燒汁焗雞扒 + 油麥菜苗 ( 6-AUG-2024 )

( 6-AUG-2024  TUE )

感恩一覺瞓天光呀   里奧大人話尋晚瞓得唔錯   可能食咗 2 晚綠豆沙清熱   哈哈 ~

今朝同里奧大人出去食早餐   食完就去佢公司坐下先番工 ~

菇場忙下停下   咁樣時間都過得好快㗎 ~

瞓到成個人仔咁

Lunch Time 出去 759 行下   有個女人見我買 3 包糖   即刻問我好唔好食 ?!   之後佢又買 1 包   咁我話我鍾意食囉   始終口味個個唔同嘛   呢隻糖係細細個成日食㗎   但之後無再出過啦   咁糟糟之前喺英國買比家姐食   家姐話個口感同味道同以前一樣   我即刻食啦   果然係好似呢 ~

買咗 2 包糖比家姐   佢話乳酪係 $7/杯都抵   咁我又買啦

買完就買燒賣腸粉番菇場食喇   呢期好想食腸粉   但就唔可以成日食囉 ~

真係搞笑   里奧大人同家姐同冰姑今日一齊 Send 午餐比我睇   好在我都有買嘢食   唔係會比佢哋引到好肚餓   家姐咁啱同我一樣食腸粉添呀 ~  

里奧大人嘅午餐係意大利茄茸香煎魚柳配薯條   估唔到佢今日又同同事喺呢間食午餐

唔忙就 Skype 啦   始終望住電腦好過望手機   哈哈 ~

3 點幾又瞓

瞓到 4 點幾都仲係瞓

放工即走   同阿花一齊行   佢講投訴啲嘢比我聽   我笑到好大聲呀   真係睇佢唔出會咁做 ~

番到屋企即預備晚餐   今晚仍然要睇嬋寶   所以咩都要快手少少呀    哈哈 ~

是日晚餐 - 燒汁焗雞扒 + 油麥菜苗

燒汁焗雞扒 - 就咁雞扒好單調   所以即刻加幾粒車厘茄   估唔到咁整又幾好味喎 ~

油麥菜苗 - 今日差啲買咗芥菜苗呀   我以為係寫芥蘭苗呢   咁轉買油麥菜苗啦 ~    

洗埋碗再開機洗衫   之後沖涼休息喇 ~

依家鍾意去 HKTVmall 買生果   價錢同出面差唔多   又可以幫家姐儲積分 ~

呢排天氣熱   真係鍾意食多水份嘅生果   香印提子好味   但可惜糖份高又唔可以成日食

9 點坐定定睇跳水女子 10 米台決賽   一見到陳芋汐同全紅嬋出場   我同里奧大人就靜哂   我緊張到連氣都唔敢抖住呀 ~

嬋寶第一跳係滿分   真係無咩幾何會睇到全部係 10 分呢 ~

我話唔知做唔做做屈體動作 ?!   里奧大人話佢呢世都未必做到   我話我下世都未必做到添呀   哈哈 ~

好開心嬋寶奪金   陳芋汐奪銀   其實北韓都好勁   所以真係實至名歸呢 ~

睇到 10 點 40 分   之後再睇多陣 BAO Family 放鬆一下   所以 10 點 55 分先瞓 ~

蠔油燜冬菇雞扒 + 菜心苗 ( 5-AUG-2024 )

( 5-AUG-2024  MON )

尋晚瞓得勁差呀   夜瞓加上臨瞓前睇太緊張嘅嘢   但感恩今朝起身都精神 ~

早餐就咁食甜餐包   今次就咁食齋包   依家戒備狀態嘛   咁今朝又晏啲先起身   所以食完早餐就即番工喇 ~

同 CC Whatsapp 傾偈   佢又係咁話好熱   我話行兩行都已經出汗   佢話唔郁都流汗添呀   本身好期待今個月同佢食生日晚飯   點知佢話天氣咁熱唔食呀   真係第一次聽到呢啲原因唔去食飯   哈哈 ~

