煎釀三寶 (外賣) ( 5-JUL-2024 )

買咗 16 件再加 1 件炸油糍   飽到反肚   哈哈

我鍾意食尖椒同炸雲吞皮

尋晚食剩嘅炒飯   今晚要食埋去喇

前喺 759 買嘅   職員話特價   咁我買 2 支啦   里奧大人問係咪好飲 ?!   我話未飲過喎   佢笑住話以為好飲先買   哈哈

( 5-JUL-2024  FRI )

感恩一覺瞓天光   但臨醒之前連續發咗好多個夢呀 ~

同小組弟兄姊妹去旅行   有得食自助早餐   但我掛住睇無影相   食完又趕住走   所以無得再番去影相 ~

去機場之前就去 Ivy 屋企   阿 Jack 要拎洗頭水   好記得係拎咗十幾支細嘅   再用一個大膠袋裝住   但當時趕住出面口   叫佢放入喼就算喇 ~

再去等 Lift 嘅時候   見到佢哋嗰層係一層樓打通哂所有單位   之後有共用空間 ~

另一個夢係同幾個唔識嘅人一齊坐   之後有河水沖落嚟好恐怖   但我哋無啦啦又變咗坐喺個大嘅盤入面 ~

早餐仍然食菠蘿包   以前喺茶記就會食芝腿菠蘿包   日日食都覺得好好味㗎   哈哈 ~

靈修半個鐘呀   開心開心   點解咁開心係因為我真係好懶   依家只係睇咗 1/4 聖經咋   真係要努力努力 ~

菇場唔忙   家姐打嚟講一樣嘢   但之後又傾咗 25 分鐘   所以時間就過得好快喇   呵呵 ~

Lunch Time 出去飲茶   因為舊老闆番咗嚟呢   佢話菇場仍然咁靜  哈哈 ~

因為我哋全部都唔想同阿怪坐   咁啱我哋 11 個人坐一枱   阿怪嬲爆爆咁企喺我哋張枱後面   感覺佢係想攝埋嚟坐囉 ~

佢係都唔肯坐另一枱   因為要同老闆坐嘛   阿後講咗 2 次佢都唔走   肥仔豪又係企咗喺中間好耐   不過佢係負責揀點心比老闆佢哋   最後老闆嗰張枱太迫   佢即刻過嚟坐呀   船頭見佢坐埋嚟   話佢已經入咗閘   哈哈 ~

阿怪其實真係好勁   真係無一個人係鍾意佢   唔鍾意佢都算   係個個直頭憎佢 ~

我哋 9 女 2 男食 39 款點心再加個伊麵   真係唔簡單   哈哈哈哈 ~

我叫春風得意腸   可能粉紅色皮   無咩同事食呀   我要食 2 件囉

灌湯餃好味呀

熱嘅綠豆沙   估唔到咁多料

肥仔豪成日唔夾嘢咁   我話一講到食   佢唔夠我哋呢班女人勁啦   所以我咪成日夾比佢囉   佢哋話我迫肥仔豪食嘢   哈哈 ~

我叫肥仔豪食多啲   因為成日要開夜   點知船頭話我好毒呀   話食多啲要開夜   我咪話佢囉   佢講少幾隻字   意思當堂唔同哂呀 ~

食到 2 點就番菇場   唔忙又 Skype 啦   當練打字都好㗎   呵呵 ~

放工即走   里奧大人去買煎釀三寶   所以番到屋企就可以食晚餐了 ~

依家 Circle K 只係 $5/杯   家姐又話幾好味   所以我買咗 4 杯

洗埋碗再抖陣   之後里奧大人幫我染髮 ~

今次係里奧大人話幫我染髮   我扮慘話係咪驚人哋話我老過妳呀 ?!   佢話梗係唔係啦   妳次次有活動就會染髮家嘛   咁佢又講得啱嘅   哈哈 ~

沖埋涼就休息啦   今日里奧大人洗窗簾又熨衫   呢兩樣係佢唯一會主動做嘅家務   咁有時都會主動話洗碗嘅   但次數真係唔多   佢話最唔鍾意就係煮餸   可能覺得煩   同埋係零興趣   咁佢係咪以為我對煮嘢食係好有興趣呢 ?!   哈哈 ~

上次買脆皮朱古力雪條比里奧大人   估唔到送個 Custard Puff  

我已經盡力 "必" 哂啲餡出嚟㗎喇 

睇下 Youtube   其實10 點已經瞓鬼咗   之後醒一醒已經 10 點 20 分   咁即入房瞓喇 ~

富華燒味餐廳 @ 紅磡 ( 4-JUL-2024 )

