清湯牛腩米 + 清湯牛筋腩飯 (外賣) ( 7-JUL-2022 )

清湯牛腩米拚菜心

清湯牛筋腩飯

( 7-JUL-2022  THU )

今朝都係瞓到 7 點 50 分都醒   感恩身體狀況都好好   但就慢動作   哈哈 ~

早餐食奶醬多   真係完全唔想食   連咖啡都唔想飲   不過驚一陣餓   所以點都要食啲飲啲咁囉 ~

菇場唔忙   但個人都仲係好攰   個肚就有少少扯住痛   所以攬住 Cushion 就最舒服 ~

Lunch Time 想瞓但又瞓唔到   到差唔多 1 點就想瞓   但要開工啦   所以食件蛋糕提提神 ~

今朝份多士仲喺度   不過真係唔想食

2 點去開會   以為實戰啦   點知又係講有咩嘢要改   阿渠話上次已經講咗   諗住今次搞掂   點知原來個問題係不斷重覆重覆又重覆   我話真係開到下年都係講緊呢個問題   完全浪費時間 ~

諗住用新 System 會好啲   但原來又煩又唔好用   不過應該係菇場 Set 得唔好   因為冰姑都係用同一個 System   但佢就簡單清楚過我哋好多囉 ~

5 點終於開完會   坐多陣就可以放工了 ~

今晚同里奧大人一班車   所以一齊買晚餐先番屋企   好感恩今晚有胃口食嘢呀 ~

食完就開機洗衫   之後沖涼休息喇 ~

8 點幾就同里奧大人一齊睇 "盡情吃 用力愛"   今集都 OK   最緊唔唔好成日情情塔塔   我哋實會飛嚟睇的   哈哈 ~

今晚 11 點左右都瞓喇   希望可以一覺瞓天光啦 ~

黑椒汁咸豬手 + 椒絲腐乳通菜炒牛肉 (外賣) ( 6-JUL-2022 )

黑椒汁咸豬手 - 里奧大人知我鍾意食呢啲豬手   所以買嚟試下   不過一政認為唔係咁好味   哈哈

椒絲腐乳通菜炒牛肉 - 我哋都鍾意食呢個餸   如果我整到咁好味就好 lu

( 6-JUL-2022  WED )

尋晚瞓瞓下   個肚都痛   所以沖咗 1 次涼   以前用非常熱嘅熱水   次次沖完出嚟真係暈咁滯   依家好咗好多   起碼唔係用勁熱嘅水都可以舒緩到呢 ~

今朝 7 點 50 分起身   都係慢動作沖涼洗頭   我一緊張就會肚痛㗎喇 ~

茶記阿哥話我呢排晏咗   以為我改咗番工時間   我話係我遲起身啫   哈哈 ~

早餐食吞拿魚治烘底   今朝算係有啲胃口 ~

菇場唔忙   但個肚開始有啲痛   所以勁想瞓覺~

Lunch Time 一到即瞓   今日瞓咗一個鐘呀   起身都算精神   但 1 點之後都好想再瞓咁   所以又抖咗 10 分鐘先開工 ~

3 點幾勁餓   拿拿聲食條即食蟹柳再飲杯熱紅茶 ~

今日用咗兩個幾鐘就搞掂哂個長命 Report   好少可咁快   哈哈 ~

放工去買雞骨草比里奧大人   又可以同佢一班車番屋企 ~

里奧大人就去買外賣   我就番屋企沖涼先 ~

我沖完涼就見到里奧大人   佢話我都沖咗好耐   咁又係呀   我每月一到會沖好耐呢   個人會舒服好多架 ~

咁等埋里奧大人沖涼先食   我叫佢開飯盒比我影相   佢話估唔到喎   因為我次次係最期待開飯盒影相   哈哈   無計啦   今日食得好少嘢   個人真係無咩力咁呀 ~

食完就叫佢抹枱   再將啲白飯轉去玻璃盒放雪櫃   問佢忙唔忙 ?!   佢話好忙   哈哈   我話平時我仲要洗埋碗添呀   所以呢   我唔舒服佢一定會買飯唔會煮飯   因為前前後後要做好多嘢呢   佢一定唔會   呵呵 ~

8 點幾同里奧大人一齊睇 "盡情吃 用力愛"   今集有啲悶   我真係差啲瞓着咗   里奧大人都話悶   咁都好   我初初以為我唔多舒服   所以無心機睇呀   哈哈 ~

臨瞓先再沖多次涼   之後里奧大人拍門叫我   佢以為我暈咗   哈哈   因為我無同佢講沖涼呢 ~

今晚 11 點都自己瞓先   希望每月一到快啲完啦   早瞓得嚟又瞓得唔好   真係好慘囉   哈哈 ~

韭菜鍋貼 + 招牌鍋貼 & 麵線套餐 (外賣) ( 5-JUL-2022 )

( 5-JUL-2022  TUE )

