鬼馬油炸鬼 + 素食腐皮卷 & 齋鴨腎酸齋 (外賣) + 自家制蛋糕 ( 5-APR-2021 )

( 5-APR-2021  MON )

今朝 10 點半自然醒   梳洗之後就整早餐喇 ~

我整醬占多   其實只係烘熱方包   非常之簡單 ~ 

咁我焗緊麵包就開機洗冷氣被   里奧大人又話我強迫症   係都要做下嘢先安樂   哈哈   不過我都係架   睇睇下電視望到梳化有塵   我會即去抹 ~

里奧大人今日要幫公司睇嘢   所以要去 Megabox   咁順便可以買埋風扇 ~

今日無咩人喎   可能啲人出哂去長洲西貢呢啲地方 ~

睇完公司嘢就去睇風扇   但諗下買唔買   食完 Lunch 再決定 ~

叉燒稻庭烏冬配香炸雞膇 & 雜錦壽司 ($92)

香炸雞膇好味呀

里奧大人一定唔比食雜錦壽司   所以我睇中呢樣先叫烏冬套餐咋   里奧大人都話估唔到我會食烏冬   哈哈

燒安格斯牛肉眼飯 ($128)

里奧大人鍾意蛋撈飯   我就超級唔鍾意   哈哈   我食麵餐如果有荷包蛋 (有時唔記得要反蛋)   我都唔會篤穿蛋黃   會浸熟佢先食   我好怕有蛋黃啲湯   好似好杰咁   但粟米蛋花湯又 OK 喎   不過我覺得好多人都會篤穿蛋黃   家姐同 8 卦都係咁

個套餐仲有湯 & 沙律

里奧大人問個飯幾錢 ?!   話牛肉份量都好多   我話 $128   但佢唔信呀   哈哈   佢以為最多只係 $8x   之後我比佢睇餐牌先信咋   佢話無諗過咁貴   因為餐牌紙左邊係 $6x   右邊價錢係 $8x   無諗過中間係 $128   哈哈 ~

食完就行 Ikea   因為又要幫公司買嘢 ~

里奧大人行行下話尋晚發惡夢   話佢升上天   咁我上半身用發泡膠保護住   但下半身就無包住   咁即係會跌落嚟   之後里奧大人喊哂同主耶穌講   話我成日因主耶穌嘅名做善事   佢真係祢嘅兒女   之後我全身都有發泡膠保護住升上天 ~

我話里奧大人真係好唔捨得我咁喎   因為真係好少聽佢話發夢喊   多數只係驚咁囉 ~

再去埋實惠睇風扇   感恩有啱心水嘅風扇   只係 $449   最開心係我張信用卡之前有 $400 回贈   即係依家只需要比 $49 就買到把風扇喇 ~

最後就去埋 Aeon 超市   好開心買到包 2 Kgs 嘅珍珠米   最搞笑里奧大人問做咩唔買 5 kgs ?!   我話唔想食唔哂又掉   因為我將啲米放入雪櫃   如果買 5 Kgs   真係成日雪櫃無位放其他嘢呀   哈哈 ~

咁大包只係 $49.9   真係超過抵   所以我打比家姐叫佢快啲睇 Whatsapp   佢話無嘢 What 喎   哈哈哈哈   原來我無 What 比佢睇呀   之後佢都話抵   原來燴燴之前買比 Berry 都係呢包   仲話好少貨   不過呢度都只係得 5 包咋   所以我話買 1 包比 Berry

買完哂所有嘢再儲積分   搞掂就搭的士番屋企喇 ~

沖埋涼就休息一下   之後煲石斛茶   係時間要清清熱氣了 ~

西瓜都好薄皮   都算多汁但唔甜

5 點 45 分預備晚餐   但  6 點 45 分先可以開餐呀   哈哈   無諗過整咁耐   成日以為有焗爐好快添 ~

是日晚餐 - 鬼馬油炸鬼 + 素食腐皮卷 & 齋鴨腎酸齋 (外賣) + 自家制蛋糕

鬼馬油炸鬼 - 好耐無整   要上網睇番點整   哈哈   里奧大人話好味   但就唔可以食咁多   因為好熱氣 ~

素食腐皮卷 & 齋鴨腎酸齋 (外賣) - 尋晚買㗎   今晚焗熱食   我覺得樣樣都好味   所以間唔中都會買嚟食呢 ~

自家制蛋糕 - 今次係蛋糕   我覺得好味呀   當甜品都唔錯 ~

洗埋碗又大清潔廚房   搞掂哂就即沖涼 ~

今晚醒修 45 分鐘   之後睇 "Signal"   今集喊到我死死下   好在聽日唔駛番工咋 ~

11 點幾都瞓   雖然假期但想正常時間瞓   哈哈 ~

菜肉餃水餃拚蝦滑 (外賣) + 鹹蛋節瓜湯 ( 4-APR-2021 )

