漢陽樓韓國料理 @ 將軍澳 ( 8-APR-2017 )

壽司 / 生果 / 甜品

沙律 / 涼粉



鴨胸前面係蜜瓜西米露 

除咗豬腳薑   其他真係無咩興趣  



豬腳薑隔離唔知係咩來   但賣相幾吸引   不過最後都係無食到呢  



左上角唔知係咪糖水   左下角就唔知係咩   好似凍咗嘅湯咁

唔太多選擇嘅肉類     

我主攻黑椒牛仔骨



魚同蝦無夾呀   



見到酸青瓜就勁想食   哈哈   



炸物   無咩興趣   里奧大人就夾咗 1 件春卷同餃子

飲咗 C&C 飲品   其他係康師傅   啤酒就要自己比錢的    



里奧大人只係 "北" 士多啤梨味   佢話因為易 "北"   但其實一睇就知邊樣好味道啦   哈哈

牛肉 / 牛仔骨



雞翼 / 豬扒 / 腎  



原味 (即係無味   哈哈哈哈)   但最緊要無羶味囉   

我次次拎嘅牛仔骨   都係拎少肉多骨嘅   蝕水   哈哈   但我只係鍾意食骨連肉嗰 Part 囉   有條筋咁呢 

里奧大人又燒下豬肉   成日心急   見佢有件吐出來係紅色   根本未熟   佢話厚肉喎   我咪話所以叫你要燒耐啲囉   佢就話好快熟   啱啱熟最好   鬼唔知咩   你控制到咁啱火侯先得㗎

豬肉都唔錯   我食完先記得   原來無咩點影相   不過其實我都只係食牛肉同牛仔骨   無理由碟碟都影同一樣嘢嘛   哈哈       



家姐拎咗龍蝦丸同腸仔   我話打邊爐嗎 ?!

繼續燒

我好鍾意食腐皮壽司   但佢哋成日話我同食白飯無分別喎   哈哈

印尼蝦片真係好鬼正   辣辣哋好味道  

酸青瓜 / 大豆芽 / 無骨鳳爪 - 我覺得酸瓜唔夠酸   但家姐就話好酸   鳳爪就無味囉   



再 Encore 酸青瓜同大豆芽   里奧大人唔食大豆芽   其實我以前都唔鍾意食   但次次食韓燒   我又好鍾意食喎   



杞子桂花糕 / 楊枝金露糕 - 一般啦   

里奧大人夾嘅啫喱糖   佢話唔好食喎   

豬腳薑 - 得個甜字   如果酸啲就好啦   



我同家姐就一定唔會食士多啤梨味囉   呵呵   咁我同里奧大人 Share 食   之後佢話食完好凍   要出去行下



( 8-APR-2017  SAT )

今朝瞓到 10 點幾就起身喇   其實我 8 點幾都醒咗   咁里奧大人又未起身   我又繼續瞓啦   下次都係唔瞓喇   咁樣瞓好似仲攰咁   哈哈 ~





食完早餐就番屋企   天氣麻麻哋咁   所以諗住喺屋企抖下   不過頭先里奧大人一起身就好緊張話出旺角去整電話   初初我諗住平日放工去整㗎   佢話 4 月好忙嘛   估唔到佢又陪我 ~

Back-up 哂所有資料都差唔多 1 點幾   係時候出發喇 ~

里奧大人話食埋嘢先去整電話   見到 Jolibee 想試下   不過唔係咁好食囉   哈哈 ~





我幫里奧大人去拎雜誌   叫佢幫我去 LG 拎定飛   咁去到都 2 點 45 分   我張飛係 124   但當時叫到 78 喇   期望一個鐘搞掂啦   點知等到 4 點 50 分先到我呀   鬼咩   Counter 係多   但職員少呢   得個 4 個人 ~

搞掂就去花園街行下   里奧大人無啦啦又話食椰撻   我話我唔食㗎   唔好預我 ~

諗住搭 98C   點知 Full 哂   咁即轉地鐵喇   仲有位坐添   感恩感恩 ~

去到新地城都 6 點幾   咁 Book 咗 7 點半   所以都周圍行陣 ~

7 點半去漢陽樓   感恩有卡位坐呀   仲對正個拎嘢食位置   唔駛行咁遠   同埋知道佢 Refill 就行去拎   爽 ~   

家姐 7 點 45 分到   好在之前燒定啲嘢咋   佢一嚟到就可以熱辣辣有得食 ~

好似好耐無同家姐食晚飯咁   今晚姐夫約舊同事食飯   咁家姐第一時間約我   仲話請我食飯   不過我話呢日 Off   應該唔會咁早食   不過佢都要番工   所以約 7 點半就最好呢 ~