脆脆肉絲炒麵 ($50) - 食埋呢次要停喇   我覺得夜晚食係好多脆麵   下午茶食係好少脆麵

楊州炒飯 ($50) - 里奧大人食咗 1 碗咋   之後要打包番屋企呢

里奧大人好鍾意飲好立克   仲話今次餐廳落得好重手   哈哈

( 4-JUL-2024  THU )

感恩一覺瞓天光呀   正想起身就鬧鐘響呢 ~

里奧大人話今晚開會   所以係番中午   好在我今日係食麵包咋   尋晚佢仲話今朝出去食早餐添   好在無聽佢講   哈哈 ~

早餐食菠蘿包   好想食甜嘢呀 ~

靈修 20 分鐘就番工   好在西瓜喺群組話菇場落大雨   我就即刻改着 Boot 喇 ~

菇場唔忙啦   家姐叫我打比佢   以為佢 WFH   點知又改咗時間係要番工   最後傾咗 45 分鐘電話呀   佢最勁係可以一心二用   我就唔可以囉 ~

Lunch Time 唔出去喇   因為想食 Flakes   今朝仲特登去買盒朱古力奶添 ~

家姐教我呢個懶人食法   連阿齋都話家姐勁   咁都諗到   哈哈哈哈   

諗住唔出去   點知里奧大人叫我買話梅薑   其實佢叫我星期一幫佢買   不過我聽日又唔得閒   所以食完嘢就出去買呢   順便買包沙爹魚片比佢   等佢可以食唔熱氣嘅零食   哈哈

唔忙又繼續 Skype   其實咁樣先最忙   哈哈 ~

放工即走   同里奧大人食完飯就睇中醫   佢就要去開會   仲要係由 7 點開到 10 點呀 ~

醫師話我今次有番啲氣   但仍然係要繼續調理   同埋話我有啲腫   我話可能食咗西藥副作用啦 ~

我話呢排食啲中藥係好瞓咗   佢話啲藥有安神嘅作用   不過我仍然腰痛囉   希望氣血可以快啲通哂啦   哈哈 ~

番到屋企即開機洗衫   之後沖涼休息休息   出咗一身汗比較攰 ~

睇下 Youtube   里奧大人 10 點鬆啲番到屋企   佢沖完涼就睇劇   仲食埋提子   真係估佢唔到   哈哈 ~

不過我 10 點半都瞓先喇   都習慣咗呢個時候瞓覺 ~

燒汁焗雞膇 + 菜心苗 ( 3-JUL-2024 )

( 3-JUL-2024  WED )

尋晚臨瞓前仲係興奮狀態   所以好感恩瞓得唔錯   不過瞓到 6 點 45 分醒咗   之後再出廳拎番手機入房   已經第 2 次係咁   其實都係早里奧大人 5 分鐘起身   所以里奧大人話唔記得拎都唔駛驚啦   哈哈 ~

今朝大家都好快手   所以早咗出門口   感恩餐廳又早咗開門   呵呵 ~

依家先睇到   原來都有幾多塊檸檬片喎

食完去里奧大人公司過冷河   因為間餐廳冷氣唔係咁夠   加上我又飲熱嘢   好在無出汗咋   多數行路嘅時候先出汗呢 ~   

菇場唔忙   咁又 Skype 喇 ~

Lunch Time 出去食牛筋米   食完去 759 買杯麵比里奧大人   之後再去萬寧買嘢   買完又已經 12 點 45 分 lu ~

SUNPLAY 美肌亮膚防曬隔離霜 & 粉嫩亮肌 ($99/件   第 2 件半價即係總數 $149.80)   其實我睇嘅時候   我同自己講話唔好比啲咩第 2 件半價又要買多件   點知收銀員話第 2 件半價喎   我又走番入去拎多件

唔忙繼續 Skype   咁就好快放工㗎喇 ~

買埋麵包就番屋企   入屋一放低嘢就預備晚餐 ~

是日晚餐 - 燒汁焗雞膇 + 菜心苗

燒汁焗雞膇 - 今晚焗完再落鑊加汁再燜一陣   咁樣其實好味好多   同埋依家覺得喺樓上買嘅雞膇係滑啲咁 ~   

菜心苗 - 好在無變冰菜咋   感恩感恩 ~

洗埋碗就開機洗衫   之後沖涼休息   咁里奧大人就熨衫   佢話呢排好攰喧   我話梗係啦   連續出咗 3 日街呀   我都好攰呀   哈哈 ~   

睇下福寶   今晚 10 點半即瞓覺 ~

香港賽馬會滿貫廳 @ 跑馬地 ( 2-JUL-2024 )

