臘鴨肶拚臘潤腸 + 菜心苗 ( 5-MAR-2024 )

( 5-MAR-2024  TUE )

尋晚半夜去廁所   之後里奧大人問我熱唔熱 ?!   我話唔熱   佢話蓋被又熱但唔蓋被就凍   咁我話開 Dry 啦   好過又熱又凍瞓得唔好嘛 ~

鬧鐘未響都醒醒哋   但點都等到鬧鐘響   哈哈 ~

整完早餐就沖涼洗頭   咁問里奧大人要唔要薑茶 ?!   佢又話要   咁我再煲啦   其實煲薑茶都好方便   最緊要佢話飲完個人好舒服呢 ~

早餐食迷你牛角包 + 窩夫   個窩夫焗到脆一脆真係好正㗎 ~

我習慣一番到菇場   放低個袋就噴消毒酒精   之後洗杯同斟水   高佬 9 點 05 分番到嚟   之後沖掛耳滴漏咖啡   好心啦   沖呢啲咖啡就早啲番嚟囉   阻住哂 Pantry 啲人斟水 ~

 

忙咗陣又做自己嘢   不過個人有啲攰咁囉 ~

Lunch Time 出去超市行下   買咗幾罐粟米就番菇場 lu ~

今日食 Flakes + 乳酪   好耐無食   直頭覺得好味呀   哈哈 ~

我覺得日版係脆啲   同埋生果乾大粒啲 

仍然唔忙又做自己嘢啦   咁之後要開張 D/N   叫阿怪開個新 Type   無啦啦又話要 Charge 邊個 A/C   我話我開幾間公司嘅 D/N 都係就咁開個 Type 就搞掂   之前佢自己都係咁 Set-up 啦 ~

之後佢話呢啲係會計內部嘅嘢   我話 Particulars 寫明咗   妳自己鍾意扣邊個咪邊個囉   妳哋內部要啲咩 A/C   我唔需要知囉 ~

明明好簡單嘅嘢   上次叫小 A 開   好快就開到   每次經過阿怪手就特別多嘢問   我話資料係肥仔豪比我嘅   妳要咁詳細嘅資料就直接問佢   唔好問我   佢話其實肥仔豪都唔需要知得咁清楚   因為係內部嘅嘢   我話佢唔需要知   我仲更加唔需要知啦   之後我叫佢唔駛再講咁多   就咁開個 Type 就得   我趕住出張 D/N ~

其實一個 Type 就可以 Cover 好多項目   唔明點解係都要搞到咁複雜   最慘佢又唔知自己講乜咁   只係來來回回重覆又重覆咁講點解個 Type 要咁咁咁 ~

之後 4 點無啦啦又好忙   咁都好   因為會覺得好快放工   哈哈 ~

放工即走   番到屋企即預備晚餐   雖然只係蒸個飯同臘鴨   都要 7 點先開飯   仲諗住蒸嘢好快添 ~

是日晚餐 - 臘鴨肶拚臘潤腸 + 菜心苗

臘鴨肶拚臘潤腸 - 好在上次望到兩隻臘鴨肶   咁就拿拿聲蒸 1 隻先喇   再加埋臘潤腸   咁聽日里奧大人就有飯帶喇 ~   

菜心苗 - 呢碟係半斤   依家食菜又 OK   之前唔知做咩鬼   完全唔係咁想食菜咁㗎 ~

洗埋碗就開機洗衫   之後沖涼休息   里奧大人就熨 2 機衫   我話真係好少做家務呀   力不從心咁   希望每月一到快啲走啦 ~

頂爺去完旅行又有手信比我   開心開心

里奧大人又買咗張防滑地墊舖廁所   我話有一邊係石屎就舖唔到   佢話真係舖唔到咁多喎   之後一齊大笑   哈哈   佢話下次真係一定要叫醒佢   好過舖滿哂防滑墊喺廁所啦 ~

呢排都係睇 "這麼近 那麼遠"   有啲地方一定唔會去   睇咗當去咗都唔錯㗎   哈哈 ~

睇陣 Youtube   今晚 10 點 15 分想瞓   點知家姐 Whatsapp 叫我 Download Apps   之後搞到 10 點半   但仲未搞完   我話我要瞓喇   哈哈 ~