食下傾下   真係唔覺又兩個鐘   係時候走喇 ~   

同家姐去百佳   里奧大人就自己周圍行   買完就再 Join 埋一齊走   家姐車我哋番屋企   咁我又順便比埋啲嘢比佢   唔駛我成日心掛掛 ~

沖埋涼就休息喇   11 點幾都瞓 lu ~

蕃茄海鮮辣肉腸螺絲粉 + 粟米蛋花湯 ( 7-APR-2017 )

( 7-APR-2017  FRI )

今朝好想食腿蛋治   但叫完之後又唔係好想食添 ~



菇場唔忙   咁就好喇   可以迎合到 Happy Friday 而聽日唔駛番工   超級勁爽嘅心情   哈哈 ~

Lunch Time 出去超市買嘢   之後就買燒賣粉果番菇場食   真係開始食到好厭喇   短期內唔會再食 lu ~



好嘢   菇場仍然唔忙   放工可以即走喇 ~

番到屋企又拖下地   執下嘢   里奧大人 7 點半放工   我都預備 lu ~ 

是日懶餐 - 蕃茄海鮮辣肉腸螺絲粉 + 粟米蛋花湯 

蕃茄海鮮辣肉腸螺絲粉 - 求其炒埋一堆   最緊要清埋半包蜆肉同蝦肉   上次 Check 個儲物櫃   好似好多嘢都 5 月到期咁   真係要快快手手清哂去呢 ~     

粟米蛋花湯 - 我真係覺得好好味   但里奧大人好一般   成日話粟米好頂胃   咁事實都係   但你估一罐粟米湯好多粟米粒咩 ?!

搞掂哂就沖涼   望下個鐘都 10 點 ~

好想 Relax 下呀   所以今晚睇下戲   成 12 點幾先瞓呀 ~

韓式辣味水餃 (外賣) + 菜心苗 ( 6-APR-2017 )

( 6-APR-2017  THU )

今朝都好 OK 呀   不過潮濕天氣就比較難頂啲   見啲人着短袖   我又覺得誇咗啲咁   哈哈 ~

早餐食米粉餐   因為呢幾日食包食到有啲驚 ~



菇場忙啦   開行 Turbo 整埋個長命 Report   11 點幾先搞掂   可以鬆一口氣了 ~

Lunch Time 出去行陣   買埋嘢食就番菇場喇 ~

無啦啦又勁忙   忙到 5 點先搞掂   咁都好   可以安心等放工 ~

番到屋企即浸菜   搞掂就拖地抹櫃   再開機洗衫   攰鬼到呢   諗住抖陣   原來已經 7 點   啱啱里奧大人打嚟話放工   咁又要預備喇 ~

是日懶餐 - 韓式辣味水餃 (外賣) + 菜心苗

韓式辣味水餃 (外賣) - 喺八方雲集買嘅生餃子   咁個餐牌寫 20 隻 ($52)   其實我覺得好多   但都買啦   點知個收銀無啦啦問我係咪要 10 隻 ?!   我話好呀   哈哈   咁唔駛又食兩晚餃子呢 ~

菜心苗 - $9/斤   拻花拻到手攰   好在都好甜   太耐無食菜   覺得零舍好味道   哈哈 ~

搞掂哂就沖涼   食埋生果就休息喇 ~

里奧大人唔夠 11 點就瞓   我就 11 點幾先瞓   之前瞓得太多   所以唔係咁快眼瞓囉 ~

四寶飯 (外賣) ( 5-APR-2017 )

燒肉啲皮都唔脆嘅



( 5-APR-2017  THU )

