龍城冰室 @ 九龍灣 ( 7-DEC-2018 )

黑椒牛仔骨煲 ($138) - 勁想食牛仔骨好耐   感恩呢個套餐有牛仔骨呢



XO 醬涼瓜斑腩煲 - 份量好多呀   同埋都好味道 



( 7-DEC-2018  FRI )

今朝又唔係好凍喎   不過我自從剪短頭髮之後   頸巾同外套一定跟身   好怕吹親條頸呀   呢下真係好易病㗎 ~

早餐食芝腿治烘底   今次多士燶咗啲 ~

咁 8 卦傾偈   佢同我講話之前同老闆 & 客 & 西瓜食海鮮   咁老闆行咗出去   西瓜就拻啲蟹肉比佢哋食   我同 8 卦都話駛唔駛呀 ?!   不過我都覺西瓜擦鞋   依家連 8 卦都親眼見到   勁不屑佢呀 ~

菇場忙呀   但好鬼眼瞓   啲藥真係好勁 ~

Lunch Time 出去買酸辣米線   依家多數係小辣   唔會食得咁刺激 lu ~



食飽勁眼瞓   同 8 卦 Share 一罐咖啡   飲咗又好似精神啲啲 ~

今晚做到 5 點 45 分   諗住番屋企   點知里奧大人又話去九龍灣食嘢 ~

里奧大人食完就去舖頭幫手   我就番屋企熨衫   沖埋涼就休息了 ~

10 點半勁眼瞓   諗住瞓覺   點知里奧大人番嚟   又傾咗一陣   終於 11 點先瞓   佢就繼續睇電視呢 ~

黑椒鹹豬手 & 腐皮卷 & 健康飯團 & 齋滷味 (外賣) + 蠔油唐生菜 ( 6-DEC-2018 )

( 6-DEC-2018  THU )

食咗藥瞓覺   真係一覺瞓天光   不過起身仲係溫溫燉燉咁   所以好怕好怕食西藥呢 ~

早餐食奶醬多   之前覺得好甜   但唔知係咪呢排成日出街食   太重味精   所以突然又好想食番啲甜嘢咁呢 ~



菇場忙呀   話咁快又到 Lunch Time ~

食完 Lunch 就去南北行買杞子同胎菊比里奧大人   之後即番菇場喇 ~

想瞓又瞓唔到   但瞓到嘅時候又要開工了 ~

放工去 Taste 買餸   買完就即番屋企   搞掂哂就開機洗衫   今晚只係淥菜   所以可以抖下 ~

里奧大人 7 點半番到屋企   可以即開餐   今晚要佢食埋個過期杯麵   只係過咗期 1 日   哈哈 ~

去完泰國番嚟   身體麻麻哋   所以好多零食杯麵都係接近過期先食   有啲直頭過期添   汽水又過期   真係好浪費呀   唉 ~

是日懶餐 - 黑椒鹹豬手 & 腐皮卷 & 健康飯團 & 齋滷味 (外賣) + 蠔油唐生菜

黑椒鹹豬手 - 咁都要 $30   好在味道都 OK 咋   哈哈 ~

腐皮卷 - 最後 1 份 $15   如果有 2 份   我就唔會買豬手了 ~         

健康飯團 - 好想食飯呀   所以買嚟試下   好味呀   不過好鬼飽肚 ~

齋滷味 - 又係好耐無食   一定要買嚟食啦 ~

蠔油唐生菜 - $9 有 2 棵仔   貴就貴啲   但好想食菜呀 ~

洗埋碗都差唔多 9 點   今晚好飽   所以熨 2 機衫當做運動 ~

我 10 點 15 分都自己瞓先喇   見到里奧大人無啦啦開啤酒飲   好少咁夜嘛   原來佢真係以為 9 點幾咋 ~

翠河餐廳 @ 官塘 ( 5-DEC-2018 )

( 5-DEC-2018  WED )

今朝又涼涼哋咁   可能個天色灰灰暗暗咁呀 ~

早餐食腿蛋治   咁 8 卦幫我叫先嘛   阿姐們係咁問佢今日唔要烘底 ?!   因為我食開烘底嘛 ~



菇場忙呀   仲要做長命 Report   今次真係要慢慢做喇 ~

Lunch Time 出去買牛雜米   我居然想話要腩汁添   哈哈 ~

阿哥問我食一碗粉就夠飽㗎喇 ?!   我話真係夠喎   但好奇怪   真係好多人都覺得食一碗粉唔夠飽   個個以為我好細食咁   但其實一碗粉真係夠哂飽囉   同埋肯定覺得我身型咁大隻   唔似咁細食啦   哈哈 ~