秘製金錢肚 + 雞扎 + 鮮竹卷 + 鳳爪排骨飯 (外賣) ( 4-MAR-2024 )

( 4-MAR-2024  MON )

感恩一覺瞓天光   7 點 20 分都醒咗   咁可以早啲煲薑茶同埋焗麵包喇 ~

早餐食迷你原味 & 朱古力牛角包   我喺 Cantevole 買㗎   不過我覺得味道好淡 ~

靈修半個鐘就出發番工   一落街見到個地下濕哂   仲以為落雨   但應該係天氣潮濕呀 ~

菇場忙下停下   咁就最好 ~

Lunch Time 一到就出去喇   因為我突然間好餓呀   所以都係食埋牛筋米先買菜喇 ~

菇場忙咗陣就可以做自己嘢   我唔係一個習慣戴眼鏡嘅人   所以飲水會好自然除眼鏡   除口罩又會除埋眼鏡   但其實駛咩除眼鏡呢 ?!   哈哈 ~

放工即走   今晚要整嘢   所以買外賣算喇 ~

8 點半就搞掂   開埋機洗衫就沖涼 ~

同里奧大人打賭抽濕機抽咗幾多水 ?!   我話抽剩 1/4   佢話抽咗 1/4   咁佢贏咗   之後我話下次打賭   我要入屋先   之後佢話我要去加水   哈哈哈哈 ~

天氣又濕又熱   所以要開 Dry   因為開冷氣又太凍咁 ~

睇下 Youtube 又打下機   今晚 11 點先瞓   家姐話我做咩仲唔瞓   阿妹又會話咁夜瞓 ?!   個個都知我好早瞓   哈哈 ~

咖哩辣肉腸意粉 ( 3-MAR-2024 )

前日食剩嘅拚盤小食   加埋里奧大人今日中午食剩嘅薯條   真係就咁食都已經夠飽

( 3-MAR-2024  SUN )

感恩一覺瞓天光呀   所以今朝同里奧大人一齊食早餐喇 ~

食完要番屋企啦   里奧大人着白色衫   點知比啲五香肉丁辣汁彈落件衫度   雖然即時用紙巾抹咗   但仲有啲漬   所以諗住比碧蓮佢用   但佢用消毒梘液洗都抹得到   咁都好呀   起碼唔駛浸件衫嘛 ~

搞掂完都即出門口喇   我要去家姐屋企呢 ~

一入到屋   Berry 又尖叫又亂走   真係好似顛咗咁㗎   哈哈 ~

坐定定等我埋去摸佢

我一摸佢   佢就會飛機耳   同埋條尾係咁郁   扮到好興奮咁   哈哈

家姐話 Berry 咁惡㗎  之後佢比姐夫睇   姐夫話佢咁惡咁曳   一陣上嚟要打佢   我話唔係惡呀   係 Berry 打喊露咋   咁我再比里奧大人睇   佢都話 Berry 做咩咁惡 ?!   我覺得 Berry 比人冤枉好慘   哈哈

狗狗都會中年發福

想瞓   但知道係無可能   哈哈哈哈

諗住擺隻腳比佢托住   佢又唔托喎   搞到我差啲描筋   哈哈

鼻短短就得意

其實佢應該係好眼瞓   但瞓咩啫   我走咗就有大把時間瞓啦

無嘢做   Berry 就會成為要陪我嘅對象   成日覺得佢個樣好無奈咁   哈哈哈哈

家姐同姐夫番到屋企   Berry 唔會叫㗎   只係撲佢哋   Berry 真係一隻奇怪的狗   哈哈 ~

今朝無餵零食比 Berry   我話驚佢肥得滯   之後家姐話啲人都話 Berry 好肥呀   咁梗係啦   佢食好多零食   食完零食先食狗糧   所以唔肥都難啦 ~

工人焗緊麵包嘅時候   就幫家姐卷頭髮   我話我又要卷呀   之後佢自己都卷埋先搞笑 ~

今日要去嬸嬸嘅安息禮   堂大哥比我哋嘅資料   只係話將軍澳醫院 LG 層   咁家姐問嬸嬸叫咩名 ?!   我話唔知喎   但又好似叫阿 X   不過我話唔緊要啦   到時去到見到親人   就知係邊度囉 ~

