辣汁焗雞肶 + 節瓜粉絲 ( 7-SEP-2023 )

我多數焗熟再落鑊煮   下次真係好想就咁拎嚟食呀   哈哈

( 7-SEP-2023  THU )

尋晚去咗次廁所   但感恩好快瞓得番呢 ~

早餐食醬占甜餐包   個餐包細細個咁   但口感好實在   最怕食空氣包   哈哈 ~

菇場唔太忙   所以又做下 Email Filing ~

Lunch Time 出去買菜   之後番菇場食即食烏冬 ~

七味粉係自己加㗎   尋日阿齋都拎咗我支七味粉加落佢嘅炒米粉   最搞笑佢話知我有七味粉   但唔知我擺喺邊   之後佢一望就望到   因為我放喺筆筒隔離當眼處   所以佢一睇就睇到喎   

菇場忙呀   但 2 個鐘頭就搞掂   不過頭先太集中精神   所以對眼超級攰 ~

放工即走   一入屋就覺得好凍   以為放工咁耐仲未解凍 ?!   但原來係里奧大人又唔記得熄冷氣 ~

我話佢唔好再話自己環保喇   佢話佢係環保   但無記性   哈哈   黐鬼線 ~

是日晚餐 - 辣汁焗雞肶 + 節瓜粉絲

辣汁焗雞肶 - 買咗 2 隻珍寶雞肶   諗住焗完會縮水   但原來無   咁下次買 1 隻就夠啦   因為今晚係食剩 1 隻   唉 ~

節瓜粉絲 - 呢個餸真係幾好味喎   又飽肚   減肥食佢都唔錯呢 ~

洗埋碗就開機洗衫   之後沖涼休息 lu ~

睇下 Youtube   睇到 11 點都瞓覺喇   原來出面落好大雨   不過關哂窗就乜都聽唔到 ~

夫妻肺片拚涼拌大豆芽 + 滋味豬扒拚手拍青瓜 (外賣) ( 6-SEP-2023 )

滋味豬扒拚手拍青瓜 ($49) - 一開個盒就極大陣孜然味   直頭係一種超極強烈嘅格甩底味   好在之後啲味道無咁強烈咋   

 

夫妻肺片拚涼拌大豆芽 ($59) - 里奧大人見到好開心   話唔知我會買呢個餸   我話連家姐都知你鍾意食夫妻肺片   我點會唔知呀   哈哈 

( 6-SEP-2023  WED )

好感恩又一覺瞓天光呀   正想起身就啱啱鬧鐘響 ~

里奧大人今日番晏晝   但佢都話醒咗   所以一齊食早餐喇 ~

咁我準備沖涼嘅時候   里奧大人話茶包喺邊度 ?!   我話今朝搽醬占呀   佢話係 "茶包" 呀   呢下我都笑出嚟   我話以為你話用咩搽麵包嘛   奇怪點解咁好幫手搽麵包添 ~

早餐食醬占牛油排包   朝早真係好求其食   我最緊要係杯咖啡   依家算好喇   我都會飲奶茶   即係唔駛日日咖啡   船頭話佢朋友係中奶茶毒   唔飲會頭痛呀 ~

菇場忙咗陣   之後又 Hea 過喇 ~

Lunch Time 出去行陣   之後買牛腩米番菇場食   今日好似無咁熱喎   起碼唔會食到出汗   雖然開埋風扇仔   但有時都覺得好熱咁㗎 ~

唔忙喇   又 Skype 到放工 ~

經過一間店舖   見到個女人喺褲袋拎嘢出嚟   佢條褲係好窄   所以見佢好難拎出嚟咁   我以為係煙啦   但原來係拎指甲鉗出嚟   真係估佢唔到呢 ~   

今晚里奧大人起碼 8 點放工   所以我買埋晚餐   因為佢本來走唔開   要喺公司食   但後尾又話可以出去食   咁我話番屋企食啦 ~

里奧大人差唔多 7 點就再番公司   我就做陣小清潔先沖涼 ~

睇下 Youtube   望下鐘原來都已經 9 點   正想問里奧大人放工未 ?!   點知佢就番嚟了 ~

同佢傾下偈   又睇下電視   今晚 10 點 45 分先瞓覺 ~

滷水金錢肚 & 燜冬菇蕃茄麻辣米線 + 仿松葉蟹捧 & 滷水雞翼蕃茄麻辣米線 + 香辣雲耳 (外賣) ( 5-SEP-2023 )

滷水金錢肚 & 燜冬菇蕃茄麻辣米線 ($52) - 兩個餸都好入味呀   今次湯底都係中辣   咁就可以食到蕃茄湯底味道   如果大辣就真係得麻辣味咁呢      

仿松葉蟹捧 & 滷水雞翼蕃茄麻辣米線 ($52) - 里奧大人係小辣   佢鍾意呢個蕃茄湯底   但佢唔知我喺米線陣買   以為屋企附近買   哈哈

香辣雲耳 ($17) - 就咁食米線好悶咁   所以加個小食   之前有 2 人餐仲抵食㗎   可惜依家無做 lu

 ( 5-SEP-2023  TUE )