火焰叉燒皇 ($238) - 呢個好味呀   叉燒啲肉好腍   同埋好香玫瑰露酒味

影唔到啲火

萬壽果杏汁燉白肺 ($537/窩 1.5) - 好濃嘅杏汁味道   飲到最後一啖都仲係熱   我本身已經灘咗一陣先飲㗎喇   之後我話飲完碗湯成個人係熱哂呀

花雕芙蓉麒麟蒸方利球 ($488/1.04) - 職員極力推介   方利聽得多   但今晚第一次食   肉質真係好滑

不得了豆腐 ($162/1.5份) - 個皮好脆   豆腐超級滑   滷水汁就淡味   我覺得呢餐飯嘅醬汁都係比較淡味

雞蛋焗魚腸 ($188) - 呢個無驚喜   我同里奧大人覺得金城好味好多

香脆鯪魚釀三寶 ($148) - 賣相靚   味道都唔錯   可惜蜆芥汁無咩味道

原籠仁稔子薑鰱魚雲 ($248) - 我覺得夠味   但糟媽話唔夠味   不過佢食慣開嘅   所以應該真係唔夠味   哈哈

脆皮炸子雞 ($228/半) - 我好飽無食到   食剩一半打包比工人   糟媽話家姐寵壞哂工人   咩都 Share   工人真係食到咀刁啦   上次家姐又拎咗香酥鴨比佢食   佢話下次唔好拎比佢食   語氣勁似太太呀   哈哈

荔蓉香酥鴨 ($208/半) - 呢個好味呀   但食完真係好飽   我哋仲叫咗白飯 ($18/碗)    但食剩一碗   所以家姐打包比工人

紅棗蓉糯米糍 ($38) - 我見家姐拎嘅時候係有煙   糟糟話我黐線   之後家姐話熱㗎原來   不過又真係無諗過糯米糍係熱就真   哈哈

蜂蜜黃金糕 ($38) - 我叫糟媽食先   我見佢食嘅時候好難咬開一半咁   之後佢話好煙韌   咁我即食啦   哈哈

芒果蓉布甸 ($52/杯) - 我落哂芒果汁   糟媽碌大對眼話做咩唔落花奶呀 ?!   我話唔鍾意花奶呀   佢話咩都要試嘛   里奧大人同糟糟都話芒果汁好酸   我同家姐唔覺得酸   之後我話個汁好開胃 呀   糟媽話唔想我咁開胃   哈哈   我其實係想話好消滯   之後糟媽話做咩里奧大人食哂先比妳㗎 ?!   我話里奧大人本身分一半比我   但我話想食其他甜品   叫佢食先   之後糟媽話妳下次嚟同佢食飯   我教妳啲嘢   唔通佢覺得里奧大人蝦我 ?!   哈哈哈哈 ~

薑汁蕃薯糖水 ($38) - 我整鬼佢哋話食蕃薯糖水   家姐糟糟同糟媽一齊啤住我   再話唔係呀嘛    之後姐夫話要食熱糖水嘛   叫呢個糖水嘅時候   我哋 4 個一齊喺度笑

蓮子百合紅豆沙 ($38) - 姑姐又係鍾意食熱嘢   叔叔飲咗健力士黑啤 ($58) 同咖啡 ($42)   所以食唔落食糖水

( 2-JUL-2024  TUE )