真係咩都唔知嘅情況下   我哋都早啲出門口   因為 11 點要去到醫院呢 ~

10 點 35 分到咗醫院   但家姐話去定廁所先   費事一陣再出嚟 ~

去完就諗住問職員點去小禮堂 ?!   因為我哋只見到殮房方向   都係問清楚好啲 ~

咁啱見到堂細佬一家四口同外父外母   佢哋都唔知小禮堂喺邊 ?!   佢即打比哥哥問位於喺邊 ?!   但我聽到佢只係話: 得你先知道箭咀方向   咁多個箭咀   之後佢就再直行睇下係咪殮房方向 ~

之後佢示意我哋行入去喇   見到二表哥表嫂   四表哥同大表哥個女已經喺度   咁佢哋都好有心呀   咁早就到   不過就無得入去坐   因為無開門 ~

我唔知醫院啲小禮堂係點   但如果見到咁情況   堂大佬應該要去問問醫院職員   係咪一定要 11 點先開門 ?!   可唔可以早少少比親友入去囉   因為 11 點開始   但點都會有嘢要打點家嘛 ~

除咗 3 個堂大佬細佬要去整嘢   我哋個個就企喺走廊傾偈 ~

到 11 點門又未開   之後就喺停車場出面做儀式 ~

做完有帛金利是回番   家姐話完全唔記得比帛金呢回事   因為我個封比埋佢一齊比   咁收帛金都要問比邊個嘛   家姐問二哥係咪比佢 ?!   佢話唔知   不過家姐都照比佢啦   真係救命呀   點會答唔知㗎   佢咃一家人肯定無溝通過 ~

裝香儀式完咗就入番個小禮堂   坐唔夠 5 秒就話做另一個儀式   感覺整個儀式好求其   有啲儀式仲係我第一次見   所以都忍唔住同大表哥個女講   啲感覺好奇怪 ~

見埋嬸嬸最後一面就要即刻拎袋走   真係好有趕豬仔感覺   其實喺個堂入面   真係好似得 10 分鐘   仲要係做埋儀式前後   完全唔會話比人有悼念嘅感覺 ~

原來表哥佢哋個個唔上山   本來我唔上㗎   咁家姐話上山但唔食飯   我就陪佢上啦   好在真係有陪佢   唔係家姐一個人仲慘 ~

坐旅遊巴上山啦   但可能接近拜山時節   所以好多車上出   我哋等咗半個鐘都有 ~

問家姐問弟婦喺邊度落車 ?!   佢話初初大佬話柴灣地鐵站   但大家都反對囉   最後決定喺坑口落車   佢哋係住將軍澳區   加上旅遊車包埋   咁落車地點更係就番屋企人啦   點會柴灣㗎 ~

一落車   職員話我哋時間啱啱好   因為之前個堂做完儀式 ~

又係快快手手咁   之後堂哥佢哋按完制就即刻要拎袋走   今日成個過程係超級超級超級趕   真係令人唔多舒服 ~

旅遊巴喺坑口地鐵站落車   我同家姐都走喇   佢哋自己都好似無訂到解慰酒   可能一家人簡單食餐飯算啩 ~

1 點左右到東港城   感覺好似嚟過又未嚟過   之後家姐話我嚟過一次   嗰時仲同埋媽咪一齊飲茶呢 ~

今朝同家姐 Whatsapp 講明中午唔食粉麵   咁佢問食唔食南記 ?!   我話南記咪粉麵囉   佢話見我同里奧大人間唔中都食   以為我好鍾意食   哈哈 ~