1 點試下瞓啦   估唔到瞓到   瞓咗 20 分鐘   當堂精神哂呀   我好少食完即瞓囉 ~

仍然忙   不過啲藥真係好勁   成日都頭暈暈咁 ~

放工即走   今晚都唔煮喇   好好休息埋今日呢 ~

我開工唔敢食藥   因為啲藥都係有睡意   我 6 點食藥   6 點半開始瞓   瞓到 7 點   咁啱里奧大人話差唔多番到屋企   咁我都預備出發 lu ~

咁等緊期間   我聽到職員叫 "余韻婷"   我心諗做咩叫全名嘅 ?!   之後有職員話收到   咁我知咩啦   係魚雲 停呀   哈哈哈哈 ~  

食完就番屋企   即開機洗衫   之後沖涼 ~

9 點 50 分食多次藥   10 點鐘可以即刻瞓到   呵呵 ~

油雞飯 (外賣) ( 4-DEC-2018 )

( 4-DEC-2018  TUE )

今朝又無咁涼了   呢幾晚又要開番冷氣瞓 ~

早餐食吞拿魚治烘底   好味道 ~



菇場忙呀   但勁眼瞓喎 ~

Lunch Time 出去買車仔麵   因為要想飲咖啡提神 ~

仍然忙呀   所以攰上加攰 ~

放工去買雞骨草比里奧大人   點知等車等到 6 點半 ~

好在喺巴士度瞓咗陣   又好似精神番啲   咁買完飯就番屋企 lu ~

食飽有啲氣力   所以即拖地同抹嘢   再開機洗衫   之後大清潔廁所   搞掂哂就沖涼喇 ~

食埋半個木瓜就休息   里奧大人今日中午上大陸見客   感恩可以坐直通巴番香港   佢喺美心食埋飯   差唔多 9 點先番到屋企 ~

今晚 10 點半都瞓喇   但今晚啲藥又唔嚟料喎   好在都眼瞓咋   哈哈 ~

米線陣 @ 官塘 ( 3-DEC-2018 )

( 3-DEC-2018  MON )

勁辛苦呀   咳到無覺好瞓   個肚又有啲扯住咁 ~

買完個吞拿魚包就去食早餐   今朝食芝腿治   不過食咗半件已經食唔落   留番做 Lunch ~



菇場超級勁忙   但真係唔在狀態   越對越錯咁   哈哈 ~

話咁快   2018 年日曆又用完喇



個肚扯住唔舒服   但實在太多嘢做   所以都係食粒醫生開嘅止痛藥   果然無耐就唔痛   所以要快快手清哂手頭上嘅嘢喇 ~

診所打嚟話我貧血指數係 7   咁我即問佢正常指數係幾多 ?!   佢話係 12   我都預咗係貧血   但無諗過指數低成一半囉 ~

Lunch 食埋件三文治   再食幾啖包   之後上網睇下嘢 ~

仍然忙呀   忙到放工   不過今日一定要準時走   我要去睇醫生呢 ~

5 點 50 分去到   要等 10 個   之後見到牧師   等佢睇完就同佢傾陣偈   佢拎埋藥我又番入診所 ~  

6 點半就睇完   診症時間只係 1 分鐘   快到呢 ~

拎完藥就去拎淘寶   咁搭地鐵啦   見排咗好長龍   原來有啲入閘機壞咗   之後扶手電梯又壞埋   人多多喎   所以真係好唔鍾意搭地鐵 ~

拎完淘寶就去官塘廣場買嘢   買完就去米線陣 lu ~

食完即番屋企   沖埋涼就食藥   9 點 50 分嚟料   即瞓喇 ~

八方雲集餃子專門店 @ 官塘 ( 2-DEC-2018 )

( 2-DEC-2018  SUN )