尋晚半夜個肚都痛   雖然無以前咁勁痛   但都唔舒服囉   所以都沖咗 2 次熱水涼   係舒服好多嘅 ~

今朝 8 點起身   9 點先番到菇場   不過都無咩胃口食早餐   咬兩啖麵包就收工 ~

菇場唔忙   但個肚冤住痛囉   好人好姐就會覺得 Lunch Time 太早   但唔舒服嘅時候   就覺得 11 點 45 分 Lunch Time 係非常好   可以早啲休息   哈哈 ~ 

Lunch Time 一到即瞓喇   一瞓就瞓到 12 點半添呀   我仲要係一合埋眼就可以瞓呢 ~

食埋朝早件奶醬多   唔好浪費啦   雖然真係勁唔想食   哈哈 ~

仍然唔忙啦   更加想快啲放工 ~

放工諗住搭的士番屋企   點知船頭話塞車   所以我即搭番巴士喇   大佬   見住咪錶係咁跳   真係肚又痛心更痛呢   哈哈 ~

今晚仍然係里奧大人買外賣番屋企   我可以沖完涼先開餐 ~

呢兩晚都唔做家務   真係要留番條命仔呀   所以叫里奧大人幫手開機洗衫同晾衫   同埋叫佢自己拎生果出嚟食   我照顧唔到佢住喇   哈哈 ~

睇多陣電視   今晚 10 點半瞓覺添呀 ~

滑蛋粟米魚塊 + 菠蘿咕嚕肉 + 叉燒拚油雞 (外賣) ( 4-JUL-2022 )

( 4-JUL-2022  MON )

感恩瞓得唔錯   雖然半夜去咗一次廁所 ~

今朝本來 7 點 50 分起身   諗住瞓多啲   但 7 點 40 分都醒咗   所以都起身番工 lu ~

天陰陰好在無落雨   不過我都買埋 Lunch 先去買早餐   咁樣中午可以休息下 ~

好掛住 Berry 女呀   搵晚要同佢 Face Time   哈哈哈哈   

早餐食奶醬多   今次啲麵包好薄身   我覺得幾好 ~

7 月新開始

菇場忙呀   實在難得 ~

Lunch Time 同阿齋傾咗半個鐘頭   佢問我做咩唔食嘢 ?!   我話每月一到呀   佢都話上次先嚟完   今次咁快 ?!   我話食藥間唔中會係咁   有時嚟得密有時唔嚟囉   同埋佢都知我以前係勁痛   佢話初初嚟做   見我有時縮埋一嚿瞓覺   臉又青哂咁   所以知我每月一到係好辛苦呢   哈哈 ~

差唔多 12 點 45 分先食個腸仔包   其實都無咩胃口食   個人非常攰可惜又瞓唔到 ~

忙多陣就可以抖下   個肚有啲唔舒服喇   勁想快啲番屋企   哈哈 ~

放工即走   今晚要里奧大人買外賣番屋企呀 ~

沖埋涼就開餐   食完就睇陣電視   今晚 11 點都自己瞓先喇 ~

帶子花枝炸拚豆卜魚腐 + 雞粒炒飯 ( 3-JUL-2022 )

( 3-JUL-2022  SUN )

今朝 9 點半自然醒   咁可以慢慢嘆下早餐   之後拖埋地就沖涼喇 ~

又每月一到   怪不得成日個肚扯住啦   唉 ~

感恩身體狀況都 OK   始終今朝有事奉係比較忙   唔想有影響呢 ~   

12 點 45 分散會   之後要去買襪   再去 Taste 買餸   最後買埋午餐就番屋企喇 ~

同里奧大人一齊番到屋企   所以食完先沖涼呢 ~

我無咩胃口   所以食剩大半碗   要留番今晚再食   之得唔買啦   嗚嗚

里奧大人 4 點幾瞓晏覺   我差唔多 5 點先瞓   瞓到半個鐘都唔錯 ~

其實我勁攰   但買咗餸同埋尋晚醃咗雞柳   所以今晚點都要煮囉   好在 7 點左右可以開餐 ~   

是日晚餐 - 帶子花枝炸拚豆卜魚腐 + 雞粒炒飯

帶子花枝炸拚豆卜魚腐 - $48/磅   我每樣買半磅   今晚焗少少算喇   我完全無胃口食嘢 ~

雞粒炒飯 - 材料有 5 件雞柳 + 3隻雞蛋   炒埋又一大碟   好在里奧大人聽日帶飯   哈哈 ~

洗埋碗都即沖涼喇   每月一到真係零舍攰 ~

睇多陣電視   之後個肚有啲痛   所以今晚 11 點唔夠都瞓喇 ~

蒸臘潤腸拚臘鴨肶 + 蕃茄薯仔粟米湯 ( 2-JUL-2022 )

( 2-JUL-2022  SAT )

里奧大人 7 點起身睇新聞   知道仍然掛 8 號風球 (暹芭)   咁可以繼續瞓   原來家姐 6 點 40 分已經喺群組通知 8 號風球至下午 4 點   里奧大人問家姐做咩咁早起身 ?!   家姐話驚里奧大人會起身番工   所以幫佢睇定   哈哈 ~