( 4-APR-2021  SUN )

今朝里奧大人好早起身番工   我就 9 點唔夠都起身   又唔餓   所以做家務同開機洗冷氣被同晨褸 ~   

一路睇 "女神降臨" 一路大清潔屋企   之後拖埋地   望個鐘原來已經 10 點 10 分   要快快沖涼啦   真係差啲唔記得今朝要番崇拜呀 ~

今朝有侍奉要早啲番教會   原來都有 5 個月無見弟兄姊妹喇   今次再見面覺得好開心呀 ~

太耐無事奉   好多嘢都唔記得   所以我負責嘅部份全部衰哂   嗚嗚嗚嗚 ~

搞掂哂都 1 點幾   咁買埋油炸鬼就去 Taste 同街市買餸同生果 ~

買蝦滑嘅時候   咁啱里奧大人打嚟   我話: 老公你放工喇   檔主笑住話好 Sweet   係咪勁搞笑呀 ?!   無諗過佢咁講   哈哈 ~

臨走前買咗個細嘅西瓜   檔主話要用 2 個膠袋裝住   因為有 7-8 磅   我無諗過咁重囉 ~

我搭車嘅時候   里奧大人都差唔多番到屋企   佢話喺車站等我   話知道我實買好多嘢   今次真係好在佢等埋我咋   因為真係好重 ~

番到屋企就快快沖涼先   因為要整嘢食呀 ~

3 點幾食   今次整芝士肉鬆多士 ~

里奧大人 5 點瞓到 6 點   我就唔瞓喇 ~

抖多陣就煮晚餐   今晚仍然 7 點開餐 ~

是日懶餐 - 菜肉餃水餃拚蝦滑 (外賣) + 鹹蛋節瓜湯

菜肉餃水餃拚蝦滑 (外賣) - 預咗今日比較攰   所以淥餃子就算 ~

鹹蛋節瓜湯 - 清埋兩個節瓜   咁滾湯就最好   感覺份量無咁多   哈哈 ~

洗埋碗就開機洗衫   之後沖涼   抖陣就睇 "Signal" ~

眼瞓樣 

10 分鐘後就瞓到咁

繼續睇 "Signal"   今晚居然 12 點先瞓   實在太夜喇 ~

魚丸出前一丁 + 雜豆 ( 3-APR-2021 )

( 3-APR-2021  SAT )

今朝 10 點自然醒   之後里奧大人去買早餐   我都梳洗喇 ~

食埋早餐就抖陣   沖埋涼就預備出門口 ~

今日要放低嘢去舖頭   所以約家姐 12 點 15 分嚟接我哋   搞掂哂就去新都城   第 2 期商舖全部封閉進行消毒 ~

咁諗住喺 1 期食埋 Lunch 就走   估唔到里奧大人話買番去家姐屋企食   咁仲好   可以探 Berry ~

一齊去雲桂香買外賣   咁里奧大人就喺度等   我同家姐去廣良興買豬肉乾   之後再去拎狗糧同蛋撻 ~

我話要買零食比 Berry   咁家姐之前訂咗包細狗糧   好似接近 $250/包   咁我話我請埋 Berry 食   之後佢話佢比咗 Bouns 比我同里奧大人   妳哋係都要咩都比哂錢   哈哈   我話完全唔記得 Bonus 呢回事喎   不過次次我哋同家姐食飯   我哋肯定會比   因為家姐成日買嘢比我哋嘛 ~

買完諗住 Join 里奧大人   估唔到佢打嚟話搞掂   咁即刻番屋企喇 ~

Berry 今次唔驚里奧大人喎   因為無縮埋喺梳化底 ~

MAMA BAKERY 手工奶茶好飲

夫妻肺片 ($42)

