鹽酥雞粒肉燥飯 (外賣) ( 7-JUL-2023 )

( 7-JUL-2023  FRI )

今朝瞓到 9 點 45 分起身   感恩個肚無痛   但隻腳就仍然好痛 ~

沖完涼就食早餐   今日全日都會 "long" 住隻腳   希望會好啲啦 ~

今朝叫里奧大人幫我買腿蛋包   但原來係餐蛋包   之後我話點解唔係腿蛋包嘅 ?!   佢話因為無哂腿蛋包呀   一係佢一陣再買腿蛋治比我食   我話梗係唔駛啦   為咗個包滕嚟滕去咩   我有包食已經好好啦   但佢嘅舉動真係令我好感動 ~

睇睇下電視都瞓咗覺   可能無飲咖啡   不過我都唔會飲啦   喺屋企灘抖就真係唔需要提神呢   一眼瞓就去瞓就得 ~

里奧大人 1 點半番到嚟   佢買咗滑蛋豬扒飯   咁我有少少胃口   因為見到幾塊黃蘿蔔   哈哈 ~

食完就灘抖下   里奧大人就番工   真係辛苦佢了 ~

里奧大人 6 點放工   我叫佢番嘢食番屋企   感恩我有胃口   所以食番今日同尋晚嘅飯餸就可以了 ~

今晚又要里奧大人開機洗衫   我一唔舒服   佢就做咩都快啲咁㗎   因為佢驚我忍唔住走去做呢 ~

要慰勞一下里奧大人   所以叫佢食雪糕   哈哈  

抖到 9 點就沖涼   感恩有力做啲小清潔   我習慣每日都要小清潔廁所嘛   呢兩晚無做   硬係周身唔自在咁   真係奴才命   哈哈 ~

今日真係除咗去廁所之外   全日灘抖   但其實隻腳一掂地都痛   希望快啲好番啦   家姐同船頭都話唔知幾時會唔痛㗎   咁我都唔理得咁多   最緊要一痛就要比隻腳休息就得㗎喇   始終無得斷尾係煩啲嘅 ~

今晚 10 點半都有睡意   所以即刻去瞓覺喇 ~         

涼瓜斑腩 (外賣) ( 6-JUL-2023 )

( 6-JUL-2023  THU )

尋晚個肚都係痛   仲有嘔   我又唔可以下下沖涼   因為我隻腳好痛   支撐唔到咁耐 ~

7 點半鬧鐵響   我直接 Whatsapp 同西瓜請病假   唔想 9 點又再起身打番菇場請假 ~

一路係咁瞓   之後里奧大人中午番咗嚟   因為我無胃口呀   佢就買車仔麵就算喇 ~

里奧大人食完抖陣就番工   我就繼續瞓到 4 點半   瞓得多條腰又痛   所以灘喺梳化睇電視 ~

約咗 5 點半睇醫生   諗住自己行去   但里奧大人啱啱番到屋企   咁可以陪我去喇   始終我隻腳好痛   要慢慢行   咁里奧大人扶住我會好啲嘅 ~

醫生話要我照 X-Ray   話我腳板同腳趾痛一掂地就好痛   唔似筋膜炎喎   但我想講上次又係你話筋膜炎噃 ~

之後佢話要我唔好行   要好似大爺咁伸直隻腳唔好做嘢   所以我叫佢比多日假我休息   雖然菇場唔忙   但我一有嘢做嘅時候就要行嚟行去嘛   我真係痛到想死囉 ~

番到屋企即沖涼休息   我仍然無胃口   所以叫里奧大人去買嘢食   佢就等我沖完涼先去買   因為佢驚我暈鬼咗   因為我沖好熱嘅熱水涼   有次沖完出嚟係有少少虛脫嘅感覺 ~

瞓咗成日   個人舒服好多   個肚都無咩點痛   感恩感恩 ~

叫里奧大人開機洗衫   雖然我做唔到   但可以聲控   哈哈 ~

今晚 9 點半都瞓覺   食完藥個人係好攰呢 ~                   

豆豉鯪魚炒油麥菜苗飯 ( 5-JUL-2023 )

( 5-JUL-2023  WED )

