嘉華大酒樓 @ 官塘 ( 7-OCT-2015 )

荔芋油鴨煲

南乳藕片豬頸肉

黃金海生蝦 

( 7-OCT-2015  WED )

今朝里奧大人上大陸   佢起身之後   我其實都瞓得唔好   佢出門口我都仍然未瞓到   好在隔咗陣就瞓得番   不過今日我 Off 陪媽咪覆診   可以瞓到 10 點 15 分先起身呢 ~

不過我 10 點已經醒   所以起身食早餐喇 ~

難得有精神   又勁想拖地   咁就認真拖地啦   仲要唔開冷氣喎   所以啲汗係咁滴係咁滴   呢啲感覺真係超爽呢 ~

反正勞動開   咁就抹埋廁所   之後收手喇   因為已經 11 點幾   要即刻沖涼洗頭喇   約咗媽咪 12 點去飲茶呢 ~

今日個天都係灰灰暗暗   又落毛毛雨   我都照着水靴   唔係就無咩機會着㗎喇 ~

媽咪 2 點 15 分覆診   所以飲到 1 點 45 分就走喇 ~

2 點 20 分到醫院   媽咪血壓係 16x   所以要抖多 20 分再量   估唔到 2 點半已經叫名   咁我哋量完血壓就可以見醫生   好感恩呀   因為上次等咗 2 個鐘先有得見醫生呢 ~

諗住 20 分鐘之後血壓會低啲   點知仲升到 188   嚇鬼死   好在媽咪無暈   同埋媽咪頭先中午無食血壓藥   所以咁高囉   其實頭先工人話番屋企拎   不過媽咪又話唔駛   所以工人勁驚   但我話都唔關佢事   唔駛驚喎   不過我都衰嘅   無諗過唔食藥會咁高血壓   唔係就一定要媽咪食囉 ~

如果見番上次個醫生就好啦   詳細解釋又細心   而今次呢個醫生唔多掂囉   我問媽咪點解成日咁攰   佢話可能係甲狀腺藥影響   話指數踩界   我問佢高定低先   因為媽咪甲狀腺係低嘛   之後佢又好努力咁碌 Mouse   碌完話我知 "應該無問題" ~

之後我問醫生   媽咪個腎功能點樣   佢話無差到   我再問點解媽咪下壓成日咁低   好多時都係 4x 同 5x   因為工人寫低哂啲記錄嘛   咁我比醫生睇啦   佢立一立就話無問題   咁好啦   你係醫生   我選擇信妳囉 ~

同埋媽咪預約抽血同覆診   拎埋藥   4 點半可以走人   實在太感恩喇 ~

頭先我幫媽咪去預約抽血   所以我知道步驟係點做   咁啱前面個婆婆又係要抽血   但我拎藥嘅時候   見佢張抽血排期紙仲喺度   所以我忍唔住問佢預將咗抽血未 ?!   最搞笑係我叫婆婆開個袋比我睇下   佢將所有嘢放喺個膠袋入面嘛   好在佢信我係好人咋   哈哈 ~

佢真係無約抽血呀   佢話佢唔識字   好驚好驚呀   佢講咗好多次好驚好驚   個樣想喊咁   我叫佢唔駛驚   我同妳一齊去預約   如果下次又係咁樣   妳記得點做   一係就問人   唔駛驚㗎 ~

搞掂就同佢番藥房   教佢聽號碼等拎藥   咁頭先經過走廊   有位四眼婆婆又係好好人   知道婆婆好驚   所以叫婆婆跟住佢一齊入藥房坐呢 ~

咁我拎完藥就要走嘛   但婆婆嘅號碼仲未到   我再行埋去同佢講   差唔多到㗎喇   記得聽住呀   之後婆婆好緊張話不如企埋去先   我話唔好   因為真係唔知要等幾耐   之後婆婆隔離嘅男人同埋前面嘅女人同我講   話佢哋都幫婆婆睇住號碼呢   咁我都可以放心走喇   哈哈 ~

婆婆係咁話我好好人   我受唔起啦   所以我都成日同媽咪講   妳有工人陪睇醫生   妳真係要感恩要珍惜   幸福唔係必然囉 ~

打的番屋企   排我哋前面係個坐輪椅伯伯   有個女人陪住嘅   但唔知係親人定工人   因為聽唔到佢講嘢   但佢嘅行為   令到我同負責安排的士嘅阿姐雙對望   因為阿伯由輪椅企喺身   之後拎住支拐杖震下震下   但個女人用張輪椅頂住阿伯對腳   而唔係扶住佢   阿伯要震完先坐入的士   但我又唔敢扶阿伯   因為我實在太論盡   一陣整親佢仲慘 ~