都唔記得呢兩碗係咩添   左邊係家姐食嘅   見佢食得好慢   佢話好辣呀   真係好少聽佢講話好辣 

極上逸品小沙甸魚乾 150g (寵物用品展價錢 $90/2 包)  原價 $75

DoggyMan 小牛肉軟骨切片 80g (寵物用品展價錢 $75/2 包) 原價$53

里奧大人幫家姐 Downlaod 歌   我即刻叫佢做 Download 王   不過真係好感激佢   因為我哋真係靠佢㗎   哈哈 ~

好耐以前同媽咪家姐一齊打牌   我哋唔打花同埋 3 番起糊嘅   里奧大人好鍾意留 "番子"   所以家姐叫佢做 "番子王"   經家姐咁講   以後次次一開牌就唔理三七廿一打哂番子   等里奧大人無得食糊   咁我哋 3 個又打開口牌   計哂里奧大人食咩牌   不過里奧大人無所謂㗎   全程仲喺度笑   因為佢話自己人打牌   邊個輸都無所謂   不過講真   呢樣嘢真係要超級讚里奧大人   真係好好牌品    因為我肯定唔可以咁   哈哈 ~

Berry 好乖咁呀   坐喺枱底陪我哋   不過有時就會咬家姐隻拖鞋   哈哈 ~

隻拖鞋真係咁好咬 ?!

個樣好驚咁   哈哈   可惜對唔到焦

應該想瞓覺

好得意呀   真係睇相先知佢咁嘅衰眼望我

向住里奧大人方向瞓覺

睇住佢瞓着

佢哋 Download 歌   我就睇電視   所以要 Berry 陪我   用牛舌引佢  哈哈 ~

希望繼續鍾意食啦   因為買咗 2 包比佢呀

次次都會有啲碎

同埋梳化好多口水

嘻嘻

佢中眼瞓   所以我即錄影   但真係中極都唔去瞓   好搞笑      

之後又陪住我哋喇   真抵錫

其實佢真係好眼瞓   哈哈

家姐抱住佢   諗住過手比我抱   點知佢勁大力撐開我   家姐都 "dun" 後咗呀   佢真係只比家姐抱㗎咋        

家姐同里奧大人講開車銀優   話佢啲同事都話車銀優整定做呢行   臉細但身型高大   上鏡一流 ~

但家姐真係越講越興奮   仲好大聲好激動   里奧大人都叫佢冷靜啲呀   工人唔知真係以為鬧緊里奧大人呀 ~

依家我同家姐嘅手機套係一樣   如果 Ringtone 都一樣真係好易拎錯   所以我哋每人揀一首   哈哈 ~

5 點先食蛋揵   因為大家都好飽   哈哈 ~

MAMA BAKERY 買嘅蛋撻   買 3 送 1   所以買夠 12 個   其中 6 個比老二個仔食嘅   佢話佢好鍾意食架

5 點半左右走人   順便同 HKTV Mall 交收   咁我可以拎椰子油同 1 Pack 忌廉 ~

講開 WFH   家姐無啦啦捉住里奧大人手臂話多謝佢   真係 R 哂頭   原來係多謝佢 Download 首歌做 Ringtone ~

番到屋企就沖涼   今晚求其煮   因為大家都好飽   但唔食又怕半夜肚餓   哈哈 ~

$19.9/樽   CC 話呢款椰子油好用   咁我都試下喇

抖到 7 點先煮晚餐   雖然簡單   但 7 點半先開餐 ~

是日懶餐 - 魚丸出前一丁 + 雜豆

魚丸出前一丁 - 一個丁麵 Share 食已經好夠   如果平時咁細食就好喇   哈哈 ~   

雜豆 - 真係好鍾意食雜豆   因為就咁淥熟就搞掂 ~

洗埋碗再沖身   之後又睇 "Signal" ~

今晚睇到 11 點都一定要瞓   因為聽朝大家都要早起身呢 ~

麻辣雞煲 + 脆肉瓜粒 ( 2-APR-2021 )

麻辣汁撈蘭州拉麵都唔錯

( 2-APR-2021  FRI )

