水牛城雞翼 + 福花 ( 7-NOV-2022 )

( 7-NOV-2022  MON )

今朝瞓到 9 點半自然醒   咁就起身煮早餐呢 ~

食完就開機洗衫   之後沖涼休息   差唔多 11 點就出發去驗眼喇 ~

已經 3 年無驗眼喇   所以我今年一定要去驗眼 ~

12 點半到我睇喇   我同醫生講話驚白內障   始終依家咩都年輕化嘛   加上眼得一對   所以好驚囉 ~

之後放大瞳孔再 Check   要等起碼 10 分鐘 ~

醫生話我對眼仲好過之前   感謝主   真係估唔到啦   好在里奧大人陪我入去  唔喺佢以為我講大話呀   哈哈 ~

咁有時我一起身對眼好痛   醫生話係眼乾   所以醫生開支滋潤眼藥水比我喇 ~

本身里奧大人話都想同我同一日一齊 Check   我話之得問你啦   之後我記得唔同一日 Check 嘅原因   係因為要放大瞳孔   睇嘢唔清楚㗎   一定要人扶住   無可能大家盲中中咁出街嘛   好危險呢 ~

1 點鬆啲可以走人   咁去裕華行陣   里奧大人話各自行  我心諗佢想睇咩呢 ?!?!   之後到我 Join 番佢嘅時候   我話想睇下有無蘋果西打   佢話無呀   頭先一嚟到已經睇咗   呢下又幾令我感動噃 ~

佢講過我實在太多嘢鍾意食   唔會記住   但如果知我好恨食好恨飲   佢就一定記得   因為唔多   哈哈 ~買咗啲零食就走人 ~

一出街就覺得對眼好刺痛   因為太曬呀   之後里奧大人拎副黑超比我   佢行街嘅背囊係長期袋住我副黑超   因為嗰時行山要嘛   所今今日好在有里奧大人幫陪我咋 ~

特登去廟街嘅髮品店買頭髮 Lotion   點知無呢個牌子   咁唯有叫家姐幫我買了 ~

@ 廟街

差唔多 1 點 45 分就去食午餐   好在間餐廳得 2 個食客   咁講好驚比人打   哈哈   所以就入去食喇 ~

八番壽司定食 (配叉燒烏冬) ($88) - 我一定食呢個餐   因為樣樣都鍾意食

壽司好新鮮

烏冬滑嘟嘟

咖哩豬扒飯 ($75) - 里奧大人就鍾意食咖哩   但豬扒就要我食多啲啦   怕熱氣呀佢

個 Set 有麵豉湯   咁我都唔客氣了   哈哈哈哈

食完行陣都坐巴士番屋企喇   坐車嘅時候   有個婆婆望住我又同我笑   咁因為我又口罩又黑超   所以我點下頭啦   之後佢問我眼鏡幾錢 ?!   我話好似 $400 左右   我特價先買咋   婆婆話佢幾十年前喺美國叫個朋友買   當時 $6 美金   我話依家古老當時興啦   之後又傾下偈   婆婆把聲好溫柔又 Nice   將來我係咁就好了   哈哈   里奧大人仲以為我係識個婆婆   話做咩咁好傾   哈哈 ~

3 點左右番到屋企   之後即去做運動   做咗半個鐘就番屋企喇 ~

里奧大人瞓陣覺   我睇睇下電視都瞓咗半個鐘   起身都 5 點   咁熨下衫啦 ~

小王子麵 ($30) & 2 包話梅薑 ($40) / 辣椒粉好似 $13.8

估唔到里奧大人話買包王子麵   因為真係百年一遇話買零食   我真係以為聽錯㗎   因為佢中午輕食   所以有時 5 點左右好餓   細細包零食最好   唔會飽又頂到肚

第一次由里奧大人配給零食比我呀   我只得 6 包咋   哈哈

呢支要 $110   希望滴咗會滋潤眼睛啦

抖陣就預備晚餐   今晚 7 點唔夠都可以開餐喇 ~

是日晚餐 - 水牛城雞翼 + 福花

水牛城雞翼 - 今次就好味喇   連里奧大人都話好味   多謝水牛城醬料   哈哈 ~

福花 - 加幾粒魚蛋   咁樣無咁悶 ~

洗埋碗就沖涼   之後睇下電視 ~

今晚 10 點 15 分就瞓覺   真係勁早呀 ~

黑椒西冷牛扒 + 福花 ( 6-NOV-2022 )

( 6-NOV-2022  SUN )