工人同媽咪番屋企先   我就去藥房買嘢   之後再買生果   一次過買哂所有嘢   了咗心事 ~

番到媽咪屋企就分藥   今次分兩個星期   分咗 1 個鐘就搞掂   都算快㗎喇 ~

抖多陣就出去食飯   媽咪話無胃口   因為肚痛   我咪話點解頭先睇醫生唔講呢 ?!   工人話如果叫媽咪做運動   佢都會話肚痛喎   所以我依家都唔知妳真定假   應講唔講   應做唔做   我唔係成日睇住妳   真係幫唔到妳咁多   妳鍾意點就點得㗎喇 ~

食完飯就同家姐去萬寧   咁講開酸嘢   家姐之前喺 AEON 買咗金奇異果   我話試過喺 MP 買金奇異果居然係酸   所以唔係幾敢再食   咁家姐上次話未試過酸㗎   點知佢尋晚食金奇異果真係食到個酸嘅   話即刻諗起我   哈哈   不過好在姐夫可以食到好酸嘅嘢   所以可以留比佢食   家姐話姐夫間唔中會咬檸檬添呀   仲係面不改容添喎   我覺得超級勁啦   哈哈 ~

買完濕紙巾就番媽咪屋企   叫家姐再 Double Check 所有藥分得啱唔啱   搞掂哂都 9 點   要走喇 ~

媽咪又買咗 4 個大嘅番鬼荔枝比我   我又買咗 6 個蘋果   重到我呢

估唔到里奧大人 9 點就番到屋企   叫佢即沖涼呀   因為我番到屋企要即沖涼呢 ~

今日滕嚟滕去好鬼攰   所以 11 點就瞓喇 ~

元氣壽司 @ 九龍灣 ( 6-OCT-2015 )

三文魚壽司 / 帆立貝壽司 / 羅勒香草赤海蝦壽司

炸蝦天婦羅 

玉米蝦船

飛魚子軍艦

軟殼蟹手卷

帆立貝裙邊

三文魚刺身 (會員任何 5 碟送半價刺身一客   但只可以食 $40 嘅刺身囉)

( 6-OCT-2015  TUE )

里奧大人好鬼衰   有時我好肉緊錫佢幾啖   佢就會話毛管動   又話見到女人都驚   所以一定唔會去滾   駛唔駛咁喎   衰人 ~

咁佢越驚我就越做家嘛   之後佢話我真係又顛又喪   我話 "別人笑我太黐線   我笑別人太瘋顛   哈哈哈哈 "   之後里奧大人大笑呀   問我知唔知自己講咩   我其實真係唔知   我話有兩句嘢   其中有句係有瘋顛兩個字嘅呢   佢話係 "別人笑我太瘋顛   我笑他人看不穿"   哈哈   是鬼但啦   反正我都係求其講之嘛 ~ 

今朝個天黑哂   咁正想搭 Lift 嘅時候   里奧大人話無帶遮   所以要番入屋攞遮   咁我喺樓下等佢啦   之後佢叫我幫佢買包   唔駛嘥時間喎 ~

都係無咩胃口食早餐   食剩好多麵包呀   但真係食唔到   唉 ~

正想番工嘅時候就落勁勁勁大雨   所以我坐多陣先走喇   寧願遲到都唔想成身濕哂   好易病㗎 ~

菇場無咩嘢做   終於可以抖下 ~

Lunch Time 出去食粥   之後行零食店同阿信屋   買咗啲零食就走喇 ~

Bakalland 能量捧 - 之前買咗 1 條杏脯味同香蕉味   我覺得香蕉好味呀   所以買咗 6 條   同埋原價 $4   依家正價 7 折   即係 $2.8 咋   所以好抵   不過如果底層唔係朱古力就更加好   咁樣無咁甜同埋健康啲咁囉

仍然 Hea 過   但無啦啦胃酸倒流勁辛苦   所以今晚都係唔煮飯喇 ~

放工去佳寶買咗幾罐醬料同雜豆   好在今日仲係有 9 折   咁點都平過喺超市同街市買   呢啲師奶數   里奧大人永遠唔會明白   哈哈 ~

番到屋企都差唔多 6 點半喇   里奧大人 7 點 15 分放工   今晚勁想食壽司   所以去元氣喇 ~

其實家姐尋晚打比我兩次問我要唔要木瓜雞腳湯   不過我唔要喇   今晚又打嚟問我要唔要   不過我都係話唔要   唔想工人拎嚟拎去   但我又唔想去媽咪屋企拎喎   我話其實我間唔中都滾湯㗎啦   佢話佢係煲唔係滾   好啲㗎   真係頂佢唔順呀   哈哈 ~