今朝 9 點半自然醒   我梳洗之後就開機洗衫   里奧大人就去買早餐 ~

本身 Plan 好今日行山   但好鬼熱呀   所以我話去佐敦行街 ~

差唔多 11 點半先出門口   行永安買滷水豆干同 Aloe Mask   之後再去買謢髮素   再周圍行陣 ~

仲未開檔嘅廟街

1940 年嘅德生大押   第一次見咋   哈哈

差唔多 1 點幾   見到間元朗新記無咩人   所以入去食午餐 ~

我話上星期已經勁想食粥   里奧大人話估我唔到喎   因為佢話咁熱   佢一定唔食粥   哈哈 ~

依家我食嘅嘢   家姐同里奧大人都話難觸摸 ~

XO 醬叉燒炒蛋飯 ($49) - 幾好味喎   我食食下同里奧大人講   尋晚咪食咗叉燒囉   今日又食   佢話唔記得   其實我都唔記得   哈哈   之後比家姐睇   家姐又話尋晚食完叉燒今日又食   哈哈

生滾及第粥 & 牛肉腸 ($42) - 粥底一般   但唔緊要   因為我好想食粥

牛肉腸就麻麻哋

食完就去裕華行陣   之後諗住買蘋果西打同紅薯粉   不過無得買呀   晴天霹靂霹靂霹靂   嗚嗚 ~

話咁快又 3 點幾   係時候搭巴士番屋企喇 ~

沖埋涼就休息   今日真係好鬼熱呀 ~

滷香豆乾 ($13/包) - 買咗 4 包   我好鍾意食㗎

Aloe Vera Face Mask ($99) - 平平哋買嚟試下

今晚 6 點都預備晚餐   但 7 點先開餐 ~

是日晚餐 - 麻辣雞煲 + 脆肉瓜粒

麻辣雞煲 - 家姐之前比咗 2 包惡魔雞煲醬   咁今晚就煮啦   我用 5 隻雞肶仔 + 半包豆卜   爆香包香料真係好搶喉   一路爆香一路打噴嚏流鼻水   頭先切洋蔥就係咁流眼水   都夠麻   但唔夠辣   我無加辣粉   上網睇話超級辣   咁頭先比里奧大人試味   佢話已經好辣   咁我唔加啦 ~

脆肉瓜粒- 之前買㗎   所以又要食呢 ~

洗埋碗就大清潔廚房   之後沖涼休息喇 ~

今晚睇 "Signal"   睇到差唔多 12 點先瞓呀 ~

鹹蛋叉燒飯 + 蒸節瓜粒 ( 1-APR-2021 )

 

( 1-APR-2021  THU )

今朝起身   里奧大人話佢今日係番晏少少   所以陪我食早餐 ~

菇場忙咗陣   之後又可以 Hea 過喇 ~

咁快又 4 月

呢排成日同家姐傾電話   8 卦以為有咩事   點解傾咁耐   堅搞笑呀 ~

我發覺喺屋企食早餐   喺菇場嘅時間過得特別快咁 ~

Lunch Time 去銀行打簿   之後再去買薑   搞掂就買菠蘿叉燒包番菇場食 ~

Berry 12 點半就會想瞓覺

20 分鐘之後就瞓到咁 lu

唔忙就放鬆心情等放工   諗起連續放 5 日就開心   哈哈 ~

放工即走   番到屋企抖陣都要預備晚餐呢 ~

里奧大人 7 點放工   所以 8 點先開餐 ~

是日晚餐 - 鹹蛋叉燒飯 + 蒸節瓜粒

鹹蛋叉燒飯 - 今次用五花腩整叉燒   醃咗兩晚夠哂入味   今次特登整薑蔥蓉   我覺得勁好味呀   好似喺出面食嗰啲咁   里奧大人話做咩整鹹蛋   我話咁樣先似食燒味飯   哈哈 ~

蒸節瓜粒- 本身想滾湯   但都係懶   所以蒸 1 條節瓜算喇   每餐最緊要有啲瓜瓜菜菜 ~

洗埋碗就沖涼   之後休息喇 ~

同里奧大人講話鼻骨好痛呀   之後我話應該係帶口罩托   叫里奧大人摸幾次確認一下   摸到佢都煩   哈哈 ~ 

今晚仍然睇 "Signal"   不過 11 點半都瞓喇   呢套戲都幾緊張   又要思考一下   加埋要追字幕   所以睇一集都好傷神好攰   哈哈哈哈 ~