菇場忙咗陣就可以抖下   家姐打嚟話好番哂   我就安心出行啦   佢成日唔舒服又唔同我講   但可惜心靈相通   我係會知佢唔舒服囉   呵呵 ~

Lunch Time 即走   約咗里奧大人食 Lunch   但佢臨時要番公司搞啲超級麻煩嘢   咁我坐喺餐廳等佢 lu ~

里奧大人差唔多 12 點半先到   咁可以正常時間食 Lunch 喇   哈哈 ~

飲咗杯水   個人當堂凍哂

我真係好鍾意紅磚牆

龍蝦湯好味道

香煎安格斯西冷 (5oz) 配紅酒燒汁薯條 ($72) - 味道 OK 啦   但配菜都唔少   仲有法邊豆

美國豬柳, 柚子蜜糖烤雞薯條 ($68) - 呢碟係里奧大人食嘅   我無試呀

凍檸檬茶 & 凍百香果紅茶

食完就番屋企抖下   咁我話靈修一下先   佢話有 15 分鐘   咁我一揭開本聖經   佢鬧鐘就響   之後話 15 分鐘係計埋行去巴士站   即係我其實唔可以靈修啦 ~

我預約咗係 2 點 45 分㗎   不過 2 點 05 分就到咗   登記完成都只係 2 點 10 分   之後等咗一陣就到我喇   感恩感恩 ~

驗完眼睛度數就要放大曈孔   今次又唔係咁濛喎   之前做就次次都好濛   仲要係疊影   真係要扶住里奧大人行先得到㗎 ~

放大曈孔之後係 R +0.25 Add +2.25   L+ 0.50 Add +2.25   同未放之前差唔多 ~

今次真係好感恩   因為我唔係成日帶副眼鏡喺身   仍都無諗過會幫我 Check 埋眼鏡度數   今日 Check 嘅度數同本身對辦公室漸進鏡度數差唔多   眼鏡好似 2 年幾前買㗎喇   咁睇近嘢無問題   睇電腦就要自己就一就   唔駛特登要配眼鏡   咁就梗係好啦   依家配副眼鏡好貴嘛 ~

感恩無白內障 青光眼同黃斑病變   但都要每年 Check 一次   其實今次驗眼   係之前望完電腦個頭好痛呀   差唔多接近一個星期有多   我驚對眼有問題呀   咁等埋里奧大人得閒就即預咗驗眼囉   同埋都已經 2 年無驗眼   係時候要驗㗎喇 ~

拎埋收據就走人   原來已經 3 點 50 分   估唔到驗咗咁耐 ~

搭巴士番屋企   等咗 2 分鐘就有車   今日樣樣都好順利呀   感謝主 ~

番到屋企就休息下   我叫里奧大人沖涼先   反正又唔駛出街 ~

今晚 6 點 15 分就可以食飯   因為 9 點要睇奧運跳水   唔想急急趕趕 ~

是日晚餐 - 蠔油燜冬菇雞扒 + 菜心苗

蠔油燜冬菇雞扒 - 里奧大人見唔到啲雞扒   咁又唔難怪佢   個色同冬菇係好似   哈哈 ~

菜心苗 - 買半斤食就最好   我依家唔會為咗平兩蚊雞而買 1 斤㗎喇 ~

洗埋碗就開機洗衫   之後就沖涼休息喇 ~

今朝里奧大人已經熨咗 2 機衫   估唔到佢記得   依家佢做任何家務   我只會叫佢一次   佢唔記得就等佢儲埋先熨   呵呵 ~

同里奧大人一齊睇跳水女子 10 米台準決賽   因為我哋好鍾意睇嬋寶呀   咁一路睇又一路食綠豆沙   所以覺得個人都當堂凍啲咁㗎 ~

估唔到有咁多綠豆同海帶

今晚終於可以 10 點 40 分   尋晚太夜瞓啦   依家都無睇 BAO Family 都要瞓喇 ~ 

生炒骨 (外賣) ( 4-AUG-2024 )