同家姐去 MUJI 睇零食   因為想用哂啲帛金利是錢   我哋想買嘅嘢   咁啱係用盡啲錢   咁就好啦   唔駛成日記住買嘢 ~

諗住去 Beans   不過有 10 個人排隊   我話唔等呀 ~

咁見到有鰻魚飯都吸引   所以入去食喇 ~

名代宇奈備長炭燒鰻魚飯專門店   

雙層鰻魚丼 ($108) - 呢個好味呀   家姐知道里奧大人唔食   所以陪我食   哈哈

咖哩唐揚炸雞丼 ($78/S) - 炸雞好油   咖哩汁一般   呢個真係麻麻哋好食

原來唔係酸青瓜   不過口感爽爽脆脆都 OK 啦

食完就行陣   家姐話想飲嘢   咁行下行下   行咗另一個商場   我仲係咁搵 Shop No. 添   怪唔得唔對路啦   哈哈 ~

去完 OWNDAYS 睇眼鏡   就去春水堂買紅豆珍珠鮮奶茶喇   外賣 8 折只係 $32 咋 ~

小珍珠好煙堅韌呀   我同家姐平排行嘛   突然見到有啲黑色嘢揚揚下咁   原來係家姐啜緊啲珍珠

再周圍行陣   之後就去搭巴士番屋企喇   好在家姐識得有轉乘優惠   咁我哋去到官塘再轉車番屋企   咁唔駛行咁遠呢 ~

番到屋企見到里奧大人啱啱瞓醒   之後即講番今日發生嘅事比佢聽   佢都覺得好奇怪 ~

里奧大人鍾意食呢啲點心麵   細細包夠方便呀   家姐都買咗包雞味點心麵同埋棉花糖

家姐比嘅栗子   佢同事比佢   不過佢唔鍾意食   所以比我   之後我話鍾意食   佢就好開心   但我叫佢唔好買比我

我做陣小清潔   差唔多 6 點先預備晚餐 ~

是日晚餐 - 咖哩辣肉腸意粉

咖哩辣肉腸意粉 - 屋企有現成咖哩包真係好方便   今晚覺得辣肉腸好辣呀   可能真係嚇驚咗   哈哈 ~

洗埋碗就開機洗衫   之後沖涼喇 ~

差唔多 9 點幾   家姐叫我得閒打比佢   之後整個笑 Icon   應該係有搞笑嘢講   哈哈 ~

佢話二表嫂 Whatsapp 佢   問佢同阿妹係咪孖生 ?!   因為二表哥話我哋係孖生呀   家姐話媽咪係 3 年抱兩噃   之後表嫂都話嫲嫲都無話我哋係孖生 ~

家姐比工人睇媽咪張相   工人話新媽咪太太係 Copy 出嚟   家姐再比爸爸張相佢睇   佢又話家姐係 Copy 出嚟   之後話我哋好好   每人似半個   哈哈哈哈   家姐話人係用一個嚟形容   無半個㗎   所以我成日覺得工人講中文係好好笑 ~

等如佢有時同家姐講   我係第二個媽咪   明明叫新媽咪家嘛   都唔知點解無啦啦叫第二個媽咪   哈哈 ~

睇多陣 Youtube   今晚 10 點 50 分先瞓覺 ~

客家原味粉 @ 紅磡 ( 2-MAR-2024 )

我話想要多蔥   之後就比咁多蔥比我了   仲問我哋夠唔夠   老闆真係好闊佬

( 2-MAR-2024  SAT )

今朝 6 點 50 分起身做運動   行咗 1 個圈就搞肚痛   即刻要打道回府 ~

行嘅時候其實都有啲想暈   我都知情況不妙㗎喇   一入屋連衫都無換就坐低落馬桶   一合埋眼就唔知發生咩事了 ~

又係醒嘅時候好頭痛   之後係漆黑一片   我周圍摸下摸下咁起身   咁我摸到個櫃   咁都知道跌咗落地   所以即刻摸個頭有無流血啦   感恩無事   只係個頭有啲痛 ~

咁整污糟咗地毯   之後又做陣清潔   搞掂哂就沖涼 ~

我只記得 6 點 52 分刷完牙   換埋衫再出去做運動   行一個圈只係 1 分鐘唔夠   但我起身係 7 點 07 分   咁暈咗有 5 分鐘 ?!

