元氣壽司 @ 九龍灣 ( 7-MAY-2016 )

海鹽赤海蝦壽司 /炸軟殼蟹芝士卷
炸蝦天婦羅壽司 / 三文魚腩壽司 / 熟蝦壽司 / 玉米蝦船

灸燒芝士熟蝦壽司 / 灸燒芝士皇帝蟹柳壽司

芥辣八爪魚軍艦

中華沙律

( 7-MAY-2016  SAT )

今朝 7 點 50 分起身   沖埋涼就番工 ~

早餐食奶醬多   之後 8 卦又嚟埋   不過我都係唔想講嘢 ~

菇場唔忙   真係番工等放工 ~

尋晚里奧大人話早啲起身陪我食早餐   之後我話聽朝晏啲起身番工   佢笑住問我係咪玩嘢   哈哈 ~

佢話今朝 9 點已經起身   食埋早餐就去寄嘢比晴晴同冰姑   之後又去買嘢寄嘢   滕來滕去   佢話搞掂哂要食杯雪糕獎勵自己   因為太熱喎   仲以為佢講笑   原來係真 ~

我有啲餓呀   所以放工就同里奧大人去譚仔食嘢   食完就番屋企抖陣   之後就要去做一件好痛苦嘅事   就係番媽咪屋企   幫媽咪執衫 ~

2 點幾上到屋企   媽咪工人拎我細個啲相比我睇   即爆喊   佢又喊   嗚嗚 ~

家姐工人好緊張咁同媽咪工人講話   妳唔好比佢睇啦   咁媽咪工人即刻收番埋 ~  

喊完舒服啲   之後又傾下偈啦   佢話媽咪走咗之後嗰兩晚   見到媽咪望住佢瞓   我問佢係咪發夢 ?!   佢又話唔係   初初佢好驚   之後唔驚 lu ~

家姐要同 Agent 整嘢   所以 4 點幾先到   之後開始一齊執嘢   之前以為無咗嘅文件同相   居然今日全部搵哂   感恩感恩 ~

之後我講開 Fat Fat   家姐話佢之前打佢手機唔通   屋企又無人聽   話佢可能入咗醫院   因為佢話之前感冒   聽完之後我開始勁緊張   因為好少搵唔到佢家嘛   之後我即打比佢   又係唔通同無人接電話   好驚呀   好在我之前影咗 Fat Fat 嘅 Phone List   感恩打到比佢朋友個仔   我同佢講話搵唔到 Fat Fat   因為之前聽佢話感冒   所以驚佢有事   但佢話今晚要 OT   最早都要 8 點幾先番到屋企   咁我話電聯 ~

同家姐 工人一齊執衫   再睇埋其他嘢   搞掂哂都 7 點半   我哋都走喇   同埋里奧大人一齊去元氣食壽司 ~

等咗半個鐘先有位   之後接到 Fat Fat 朋友電話   佢話 Fat Fat 走咗   點解個天要咁對我哋呀   嗚嗚嗚嗚 ~

之後佢同我講   話 5 月 5 日有位姑娘搵 Fat Fat   但電話打極唔通   所以驚佢有事   Call 埋警察一齊上去   Fat Fat 瞓咗喺廚房   警察話已經救唔番   所以黑廂車送走 ~

我同朋友講話因為我依家做緊白事   原來佢都識媽咪嘅   之後佢話今個月生日   都唔會搞   佢話要過埋呢個月先搞   我話無問題   有咩事可以搵我   我真係唔想 Fat Fat 咁孤單咁走呀 ~

其實里奧大人話佢搞   但家姐話唔好喎   話我哋係一齊   唔係分開   所以唔好搞 ~

家姐話好唔鍾意 2016 年   我話係   希望快啲過啦   嗚嗚 ~

今日眼淚流乾了   只係個腦仍然諗緊 Fat Fat   真係好痛苦呀 ~

食完就去舖頭幫手   家姐就自己行去搭車番屋企喇 ~

9 點開始做呀做   一路做嘢都唔想講嘢   其實水姑都好擔心我情緒   係咁同我講嘢   想我笑下   但真係笑唔落   就算係都係強顏歡笑 ~

1 點幾搞掂   送埋水姑番屋企   我哋就打的番屋企喇 ~

沖埋涼抖陣都 2 點   要瞓 lu   希望唔好半夜去洗手間啦   去完洗手間之後好難瞓得着   唔夠瞓已經唔係問題   最慘係一合埋眼好自然就會諗起媽咪同 Fat Fat 呢 ~