今朝同里奧大人一齊番工   因為我起身都精神呀 ~

依家朝早食唔落太多嘢   加上本身早餐份量夠多   所以 Share 食最好 ~

食完早餐就去幫手   之後就番學喇 ~

崇拜完之後就行陣   咁買埋午餐就番屋企 lu   因為里奧大人已經放工 ~

食剩 1/3   留番今晚再食   嘻嘻 

約阿妹 2 點 45 分一齊搭的士去婚禮場地   等咗 10 分鐘的士呀   好在頭先再預早 15 分鐘咋 ~

5 點左右完成大婚儀式   我哋唔影相喇   因為起碼要等一個鐘   咁直接搭的士番屋企算喇 ~

抖陣就預備晚餐   今晚 6 點 45 分可以開餐喇 ~ 

是日晚餐 - 黑椒西冷牛扒 + 福花

黑椒西冷牛扒 - 1 磅 $40   但我只買咗 $29   不過都有兩大塊㗎   所以仲以為已經 1 磅添 ~

福花 - 呢個菜其實都好味道   同埋易咬   哈哈 ~

洗埋碗就沖涼休息   今日早起又周圍滕有啲攰 ~

睇睇下 Youtube 其實都瞓着咗咁   所以今晚 10 點半都瞓覺喇 ~ 

蔥油雞絲炒麵 + 鳳城水餃拚招牌鮮蝦雲吞 + 紅油拍青瓜 + 炸角皮 + 泡菜豆腐湯 + 杏仁片牛角酥 ( 5-NOV-2022 )

( 5-NOV-2022  SAT )

今朝 7 點半都醒咗   咁我喺床上面睇手機   里奧大人話望住我就話嚇死佢   可能啲光反射喺我塊臉度好恐怖   哈哈 ~

可以早一班車到家姐屋企   家姐都話今日都好早下   哈哈哈哈 ~

家姐 10 點鬆啲番到屋企   我可以食早餐喇 ~

拉絲菠蘿包 ($20) + 凍奶茶 ($18) - 我話咁買都貴喎   咁價錢可以食一個茶記早餐呀   家姐話買比妳食唔貴啦

一啲拉絲感覺都無

URBAN 嘅麵包都好味㗎   所以家姐買咗 3 個杏仁片牛角酥   咁我同家姐 & 里奧大人每人一個

我以前都食芝土火腿菠蘿包   鹹鹹甜甜感覺勁正   家姐問有無生痱滋 ?!   我話又無喎 ~

食完又傾下偈   家姐講糟糟朋友嘅事   我話呢個朋友係咪之前點點點   家姐好愕然話點解我會記得 ?!   我話可能聽得少啦   咁咪易記得囉   家姐話唔關事   話我好勁   我話勁乜鬼呀   讀書咁好記性就話叻啫 ~   

好在佢鍾意食零食   唔係好難會見到佢   哈哈   

工人喺度先可以咁影咋

佢都應該唔多耐煩定啦   哈哈

傾傾下偈   家姐話我口唇好白   我話之前 8 卦先咁講   可能前排失血過多   點補都仲係差啲啲咁囉 ~

之後講開零食   我話包日本脆脆好味   但真係唔好再買比我   一大包食咗幾次先食得哂   真係食到驚   始終里奧大人又唔多食熱氣嘢嘛 ~

家姐話估唔到我話貴呀   我話友誼價 $78 買包零食都貴啦   正價要 $100 肯定唔會買添呀   之後家姐同同事講話覺得自己好衰   原來阿妹咁鍾意食但覺得貴唔捨得買   佢居然唔知道   覺得個妹結咗婚   有老公關心就得   自己無關心個妹咁   仲同同事講話有筍嘢記得即刻話佢知   等佢買比阿妹   哈哈 ~

不過佢同事都話   自己食可能覺得貴   但買比屋企人食係唔會覺得貴   呢樣我就絕對認同   所以我好鍾意買嘢比屋企人食   佢哋開心我就更加開心㗎 ~

Berry 依家成日呢喺梳化底   真係超級勁懷念佢細細隻嘅時候   走唔出我手指罅   哈哈

對眼好似好精神

一秒唔夠就眼 "Dup Dup" 咁

係都唔上梳化

好似好多粒蔥黐喺碗邊咁   哈哈

坐到 1 點左右就走喇   番到屋企仲未見里奧大人   所以我去街市買下嘢先喇 ~

差唔多買完   里奧大人已經番到屋企   我叫佢食個牛角酥   佢話點解無咗脆卜卜啲邊嘅 ?!   我話今次係杏仁片牛角包   所以無芝士片呢   無諗過佢會咁問   平時食嘢好少記得之前食咩家嘛 ~