下次都係叫醒里奧大人好啲   同埋我覺得係尋晚食咗辣椒粉調味   當時都覺得辣   但就繼續食   我發覺食得好辣就係咁搞肚痛   咁即係又要戒埋辣椒粉了 ~

焗完麵包   我喺梳化瞓咗 40 分鐘   之後個頭仲有啲痛   所以都係請病假休息 ~

咁我上即刻床瞓啦   里奧大人問咩事瞓覺 ?!   我只係話頭痛要瞓   佢仲好開心話因為佢放假   我都唔番工   真係比佢激死 ~

10 點電話響喎   我仲話係里奧大人公司打嚟   但原來係銀行打嚟話定期到咗要續   又叫我星期一去搞   依樣嗰樣咁   我又未瞓醒   之後我話星期一搵佢   咁里奧大人話做咩唔比佢聽 ?!   其實係佢要去搞   哈哈   好在最後都搵到頭先個職員   咁里奧大人同佢傾啦   我就整早餐 lu ~

早餐食四味芝士圓法包   好在覺得好味道咋   哈哈 ~

焗完再焗   所以表面燶咗啲

呢個包好濃芝士味   所以好鍾意食   不過唔係成日行咁遠買呢

食完就抖喇   因為 11 點半先有得睇醫生 ~

去到要量體溫   我 37.4 度   姑娘話我有燒   我話不嬲體溫高   不過佢唔信我咁   仲叫我同醫生自己講   但上次醫生話 37.4 度係 "澤界"   都唔係話我有燒   唉   下次都係喺屋企量完體溫先去睇醫生會好啲 ~

12 點到我睇喇   我講個情況比醫生聽   佢都好輕描淡寫話失去知覺   之後叫我量血壓   我 170/85 呀   不過我係預咗好高   因為頭先話我有發燒已經好驚   等如我以前去醫院覆診   我要量完再量先可以見醫生   咁樣就要用多 40 分鐘㗎   但其實我都係要做多啲運動減肥先得㗎喇 ~

醫生用聽筒 Check 我個肚   話我個肚仲係搞下搞下   其實我想叫佢比我聽下係點   哈哈 ~

之後又話我貧血   我話每月一到太耐   依家有調理身體 ~

睇完都差唔多 12 點 15 分   里奧大人打嚟問食唔食埋午餐先番屋企 ?!   我話唔啦   我未餓呀   同埋我想番屋企休息下先 ~

番到屋企即做快測   感恩係一條線 ~

沖埋涼就抖下   抖到 2 點就出去食午餐   食完就去買地毯   買完都即刻番屋企 lu ~

我其實想食口水雞   但諗起都幾辣就有啲驚   哈哈

又要食蕃薯糖水喇   今日點都要食哂去   但仲剩番啲   要留番今晚再食 ~

每次搞完肚痛   個人真係超級攰咁   我本身又唔係咁眼瞓   但里奧大人話瞓覺   咁我又試下瞓啦   之後由 4 點瞓到 5 點   起身嘅時候   成個人精神哂呀 ~

最感恩係我本身係想 5 點 10 分起身  因為約咗鴛鴦傾嘢   但依家叫做自己醒   感覺好好多㗎   哈哈 ~

里奧大人要番公司處理 Urgent 嘢   咁我又約咗鴛鴦   咁一齊出門口喇 ~

同鴛鴦傾咗半個鐘   之後我要番崇拜 lu ~

今晚仍然好凍   所以我話要食湯粉麵呀 ~

食完就番屋企   繼續食埋啲蕃薯糖水   食完先開機洗衫同沖涼 ~

里奧大人要熨 2 機衫   我就唔做家務喇 ~

睇陣 Youtube 再打下機   今晚 10 點 40 分都瞓覺了 ~ 

泰亞萊泰式美食 @ 紅磡 ( 1-MAR-2024 )

雙人套餐 ($188)

泰式細拚盤 - 最鍾意有拚盤   不過食唔哂   要留番聽晚食 lu

香草辣椒肉碎煎蛋飯 - 呢個飯又係好鍾意食   哈哈

馬拉盞炒通菜 - 無咩味道   所以加辣椒粉調味

泰式椰汁冰 X 2

( 1-MAR-2024  FRI )