里奧大人 7 點 45 分都醒咗   佢食埋杯麵   抖多陣又去大酒店集合 lu ~

我就 8 點 25 分先起身呀   感恩個肚 OK ~

買埋早餐就番菇場   拿拿聲食完早餐就開工喇 ~



我最緊要就係杯熱奶茶呢



忙到死死下   好在唔攰咋 ~

Lunch 食麥包   尋日叫里奧大人幫我買定 2 個   好後悔呀   原來食一個都已經咁飽   哈哈 ~

樣樣都趕   真係緊張到個肚扯住痛呀   要食藥呢 ~

終於等到放工   即打的番屋企呀 ~

番到屋企除埋對鞋就即瞓喇   瞓咗半個鐘又好啲咁啦   但都痛囉   嗚嗚 ~

里奧大人 7 點半放工   今晚我都只係想飲中湯   想暖下個肚   但飲完又真係舒服好多喎   最後都無痛呢   感恩感恩 ~

抖多陣就沖涼   之後睇下電視   11 點幾就瞓覺喇 ~  

燒雞扒肉燥飯 (外賣) ( 4-APR-2017 )

( 4-APR-2017  TUE )

今日係清明節假期   所以放假   好感恩今日係假期   我可以全程休息 ~

尋晚瞓到半夜個肚都有啲痛囉   同埋成日起身去廁所   又嘔喎   咁我望個鐘係 1 點幾 3 點幾 5點幾 7 點幾 9 點幾咁   完全無瞓過一樣咁   哈哈 ~

瞓到 12 點左右   里奧大人就去買嘢食   不過我無胃口食嘢 ~

里奧大人知我次次要飲中湯   佢特登買咗中湯番嚟比我飲   不過我話唔飲囉   真係飲唔落嘛   同埋我話想飲先叫佢買   唔飲就唔駛買比我呢 ~

之後都係灘喺床   後尾頂唔順要食藥   咁里奧大人 4 點幾出門口去大酒店   我就繼續瞓啦 ~

估唔到之後又唔痛   好快瞓着添呀   鬼咩   尋晚好似無瞓過咁 ~

7 點都餓醒咗喇   之後里奧大人明明話儀式後就買飯比我食   但原來佢同埋姑奶佢哋食埋飯   大佬   咁你一早講   我食住嘢先啦   最邪我覺得係佢根本無諗住講   係佢姐夫 Send 咗張合家歡相喺群組度   我先知佢哋食飯   之後問佢   佢話姑奶跌倒   所以一齊食飯   我想話佢跌倒一齊去醫院就話啫   跌到之後一齊食飯即係咩呢 ?!

我飲咗碗中湯   咁個飯盒就食剩 1/3   咁佢又無講話頭先食咗   唔係就之得 Share 食餃子啦   唔駛嘥哂啲嘢嘛 ~

抖陣就沖涼喇   10 點都瞓覺   聽日要番工呢 ~

興興 @ 官塘 ( 2-APR-2017 ) + ( 3-APR-2017 )

二人套餐 ($248)



炸蝦餅 - 熱辣辣又彈牙   好味道呀  



泰式干炒豬頸肉河 - 材料都好多   加埋有蛋   所以超級勁快飽   我食到一半   已經要開始食熱檸水嘅 3 片檸檬添呀   食完當堂無咁滯   



馬拉盞炒時茶 - 個汁好味過炒通菜個汁   無咁稀呢  



泰式無骨海南雞半隻 - 我話好餓   所以里奧大人就叫套餐   但食剩大半碗雞   咁唯有打包啦   留番比佢聽晚煮麵食   

( 2-APR-2017  SUN )

今朝 9 點半起身   沖埋涼就食早餐   之後番教會喇 ~





今日終於可以事奉   真係好開心好開心呢 ~

感恩今日可以番到教會   因為聽道嘅時候   講到不要含怒到日落   最傷只係自己   好似神要話比我知道咁呀   嗰下當堂想喊出來   之後話記住要站立穩   因為撒旦只會轉移視線   偽裝同謊言   我覺得勁似講緊我身邊班人呀 ~

崇拜完畢就去超市買嘢   里奧大人買咗個椰撻同蛋撻做下午茶   之後番屋企 lu ~

難得今日勁乾燥   所以即開機洗梳化墊同 Cushion   搞掂哂又執下櫃 ~

咁差唔多 3 點就蒸熱啲艾果   我買嘅時候話唔係即時食   佢教我放入雪櫃   咁我話我驚好硬喎   佢就教我食嘅時候蒸熱就得   點知蒸到一 Pat 嘢咁   不過我又係豬嘅   拎出嚟嘅時候   艾果都唔係硬   駛鬼蒸咩   直接食咪得囉   但我入哂腦佢講話要蒸 ~