呢餐抵呀   食咗 $189   但我扣咗賞分   只係比 $9 就搞掂   不過佢哋扣得好得意   係 $30 / $50 / $100 咁扣呢 ~

食完就去 Taste 買金奇異果   我揀咗 8 個   之後里奧大人指住另一堆奇異果   問我兩隻有咩唔同   嘩   好在佢問一問咋   原本我揀咗奇異果   我唔食㗎   因為好酸   同埋次次食完喉嚨會好痕   但食金奇異果就唔會囉   最後只係買咗梳蕉就走人喇 ~

沖埋涼抖陣   再睇下電視   11 點瞓 lu ~

大快活 @ 九龍灣 ( 5-OCT-2015 )

( 5-OCT-2015  MON )

尋晚瞓得唔係咁好添   今日仲要係星期一   好在菇場超多嘢做   咁樣啲時間就會過得好快呢   呵呵 ~

早餐食芝腿治烘底   不過真係無咩胃口   所以留番半件做 Lunch 喇 ~

菇場超級忙   因為要做番之前兩日嘅嘢   哈哈 ~

勁攰呀   所以一到 Lunch Time 就即停手喇   一路上網一路食埋今朝件芝腿治   但其實都唔餓   不過唔想留咁耐囉 ~

仍然忙   忙到差唔多 4 點就搞掂   諗住 Hea 啦   又要做新嘢   煩呀 ~

放工即走   條腰勁痛呀   但見佳寶開張又行下啦   之後再行下 Taste   但行行下覺得條腰好似就嚟斷咁滯   頂唔順呀   所以都係番屋企喇 ~

里奧大人 6 點 45 分放工   咁我抖到佢番到九龍灣先落樓呢 ~

我話要食牛肉補血呀   但唔要行咁遠   所以就去大快活喇 ~

食完就番屋企   抖陣就沖涼   睇多陣電視   11 點唔夠就瞓 lu ~

Subway (外賣) ( 4-OCT-2015 )

今次食 BLT   但居然無蕃茄同生菜絲   當時都係 6 點幾之嘛   咁都唔 Refill   真係離譜囉   

( 4-OCT-2015  SUN )

今朝瞓到 12 點 15 分先醒呀   真係勁好瞓呢   但估唔到里奧大人都一樣瞓到咁晏 ~

無得食早餐 lu   但其實我唔餓   不過里奧大人就要食嘢啦   話 Share 食焗豬扒飯喎   咁是但啦   其實聽見都飽   哈哈 ~

喺大家樂買㗎   啲飯超級林   真係無牙都食到

個肚有少少唔舒服   所以成日都灘喺梳化睇戲   真係無乜點郁   反而里奧大人就熨衫   熨完就做公司嘢   佢最辛苦呢 ~

6 點幾叫里奧大人去 Subway 買嘢食番嚟   抖多陣就沖涼   11 點就瞓喇 ~

麵醬油麥菜炒滑雞 (外賣) ( 3-OCT-2015 )

麵醬油麥菜炒滑雞 - 完全係無味嘅   等我狀態回勇   我試下煮呢個餸先   應該好味過佢啩

( 3-OCT-2015  SAT )

今朝 8 點 15 分先起身   因為打的番菇場   唔駛咁辛苦 ~

買咗腿治 + 奶茶番菇場食   飲咗兩啖奶茶已經頂住個胃   所以份腿治都唔食喇   留番晏晝有胃口先食 ~

今朝起身個肚唔痛   但一番工就痛   可以緊張啦   同埋又有嘢做喎   不過真係頂唔順囉   好在啲嘢唔 Urgent   所以留番星期一先做喇 ~

放工即走   又係無的士   咁坐番巴士啦   今次關愛座都照坐喇   因為我其實有啲暈 ~

番到屋企即沖涼瞓覺   瞓到 6 點先起身呀   不過瞓完真係舒服好多   個肚又唔痛呢 ~  

里奧大人自己去食 Tea   佢終於飲正常凍啡   哈哈   

其實今晚本來入大埔做節㗎   但我唔舒服   所以都唔去喇   喺屋企休息好過 ~

廳部冷氣機無啦啦勁嘈   所以都唔敢開呀   好在今晚又涼涼哋   同埋我又唔多舒服   反而覺得開冷氣仲凍添呀 ~

差唔多 8 點有啲餓   咁里奧大人話買嘢食番嚟   我叫佢帶遮   佢話唔駛   點知佢一落樓   大風大雨到呢   佢要番番上屋企拎遮   一早叫佢帶遮啦   唔駛滕嚟滕去嘛 ~

食完抖陣就沖涼   個肚唔痛就睇電視啦   因為里奧大人要做公司嘢   今晚終於可以睇 "挑戰" 喇 ~

睇到 11 點幾   我自己瞓覺先喇 ~

鹹魚肉餅飯 + 山竹牛肉 (外賣) ( 2-OCT-2015 )