感恩一覺瞓天光   但又筋膜炎啦   呢排身體狀況真係唔多理想添 ~

早餐仍然食朱古力瑞士卷   應該呢個星期都食㗎喇   無咩心機整嘢 ~

好慘呀   真係行十步要停下先可以再行   腳痛真係好慘   嗚嗚嗚嗚 ~

菇場唔忙呀   但個肚無啦啦又扯住痛   真係每月一到   睇嚟我都開始食番藥   我唔想又痛呀   嗚嗚 ~

好在西瓜唔喺度   我可以托住個頭瞓下   咁樣舒服好多呢 ~

Lunch Time 一到   即拎枕頭出嚟瞓添呀   真係瞓到 1 點 05 分   瞓醒真係好好多 ~

感恩仲有啲餓    其實好想食杯麵   因為熱辣辣   但已經唔係 Lunch Time   所以食 Fakes + 豆奶算喇 ~

唔忙就灘抖下咁啦   隻腳真係痛到不得了   行幾行要抖   我覺得痛到想死呀   嗚嗚 ~

放工即走喇   我要搭的士番屋企   真係痛到唔想行 ~

番到屋企即沖涼休息   我食唔落嘢呀   里奧大人就食番今日嘅飯盒   因為佢中午同同事出去食   所以變咗今晚要食番呢   唔好浪費嘛 ~

雖然 8 點幾   但個肚都開始唔舒服   咁即瞓覺啦   之後聽到里奧大人手機響   係家姐打比佢   我以為家姐有嘢搵佢啦   原來家姐話 7 點 50 分 Whatsapp 問我食咩晚餐 ?!   8 點見我唔覆   就喺群組問我係咪手機叉緊電 ?!   見我唔覆就估我唔舒服囉 ~

真係好邪   我就係唔想話佢知唔舒服   但又真係好似感應到我唔舒服咁 ~ 

豆豉鯪魚炒油麥菜苗 ( 4-JUL-2023 )

 ( 4-JUL-2023  TUE )

尋晚去咗次廁所   好快就瞓得番   不過 7 點鐘都醒醒地   但懶床到 7 點 15 分都起身   咁都好   有時間醃牛肋條   嘻嘻 ~

早餐食朱古力味瑞士卷   少咗 Cream 喎   依家食嘢真係樣樣都縮哂水 ~

菇場 3D   個個盡情上網   所以特別特別靜 ~

Lunch Time 出去買菜   之後買雞翼紅薯粉番菇場 ~

忙咗陣就見到西瓜   即係唔可以 3D 了 ~

放工即走   番到屋企都即預備晚餐喇 ~

諗住早啲食早啲休息   但里奧大人 6 點 45 分先番到屋企 ~

是日晚餐 - 豆豉鯪魚炒油麥菜苗

豆豉鯪魚炒油麥菜苗 - 買油麥菜苗方便呀   因為油麥菜太大棵   驚人唔都知妳去買菜咁   哈哈 ~

洗埋碗都即沖涼休息   今晚個肚有啲扯住痛   所以唔做家務了 ~

睇電視睇到 10 點   但個肚仲係扯住痛咁   咁再沖多次熱水涼   今晚 10 點 15 分都即瞓覺了 ~

香煎蓮藕餅 & 生煎鍋貼 (外賣) + 菜心苗 ( 3-JUL-2023 )

( 3-JUL-2023  MON )

尋晚去完廁所   都好快瞓得番   之後瞓到咁上下又好似想起身   但個天仲黑嘛   所以望個鐘原來只係 6 點 40 分   咁我都再瞓啦   瞓到 7 點 20 分自然醒 ~

早餐食芝士條   我覺得好味呀   如果屋企同菇場附近有東海堂就好啦 ~

焗熱埋比里奧大人   但我會用蒸架托住   咁麵包底部唔駛濕哂呢

菇場忙呀   差唔多 11 點先搞掂 ~

話咁快   下半年又開始了

Lunch Time 出去買菜   再買鯪魚球米都即番菇場喇   個天又想落雨咁 ~

突然好忙呀   好在做咗個幾鐘就搞掂 ~

放工即走   今晚只係焗同蒸   咁就快手好多呢 ~

是日懶餐 - 香煎蓮藕餅 & 生煎鍋貼 (外賣) + 菜心苗

香煎蓮藕餅 & 生煎鍋貼 (外賣) - 中午買㗎   所以番到屋企一定要焗熱   鍋貼蘸陳錯真係好味   下次買 8 隻都好  呵呵 ~   

菜心苗 - 呢間嘅菜心苗無咁甜   定係依家開始無咁甜呢 ?!