食剩 12 粒   又要留番聽晚食 lu

( 4-AUG-2024  SUN )

感恩瞓得都唔錯   所以今朝可以同里奧大人一齊食早餐 ~

食完就去佢公司幫手   咁榴槤話有嘢比我同阿妹   我就好奇怪   關我咩事   之後阿妹話我都係同佢係一個部門   哈哈 ~

幫到 10 點幾就要番自己教會幫手   感恩今朝都好精神呀   始終膝來膝去加上天氣又熱   個人會好易攰呢 ~

搞掂都 1 點半   咁我買埋午餐就番屋企 lu ~

京都骨拚魚香茄子飯

尖椒炒豬腸拚椒鹽骨飯

留番今晚食

我見綠豆沙 $16/2 碗好抵   又好多料咁   所以忍唔住買咗 4 碗 

食完就同里奧大人網上散拜   之後睇陣 Youtube 又抖下 ~

榴槤請我食月餅   紫人就請我食韓國薯片

水姑 5 點鬆啲就嚟車埋我哋一齊去機場   佢居然又係一大喼一細喼番澳洲   佢成日買咁多嘢   我話其實喺澳洲買都得啦   佢話澳洲買得貴   咁咪試另一個牌子囉   唔係一定永世用死一隻家嘛   咁人哋唔出   咪一世唔駛用 ?!

咁 Check-in 完就去食嘢   因為我買咗晚餐   所以我哋唔食嘢   就咁飲嘢算喇 ~

今日我買兩餸飯   里奧大人叫我買多盒餸   咁我無問題啦   之後佢唔醒起今晚要送機   我買嘅時候又無諗咁多家嘛   如果無買就可以一齊食晚餐囉 ~

食下傾下   水姑買咗車 Cam 番澳洲   里奧大人覺得奇怪啦   佢話新車未有車 Cam   之後里奧大人更加愕然   我上網 Check 佢買嘅型號   我睇完嚇一跳   里奧大人再搵   更加嚇一跳   對住佢哋兩公婆真係無嘢好講 ~

鐵板京川蝦球炒雙面黃 ($128) - 份量超級少   真係一個人食都唔夠飽

水姑話朋友買比佢   叫佢記得睇   我真係替佢可悲

睇咗 Apps 係 7 點半開車   但巴士站已經上哂人   我同里奧大人即跑啦   本身係慢慢行家嘛   我哋上咗車就開喇   再望下手機係 7 點 29 分呀   如果慢咗一步上車   我哋就要等 35 分鐘喇 ~

番到屋企即預備晚餐啦   叫里奧大人沖涼先   搞掂好就到我沖涼喇   今晚一定唔會食到出汗   所以沖埋涼先食   今晚 9 點 10 分先食飯   真係好夜   哈哈 ~

是日晚餐 - 生炒骨 (外賣)

生炒骨 (外賣) - 剩買一盒餸都唔錯   盡咗力食剩 10 嚿   又要留番聽晚再食過 ~

今晚睇男單乒乓球金牌戰   之後睇女子高低槓   睇完就燜冬菇   真係好少咁夜燜嘢   哈哈 ~

搞掂哂就睇男雙羽毛球金牌戰   又係睇到好緊張呀   之後望下手機   原來已經 11 點 45 分喇   無諗過今晚睇咁耐添 ~

特色風味辣香濃郁羊肉羊渣麵 + 粉粿綜合凍 (外賣) ( 3-AUG-2024 )

特色風味辣香濃郁羊肉羊渣麵 ($48) - 里奧大人揀咗上海麵   我係重口味人仕   所以拎咗傳承古早味香辣靈水菜脯 & 傳統手工農家香辣蝦米醬   呢兩款都好味道呀

羊渣脆脆哋   呢個我就接受到喇   哈哈

粉粿綜合凍 - 我話唔食芋頭喇   因為有啲飽飽哋 

( 3-AUG-2024  SAT )