感恩一覺瞓天光   仲要無發夢   不過瞓到 7 點都醒咗   懶床到 7 點 15 分就起身整早餐 ~

早餐食芝士拖鞋包 & 芝士牛油排包   其實我鍾意食芝士   記得後生嘅時候   朝早係食兩份芝腿治㗎   諗起都勁大人食   哈哈 ~

菇場唔忙呀   又係時候做下自己嘢先 ~

Lunch Time 出去買包   之後再去買朱古力就番菇場喇   落緊毛毛雨唔想行咁耐呢 ~

家姐買咗   話係抵喎   咁我就去買啦   我特登影到同家姐影嘅一樣   之後我 Send 比佢睇   佢即刻問我係咪想要 ?!   哈哈哈哈   因為次次我再 Re-send 比佢係等如想要呀

4 點先嚟忙   不過都好   始終忙好過唔忙嘛   哈哈 ~

放工即走   今晚去比生日利是比姑奶呀   因為里奧大人話好遲放工   咁我多咗時間就去探下姑奶咁啦 ~

傾咗陣都走喇   買埋晚餐就番屋企 ~

番到屋企都 7 點半   里奧大人打嚟話做咩唔見我   因為佢唔知我探姑奶㗎   哈哈 ~

食完就開機洗衫   抖陣再沖涼 ~

睇陣電視同 Youtube   今晚可能滕來滕去有啲攰   所以 10 點 25 分都即瞓覺喇 ~

蠔油燜薯仔雞翼 + 剁椒蒜蓉蒸脆肉瓜粉絲 ( 4-SEP-2023 )

( 4-SEP-2023  MON )

尋晚瞓得麻麻哋   始終放幾日假   番工起身有壓力   但其實我都校咗鬧鐘   不過都好怕唔知醒起身   哈哈 ~

早餐食芝士拖鞋包   尋日喺大班買㗎   $18/3個都抵   同埋口感唔錯喎 ~

我 Send 張相比家姐   同佢講話呢個拖鞋包都抵呀   佢問係咪有芝士 ?!   我話自己加咋   佢就話個包裝無寫有芝士   奇怪點會有囉   我話好在佢問咋   唔係佢問店員有無芝士拖鞋包就搞笑了

菇場忙呀   日日係咁就好喇 ~

咁又到 9 月了   好快又到 2024 年㗎喇 

Lunch Time 出去行陣   尋日飲好多凍嘢   所以今日想食番啲熱嘢   哈哈 ~

午餐食手打墨魚丸米   呢間嘅墨丸好正㗎   有啲墨魚粒   如果家姐嚟打邊爐   我實會買比佢食 ~

忙咗陣又 Hea 過喇   都係 Skype 到放工 ~

放工即走   番到屋企可以即刻預備晚餐   因為今餐好簡單呢 ~

是日晚餐 - 蠔油燜薯仔雞翼 + 剁椒蒜蓉蒸脆肉瓜粉絲

蠔油燜薯仔雞翼 - 尋晚燜㗎   本身買咗 2 個薯仔   但其中一個爛嘅   激鬼死我   雖然我鍾意食焗雞翼   但次次都焗好似好悶咁   所以改為燜   又無咁熱氣   唔錯唔錯 ~      

剁椒蒜蓉蒸脆肉瓜粉絲 - 之前買咗好多泰國粉絲   依家一蒸瓜就順便煮埋去   哈哈 ~

洗埋碗就沖涼   之後睇陣電視同 Youtube ~

HERSHEY'S 呢個牌子嘅朱古力   做好多零食好多都好味道   所以呢包朱古力味爆谷勁好味呀

今晚手機叉電   睇咗平板電腦成個鐘咁滯   其實仲攰   因為太集中精神睇嘢   所以 10 點半唔夠都要瞓覺了 ~

黑椒牛仔骨螺絲粉 ( 3-SEP-2023 )

( 3-SEP-2023  SUN )

今朝同里奧大人一齊食早餐   我食完早餐就番屋企抖陣   之後要去整嘢 ~

搞掂哂就番教會事奉   差唔多 1 點半搞掂   之後即去買午餐就搭車去里奧大人公司喇   因為食完飯就要再幫手呀 ~

感恩好快做完   咁里奧大人就番屋企   我就去街市買菜 ~

雖然慢行又買得唔多   但都可以出一身汗 ~

番到屋企即沖涼呀   唔係真係做唔到嘢   哈哈 ~

同里奧大人傾陣偈   原來都已經 4 點幾   佢就話瞓陣晏覺   我就睇 Youtube 喇 ~

睇睇下都瞓咗陣   一起身已經 5 點幾   係時候預備晚餐喇 ~

是日晚餐 - 黑椒牛仔骨螺絲粉

黑椒牛仔骨螺絲粉 - 頭先買咗一盒牛仔骨嘅餸   又唔想食飯   所以整螺絲粉喇   我仲加咗 1 條脆肉瓜   但將佢切粒   咁煮埋一齊有樣好   唔駛洗多隻碟   哈哈 ~