洗埋碗就開機洗衫再做大清潔   搞掂哂就即沖涼喇 ~

睇陣 Youtube   10 點鬆啲就開始靈修   不過今晚飲咗珍珠奶茶   所以 11 點先覺得眼瞓呀 ~

意式風情普通批 (外賣) ( 2-JUL-2023 )

依家無得轉薄批   所以我轉手藝薄餅   因為口感係煙煙韌韌   食剩兩件留比里奧大人聽日做 Lunch 

 ( 2-JUL-2023  SUN )

今朝同里奧大人食早餐   之後就去佢公司幫手喇 ~

幫到 10 點都要走喇   因為我要去睇醫生 ~

我隻腳仲有啲痛   但感恩喺床落地嘅時候已經唔痛   不過仲係有啲腫   都係睇下醫生好啲 ~

左邊小腿有個位置紅紅哋   一掂就痛到飛起呀   醫生話有無按摩呀 ?!   我話無喎   之後醒起尋晚我用刮沙刮小腿呀   真係用錯唒力囉 ~

之後我問醫生隻腳有無水腫 ?!   佢按完話無 ~

咁我同佢講   我家姐話我小腿腫   會唔會心律不正影響   咁我即同醫生講啦   佢明明打緊字   聽到我咁講話: 妳咪嚇我   之後即刻幫我聽心跳   之後話無事   妳唔好講到咁大件事啦   聽完佢語氣我都笑咗出來 ~

其實睇醫生都好快   反而最耐係等拎藥   等咗半個鐘呀   我見姑娘又拎簿又拎計數機   我心諗唔係就咁比病人就得咩 ?!   因為執藥姑娘比醫生 Check 哂之後就會直接比佢再比病人嘛   唔駛佢再分類家嘛 ~

終於遲咗 10 分鐘先番到教會   不過都要怪自己   約 10 點睇醫生就唔會遲囉 ~ 

崇拜完畢同 Ivy 仍然有事奉   所以 1 點幾先走得 ~

咁啱里奧大人又放工   我同 Ivy 行去買嘢食   行行下原來里奧大人已經喺我哋後面   所以一齊揀午餐喇   因為里奧大人買嘅午餐要等   我同 Ivy 去買涼拌   之後就去佢屋企先   里奧大人就自己上嚟 ~

今日同 Ivy 兩公婆食飯   真係番到教會見面先約咋   所以預咗即慶必成事   哈哈 ~

好耐無一齊食飯傾偈啦   好似都有 4 年幾   不過番教會實會見到面同傾到偈   但大家都識咗好多好多年   所以今日一坐低   大家就傾唔停   好開心呀 ~

食剩 1 盒涼拌同半盒雞扒意粉   咁要 Ivy 一陣再食了   嘻嘻

涼拌撈撈 (中辣) - 涼拌海帶絲 + 麻辣豬耳 + 麻辣雞腎 - 都好味   但唔係太辣

涼拌撈撈 (中辣) - 有涼拌青瓜 + 涼拌豆皮 + 手撕雞   我鍾意食豆皮呀

燒汁雞扒拚秋刀魚意粉 - 好耐無食秋刀魚   我好鍾意食佢嘅口感㗎 

龍城炒米粉 - 呢個都好味   同埋都幾多材料

Ivy 比咗 2 包黑咖啡比我   聽朝試下先   

傾下偈又睇下電視   咁啱做中年好聲音   我哋一齊做評審   真係笑死   但都係嗰句   當唱 K 玩下   真正當歌手   唔知有無公司捧呢 ~

睇到 4 點 45 分要走喇   因為我哋要去整嘢   之後話約我哋下次打邊爐   但就唔可以即慶   係要一早約定   因為佢哋要去買嘢   哈哈 ~

5 點半搞掂哂就番屋企   番到屋企都 6 點幾   其實唔太餓   但就一定唔煮啦   所以我話外賣 Pizza   因為我可以用 130 積分換   但就係要買樣嘢先可以用積分   所以職員叫我買最平嘅汽水 ($10)   其實我得 131 積分 7 月到期   依家剩番 1 分   真係好絕   哈哈 ~