感恩一覺瞓天光呀   今朝里奧大人手機響先   我覺得好奇怪囉   原來我無拎手機入房呀   我仲以為自己手機鬧鐘響咗都唔知添 ~

早餐食芝麻包夾芝士   之前買咗 2 包芝士   所以依家間唔中都要咁食   哈哈 ~

今朝晏咗出門口   好在趕得到班車咋 ~

番到菇場掛住 Skype   突然醒起我月頭係要開 D/N 呀   嚇到拿拿聲去做嘢   哈哈 ~

7 月了   話咁快又 7 月 

如果同家姐同一間公司就好   哈哈

咁又已經搞咗半個鐘   之後又開始忙 lu ~

Lunch Time 落雨就唔出街啦   同阿齋傾咗半個鐘   咁又好呀   啱啱開始餓   呵呵 ~

到 3 點就搞掂   今日 5 點鐘放工   好在西瓜喺度   唔係就要準時走㗎喇 ~

我同里奧大人喺土瓜灣等   去到金鐘都只係 5 點 35 分   咁我話坐住等佢哋啦 ~

家姐 5 點 45 分打嚟話佢喺金鐘   不過等埋姐夫先出閘   咁我就再打比姑姐問佢喺邊 ?!   點知我哋一行出去想上扶手電梯去 C2   姑姐咁啱搭扶手電梯上嚟   里奧大人話姑姐呀   成個過程都係神嘅保守   因為我咁啱可以早放工   咁啱家姐又打嚟   咁啱我哋又要去 C2 就見到姑姐   始終姑姐喺加拿大係揸車   真係好少機會搭地鐵   佢話咁多條扶手電梯好似八爪魚咁   哈哈 ~

最感恩係今晚里奧大人都嚟到   本身今晚係要同人開大會   感恩勁哥幫手   唔係里奧大人就嚟唔到 lu ~

家姐同叔叔佢哋 6 點就到 C2   今晚大家都早到咗呀   因為本身約 6 點 15 分㗎   我係最遲放工嘅一個   所以我今日特登早半個鐘走   我驚行去地鐵站好耐   唔想佢哋等囉 ~

因為間酒樓未開   所以我哋周圍行下先 ~

一見 ASTRO BOY 就有啲感慨   但里奧大人就會笑囉

家姐以前買咗一套   但後尾搬屋就掉哂 lu

見唔到高樓真係好

食完行番一個圈都唔錯   哈哈哈哈

里奧大人話翠河係馬王   我對跑馬真係咩都唔知   但我買過一次馬   我買隻賠率唔知係幾多 %   我個男同事唔比我買   佢話要我買爆冷嘅   但我鬼識咩   見個騎師出名先買嘛   所以人生第一次買馬仍係最後一次買馬   但仲要係無買添   哈哈 

之後見到糟糟同糟媽   Auntie 同我握手先搞笑   不過真係好多謝糟糟同糟媽嚟食飯   因為佢負責幫我哋 Book 枱   唔係我哋唔可以喺度食飯呢 ~

糟糟同糟媽強調家姐唔鍾意食中菜   但係佢話揀去馬會食飯   不過叔叔佢哋鍾意食中菜嘛   一定就番佢啦   同埋移民咗咁耐   都好掛住香港嘅點點滴滴   始終係一個回憶呢 ~

糟媽無啦啦摸我隻手   又無啦啦情深款款咁望我   我話我肥咗好多啦   所以妳成日認唔到我   以前成日去妳屋企食飯㗎   不過隔咗好多好多年都無見   我話對上一次見係 2017 年啦   佢話上年咪見過囉   因為糟爸走咗   其實我意思係想話大家一齊出嚟食飯呀 ~

佢成日叫里奧大人食嘢啦   我話勁喎   記得我老公個名   係都要話下佢   所以佢對我反白眼   哈哈 ~

咁我行去問糟糟嘢   佢同糟媽話我條裙好靚   喺邊度買 ?!   可能我次次都着深色衫   好少係咁 Colorful   哈哈 ~

糟糟每次串串共講笑   糟媽就會細細力打佢隻手   抵死 ~

今晚真係體會到糟糟超級孝順   每碟餸一到就會夾比媽咪先   又係咁睇住媽咪個碗啲嘢食哂未   食完又再夾比佢   糟媽真係全程無夾過餸㗎   但糟媽係好鬼精靈   食得瞓得又行得   我好羨慕啦 ~

糟媽好搞笑   一眼望到對面嗰枱食片皮鴨   又話後面嗰枱炒嘅菜好香   叔叔話佢隔離飯香   呵呵~

其實叔叔呢兩日都好少講嘢   同埋我哋感覺佢心情仲未回復   個樣係好唔開心咁   可能真係每次番嚟都會同姑姐一齊   今次姑姐走得咁突然   可能一時間仲未接受到 ~

糟媽好識做   真係一路食一路睇實叔叔佢哋   咁糟糟同家姐話叫甜品   糟媽即刻指住叔叔方向   示意話仲食緊唔好叫甜品住   衰糟真係好鬼心急   食到一半已經話食甜品 ~

