蕃茄雞柳螺絲粉 + 蕃茄香草炒雞蛋 + 鹹蛋絲瓜湯 ( 6-MAY-2021 )

( 6-MAY-2021  THU )

感恩一覺瞓天光   我應該 7 點左右都醒咗   不過懶床   咁啱里奧大人都早咗起身   因為我聽唔到佢鬧鐘響   呵呵 ~

早咗一班車真係唔錯㗎   因為無咁多人 ~

今次去另一間買早餐   我番到菇場放低早餐就會去洗杯斟水   點知原來個咖啡杯斜咗   倒瀉咗半杯咖啡喺膠袋入面   激死我   最搞笑家姐話我都係飲半杯啫   但最煩係整濕哂個三文紙袋嘛   同埋無諗過個杯蓋唔實囉   嗚嗚 ~

菇場忙呀   好快 Lunch Time ~

今日又食酸辣米線   呢個月唔再食喇   一個月兩餐真係好夠呢 ~

呢排都掛住睇 ASTRO   今日阿花又問我拎條 link   佢實在唔似我咁大包圍呢 ~

終於忙完   又可以同阿花 Whatsapp   佢真係勁鍾意車銀優   應該仲痴過我   哈哈 ~

放工即走   番到屋企要即預備晚餐喇 ~

今晚里奧大人 6 點鬆啲先放工   所以要 7 點先開餐 ~

是日晚餐 - 蕃茄雞柳螺絲粉 + 蕃茄香草炒雞蛋 + 鹹蛋絲瓜湯

蕃茄雞柳螺絲粉 - 之前買得太多車厘茄   又唔想當生果咁食   所以用來煮餸啦   咁順便清埋少少螺絲粉   今次煮 1 塊雞扒   真係唔夾出來係完全唔覺佢存在   哈哈 ~

蕃茄香草炒雞蛋 - 尋晚家姐食蕃茄蛋   搞到我都想食   所以今晚整   但煮滑蛋真係好鬼難   不過其實我係唔鍾意食滑蛋   所以求鬼其炒兩炒就算 lu ~

鹹蛋絲瓜湯 - 本身諗住用小元貝滾湯   但無時間浸喇   所以轉用鹹蛋   一樣咁好味 ~

我話仲係好飽   里奧大人問我食咗咩 ?!   我話米線   佢話相隔咗 6 個鐘啦   應該會餓   但我話次次食完酸辣米線都可以頂好耐㗎   有時飽到直頭水都飲唔落添呀 ~

8 點半左右徑步   其實好攰   不過又好想徑步 ~

徑半個鐘就搞掂   之後即番屋企沖涼 ~   

抖多陣就睇 "金秘書為何這樣"   又 11 點幾先瞓 ~

香煎三文魚 + 清甜菜心苗 ( 5-MAY-2021 )

里奧大人中午食剩半盒鹹魚雞粒炒飯   但無味道嘅

( 5-MAY-2021  WED )

雖然尋晚去咗次廁所   感恩都叫做瞓得好 ~

今朝好熱咁呀   可能有太陽   不過點都好過落雨嘅   買完早餐再買雞骨草就番菇場喇 ~

早餐食芝腿治烘底   隔住咁食就無咁悶 ~

菇場忙下停下   好快又到 Lunch Time ~

今日買艇仔粥同牛脷蘇   因為呢排好想食粥   阿齋話我成日都咁樣   會呢排想食牛雜   呢排想食酸辣   哈哈 ~

咁我睇 ASTRO Play   阿花突然喺我耳邊叫我比條 Link 比佢   真係比佢嚇死 ~

比咗 1/4 阿齋   其餘就等到 3 點幾先食   無諗過食碗粥已經夠飽

8 卦問我咩事食粥   我話唔係覺得我唔舒服呀嘛 ?!   佢真係話係呀   因為咁熱仲食粥   之後我睇天氣   原來今日 30 度   怪不得我買粥食   阿齋同 8 卦個樣都好出奇咁啦   哈哈 ~

