蜜糖焗雞翼 + 白菜仔 ( 7-JAN-2019 )

( 7-JAN-2019  MON )

話咁快新一年又過咗 7 日   我想我啲咳快啲好番呀   哈哈 ~

早餐食吞拿魚治烘底   其實勁唔想食三文治   但粉麵又食唔落 ~

菇場忙呀   今日靜靜哋做嘢   個人唔舒服同埋心情唔係咁好   所以叫 8 卦唔好同我傾偈 ~

Lunch Time 出去一田買無糖咖啡   之後再買埋腸粉燒賣就番菇場喇 ~

仍然忙   想快快手做埋個長命 Report ~

放工去街市買菜   之後即番屋企 lu ~

醃好哂雞翼就拖地   好攰呀 ~

里奧大人 7 點幾番到屋企   可以即開餐喇 ~

是日懶餐 - 蜜糖焗雞翼 + 白菜仔

蜜糖焗雞翼 - 本來好想煎㗎   但真係唔想大清潔廚房   所以焗喇   但啲皮唔脆囉 ~

白菜仔 - 買半斤就最好   以前唔知可以買半斤   次次買 1 斤就食到好辛苦 ~

洗完碗就開機洗衫   之後沖涼休息喇 ~

里奧大人係都要我番工前開抽濕機   我話好危險   始終係高耗電量嘅電器   我話頭先開咗 45 分鐘都好好多啦   佢居然好勞氣話: 你用下個腦啦   之後佢再講咩我都無聽   我心諗駛唔駛咁樣講嘢 ?!   頂佢個肺 ~

呢排瞓得好差   但今日真係好鬼攰呀   所以 9 點 54 分都瞓覺了 ~

豉油雞 (外賣) + 粟米蛋花湯 ( 6-JAN-2019 )

( 6-JAN-2019  SUN )

今朝 9 點起身   沖埋涼就去食早餐喇 ~

食完早餐就番教會   今日開學禮呀   所以 10 點半要番到教會   因為我同里奧大人有份領獎   勁開心 ~

我同里奧大人都有事奉   今次我仲錯漏百出   因為我今日心情好沉重   個人集中唔到精神   但當中原來有啲步驟   我係錯咗好耐   終於今日我先發現到   感謝神讓我喺錯誤中學習 ~

番咗咁耐教會   今日係一個好傷痛嘅崇拜   諗起蔡弟兄   眼淚就不斷係咁流   祈禱嘅時候   喊到崩潰咁滯   真係好唔捨得蔡弟兄嘅離開 ~

崇拜之後就為短宣事項開會   差唔多 2 點幾先走   咁順便食埋下午茶先番屋企 lu ~

鮮菜豉油王炒麵配香辣雞膇

乾燒伊麵

里奧大人就做公司嘢   我就睇下電視   之後都瞓着咗   一起身都 5 點 ~

今晚只係滾個粟米湯   所以 7 點可以開飯 ~

食完飯洗埋碗就抖陣   8 點半出去徑步   徑咗半個鐘就番屋企 lu ~

洗多機衫就沖埋   之後休息喇 ~

諗住食完藥會好眼瞓   又唔係喎   成 11 點半先瞓到 ~

米線陣 @ 官塘 ( 5-JAN-2019 )

手打豬肉丸+彈牙魚腐米線 (麻辣蕃茄湯底)

手打豬肉丸+滷水牛展+紫菜米線 (麻辣蕃茄湯底)

( 5-JAN-2019  SAT )

今朝同家姐喺 Toast Box 食早餐   家姐好鍾意飲佢杯咖啡   我都覺得好飲   但就唔係咁提神嘅   哈哈 ~

食下傾下又 8 點 45 分 lu   又係時候番工了 ~

菇場忙呀   但個人仲係吽吽哋   真係慢工出細貨喇 ~

放工即走   番到屋企又要開機洗衫   抖到差唔多 3 點就去食下午茶 ~

食完去超市買嘢   之後都番屋企休息 ~

里奧大人又熨衫   呢排真係要佢幫手熨衫喇   我食完藥都勁攰 ~

6 點幾出去拎淘寶   之後去米線陣食嘢   食完又行陣 APM   之後番屋企 lu ~

沖埋涼就休息   睇戲睇到 11 點   我啲藥又嚟料   所以都瞓先喇   里奧大人繼續睇 ~    

榮基打冷小菜 @ 官塘 ( 4-JAN-2019 )

魚皮餃王米粉

鮮蝦韭菜餃 + 手打牛丸河

蠔油菜心

( 4-JAN-2019  FRI )

好攰呀   尋晚已經 10 點瞓覺   但可惜半夜去咗 2 次廁所   如果一覺瞓天光就好了 ~

今朝仲唔舒服過尋日咁噃   聽日放工真係要盡情抖喇 ~

早餐食芝腿治烘底   諗住食唔哂可以拎走   估唔到又食得哂 ~

菇場唔忙   個肚有啲扯住痛   唔係咁舒服   好在所有大粒唔喺度   我可以休息下 ~    

咁我戴口罩嘛   阿爽問我係咪禽流感 ?!   我話雞先有之嘛   佢又問係咪咩豬瘟   哈哈   衰得佢吖 ~

Lunch Time 一到就即瞓喇   瞓咗半個鐘   精神番啲喇 ~

頭先叫 8 卦幫我買個吞拿魚包   不過差唔多 2 點先食 ~

無啦啦勁忙   好在頭先瞓咗陣咋   咁先有氣力做嘢   哈哈 ~

放工即走   番到屋企即休息   睇睇下電視都瞓着咗   好似瞓咗 15 分鐘 ~

今晚里奧大人做到 7 點先放工   番到嚟都 8 點   即去食嘢喇 ~

食完就番屋企即開埋機洗衫   再大清潔廁所   之後就沖涼休息 lu ~

11 點即瞓   雖然食咗藥   但都瞓得唔係咁好呢 ~

榮基打冷小菜 @ 官塘 ( 3-JAN-2019 )