感恩一覺瞓天光呀   但應該瞓到 7 點已經醒咗   不過我唔想起身住 ~

估唔到里奧大人 7 點 17 分起身   咁等佢沖埋涼   我都起身 lu ~

今朝同里奧大人出去食早餐   之後再去佢公司坐陣就番工喇 ~

菇場居然忙下停下   打亂哂我嘅計劃添   哈哈 ~

放工即走   咁我番到屋企又未餓   所以差唔多 2 點先出去食嘢 ~

天氣熱真係想食啲辣嘢   我話去譚仔食米線   食完再行番屋企又已經成身汗   要即沖涼洗頭啦 ~

里奧大人沖埋涼抖陣就瞓   我就睇 Youtube   不過睇睇下都瞓咗半個鐘   出咗一身汗真係好易攰   哈哈 ~

佢瞓到 5 點要番公司做嘢   咁我喺屋企抖多陣先番教會 ~

今晚水姑都有番崇拜   之後有個小食會   水姑成日話韭菜餃好鹹   又食剩 1 隻   我同里奧大人講囉   叫佢下次唔好喺成堆人面前咁講啦   可能包水餃嘅人喺佢隔離   咁就核突啦 ~

粟米豬肉餃

韭菜餃

咁我食咗幾隻餃子都有啲飽   水姑又話佢都唔駛食飯   所以里奧大人送佢搭的士再番公司整嘢   咁我等埋佢之後就一齊去買糖水 ~

里奧大人話想食碗羊肉粉   咁無問題啦   因為佢無食到水餃   哈哈 ~

今晚勁焗熱呀   企喺度等 Lift 嘅時候   感覺係全身濕哂 ~

食埋碗粉先沖涼   之後抖陣再食糖水 ~

奧運無咩好睇   咁就睇下 Youtube   今晚 11 點先瞓覺 ~

芝士肉鬆芝麻餐包 + 粟米 ( 2-AUG-2024 )

( 2-AUG-2024  FRI )

感恩一覺瞓天光呀   7 點 19 分都起身了 ~

早餐食芝麻餐包搽醬占   都幾好味㗎 ~

菇場唔忙   但食飯前先嚟忙   不過點都係食完飯先搞得掂㗎喇 ~

今日用防藍光電腦屏幕罩   同事經過好似見到出奇蛋咁   我好多時用啲新嘢   佢哋個個都好好奇咁   好搞笑囉 ~

Lunch Time 出去等 Lift   阿蟲就入門口見到我   之後話夠鐘食飯喇 ?!   我話唔夠鐘點敢出去呀   同埋當時已經係 12 點 47 分啦   講到好似我早出去咁   哈哈 ~

買埋雞翼酸辣米線就番菇場   今日唔係咁想出去行   同埋個天又暗暗哋   我又無着水靴   所以都係早啲番菇場好喇 ~

里奧大人今晚約咗媚媚去旺角食飯   所以我就一早約咗家姐   但佢重感冒就唔同佢食飯啦   最搞笑佢話好唔開心呀   仲諗住帶妳去食好嘢   但自己唔爭氣病咗   我話駛咩唔開心呀   病咗咪病咗囉   最緊要休息快啲好番就真 ~

咁我都忍唔住比冰姑聽下家姐兩段錄音   佢以為家姐病到聲都變埋   之後我比番家姐當日把正常聲佢聽   哈哈   佢一講到無得同我食飯就好唔開心   又再話同唔到我食好嘢   我都問佢   其實妳想同我食咩好嘢呢 ?!   佢話未諗喎   哈哈哈哈   佢好搞笑啦   特登想同我兩個人食   叫姐夫出去同朋友食飯呀 ~

唔忙就繼續 Skype 到放工   唔係會好悶呢 ~

放工要去搞啲嘢   不過有啲問題   要一陣再搞   所以番屋企食嘢先 ~

經過 Circle K 就去買 HERSHEY'S 特濃朱古力甜筒   因為 $12 都抵   原價要 $22 㗎   咁家姐朝早已經 Send 張 Poster 比我知㗎喇   之後影比家姐睇我買咗 4 支   佢話估唔到我會食特濃朱古力味   我話係妳叫我買嘅   佢話我無叫妳買   我係比妳睇下啫   哈哈 ~