無啦啦勁忙   所以好快放工咁 ~

番到屋企即預備   里奧大人 6 點 15 分都番到屋企   不過無咁快食得   因為今餐要炒又要煎呢 ~

今晚 7 點唔夠就可以開餐   我覺得算快喇 ~ 

是日晚餐 - 香煎三文魚 + 清甜菜心苗

香煎三文魚 - 家姐之前買咗 4 Pack 比我   不過百佳買嘅就唔係咁厚身   所以唔駛煎咁多時間   我夾咗嚿脆卜卜部份嘅比里奧大人食   佢話好味呀   今晚佢仲食咗 1 條半添呀   因為我哋係食完 1 條到 1 條   佢以為我都有食呀   其實我次次煮完飯   真係食得好慢   要抖抖先想食呢   哈哈 ~

清甜菜心苗 - 呢排好想食深色嘅菜   所以買菜心苗   蘸辣椒豉油勁好味 ~

洗埋碗再執一執醬料櫃就沖涼   之後抖陣就睇 "金秘書為何這樣" ~

今晚比較攰   差唔多 11 點都瞓 lu ~

韭菜餃水餃拚蝦滑 + 水魷 + 牛柏葉 + 炸魚皮 (外賣) ( 4-MAY-2021 )

( 4-MAY-2021  TUE )

尋晚瞓到半夜好似醒醒哋咁   好在無耐又瞓得番咋 ~

今朝早咗一班車但塞車   差唔多 8 點半先番到菇場 ~

早餐食奶醬多   最緊要快 ~

仍然做長命 Report   所以今朝叫 8 卦唔好同我傾偈   哈哈 ~

Lunch Time 出去行陣   再去 7-11 買 Lunch   今次除咗烏冬   其他全部凍冰冰嘅   以前唔係咁㗎 ~

差唔多 3 點就做完個長命 Report   終於可以抖下 ~

放工去街市買餸   之後都即番屋企喇   因為里奧大人已經放工呢 ~

今晚用白蘿蔔做湯底   因為係我好想食白蘿蔔   今次仲買咗水魷 & 牛柏葉   咁都要 $40   今餐都買咗 $103   依家食水餃餐都唔平了   哈哈 ~

7 點先可以開餐   所以去買餸嗰晚最好食水餃餐   一鑊熟就可以 ~

食完之後我話整啫喱   但里奧大人話唔好住   等佢聽日問下頂爺點整先   哈哈 ~

一睇手機見到天文台發出黃雨警告   仲話未來兩小時有雨   本身諗住抖半個鐘去徑步   咁依家唔駛 lu ~

開機洗衫之後沖涼   我同里奧大人講話都無落雨嘅   點知講完唔夠 10 秒   即落咗場大雨呀   真係好在無出去徑步咋 ~

抖到 9 點就睇金秘書   但 11 點都瞓喇   雖然好想睇   但都係唔想咁夜瞓 ~

辣汁焗雞翼 + 紅油拍青瓜 + 辣椒菜脯小旺菜 ( 3-MAY-2021 )

我就食埋尋晚嘅點心   里奧大人就食蘭州拉麵

( 3-MAY-2021  MON )

感恩一覺瞓天光呀   呢排最渴望係咁呢 ~

早餐食腿蛋治   要食飽啲   因為落雨絲濕    Lunch Time 唔想出街 ~

菇場超級忙   好快又 11 點 45 分了 ~

5 月了

Lunch 食 Flakes + 朱古力奶   好耐無飲朱古力奶   覺得勁好味   哈哈 ~

同阿齋傾下有咩韓劇好睇 ?!   佢係超級勁鍾意朴敘俊   阿花就超級勁鍾意車銀優   又話佢係自己老公   真係笑鬼死   家姐同事都話佢哋咁搞笑   愛得咁瘋狂嘅   里奧大人都話我哋成班都係黐   哈哈 ~