叉燒 + 金銀蛋油麥菜拚唐生菜 ( 6-MAY-2016 )

( 6-MAY-2016  FRI )

今朝都幾好天   但都係焗熱咁 ~

早餐食米粉餐   明明好想食   但叫完唔想食   呢排都係食三文治好啲   起碼食唔哂可以拎走 ~

菇場忙下停下   阿矮叫我開 D/N   佢已經講咗點開㗎喇   但硬係又要講多次   心情唔好   我都唔望佢   即刻開 D/N   由佢自己繼續講   之後又見到佢   佢又講番點解要開張 D/N   黐線咩   開完啦   仲講講講 ~

Lunch Time 出去一田行下   之後再買菠蘿包番菇場食   其實唔餓   所以 2 點幾先食 ~

Ivy 知道媽咪走咗   所以 Whatsapp 問候   其實我唔想喺番工時間講呢啲   因為我會忍唔住喊   但喊咗出嚟真係舒服好多 ~

呢排好在冰姑每日同我 FB 傾偈   我個人先無咁多時間亂諗嘢   佢好擔心我   所以每日都陪住我   阿 mi 又係咁叫里奧大人睇住我   知我情緒唔好呀   好感激佢哋咁關心我 ~    

放工去 Taste 買唐生菜   $7/Pack   街市 $7/斤咋   不過我懶得行去街市 ~

今日真係好邪   好日唔講媽咪啲嘢   一講就個個講   里奧大人 冰姑 Ivy 問   之後大食表妹都問埋點樣 ?!   好在我番到屋企   我可以大喊一場   我唔想喺里奧大人面前喊   佢好驚我有事   姑奶話想今晚探我   但我話唔好   我仍然好難過   想靜靜哋   唔想講嘢 ~

喊完舒服啲   但我覺得自己情緒唔係咁好   真係好想唔同人講嘢   同埋我覺得有少少手震   呢下最驚   我唔想甲狀腺翻發呀 ~

情緒好番啲就熨衫   唔想坐喺度亂諗嘢   里奧大人 8 點先放工   咁我都預備煮嘢 lu ~

是日晚餐 - 叉燒 + 金銀蛋油麥菜拚唐生菜  

叉燒 - 醃咗 2 晚   呢排做咩都唔上心   以前我會間唔中轉下嚿肉   但今次完成唔記得呢回事   今次都係瘦叉   下次再買肥啲嘅梅頭豬肉先   咁樣好味啲呀 ~   

金銀蛋油麥菜拚唐生菜 - 清埋啲鹹蛋皮蛋   煮咗 1 棵油麥菜 + 3 棵細嘅唐生菜   食到好飽   之得唔買唐生菜啦   哈哈 ~

洗埋碗就沖涼   之後再熨埋幾件裇衫就休息喇 ~

唔知點解無咩睡意   仲諗住喊完會攰啲添   所以今晚差唔多 12 點先瞓呀   如果聽日唔駛番工    我估我可以 2 點先瞓   我真係好唔想合埋眼呢 ~

港式炸醬 + 齋滷味 (外賣) + 粟米蛋花湯 ( 5-MAY-2016 )

( 5-MAY-2016  THU )

尋晚半夜熱醒   之後又瞓得唔好  ~

眨下眼又過咗一星期   傷痛依然   我真係唔想成日縐住眉頭做人   但真係有時縐到好攰   先知自己係一直縐緊眉頭   2016 年快啲過啦   好唔鍾意 2016 年呀 ~            

今朝早咗出門口   所以去 KFC 食早餐   次次喺 KFC 飲完咖啡   個喉嚨真係特別涸   同埋感覺到特別熱氣咁㗎喎   好奇怪   下次都唔好喺 KFC 飲咖啡喇 ~ 