開機洗衫就去做機   之後大清潔屋企同廚房   搞掂哂就即沖涼 ~

抖到 5 點幾都仲未餓   個菠蘿包真係好抵食   可以當兩餐   哈哈哈哈 ~

就預備晚餐   咁樣唔駛咁趕   不過今晚都要 7 點開餐呢 ~

是日晚餐 - 蔥油雞絲炒麵 + 鳳城水餃拚招牌鮮蝦雲吞 + 紅油拍青瓜 + 炸角皮 + 泡菜豆腐湯 + 杏仁片牛角酥

蔥油雞絲炒麵 - 尋晚食剩嘅口水雞   同埋有盒蔥油   咁唔好浪費   走哂啲油就用嚟炒麵   咁樣都好味道㗎 ~

鳳城水餃拚招牌鮮蝦雲吞 - 又清埋去喇   無放冰格唔可以擺咁耐㗎 ~

紅油拍青瓜 - 食埋呢 3 條就清哂   但我仍然會再買   哈哈哈哈 ~

炸角皮 - 好在今晚食完無喉嚨痛咋   唔係又驚餐死 ~

泡菜豆腐湯 - 突然好想飲呀   所以即去買材料呢   今次無咁辣   但里奧大人反而鍾意 ~

杏仁片牛角酥 - 聽日唔想整嘢   所以今晚焗埋食啦 ~

洗埋碗就沖涼休息   睇陣 Youtube 又睇陣電視 ~

今晚 10 點 45 分都瞓喇   出咗成日街又做咗成日嘢好攰呀   哈哈 ~

口水雞 + 鳳城水餃 & 招牌鮮蝦雲吞 + 炸魚皮 (外賣) ( 4-NOV-2022 )

( 4-NOV-2022  FRI )

感恩又一覺瞓天光呀   所以 7 點都醒醒哋了   但試下仲瞓唔瞓到   不過都係瞓唔到到   咁 7 點 20 分都起身喇 ~

沖埋涼就去買麵包   里奧大人隻腳仲痛呀   唔想佢拐下拐下去買呢 ~

早餐食台式蔬菜培根 + 餐蛋包   但食剩個餐蛋包   其實我買嘅時候都想買一個就算   但驚里奧大人唔夠飽囉 ~

菇場忙啦   不過日日係咁都唔錯㗎 ~

Lunch Time 出去行咗陣   之後買鯪魚球米粉番菇場慢慢食 ~

最搞笑家姐要我幫佢整嘢   不過我話想食咗嘢先   佢問我係咪好肚餓呀 ?!   我話唔係   只係啲米粉已經索哂啲湯   再唔食就更難食呢   哈哈 ~  

今次落少咗麻辣醬   當堂無咁好味

仍然忙爆呀   感恩放工前開行 Turbo 搞掂呢 ~

放工買埋餸先番屋企   所以今晚要簡單啲   哈哈 ~

是日懶餐 - 口水雞 + 鳳城水餃 & 招牌鮮蝦雲吞 + 炸魚皮

口水雞 - 見 $35 就買一份試下   估唔到都幾好味呢噃   不過食唔哂   咁聽晚可以整雞絲炒麵 ~

鳳城水餃 & 招牌鮮蝦雲吞 - 最緊要快   所以每樣買半打   今晚都只係食半打 ~

炸魚皮 - 我食咗 2 件咋   無耐就喉嚨痛囉   真係勁驚   因為我好少會咁嘛   之後里奧大人話佢成日係咁   我終於明白佢喉嚨痛嘅感覺   真係好辛苦 ~

洗埋碗就即沖杯積熱清   之後就沖涼休息 ~

頭先我買咗 2 磅人參果   咁問家姐要唔要 ?!   佢話邊度買 ?!   咁我都知佢會要啦   如果唔係佢會直接 Say No   之後佢真係話要呀   哈哈 ~

差唔多 10 點幾   喉嚨先唔痛咋   真係驚咗成晚   哈哈 ~

睇 Youtube   睇到 11 點幾先瞓呀   今晚無咩睡意咁 ~ 

手包鮮蝦卷 & 手包墨魚卷 (外賣) + 老干媽秀珍菇 + 菠菜拚銀絲旺 ( 3-NOV-2022 )

我將麵包皮做麵包粒   唔好浪費嘛

( 3-NOV-2022  THU )