燜埋餸就洗碗   之後即沖涼 ~

抖陣就熨衫   熨完就同里奧大人睇 "思家大戰" ~

今晚靈修一個鐘   之後同里奧大人傾下偈   差唔多 11 點 45 分先瞓呀 ~

剁椒蒸野生紅魚柳 + 韭菜豬肉餃 + 椰菜 ( 2-SEP-2023 )

 ( 2-SEP-2023  SAT )

今朝 6 點幾都起咗身   仍然掛緊 8 號風球   直至到 4 點   咁即係今朝肯定唔駛番工喇   之後一瞓就瞓到 10 點 ~

拿拿聲整早餐   好在真係買定麵包   唔係就要煮麵   要多好多時間㗎   哈哈 ~

早餐食牛油排包   搽醬占係好味嘅   因為真係多數早餐先食啲甜嘢咁呢 ~

食完抖陣就開機洗衫   之後再執衣櫃   搞掂哂就沖涼休息一下 ~

頭先體力勞動   所以 1 點半都要食午餐喇 ~

又再嚟芝麻麻糬 & 朱古力麻糬   里奧大人話係咪買咗好多呀 ?!   我話 6 個啫

椰菜雲耳豬肉餃

洗埋嘢就真正休息   咁可以抖幾個鐘㗎   嘻嘻 ~

5 點開始靈修一個鐘   之後都預備晚餐喇 ~

是日晚餐 - 剁椒蒸野生紅魚柳 + 韭菜豬肉餃 + 椰菜

剁椒蒸野生紅魚柳 - 里奧大人唔駛帶飯就蒸魚啦   同埋放喺冰格   真係好易忘記佢存在 ~

韭菜豬肉餃 - 我係買一打生餃   咁我又無放冰格   好在雪櫃夠凍咋   所以今晚點都要食埋去呢 ~

椰菜 - 加埋啲剁椒同豉油   個菜當堂好味道 ~

打兩日風   我連煮 6 餐呀   右邊賤頭好痛呀   應該係勞損   哈哈 ~

洗埋碗即沖涼休息   今朝太晏起身   所以 11 點幾先眼瞓呀 ~

焗海鮮卷 + 椰菜絲炒米粉 + 燒鴨粒炒飯 + 菜心苗 ( 1-SEP-2023 )

加埋辣椒蒜蓉就更加好味

( 1-SEP-2023  FRI )

今朝里奧大人 6 點幾起身   話 4 點幾已掛 8 號風球   所以朝早肯定唔駛番工   咁我都繼續瞓喇 ~

瞓到 9 點先起身   都係時候整早餐喇 ~

早餐食牛油排包 & 極醇湯種迷你軟包   都係搽醬占   以前唔鍾意食果醬   依家都唔係話鍾意   但就唔抗拒咁囉 ~

食完又開機洗衫   睇下 Youtube 咁啦 ~

1 點又食午餐喇   其實我有啲餓   次次喺屋企都係咁 ~

滿漢大餐紅燒牛肉麵 & 椰菜雲耳豬肉煎餃 + 韭菜豬肉煎餃 & 芝麻麻糬 + 朱古力麻糬  

里奧大人做功課   我就睇 Youtube   有時聽到啲人講嘢嘅聲調語氣   真係好難令妳唔眼瞓   所以我 4 點幾都瞓咗陣   哈哈 ~

5 點幾都預備晚餐   呢排做嘢手腳慢   係要多啲時間預備 ~

今晚 6 點半左右開餐   原來 6 點 20 分已經掛 9 號風球   今次個風真係好勁 ~

是日晚餐 - 焗海鮮卷 + 椰菜絲炒米粉 + 燒鴨粒炒飯 + 菜心苗

焗海鮮卷 - 其實可以唔焗嘅   不過等里奧大人叫做有個餸夾下   所以就焗 3 條啦 ~

椰菜絲炒米粉 - 以前成日喺酒樓食炒米粉   就咁加蒜蓉炒   再灑啲芝麻已經好好食   同埋最緊要炒得好乾身   但我炒唔到咁   嗚嗚   可能太多椰菜呀   呢度係半個椰菜份量 ~

燒鴨粒炒飯 - 之前食剩 5 件燒鴨肉   所以切粒炒飯比里奧大人食喇 ~   

菜心苗 - 終於清哂   開心開心 ~

洗埋碗就沖涼   之後休息休息 ~

9 點 10 分掛 10 號風球   咁睇嚟聽日都應該唔駛番工了 ~

睇多陣 Youtube   今晚 10 點 45 分都瞓覺 ~