菇場唔太忙   但對眼濛查查   唔知係咪散光加深咗呢 ~

Lunch Time 出去行下   之後去另一間買燒賣粉果番菇場食   估唔到好味喎 ~

放工去 Taste 買齋滷味   買完就即番屋企 lu ~

里奧大人 5 點喺葵興見客   7 點番到屋企   實在太好喇   早啲食早啲休息   今晚諗住徑步   但實在太焗熱   所以唔徑喇 ~

是日懶餐 - 港式炸醬 + 齋滷味 (外賣) + 粟米蛋花湯  

港式炸醬 - 睇頭條見到呢個食譜好簡單   同埋里奧大人好鍾意食炸醬麵   所以整下新嘢   都 OK 好味   但我覺得仲係唔係咁似   搵日再整先 ~  

齋滷味 (外賣) - 好想食酸嘢   所以買嚟食 ~     

粟米蛋花湯 - 其實仲有棵油麥菜   不過好攰   唔想又拻又浸   所以煮粟米湯算喇 ~

搞掂哂就沖涼   一齊睇 "太陽的後裔"   睇完即瞓 ~

以前里奧大人喺房睇聖經   我會覺得開住燈好刺眼   依家我反而叫佢入房睇聖經   我開住燈瞓覺得仲易瞓 ~

煎鯖魚 + 油麥菜 ( 4-MAY-2016 )

( 4-MAY-2016  WED )

里奧大人今朝上大陸   叫佢帶支麥茶之後都瞓番 lu ~

早餐食豬扒包   食到一半已經好飽   好後悔叫佢呀 ~

菇場唔太忙   可以抖下 ~

Lunch Time 想出去行下   順便買埋燒賣粉果番菇場食 ~

今日家姐同姐夫去拎紙   醫院醫生寫錯哂嘢   真係離譜   搞到 4 點先搞掂   好在請一日假   唔係就煩啦 ~

以前里奧大人一上大陸   我就同媽咪家姐食飯   依家好唔慣添   希望自己唔好再諗番以前啦 ~

放工去街市買餸   買完即番屋企   浸完菜就開機洗衫   今晚要熨衫   所以我 7 點幾就食碗麵先   食完再煎魚同淥菜   再炒碗油麵比里奧大人   之後等埋佢番嚟就一齊食   搞掂哂就即沖涼   次次煎完魚硬係覺得成身油林林咁 ~

里奧大人 8 點幾先番到屋企   咁一齊食啦   開心啲 ~      

是日懶餐 - 煎鯖魚 + 油麥菜  

煎鯖魚 - 好有心機煎   第一次煎到底面都脆卜卜   好開心呀 ~  

油麥菜 - 買咗 2 棵   都係煮 1 棵先喇   因為要留肚食士多啤梨   所以唔想食咁飽 ~  

洗埋碗就熨 2 機衫   攰到呢   熨剩 3 件都唔熨喇   留番聽晚再熨 ~

好攰呀   10 點 45 分即瞓   呢排半夜都去洗手間   希望今晚唔駛啦 ~

滷水鴨腎 & 燻蹄 (外賣) + 娃娃菜 ( 3-MAY-2016 )

( 3-MAY-2016  TUE )

要收拾心情番工喇   希望快啲平復到心情呢 ~

早餐食芝腿治   食完就睇陣報紙   又要番工 lu ~

菇場忙呀   又要做 Report   今次真係要打醒十二分精神呢 ~

打去聯合拎張紙   但我打極唔通   之後叫家姐打啦   佢一打即通   媽咪真係錫家姐喎   哈哈 ~

聽日家姐去胡中   感恩姐夫可以陪佢   因為西瓜唔喺香港   好難請到假   但如果無人陪家姐   我都照請   同埋家姐話如果我陪唔到佢   佢會搵里奧大人陪   咁都好   佢識搵里奧大人   因為里奧大人話過   一個人做好孤單   有咩就一齊搞掂去呢 ~

Lunch Time 出去買包比里奧大人   買完就番菇場食麥皮同芝士餅喇 ~

仍然忙㗎   不過就做下停下咁囉   對眼好攰呀 ~

放工先嚟落大雨   咁唔去街市喇   就咁買燻蹄同鴨腎   再去 Taste 買菜同大盒士多啤梨就番屋企喇 ~

浸完菜就拖地   今晚有啲攰   都係唔熨衫住   咁里奧大人 7 點放工   我都預備煮嘢 lu ~

是日懶餐 - 燻蹄 & 滷水鴨腎 (外賣) + 娃娃菜 

燻蹄 & 滷水鴨腎 (外賣) - 好想食   但鴨腎就食唔哂囉   之得唔買啦 ~  

娃娃菜 - 好似好耐無食菜咁   煮娃娃菜好方便   唔駛拻芯   同埋今次好甜   好好味呢 ~

搞掂哂就沖涼   睇埋電視   11 點幾都瞓 lu ~

Outback Steakhouse @ 銅鑼灣 ( 2-MAY-2016 )