尋晚瞓得唔係咁好   不過呢排都係咁 ~

6 點 50 分鬧鐘響   但個人好攰   最後都係瞓到 7 點 18 分先起身 ~

一起身覺得凍咗好多   但有幾凍就要出街先知   哈哈 ~

早餐食十字包加芝士   我好鍾意食佢嘅脆邊 ~

今朝真係凍咗好多呀   好似得 12 度   我覺得有冰凍嘅感覺 ~

菇場忙呀   忙到 11 點鬆啲先搞掂 ~

好快又到 3 月

其實呢個月曆嘅顏色好 Pink 好舒服

Lunch Time 去萬寧買嘢   買滿 $99 個人用品就送 Pack 鈣思寶   實在太好啦   我正正想買 M 巾同鈣思寶呢 ~

之後去 360 買 2 罐咖啡粉同 2 包 Flakes   咁啱想買又做緊特價   咁樣已經慳番幾十蚊   感恩感恩~

買完就去買雞翼酸辣米線   今次真係有扣底喇   但就酸多過辣   同埋好多酸菜   好驚一陣好快餓呀   哈哈哈哈 ~

我買咗包梅味薯片比阿花   頭先 Lunch Time 無咩人就放喺佢枱面   我聽到阿花問係咪阿爽買 ?!   阿爽話唔係   我即刻 Whatsapp 阿花話係我買   原來佢話阿爽不嬲唔會搞佢啲嘢   無啦啦搞佢包薯片   佢咪以為阿爽請佢食囉   咁又幾似嘅   哈哈   之後話唔係佢買就唔好搞佢包嘢啦   呢句好笑 ~

菇場唔忙   但突然好眼瞓呀   我估係味精重   想食嘅時候   永遠唔記得食完佢係好眼瞓   哈哈 ~ 

放工即走   里奧大人 6 點半要開會   所以我去睇中醫喇 ~

醫師幫我把脈   見到醫師隻手背好白   我先覺得自己手掌原來好黃呀 ~

佢話我係萎黃   因為肝唔好   膽汁太多   加上每月一到太耐太耐又貧血   所以今次中藥要加少少當歸   再加啲止血嘅藥   同埋要加緊調理喇 ~

睇完就去 AEON 行下   難得今日有 95 折   好在今晚先睇醫生咋   哈哈 ~

去完 DAISO 再去超市買嘢   我自己一個人行  真係行咗個幾鐘 ~

7 點 40 分走人   掛住同石頭姐姐 Whatsapp   無望架巴士去邊   好奇怪架車唔係去機場   但有位伯伯拎好大個喼上車   突然覺得心知不妙   好在我坐位下門口位置   一望就見到個顯示下站係佐敦   唉呀   我搭錯車去機場呀   好在我望到佐敦站咋   唔係坐到機場都唔知   到時我就真係喊了 ~

本身里奧大人 8 點 15 分開完會   依家要佢等番我轉頭   咁去到車站   兩架巴士又走咗   但感恩係原來仲有另一架巴士係到屋企附近   仲只係等 5 分鐘就有車呢 ~

我同里奧大人同家姐講話搭錯車   佢哋第一時間話搭咗幾錢 ?!   我話無望到幾錢呀   下次真係唔好心急掛住坐低傾偈   今次真係大教訓啦   明明平咗嘅 Discount   依家搭咗架機場巴就變咗買嘅嘢係原價   哈哈哈哈 ~

番到屋企都接近 8 點 45 分喇   里奧大人就啱啱放工   咁一齊去食店等喇 ~

里奧大人話阿妹派同事嘅手信   第一個就派比佢   之後話唔係你嘅   你明白啦 ?!   里奧大人話我知   哈哈哈哈

沖埋涼就休息喇   今晚真係滕來滕去好攰呀 ~

余均益辣椒醬 ($55) - 估唔到 AEON 有得買   即刻買多支比家姐   上次同家姐經過雜貨舖   佢已經話想買   但我話啲辣椒醬向住街邊就唔好買啦   所以好感恩今次買到呢

TV BP 牛肉咖哩 (辛口) ($29.90)   其他醬料喺 DAISO 買   買 5 送 1

萬家讚岐烏冬 ($36.90/2件) / 日本故里風味蕎麥麵 ($11.9) / VERONELLI 扁意粉 ($25/2件)

飯素 ($9.9/包) / 昭和炸雞粉 ($5) - 呢幾樣都好抵

睇多陣 Youtube   差唔多 11 點先瞓 ~