同里奧大人沖埋涼先開餐   始終出咗街   都係想沖個涼先囉   同埋唔駛洗嘢唔會出汗   就更加想沖完先食㗎 ~

尋日同家姐講話仁御堂買嘢都 OK 㗎   價錢唔貴但包裝乾淨   估唔到佢記得我咁講   今晚佢都去買咗胎菊   佢仲抵啦   做特價 $20 咋   我好似要 $26 㗎 ~

同里奧大人睇 "思家大戰"   之後就網上崇拜   完畢都接近 10 點   我再睇陣電視   10 點半都自己瞓先喇 ~

糖醋骨拚咕嚕肉 & 尖椒豬肚拚椒鹽骨 (外賣) + 超甜粟米 ( 1-JUL-2023 )

 

( 1-JUL-2023  SAT )

里奧大人今朝要番工   但我 7 點半都要起身㗎喇   因為約咗家姐食早餐呢 ~

家姐尋日係咁問我想食咩   佢一定唔會去飲茶   我又一定要飲咖啡   所以去間泰國餐廳食茶記早餐   估唔到又幾好味喎 ~

金不換雪菜肉絲米粉 + 腸仔炒蛋配牛油麵包 (凍飲 $44)

香葉沙爹牛肉媽媽麵 + 腸仔炒蛋配牛油麵包 ($41)

食完同家姐行一陣   再去東海堂買蛋糕   之後都番屋企 lu ~

同家姐講阿花見到車銀優   之後家姐話工人都識得車銀優   因為上次家姐拎支筆出嚟   工人望住車銀優個樣   家姐話妳唔識啦   點知工人話佢叫 Eunwoo   話佢好靚仔   仲話佢個團死咗個男仔只係 25歲   估唔到佢都留意 K-POP ~

Berry 女又好顛咁樸我啦   又跟我去廁所   懶係黐人咁 ~

好細隻 Berry

又唔理我了

唔係咁想望我

個樣好無奈   呵呵

又呢埋梳化底   但伸個頭仔出嚟

用零食引佢

唔會用手按住零食

兩隻手嘅位置係無郁過   真係好懶

想走 

同家姐傾咗好耐偈   好似好耐無試過咁正經咁傾   因為有時傾偈係斷斷續績又九唔搭八呢 ~

同 Berry 落街   都唔知行咗幾耐   不過我覺得行下   反而對腳無咁痛 ~

差唔多 1 點半同家姐一齊搭地鐵   本來同里奧大人食酸菜魚   但我話上次堂食都等半個鐘   依家又已經 2 點半   所以我話買兩餸飯算喇 ~

買完先見到粟米魚柳   激死我

家姐買蛋糕   所以可以用換購價 ($13) 買一包芝士條   又益咗我啦   呵呵

食完就抖下   里奧大人就瞓晏覺   我就靈修一個鐘   其實靈修嘅時候   個人真係平靜好多   但我衰太懶囉   唉 ~

唔想太夜食   同埋都係食番中午食剩嘅餸   都係焗同蒸   所以 7 點開始煮   7 點半都食得了 ~

是日懶餐 - 糖醋骨拚咕嚕肉 & 尖椒豬肚拚椒鹽骨 (外賣) + 超甜粟米

糖醋骨拚咕嚕肉 & 尖椒豬肚拚椒鹽骨 (外賣) - 其本上都係呢幾個餸   下次真係要轉下其他先   哈哈 ~

超甜粟米 - 終於清哂   雖然我好鍾意食粟米   但都唔可以食咁多 ~

洗埋碗就沖涼   今晚都幾攰下 ~

都係睇下電視同 Youtube   都係 10 點半瞓覺   好準時   哈哈 ~