肉醬味肋骨雞槌拚盆 - 其實唔餓   所以又係叫呢個拼盆   但份量都好多   食到好飽         

( 2-MAY-2016  MON )

尋晚真係發夢見到媽咪呀   我約咗佢嘅   之後見到佢企喺度食嘢   好似係煎堆   我好肯定係用白色有耳膠袋裝住嘅   無耐就見到佢坐喺一架單層巴士咁嘅車   佢好開心笑住同我揮手拜拜   但坐佢前面嘅人同後面嘅女人就好唔開心   想喊咁   之後我跟住架車   無啦啦同媽咪 Give Me Five   咁即係好定唔好呀 ?!   不過我都相信媽咪都係唔鍾意我呢 ~

起身都 10 點   梳洗之後就去食早餐 ~

咁我諗住去拎錢做家用   點知里奧大人話佢有   佢話前日特登拎定   驚大酒店要比訂金   我真係完全無諗過訂金呢回事   所以我同佢講   依家唔好靠我記嘢   我真係咩都記唔到呢 ~     

唔知點解   我唔想喺屋企   其實個人係攰   唔知做緊乜咁   但都想出去行下 ~   

抖到 1 點半就坐 619 去銅鑼灣   因為有 $150 SOGO Cash Coupon   所以睇下有無黑鞋   有就用埋去   唔駛成日記住 ~

同里奧大人去南記   感恩有卡位   坐得舒服啲 ~ 
  

食完抖陣就去 SOGO 行喇   有 2 對啱心水黑鞋   但無碼囉   唉 ~

咁再周圍行下   又行埋東角   不過都係唔啱心水   見里奧大人攰到寒住背搭扶手電梯   心痛死我   我話攰要出聲呀   唔駛特登陪我行呀 ~

所以 5 點半都去 Outback 喇   但 7 點還枱   我問係咪依家要限時 ?!   佢話只係今晚 Booking 多喎 ~

7 點走人   之後佢無啦啦企喺度扮大隻佬震胸   呢下我真係笑出嚟   胸就震唔到   但個肚腩就鄧鄧下   肉酸到呢   哈哈 ~

行完 H&M 諗住走   點知突然搞肚痛同想嘔   所以即去番 Outback 洗手間呀   可能油得滯 ~

坐 619 番屋企   之後睇陣電視   11 點幾都瞓喇   聽日要番工呢 ~

五香肉丁米粉 ( 1-MAY-2016 )

( 1-MAY-2016  SUN )

今朝 9 點幾都醒咗   但無番教會   唔想面對人呀 ~

食完早餐番屋企抖下   實在一合埋眼就會喊   所以好想出街   差唔多 1 點就出去旺角   因為要買黑色衫 ~

差唔多行到去小巴站   見到教友   佢安慰我   叫我唔好咁傷心   佢講埋佢嘅故事   咁我覺得自己都應該唔好太傷心   因為佢嘅遭遇仲慘   大家彼此紀念吧 ~

出到旺角都差唔多 2 點   我哋食嘢先喇 ~

招牌鹽酥雞球 ($37) - 份量都多呀   蘸啲酸酸哋嘅汁都幾好味  

咖哩雞球飯 ($49) - 咖哩汁都辣  

食完去花園街一轉   感恩喺 Boutique 買到件黑衫   買完都走喇   同埋成日心不在焉   又好攰咁   都係番屋企算喇 ~

之後師傅打嚟講幾時回魂   又講媽咪係象三   佢有講唔知咩象十   但佢講完都唔記得係啲咩   我只記重點咋   同埋話咩天道人道地道乜道係有 6 道嘅   但媽咪係行天道   所以條路行得好順 ~

咁我同里奧大人講啦   佢即刻同我講話唔駛破地獄啦   我話唔好再講   我講過話家姐個心舒服就可以   我知道任何儀式都係令自己安心啲   咁就去做啦   唔好再講 ~

坐小巴番屋企   番到屋企就開機洗衫又抖下   呢排都開住電視   但其實都唔係睇   只係唔想間屋咁靜 ~

我真係唔餓   但已經 8 點幾   所以我話煮丁米比里奧大人食   我食條粟米就夠喇 ~

里奧大人知我唔開心   所以一齊睇 Minions   係幾好笑   但我睇睇下都瞓着咗 ~

差唔多 12 點就入房瞓   不過好似唔太眼瞓   但唔理喇   照瞓   但我覺得今晚會發夢   唔知點解有呢啲感覺 ~