一粒粒用保鮮紙包住

嗚嘩嘩   蒸出嚟咁嘅樣呀   但點都要食啦   $30一包   成 $5 粒啊   灘凍之後用手拻嚟食   不過就食唔哂啲豆沙囉   好鬼甜呀   食完有啲暈咁   應該係甜得滯

睇多陣電視   差唔多 4 點又再開機洗床單   咁就了哂心事 lu   呵呵 ~

好餓呀   6 點出發去食嘢喇 ~

食完就番屋企喇   條街好凍呢 ~

沖埋涼就睇下電視   差唔多 11 點都瞓 lu ~

( 3-APR-2017  MON )

終於每月一到喇   又 OK 喎   感恩感恩 ~

早餐食芝腿治   最緊要有杯熱奶茶   暖下個肚都好 ~

菇場忙啦   仲要做埋個長命 Report 添   嗚嗚 ~

Lunch Time 瞓陣先   醒咗之後就食杯麥皮   抖多陣又開工 lu ~

4 點個肚有啲唔舒服喇   好在就快放工   我忍 ~

放工即走   又唔見有的士   咁巴士啦   真係關愛座都照坐呀   哈哈   好在都有位坐   感恩 ~

番到屋企即沖熱水涼   食埋藥都抖喇 ~

我 8 點唔夠都瞓喇   里奧大人啱啱番到屋企   叫佢自己蒸翻熱啲雞   再煮個麵食   自己搞掂   唔好叫我呀下 ~

咁我叫佢記得隔水蒸呀   佢話梗係啦   唔係點蒸呀 ?!   估唔到佢都識喎   哈哈哈哈 ~

八方雲集餃子專門店 @ 官塘 ( 1-APR-2017 )

( 1-APR-2017  SAT )

又一覺瞓天光呀   感恩感恩   呢兩晚瞓得好舒服   我覺得我真係放開咗呀   勁開心 ~

今朝約家姐食早餐   所以我 7 點 20 分都起身 lu   咁搞掂哂就問佢喺邊   本來佢搭巴士嚟   但巴士飛車   咁佢見我起咗身   係都要打的嚟   搞笑 ~

咁我拎咗樽雪梨水比佢飲   我無試味㗎   之後佢話無咩味   哈哈   我話當水飲就得啦 ~ 

我奶茶要少少奶   家姐要少奶   咁嚟到之後   家姐杯少奶居然深色過我杯少少奶   之後侍應話廚房真係唔知我哋要求   咁我都好明白   咁我都諗住同家姐調換咪得囉   之後佢又好快手收咗杯奶茶   話不如走奶   因為少少真係唔知點落   家姐反而好大反應話走奶咪即係飲茶 ?!   之後個侍應又比番杯少少奶嘅奶茶比我   咁佢態度都唔係差嘅   同埋我都覺得少少奶又真係好難落手   咁家姐教我下次話分開上啦   咁都好喎   如果佢哋得嘅話 ~

家姐又比咗 Coupon 比我   呵呵   本來佢係 MUJI coupon 㗎   不過佢同同事換咗   知我會飲咖啡   家姐呢啲錫我行為咪做出來囉   同埋佢比我嘅時候   都無強調話我鍾意飲㗎喎   只係佢覺得我鍾意就比我咁囉 



今朝家姐早咗嚟   同埋佢又要早啲番公司   所以 8 點 45 分都走人 lu   家姐好快有車   之後到我有車   感恩感恩 ~

菇場勁忙   之後長命 Report 又來了 ~

做下停下咁啦   真係無咩 Mood 做   哈哈 ~

放工即走   番到屋企又執下嘢   終於執好哂櫃桶嘅嘢喇   勁開心 ~   

3 點半先去食下午茶   無啦啦勁想食炸肶   不過啲肉有陣羶味   好難頂   但點都要食哂去囉 ~

食完番屋企抖下   睇下電視咁啦 ~

8 點幾去食嘢   唔想食咁飽   咁就食餃子喇 ~

諗住徑步   不過又連續打咗接近 10 個噴嚏   所以都係唔去喇   快啲番屋企沖熱水涼休息算喇 ~

呢排成日好似作感咁樣   所以瞓到就瞓   今晚 11 點都自己瞓先喇 ~