一瞓就瞓到 10 點 15 分   之後起身整早餐 lu ~

我同里奧大人講話真係整定   我本來唔係買 1 條糙米芝士包㗎   因為都驚食唔哂   點知今朝可以一齊食   哈哈 ~

食完抖陣就熨衫   因為我好想郁下   今朝真係冷氣都唔駛開呀 ~

熨完就睇下電視   差唔多 2 點食午餐   當然都係我煮啦   如果我唔攰   其實一日煮 3 餐都無問題   但唔可以日日係咁煮   我會覺得好悶同埋好攰囉 ~

 今日無得探 Berry 女喇

做下小清潔   之後咁又執下櫃桶啦   原來里奧大人有 60 對新襪   真係買下買下唔多覺   只怪我收納得太好   哈哈哈哈 ~

搞掂哂就沖涼   今晚 7 點都可以開餐   快快食完就可以休息喇 ~

是日懶餐 - 蒸臘潤腸拚臘鴨肶 + 蕃茄薯仔粟米湯

蒸臘潤腸拚臘鴨肶 - 今餐簡直係冬天餸   哈哈   無計啦   想清埋隻眼鴨肶呢 ~

蕃茄薯仔粟米湯 - 仲飲多晚先飲得哂   始終有薯仔比較飽肚   唔飲得咁多   哈哈 ~

洗埋碗就抖半個鐘   之後同里奧大人跳 2 Part 舞   呢排想流多啲汁   始終開冷氣個人好濕   要排下毒   哈哈 ~

家姐喺其奧買嘅開心果脆糖   新鮮最好味   所以一開要快啲食哂囉

沖埋涼又睇下電視   今晚 11 點左右都瞓   算早啦   哈哈 ~

蒜蓉焗豬扒 + 蕃茄薯仔粟米湯 ( 1-JUL-2022 )

午餐食唔哂   所以今晚要食埋去喇

( 1-JUL-2022  FRI )

今朝瞓到 9 點半自然醒   咁起身煮早餐喇   里奧大人話唔好煮   我話難得假期就煮啦   我又唔攰 ~

食完抖陣   11 點 45 分左右出發去 Megabox   今日會員有 9 折優惠呀   希望買到嘢啦   哈哈 ~ 

里奧大人本身諗住只買 3 Pack 襪   點知又忍唔住買咗 4 條褲   不過特價 $139 係抵嘅   同埋係佢鍾意嘅質地呢 ~

之後到我想買個化妝袋喇   不過 $99 好貴咁   但里奧大人話買啦   咁我唔客氣喇 ~

咁繼續周圍行啦   終於買到行山鞋喇   之前好耐都唔出   仲以為唔再出添 ~

今次都係做特價 $599/對   買滿 $1,000 仲有 $50 Cash Coupon   所以買咗 2 條冰手巾   哈哈 ~

買完就去儲積分   職員叫我換實惠 $50 Cash Coupon   咁我都覺得好過儲分   成日換埋啲唔待駛嘢咁 ~

諗住買 Camel 水樽啦   都只係 $119   但最後買咗護腰墊要 $399   不過減 $50 感覺抵好多咁   哈哈   話哂都可以用 10 年嘛 ~

再去多次儲分就坐 Shuttle Bus 去德福   里奧大人喺馬莎買 3 件 Tee   感恩仍然係 $99/件呀   咁我都買咗對特價鞋 ($325)   落雨可以着呢 ~

之後里奧大人要我買 Boot   佢叫我唔好着水靴   因為我成日話好重同好焗   所以特登要我買對防水 Boot   我揀咗粉紫色呀   着起來嚟都好百搭   最感恩係特價 $998 會員再有 95 折   里奧大人話抵呀   因為接近半價咁滯呀 ~

所有任務完成就即去買午餐   因為開始橫風橫雨喇   好在走得早咋 ~

番到屋企都 3 點   里奧大人都開始餓喇 ~

食完就煲湯   搞掂哂就即沖涼喇 ~

里奧大人問我今日開唔開心 ?!   我話 200% 開心呀   之後我問番佢開唔開心 ?!   佢話我開心佢就開心   哈哈   不過佢次次見我買嘢開心   佢又真係好開心咁㗎   但最緊要係我要着   哈哈 ~

OJisan 大叔幾可愛   哈哈

當時無為意係粉紅色添   以為全個都係粉紫色呢

真係有冰冰哋嘅感覺   行山用真係唔錯呢

睇下 Youtube   差唔多 6 點半先煮嘢   今晚 7 點半先開餐   因為太晏食 Lunch 了 ~

終於掛 8 號風球喇   其實中午嘅天氣都開始轉差   感覺都似打得成咁呢 ~ 

是日懶餐 - 蒜蓉焗豬扒 + 蕃茄薯仔粟米湯

蒜蓉焗豬扒 - 清埋去啦   唔係又唔想煮㗎喇 ~

蕃茄薯仔粟米湯 - 好耐無飲   覺得勁好味   哈哈 ~

洗埋碗就抖下   之後同里奧大人跳 1.5 Part 舞 ~

又抖半個鐘   開埋機洗衫就即沖涼喇 ~

今日出咗成日街咁   所以有啲攰   11 點幾都瞓 lu ~