客家梅菜扣肉

豆豉鯪魚炒油麥菜

( 3-JAN-2019  THU )

食咗藥真係無喉嚨痛喎   呢個醫生啲藥真係好勁   但食完就真係成身散哂咁囉 ~

早餐食吞拿魚治烘底   酸酸哋夠醒神 ~

菇場忙下停下   食完粒抗敏藥好似好眼瞓咁   但寫明無睡意㗎   可能每月一到啦   個人比較攰   哈哈 ~

Lunch Time 出去行陣   之後再買水餃米番菇場食   原來已經 1 點   怪不得有啲餓啦 ~

無啦啦又忙   好在快手搞掂   個人不在狀態   越做得慢   錯嘅機會越大㗎 ~

攰到黐咗   同 8 卦傾偈   以為今日係星期三   因為我記得係第 3 日番工   哈哈 ~

放工即番屋企   6 點食一次藥   聽陣詩歌再睇靈修書   之後瞓咗 10 分又醒哂 ~

里奧大人差唔多 7 點就番到嚟   咁我都出門口 lu ~

食完就番屋企   沖埋涼就休息   10 點食埋藥都瞓先喇 ~

龍城冰室 ( 2-JAN-2019 )

豉汁涼瓜斑片

土魷蒸肉餅

( 2-JAN-2019  WED )

今朝瞓到 7 點 45 分起身   其實個人好浮   不過點都要番工呢   我同自己講過   唔想成日請病假呀 ~

早餐食芝腿治烘底   但完全食唔落   但唔想齋飲咖啡   所以只食咗 1/4   剩咗就留番做 Lunch ~

菇場唔太忙   最緊要做 Report 啫   其他可以慢慢整 ~

2018 年圓滿結束喇

2019 年美好新開始

Lunch Time 食埋件芝腿治啦   又唔眼瞓   咁上網睇嘢 lu ~

依家連聲都變埋   好在我今晚都睇醫生 ~

3 點幾又餓又凍   所以即沖杯藍莓紫薯五谷粉   我覺得好味呀   又飽肚   哈哈 ~

放工即走   去到診所已經勁多人呀   我要排 16 個   不過呢個係 1 分鐘醫生   所以里奧大人就搭快車去九龍灣 ~

都話好快架啦   我 6 點 12 分到診所   6 點 33 分睇完 ~

拎完藥   里奧大人啱啱落車   咁我去龍城冰室攞位先喇   感恩有 4 人卡位 ~

一見到里奧大人   比佢個咀嚇親   上唇腫哂呀   嚇到我呢   叫佢一陣去睇醫生   驚係泡疹呀   之後佢話今朝仲腫呀   唉   真係搞到我心都痛埋   佢呢兩晚肯定無覺好瞓   驚我發燒 ~

食完即去買雞骨草   再去超市買香蕉   之後就搭車番屋企喇 ~

番到屋企即開機洗衫   去轉旅行番來   有 4 機衫輪住洗   呢排又落雨   啲衫無咁快乾   好在我哋有熨衫習慣   咁啲衫 9 成乾都可以收呢 ~

沖埋涼就食藥   里奧大人就熨衫   不過好在呢兩日佢幫手熨衫   唔係又堆埋一大埋衫了 ~

11 點要瞓   因為啲藥嚟料喇   希望今晚一覺瞓天光   其實聽到弟兄回天家嘅消息之後   我都瞓得唔好   事情太突然了   真係一時間接受唔到呢 ~

翠河餐廳 @ 官塘 ( 1-JAN-2019 )

栗子燜滑雞煲

豉汁涼瓜炒牛肉

( 1-JAN-2019  TUE )

新一年新開始   我真係要祝自己身體健康健康健健康呀 ~

感恩尋晚瞓到出哂汗   可能就係出咗一身汗   所以今朝無哂燒 ~

次次我一發燒   好肯定里奧大人一定瞓得唔好   因為佢會成晚摸我仲有無燒   一摸到我成身熱就要我食 Panadol 㗎   我好番真係要對佢好啲   哈哈 ~

今朝瞓到差唔多 11 點呀   沖埋涼先出去食早餐   其實無咩胃口   但陪里奧大人食啦 ~

食完都番屋企喇   即開機洗衫   再換埋床單   擺好啲手信就休息   里奧大人就要幫手熨 3 機衫   哈哈 ~

咁 Whatsapp 比家姐   話比啲梅菜比佢   佢原來佢今晚整咗咖哩魚蛋   佢又話想比我呀   我話唔要喇   佢問我點解 ?!   因為知我鍾意食   咁唯有話比佢知我喉嚨痛囉   本來都唔想比佢知   費事佢又擔心   但最終點都要講   唔係佢一定點都要我要咖哩魚蛋做餸㗎 ~ 

差唔多 3 點就出去食下午茶   里奧大人話餓喎 ~

7 點幾出去食飯   食完行陣都番屋企 lu ~

沖埋涼就休息   睇下電視又 11 點   探埋熱就瞓   好在係 37.x 度   應該無哂燒喇   里奧大人今晚應該好好瞓喇 ~