又要做長命 Report 喇   本來一心一意做嘅   點知 8 卦又係咁搵我傾偈   終於只做咗少少   聽日要開行 Turbo 做喇 ~

放工即走   番到屋企即預備晚餐 ~

一開個食物盒見到雞翼   我仲以為係雞扒   諗住整手撕雞   因為好快搞掂   點知依家要醃要焗   時間用多咗好多   今晚 7 點先可以開餐 ~

是日晚餐 - 辣汁焗雞翼 + 紅油拍青瓜 + 辣椒菜脯小旺菜

辣汁焗雞翼 - 用辣汁醃咗廿分鐘   焗完再掃蜜糖   真係簡單又好味 ~

紅油拍青瓜 - 4 月 21 日買嘅   等到今晚先食   但其中一條已經結冰喇   好在今晚食埋去咋   唔係應該都可以掉 lu ~

辣椒菜脯小旺菜 - 最後 1 棵小旺菜   之前買一份有 4 棵   真係好抵食   哈哈 ~

尋晚整嘅芒果啫喱全部衰哂   兩碗都係 "水 Nel Nel" 咁   家姐之前又係咁   所以都要掉哂去 ~

啫喱要五蚊盒   今次又無咗十蚊雞   好在里奧大人叫我整兩盒先咋   最慘浪費埋啲鳳梨粒嘛   嗚嗚 ~

今晚再整但走鳳梨   我同里奧大人好認真整   真係笑鬼死   焗個蛋糕都係一個人整   但整盒啫喱就要兩個人整 ~

搞掂哂就沖涼   之後抖陣   差唔多 9 點半先睇 "金秘書為何這樣"   真係好好笑   臨瞓前睇啲笑片都唔錯 ~

11 點左右都瞓先   里奧大人就睇陣聖經先瞓呢 ~

腐皮卷 + 素粉果 + 酸齋 + 煎堆 + 鹹水角 + 黃糖糕 + 艾葉茶果 + 雞屎滕果 (外賣) ( 2-MAY-2021 )

( 2-MAY-2021  SUN )

里奧大人出門口之後   都預咗自己瞓得唔好㗎喇 ~

今朝本身校咗 9 點半起身   但 9 點 10 分都醒咗   所以起身拖地 ~

沖埋涼就出發   條街好焗熱呀   慢慢行都成身汗 ~

食埋早餐就番教會   依家都唔會逗留喺餐廳咁耐㗎喇   但就唔會好急咁食   哈哈 ~   

我今日想 11 點番到去   因為想 Set-Up 好哂啲嘢先   講開崗位嘅問題   牧師講咗句說話令我好感動   真係好在我講出自己感受   咁佢哋先知我哋嘅難處呢 ~

諗住搞掂哂就搵 Ivy 為侍奉崗位祈禱   估唔到佢哋過哂嚟搵我   唔駛我周圍走   又係好感動 ~   

今日侍奉超超超級勁忙   搞掂哂已經 1 點 45 分   我成個人散哂了   哈哈 ~

咁啱里奧大人放工   我話去南記食酸辣米線 ~

我就咁食辣豬肉一個餸已經好夠

里奧大人就一定食辣豬肉+招牌春卷

里奧大人話阿妹話我真係唔番   佢以為里奧大人講笑都有嘅   哈哈 ~

食完去 Samsung 睇手機   因為之前應承送手機比里奧大人公司   但今日先可以落實買呢 ~

搞掂就去 Market Place 買齋做晚餐   之後再去買糕點   買完即番屋企   因為條街焗熱到抖唔到氣咁滯 ~

沖埋涼就休息   家姐話佢要開冷氣   我話我好早已經開緊喇   因為我真係好怕熱   哈哈 ~

里奧大人就瞓晏覺   佢 6 點幾起身   我就整晚餐喇 ~

今晚只係焗熱同蒸熱   真係超級勁方便 ~

洗埋碗就整埋啫喱   搞掂哂就開機洗衫   沖完涼先食生果 ~

呢個鳳梨係爆汁   我鍾意食但唔可以食咁多   不過都仲有一個排住隊食

今晚差唔多 9 點半先同里奧大人一齊敬拜   接近 10 半就完畢 ~

睇多陣電視   我 11 點幾都瞓先喇   里奧大人就仍然睇 Youtube ~ 

黑毛豬午餐肉辛辣麵 + 辣椒菜脯小旺菜 ( 1-MAY-2021 )

今日大豐收 因為家姐比咗 2 個金鑽鳳梨 + 4 支 Pokka Sapporo 檸檬汁 + 5 個日本兵衛腐皮烏冬

( 1-MAY-2021  SAT )

今朝 8 點半醒咗   里奧大人話佢都瞓夠   所以叫佢即刻去麥當勞買早餐   因為買夠 $59 就送自動泡沫洗手液機   不過排咗半個鐘就話已經排完 lu ~

真係辛苦里奧大人喇   咁早起身又要排隊又要買早餐   哈哈 ~

感恩里奧大人今日放假   可以見足一日   難得難得 ~

一開 Whatsapp 就見到家姐話買咗 5 支 Haagen Dazs 綠茶味焦糖味雪糕批比我   我以為睇錯   因為我都無話要買   咁我話唔要喇   留比妳自己要啦   佢話佢都買咗 5 支㗎喇 ~

