煲仔飯 + 南瓜粟米栗子豬𦟌湯 ( DEC-2007 )

原本鬧鐘係校 10 點起身嘅   但同里奧大人不約而同咁 9 點 15 分已經起咗身   之後就即刻梳洗沖涼   里奧大人話去椰林閣食早餐   因為應該無咩人喎   去度真係無咩人   所以即刻 Order 炸魚柳 + 鮮果沙律 + 多士配熱朱古力   而里奧大人就 Order 腿蛋治 + 牛奶麥皮配熱檸茶   總共 $42   椰林閣早餐啲份量真係好多   但最討厭係要等好耐先有得食   最快要 20 分鐘   試過有次等咗 30 分鐘   真係等到火滾成身慶呀   諗住早咗起身早啲食早餐早啲番教會   點知都係同平時 10 點起身嘅時間一樣   激死 ~

食完早餐慢慢行番去教會   熱到嗌救命   但去到教會又越坐越涷   真係遲早病呀   今次只係聽完道就走 lu   .因為里奧大人要去圖書館借書   而我又可以借到 3 本整蛋糕嘅書   太好喇   講真   我唔係咁捨得買啲甜品書   因為好貴   同埋一本得幾款啱自已係幼稚園班級數整嘅   所以都係借嘅好 ~

之後去街市入面嘅熟食中心食馳名撈麵   我食蝦子雲吞撈麵 ($26)   里奧大人食豬油撈麵 ($15)   再加碗淨魚蛋水餃 ($15) 同隔離食檔嘅涷胚芽珍珠奶茶 ($12) + 炸兩 ($8)   好飽呀 ~

之後同里奧大人去買嘢   買咗一個我突然好鍾意嘅小天使裝飾品   再去街市買半個南瓜 ($7) + 3 支粟米 ($9) + 半磅栗子 ($5)   就番屋企 lu ~

番到屋企各有各忙   我就忙煲湯 + 煲藥 + 執衫   里奧大人忙就做功課   話希望聖誕節前做完可以夠我行街買嘢喎 ~

雖然星期日   但都忙到天昏地暗   本來諗好煮飯   但里奧大人想同奶奶 2 姑奶佢哋食煲仔飯   所以就出去食喇   去苑記食臘腸雞飯 + 窩蛋牛肉飯 + 菜心   真係希望越大失望越大   個煲仔飯一啲都唔好食   好似就咁將煮好嘅飯放落煲仔度咁嘅   啲飯又腍又無飯焦   失望失望   好在飲咗好味又超甜嘅南瓜湯潤下咋 ~

又 12 點先瞓喇   仲要聽日係星期一添 ~

麥當勞 + 聖誕禮物 ( DEC-2007 )

真係太多嘢做喇   所以 5 點 45 分先放工   之後拿拿聲搭車番學 ~

尋晚一定要食麥當勞   因為有得換 Keroro   所以就約定里奧大人大家一齊分別去食麥當勞食兒童套餐 (魚柳包 + 細粟米 + 細可樂) ($22.5)   之後就去上堂 lu   真係好攰   好多嘢都入唔到腦 ~