咁我間唔中就會幫佢喺 FB 同 IG 追蹤啲專頁   呢期我鍾意福寶   就會幫佢追蹤埋福寶嘅嘢   佢都奇怪點解突然咁多福寶出現   咁再之前幫佢追蹤個超市專頁   依家佢日日睇   話搞到佢成日好想買嘢   哈哈 ~

每樣 2 件   家姐又跟我咁買   呵呵

等埋里奧大人食完飯   又要再同佢去搞啲嘢   咁我比里奧大人睇下甜筒張相   問佢食唔食 ?!   佢話都好喎   買 5 支   買完就再同佢講其實我都買咗 4 支   因為佢好少話買嚟食嘛   難得又做半價   所以買多啲囉 ~

咁我話我拎住番屋企都得啦   佢話咪搞   我對手咁熱   未番屋企都已經溶哂   哈哈 ~

沖埋涼就睇埋羽毛球混雙金牌戰   又係好緊張 ~

依家係細雪櫃   所以連冰格都好少位   買得雪糕就要清咁啲雞扒   要有策略㗎

即買即食其實係最好   因為好味可以再買嘛

睇下 BAO Family 輕鬆下先   所以 11 點半先瞓呀 ~

煎釀三寶 + 碗仔翅 + 腸粉 ( 1-AUG-2024 )

其實想食碗仔翅   不過驚食唔哂   所以無叫里奧大人買   估唔到佢買咗   話試下新嘢喎   呢個都幾好味

好在煎釀有好多甜辣醬   不過其實無都唔驚   因為屋企原來係有甜辣醬   真係買完都唔記得添

( 1-AUG-2024  THU )

瞓到半夜好焗   我再望下個冷氣機總制係紅色   我以為停電   但其他燈制又有着   之後里奧大人話校低 1 度   我話冷氣直頭係關咗呀   再開番又無問題   里奧大人即刻話唔駛校低 1 度 ~

今朝同里奧大人講番啦   我話以為停電   佢條友串串共話停電就唔會有紅燈着啦   我話大佬   瞓到濛濛瀧未清醒   點會咁理智諗到有燈着唔係停電呀   之後佢喺度笑   同埋話其實有時佢喺房都係咁   無啦啦會停咗   所以佢唔覺得好出奇   哈哈 ~

一出大堂有個女人問我哋點去牙科中心   里奧大人即開 Google Map 睇   之後再帶埋佢去   所以我就去餐廳先喇 ~

菇場忙呀   但忙咗個半鐘就搞掂 ~

幾快又到 8 月呀

就嚟又要買 2025 年月曆 lu

Lunch Time 出去行陣   之後諗緊買咩食好   因為好想買嘢番菇場食呀   最後決定買兩餸飯呢 ~

叫到第 2 個餸先醒起無叫少飯   所以我食完要飲杯濃茶消滯同埋食酸糖呀

估唔到家姐食滷肉飯   平時佢多數食炸豬扒   咁啱我今日又唔想食辣先食兩餸飯  真係啱喇   呢餐對我哋嚟講算清㗎喇   因為唔辣   哈哈

唔忙就 Skype 啦   聽下 Keyboard 聲都好啦   唔駛咁靜   哈哈 ~

放工即走   今晚唔煮呀   所以里奧大人即刻話買煎釀三寶番屋企   之後仲叫我唔好煮飯   我都估到佢買腸粉㗎喇 ~

食完抖陣就開機洗衫   之後沖涼休息   里奧大人就熨衫 ~

睇下 Youtube   今晚 10 點半都瞓覺   呢排一坐低睇睇下電視就好眼瞓   頭先 9 點 50 分直頭差啲瞓着添呀   但唔比自己瞓囉   因為真係太早喇   哈哈 ~