感恩一覺瞓天光呀   今朝鬧鐘未響都起身   咁都好呀   可以多啲時間整早餐呢 ~

早餐仍然係醬占包   麵包 Soft 都好食㗎   但出街一定食多士   因為唔係間間麵包都 Soft 呢   哈哈 ~

8 卦話我臉色好白   問我係咪以前搽咗胭脂 ?!   真係搞笑啦   我都唔會化妝嘅   不過可能貧血   個人無咩血色囉 ~

菇場仍然忙呀   時間過得超級快 ~

Lunch Time 出去行 15 分鐘   之後再買豬軟骨酸辣米線番菇場慢慢食 ~

尋晚特登開 1 罐辣油沙甸魚加半碗韓國即食白飯   咁里奧大人可以有飯帶   佢話沙甸魚都好味   咁又好呀   我下次可以再買

我話 Berry 蛇王啦   因為家姐 WFH   佢一定坐喺家姐腳底   好似陪住佢咁㗎   勁可愛呢

仍然忙呀   用新 System 真係超級超級超級勁煩   真係整到人都顛   搞到我好大壓力咁呀 ~

有人請食蛋撻   咁就好喇   因為我都想抖下   

放工即走   番到屋企都即煮晚餐   因為里奧大人已經番到屋企了 ~

是日懶餐 - 手包鮮蝦卷 & 手包墨魚卷 (外賣)  + 老干媽秀珍菇 + 菠菜拚銀絲旺

手包鮮蝦卷 & 手包墨魚卷 (外賣) - 買 1 磅有 10 條   所以分兩餐食最好   不過就真係由新鮮變成急凍呢   哈哈 ~

老干媽秀珍菇 - 唔想就咁淥熟呀   所以加老干媽撈勻去   都好好食㗎 ~ 

菠菜拚銀絲旺 - 終於食哂所有菜   雪櫃太凍   唔想擺咁耐 ~

洗埋碗就做下小清潔   之後都沖涼喇 ~

扭親隻左腳   所以無得做運動喇   咁我都唔做   反正今晚我都想休息下 ~

睇完電視都 9 點半   咁睇 Youtube 啦   睇睇下都瞓咗   一起身已經 10 點 15 分   咁我都上床瞓覺喇   呢排好攰   可能用新 System 太傷神呢 ~

黑毛豬午餐肉辛辣麵 + 菠菜拚福花 ( 2-NOV-2022 )

( 2-NOV-2022  WED )

今朝 7 點 10 分都醒咗   仍然 3 號風球   不過話 12 點至 2 點改發 8 號風球   咁即係番半日喇 ~

咁都起身整早餐 lu   早餐食醬占包   間唔中食都唔錯   我唔想成日都腸仔包   好似好無益咁 ~

菇場忙呀   我要快啲做   因為下午應該放工啦 ~

Lunch Time 去萬寧行下   順便買麵包   之後買埋燒賣粉果就番菇場了 ~

番到菇場只係 12 點   食完就收到公司群組訊息   話可以即刻放工   當時係 12 點 20 分   所以頭先溫總話不如大家做到 12 點半   之後放工好過啦   有啲同事啱啱買完 Lunch 番公司咋 ~

 

咁我都即走喇   我已經係第 4 個走   啲人真係準備就緒   哈哈 ~

番到屋企都沖涼   之後里奧大人都番到屋企 ~

里奧大人 2 點左右瞓陣   估唔到我都瞓咗 20 分鐘   哈哈 ~

差唔多 3 點就去做機   做半個鐘啦又   今日多時間嘛 ~

睇下 Youtube 又到 5 點幾   係時候預備晚餐喇   今晚 6 點半可以開餐呢 ~

是日懶餐 - 黑毛豬午餐肉辛辣麵 + 菠菜拚福花

黑毛豬午餐肉辛辣麵 - 打風呀   食呢個打風餐最方便   不過我都係會焗熱咗啲午餐肉嘅   我覺得香口好多呢 ~   

菠菜拚福花 - 細半棵福花再加幾棵菠菜   其實咁樣都幾好   唔駛食一樣菜咁悶   哈哈 ~  

洗埋碗就開機洗衫   沖完涼就食麥芽糖餅   好想快啲清哂啲麥芽糖呀 ~

依家每晚都會追緊 "下流上車族"   估唔到幾好睇   連里奧大人都話要睇呀 ~

天氣涼涼地都唔錯   今晚又係 10 點 45 分瞓覺喇 ~

福花雙椒炒豚肉 ( 1-NOV-2022 )

 

( 1-NOV-2022  TUE )

感恩瞓得唔錯   如果唔駛去廁所就更好   哈哈 ~

早餐食芝士火山包 + 芝士腸仔包   好好味呀 ~   

菇場忙呀   超級開心啦 ~

11 月喇   2022 年好快又成為過去了

Lunch Time 出去買菜   之後又周圍行下   行到 12 點半都番菇場喇 ~

今日食 Flakes + 燕麥奶   因為包奶今日到期   呵呵 ~

仍然超級忙呀   真係做到 5 點 27 分呀   勁驚遲放工   哈哈 ~

今晚超勁大風呀   吹到成隻顛雞乸咁   好在只係番屋企咋 ~

番到屋企都即預備晚餐   7 點左右可以開餐 ~   

是日晚餐 - 福花雙椒炒豚肉 

福花雙椒炒豚肉 - 因為得幾塊豚肉   所以加多 2 條豬肉腸   其實半個福花同紅黃椒都好大盤   不過里奧大人帶飯   咁比啲肉佢食下咁呢 ~

洗埋碗就開機洗衫   今晚唔做運動喇   想喺屋企休息下 ~

睇多陣電視同聖經   11 點唔夠都瞓 lu ~