尋晚諗住今日唔番崇拜   想瞓番夠本   點知今日係有事奉   所以就一定要番喇 ~

8 點 45 分起身   沖埋涼就去食早餐 ~





番完學就番崇拜   尋晚牧師想食嘅 Puff 比人食哂   所以我話一陣買番比佢食   同埋買埋比其他同工一齊食 ~

崇拜完畢之後   我叫里奧大人喺教會等我   我自己去買 ~

買完番去又見唔到牧師   所以叫同工幫我交比佢   我寫低張便條再叫里奧大人幫我 Whatsapp 牧師就走人喇 ~

唉   個肚又扯住有啲痛   好似每月一到咁   但就好輕微   所以我都沖個涼   咁個人舒服啲   不過就勁眼瞓囉   之後瞓咗 1 個鐘呀   爽 ~

3 點幾去食下午茶   食完去日本城買嘢   之後番屋企 lu ~

抖到 6 點   我話早啲食晚餐   咁我可以早啲沖涼瞓覺 ~

食完就番屋企   抖陣就沖涼   之後食木瓜   里奧大人今次揀得好好味呀 ~

睇多陣電視   我 10 點半都瞓喇 ~

聚餐 @ 教會 ( 1-DEC-2018 )

除咗 2 盒發泡膠嘅食物同 Pizza 係外賣   其他都係弟兄姊妹整㗎   勁呀   估唔到個個都係煮嘢食高手   今晚真係有口福喇



本來我想整芒果小丸子   不過我同里奧大人講話前一晚先決定好啲   始終驚身體狀況有變化嘛   好在真係無整咋   今日真係唔在狀態呢



( 1-DEC-2018  SAT )

今朝 10 點半都起咗身喇   里奧大人叫我瞓多陣   但我話都 OK 呀   可以出去食早餐 ~

食完番屋企抖陣   之後就沖涼   咁唔想咁早入西貢   所以里奧大人就熨衫   我就仍然要抖下 ~

12 點幾出發   今日車程好快   半個鐘左右入到去呢 ~

去到都成  1 點 45 分   里奧大人話要食午餐喎 ~

沙爹串燒 - 牛肉 + 豬肉 ($24) - 一般啦 



泰式魚餅 + 泰式蝦餅金邊粉 (冬蔭功湯底) ($55) - 酸酸辣辣好醒胃 



馬拉盞通菜($56) - 呢個非常之好味呀



芒果沙冰 ($29) 



食完就周圍行   今日好熱呀   我個肚又有啲扯扯哋   雖然頂到   但唔係咁舒服咁囉 ~

諗住買茶果一陣聚會嘅時候食   但見到好多都係豆沙餡同紅豆餡   好似好飽肚同好甜咁   所以都係唔買喇 ~

望見藍天白雲   心情都靚啲   但無咁熱就更好啦   哈哈 



行呢度無咁熱





好攰呀我   所以差唔多 3 點都要搵地方坐坐   里奧大人話食菠蘿包   佢成日想買菠蘿包去聚餐   但我話凍咗唔好食   同埋又無盒   拎到去到甩哂啲皮   勁肉酸囉   所以又唔買了 ~

我覺得凍咖啡少甜同熱檸茶都好好飲



食完又行下





有隻遊船擱淺



好多藍色







睇人買海鮮

我覺得今日都幾大浪 



5 點左右就搭車出九龍灣   差唔多半個鐘就出到去   好快呀 ~

喺德福行陣   買完暖水煲就去買 Puff   好感恩呀   因為我仲同里奧大人講話德福無咩小食   咁我見到 Puff 都諗住大大個   估唔到有迷你 Puff   所以買咗 18 個   應該夠食呢 ~

6 點半去到教會   啲食物都嚟得 7788   同埋每人又整啲食物   所以加加埋埋份量都好多   今晚有 17 個人出席   都應該食得哂啲食物啩   哈哈 ~      

6 點 45 分開餐喇   今晚勁開心   又見到短宣班弟兄姊妹   最開心係個個都有事奉嘅心   今晚開會講出年嘅事項   所以我唔太舒服   我都堅持要出席囉 ~

食完就詩歌分享   再講出年嘅事奉去向   差唔多 9 點半就散會 ~

估唔到佢哋好鍾意食啲 Puff   最搞笑牧師一見到嘅時候已經話想食   但到最尾佢一粒都食唔到   因為已經比人食哂   所以我話下次買番比佢食啦 ~

食剩好多嘢   所以佢哋都拎番屋企食   我就唔拎喇   知道自己唔舒服   唔想開火煮嘢嘛 ~

番到屋企都 10 點幾   即沖涼休息喇 ~

睇多陣電視   都成 12 點先瞓 ~