糟糟真係好有心   特登去買蝴蝶碟比叔叔同姑姐   今晚嚟同我哋一齊食飯已經好感激啦   但估唔到連我都有份   真係當我長輩咁喎   哈哈 ~

朱古力蝴蝶酥

嬸嬸買比我哋嘅花旗參糖

呢餐係 $3,041   家姐話好抵   因為我哋無睇價錢叫餸嘅   佢哋想食咩就叫咩   同埋我哋諗住起碼 $5,000 嘛 ~

差唔多 9 點半都走人喇   糟糟就揸車番屋企   我哋就行去銅鑼灣地鐵站   因為馬會職員話呢個時間唔會有的士入嚟呢 ~

家姐坐北角線   我哋同叔叔姑姐就坐金鐘線   不過我哋就早過佢哋落車呢 ~

今次我送唔到佢哋機呀   因為公司中午去飲茶   其實真係好邪囉   好記得嗰日係西瓜中午上工廠   咁我諗住佢走咗先比請假表比佢   佢聽朝就會簽比我   咁我唔駛特登入佢房比佢簽嘛 ~

之後西瓜出發   我已經寫緊請假日子   點知 BG 喺群組話 7月5日公司請食飯   請大家預留時間   咁我仲點敢請假呀 ~

番到屋企都 10 點半   要即刻沖涼喇 ~

今晚真係超級開心呀   掛住同糟糟 Whatsapp   所以成 11 點半先瞓呀 ~

滷水鵝 (外賣) + 菜心苗 ( 1-JUL-2024 )

之前食剩幾個刈包   咁今晚蒸埋去啦   因為唔想食飯

( 1-JUL-2024  MON )

今朝 8 點起身   沖埋涼就即刻去食早餐喇 ~

食完番屋企抖陣就出發去寶福山   咁堂二哥約咗家姐喺 Shuttle Bus 等   咁我到咁上下就問佢喺邊 ?!   估唔到去到啟德站就見到家姐   真係約埋都唔會咁啱時間呀 ~

落車嘅時候   望到月台就見到堂二哥講緊電話   即係其實我哋全部係同一班車呀   哈哈 ~

我哋 9 點 45 分到   之前表哥話 10 點至 10 點半到   我同里奧大人話唔好囉   點都要早過 10 點   我哋算係最後一批親友到添呀 ~

見到叔叔望住姑姐張相好耐   我都真係眼濕濕好感慨   難得仔女個個出哂身   自己退咗休又多咗時間番香港探親   佢哋仲會住喺姑姐屋企   所以更加傷感   本來 10 月都會番嚟香港   今次因為姑姐走咗   佢哋特登番香港送姑姐一程呢 ~

好似 10 點半儀式開始   之後去富山火葬場   原來好快就到   我仲以為係九龍區添 ~

儀式完畢就去大圍食纓紅宴   同叔叔嬸嬸姑姐加 2 表哥兩公婆   同埋 2 個姑姐嘅親戚一張枱   大家食下傾下   差唔多 1 點半就走人 ~

唔記得邊個親戚去日本   所以有手信喇

中間嗰塊係蘋果乾

家姐同里奧大人講話聽日唔駛番工   里奧大人話要番工呀   家姐再話星期一喎   之後里奧大人都話家姐都搞錯啦   我星期五同家姐約時間   我都話星期六幾點幾點等   家姐話係約星期日喎   因為多數星期六日搞嘛   好少會星期日一搞   可能係擇日啦 ~

因為家姐喺我屋企附近針灸   所以一齊搭地鐵   里奧大人就要番公司做嘢 ~

估唔到見到糟糟同佢朋友   我話好在佢哋做完咋   咪阻住哂   哈哈 ~

到家姐開始針灸   咁我都番屋企休息   糟糟就同朋友食嘢 ~

家姐 3 點 45 分搞掂   我送佢去搭地鐵   之後我就去街市買嘢喇 ~

出咗去一個鐘   已經慢慢行啦   但由頭到腳都濕哂   今日都好焗熱呢 ~

沖埋涼洗埋頭就開機洗衫   睇下 Youtube   今晚差唔多 7 點先開餐 ~

家姐話 $58 抵呀   因為份量都多

是日晚餐 - 滷水鵝 (外賣) + 菜心苗

滷水鵝 (外賣) - 我本身想拎盒手撕雞   之後阿姐叫我買滷水鵝啦   又靚又抵食   聽晚先買手撕雞食啦   估唔到又幾好味喎   下次有機會見到都會買 ~

菜心苗 - 買唔到芥蘭苗   所以買菜心苗 ~

里奧大人主動去洗碗   可能知我條腰好痛呀   因為頭先叫佢幫我按腰   平時係臨瞓先要咁做呢 ~

咁我開埋機洗衫就沖涼啦   里奧大人就幫手熨衫 ~

睇下 Youtube 又打下機   今晚都係 10 點半瞓覺 ~