但番到屋企又好鬼精神   所以又係 12 點幾先瞓 ~

~~~~

今朝 6 點 45 分起身   因為北上睇中醫   真係早過番工呀   同里奧大人 8 點第一個到中醫師度   個見到都 O 哂咀   梗係啦   佢哋開 8 點半嘛   但中醫師話可以早啲到   咁梗係早啲到啦   唔想等咁耐呀 ~

今次又要拎 17 劑中藥   埋單要 $2,230   好貴呀   依家啲人民幣又係咁升   好慘呀 ~

終於可以同里奧大人去丹桂軒飲   食咗雲耳魚蛋 + 上海小籠包 + 鳳凰千層糕 + 脆炸靚雲吞 + 竹笙上素餃 + 兩碟崧化牛肉腸   埋單 $130   美中不足本來叫咗個魚翅灌湯餃   但食落係益益哋   所以要取消   大致上啲食物都有水準   特別係碟牛肉腸   真係好食到不得了   而最緊要係可以好放心食   因為我都好怕喺大陸食嘢   原來丹桂軒係唔比客人影食物相㗎   我影嗰陣時有個侍應話公司規定任何人都唔可以影食物喎   唔知真定假呢 ?!   不過人家咁講   我當然即刻收相機啦   費事同佢嘈呀   我驚比人打呀   之後同里奧大人行一陣羅湖商業城就番香港 lu ~

番到香港記得 Jusco 有 8 折   所以番屋企放低中藥就出發去掃貨喇 ~ 

但第一站係里奧大人話先去咗 Gome 睇 Sony Digital Media Player   因為我好想擁有呀   當睇完 Display   里奧大人就二話不說話要部新   太感動喇   估唔到真係會送比我   我真係好開心好開心   不過今次好抵   因為同 Sales 哥哥比較熟   以比咗 Discount 再扣除之前嘅積分及恆生 Cash Dollar   所以里奧大人只需用 $607 就買咗原價 $818 嘅 Sony 比我喇 ~

之後再途經商場   又各自買對拖鞋 + 聖誕小裝飾   用咗 $74 買咗需要買嘅嘢   所以又好開心   
但今次最大收獲估唔到係里奧大人   因為佢用咗折實價 $555 買咗好多襪同私人物品   里奧大人真係以為唔駛錢咁   一口氣買咗 12 對襪   成日話我買嘢顛   自己咪又係一樣   係男同女眼中   8 折真係好吸引   再加上我有 J Card   真係唔買唔得   當職員 Print Out 張單嗰陣時   我真係笑咗出嚟   因為我一生人未試過張單係咁長   真係好值得留念呀   之後再去超市買咗包好想買好耐嘅日本年糕   又係因為有 9 折   所以只需 $36.8 就買到   太好喇 ~

買到一袋二袋   所以要番屋企放低先可以出去食下午茶   同里奧大人去咗平靚正嘅大家樂   好肚餓   所以叫咗至愛嘅蜜汁燒雞脾配紅豆冰   里奧大人仍叫咗至愛嘅叉燒瀨配花旗參杞子蜜   再 Share 食春卷 + 粟米 + 焗薯配檸茶   好滿足呀 ~

之後要去百佳買豬𦟌 + 排骨 + 湯包   買下買下又用咗 $160   但今次我好豪   因為我動用咗原本應該係我嘅私己 $69 Cash Dollars   又有排儲喇 ~

番到屋企里奧大人幫我 Download 音樂落 MP3   而我就第一時間煲藥   再煲川貝雪梨蘋果   用 6 個鴨梨 + 3 個蘋果 + 川貝 + 南北杏 + 冰糖煲 2 個鐘   好清甜呀 ~

咁都搞咗個幾鐘   再洗衫 拖地 執嘢 抹嘢   話咁快就到 7 點半   又係時候食晚餐   由於今日用咗好多錢   所以要慳啲去食車仔麵   食咗通菜 + 韭菜 + 豆腐卜 + 辣魚蛋河粉   里奧大人食牛腩 + 辣魚蛋 + 生菜米粉   加埋都係 $38 咋   等同人家一個餐嘅價錢呀   所以真係好抵   又平又好味  但超無益囉 ~

唔知點解   今日真係好開心好開心好開心 ~

川滬小館 @ 大埔 ( NOV-2007 )

尋晚好攰又有啲頭痛   所以決定唔煮飯   同里奧大人去川滬小館食小籠包 + 海哲拚素鵝 + 八寶豆腐 + 鬆子肉碎 + 2 件叉子燒餅 ($186)   依家咩都細碟哂   以前碟鬆子肉碎一定要叫夾 4 件燒餅先食得哂   但尋晚嘅份量只可以夾 2 件叉子燒餅   價錢無變   但份量劇變   不過對於我都好嘅   細細碟份量啱啱好唔駛嘥嘛 ~

番到屋企同自己講一定要 11 點瞓覺   唔係唔掂   好在真係可以 11 點瞓覺 ~