鹹魚肉餅飯   個人唔多舒服   真係唔想問陣鹹魚味   好鬼難頂   

次次都勁想食山竹牛肉   因為乾得嚟有啲濕咁   哈哈   里奧大人驚我唔夠飽   又再買多個豆沙包   不過最後都係佢食   我真係食唔落呢  

( 2-OCT-2015  FRI )

今朝超勁攰   原來每月一到   唔怪得之啦 ~

我想要支洗頭水呀   所以去麥當勞食早餐   食到一半已經超級勁飽   但唔想拎嚟拎去   因為知一陣都應該無胃口食㗎喇 ~

菇場忙呀   11 點無啦啦個肚有啲痛   咁即食粒勁嘢啦   但居然無料到   之後一食完   半個鐘就唔痛㗎喎   點解咁㗎 ~

其實勁想請病假   不過真係唔想又比西話   所以忍呀忍呀忍呀   其實我最煩係嘔之嘛   一飲水就頂住個胃   所以真係成日去廁所㗎 ~

好啦   行去廁所都行到攰   我發覺一起身   阿齋都望住我添呀   哈哈   因為去得好頻密 ~

一到 Lunch Time 即擺陣瞓覺   叫里奧大人 1 點半叫醒我   其實我都瞓得唔係咁好   始終驚唔知醒呢 ~

真係好辛苦   所以索性伏喺枱度瞓下   唔係我會死   嗚嗚 ~

終於頂到 5 點半喇   即走   諗住打的   點知無的   咁唯有搭番巴士啦   好感恩去到巴士站就有車   唔係暈都似 ~

番到屋企即沖熱水涼   真係舒服好多   咁睇下電視   睇睇下都瞓着咗   里奧大人 7 點放工   所以叫佢去唐記買飯一齊 Share 食呀   因為我有少少餓呢 ~

好感恩個肚唔痛   不過 10 點都瞓喇   好鬼攰呀 ~

嘉華大酒樓 @ 官塘 ( 1-OCT-2015 )

蒜香燒汁一口牛 - 食剩大半碟   所以叫工人拎走   留番聽日做 Lunch 呢 

粟米石斑塊

脆皮燒腩仔 - 食剩 1/3   叫家姐拎走   我叫佢切粒之後炒飯   佢話工人多數用節瓜燜定咩喎   是但啦   最緊要佢識整就得喇   哈哈

雙丸什菜煲

( 1-OCT-2015  THU )

今朝里奧大人 8 點起身整嘢   咁我又啱啱醒咗去廁所   其實都可以起身   因為又係一覺瞓天光   不過里奧大人話會再瞓   咁我都瞓啦   之後一瞓就瞓到 11 點 15 分   仲諗住去麥當勞食早餐添   依家無得食 lu ~

好在附近幾間餐廳嘅早餐時間去到 12 點   咁我哋都即刷牙洗臉落去食早餐喇 ~

假期好多人都瞓得好晏   去到麻酸樂要等 10 張枱   咁叫里奧大人去金姆指睇下啦   感恩金姆指有位   唔係唔知等幾耐 lu ~

食完去萬寧買嘢   之後再坎日本城買拖版同燈膽   再去 Giodano 買 2 件 Tee   $79/2 件   超勁抵   啲料又舒服   所以買咗兩件同色   因為想要嘅顏色無碼呢 ~

其實之前喺屈臣氏買咗盒   好似 $159   今日萬寧有 9 折   佢原價 $165 嘛   咁折咗又同出位價差唔多錢   所以我買多盒

我其實最主要係買 2 盒膠布   但原來今日買滿個人用品滿 $138 就送呢 Pack 嘢   我仲以為買啲咩會送呢 Pack 嘢添 

勁秋價   個名雖然老土   但勁有親切感   哈哈   

商場影架   呢幾隻係配合 Halloween 主題嘅公仔

番到屋企抖冬天褸   我就順便抹埋衣櫃同鞋櫃   搞掂哂就沖涼   因為已經 3 點幾   里奧大人話要食嘢呀 ~

又係勁想飲凍咖啡   同埋唔想行咁遠   所以又去大快活喇 ~

我要正常嘅凍啡 (左邊)   里奧大人要小甜小冰   所以完全係無味   因為佢哋係用水溝淡呢  

今晚約咗家姐同媽咪 6 點半食飯   咁 6 點要出門口喇 ~

食完都 8 點   之後上媽咪屋企坐陣就走人 lu ~   

今晚着哂運動裝束   所以可以直接去徑步   家姐仲搞笑   以為我頭先去行山呢 ~

呢兩晚徑步徑得好舒服   可能之前 Warm Up 咗   今晚行番晨運徑都無難度   上上落落覺得好正添呀   哈哈 ~

徑咗半個鐘就走   其實想徑耐啲   不過想睇埋尋晚睇唔哂嗰半 Part 戲   所以想番屋企睇囉 ~

沖埋涼就睇戲   11 點就瞓喇   聽日要番工呢 ~