今日唔做家務   因為好想睇 ASTRO ~

1 點左右食午餐   今日唔買外賣   好想清埋 3 塊印度薄餅 ~

餡料係芝士加肉鬆   堅好味   不過都幾滯   哈哈

洗埋碗就大清潔廁所   之後休息一下先 ~ 

3 點 15 分左右家姐嚟接我哋去舖頭拎嘢   之後再去家姐屋企 lu ~

里奧大人整咗啲戲比家姐   咁佢應該可以睇兩個月㗎喇 ~

里奧大人坐飯廳整嘢   唔知 Berry 係咪陪住佢呢 ?!

哈哈哈哈   

Berry 居然食埋今朝剩嘅狗糧   因為家姐唔記得拎起   無諗過佢咁餓喎   所以我又即刻比零食佢食喇   哈哈 ~

諗緊點樣食

我叫 Berry 唔好唔食呀下   里奧大人話邊有狗仔唔食零食㗎   我話 Berry 真係唔係樣樣都食枚喎   所以好鬼煩囉

好味道

佢似乎好餓咁

咁睇好似得兩隻牙仔

我話 Berry 好乖   因為丫大佢個口都唔會咬人   點知家姐話係鬼   餵佢食藥係咁咬人㗎

奸笑

點呀 ?!   哈哈哈哈

坐到就嚟想反艇咁

呢塊唔知咩零食   硬崩崩嘅   但就比佢磨牙都好喎

家姐叫里奧大人記得拎雪糕批   里奧大人話家姐想食綠茶味   唔駛比佢啦   家姐話佢只係好想買嘢   又問廁紙用哂未 ?!   檸檬茶仲要唔要 ?!   真係唔講得笑架   叫家姐做咩無咁快   但一話叫佢買嘢   佢即落單㗎   好恐怖   所以同里奧大人講千奇唔好話鍾意食咩飲咩   唔係次次見到又會買   真係食極唔完架 ~

講開綠茶味雪條   家姐話好邪呀   上次佢買咗 1 支綠茶味   諗住試下   因為我同佢啲同事都話綠茶好味   點知姐夫話食   咁家姐由得佢食啦   咁第 2 次再買 1 支   家姐問里奧大人食咩味雪條 ?!   里奧大人話綠茶味   家姐仍都由得佢食啦   哈哈   所以佢買兩次都無得食   真係慘慘豬 ~

里奧大人跟家姐入房整嘢   我坐喺廳睇電視   我聽到 Berry 係咁狂吠   到佢哋人狗一齊出嚟   里奧大人話 Berry 係咁向住佢吠   家姐話吠聲同平時唔同   可能覺得間房係佢   唔準人入去啩   我話我次次入去都無吠喎   可能驚陌生人啦   哈哈 ~

家姐買咗鳳梨   係都要切一個大家食   仲話好易處理   哈哈 ~

家姐幫襯糟糟朋友買一箱金鑽鳳梨

好香甜   最正係好多汁

差唔多 6 點就番屋企   今晚又係 1 袋去 3 袋走   家姐本身再話比廁紙比我   話里奧大人喺度幫手拎   我話唔得啦   頭先放低啲嘢喺車入面   真係無手拎喎 ~

番到屋企即開機洗衫   之後抖陣   7 點幾先煮晚餐 ~

是日懶餐 - 黑毛豬午餐肉辛辣麵 + 辣椒菜脯小旺菜

黑毛豬午餐肉辛辣麵 - 我一話煮麵   里奧大人就話要辛辣麵   所以呢餐佢食得好滿足   哈哈 ~

辣椒菜脯小旺菜 - 喺菇場附近買咗盒辣椒菜脯   有好香麻油味   估唔到里奧大人鍾意食   佢話唔好再買呀   我話一盒有排食啦 ~

洗埋碗就沖涼   之後睇 "金秘書為何這樣" 喇 ~

睇到 11 點幾都要瞓   因為里奧大人聽朝要好早起身 ~