~~~~

今朝太好喇   因為有充足嘅時間食早餐   所以去咗 KFC 食牛角包餐配咖啡 ($12)   今次早餐真係要多謝家姐   因為佢比咗張 $10 Coupon 比我   所以今朝只係用咗 $2 就可以嘆到早餐   估唔到 2 個細細嘅包又幾飽㗎噃 ~

番到公司超級忙   忙到就嚟顛 ~

晏晝好開心可以同里奧大人 + 1 個客 + 1 個同事去別府食 Lunch   我食咗魚生飯   勁飽呀 ~

但那等候耶和華的, 必從新得力, 他們必如鷹展翅上騰, 他們奔跑卻不困倦, 行走卻不疲乏. (以賽亞書 40 : 31)

But they that wait upon the Lord shall renew their strength. They shall mount up with wings like eagles; they shall run and not be weary; they shall walk and not faint. (Isaiah 40:31)

菜遠炒牛肉 + 生炒排骨小菜套餐 ( NOV-2007 )

放工唔駛煮飯唔駛煲藥真係好鬼嘆   所以就去百佳行下   因為想買麥片做早餐   所以買左 1 盒即沖營養燕麥片 (原味) +  2 盒 Nestle 麥片 (高鈣脫脂配方)   去得百佳梗係唔咁快行番出嚟啦   所以順便買埋 St. Ives 潤膚露18oz + 透明膠布 + 椰纖果 + 黑胡椒粉 + 手指餅 + 鴨梨 6 個   又用左 $140   所以又要開始慳番唔好買其他嘢先得喇 ~

番到屋企他他條條咁掃掃地   拆拆信   收收衫咁等里奧大人電話就可以出街食飯 lu   去好麵膳食咗菜遠炒牛肉 + 生炒排骨配例湯 + 白飯 + 熱柚子茶 ($80)   不過啲餸唔係咁好食   而里奧大人又覺得啲飯好硬   但為咗慳啲錢無辦法啦   如果去酒樓食要百幾㗎 ~

食完行一陣就番屋企喇   之後就沖涼   一路燙衫一路睇電視   其實都幾辛苦   因為咁樣基本上係聽電視   唔係睇   但係我一心想燙衫   如果唔燙真係會覺得有樣嘢未做咁會周身唔安樂   呢樣嘢真係要戒喇唔係自己會好辛苦 ~

真係覺得涷同勁乾燥   個鼻哥同喉嚨勁唔舒服   皮膚又乾   去一次洗手間要搽 2 次 Hand Cream 先得   之後即刻敷 Mask   我唔想塊粉臉乾爭爭呀    一敷塊 Mask 真係涷到嗌救命呀冬天最需要做保濕㗎   咁點算好呀 ~

尋晚又係成 12 點先瞓   好驚習慣咗呢個時間先瞓呀 ~

~~~~

今朝天氣真係涷左好多   所以真係唔願起身番工   但我需要錢   所以簡單一個祈禱就彈起身去

梳洗   然後番工賺錢 ~

今朝又係 Only me   因為里奧大人要見客   坐車既時侯雖然有陽光曬住   但都覺得有啲涷   所以好想瞓覺 ~

今朝早左番到公司附近   所以食在早餐先番工   食咗芝士火腿菠蘿包 + 熱杏霜 ($15)   呢排都好多嘢做   真係有啲攰 ~

里奧大人突然打嚟   話見完客之後要同另一個客上廠   好辛苦呢   我真係要學會儲錢   唔想再亂駛錢   因為里奧大人賺錢好辛苦呀   我真希望可以做到 ~

晏晝帶飯   因為尋晚食唔哂   唔好嘥   又可以慳錢   但真係好奇怪   慳慳埋埋啲食飯錢都唔覺銀包多錢咗   因為多咗嘅錢係會不期然咁買其他嘢   所以基本上係無慳到   就係咁   里奧大人就成日丙到我 9 彩   話知唔知咩叫慳錢 ?!   唔係慳呢樣錢黎買其他嘢叫慳錢   呢頭話儲錢..果頭又買到成屋都係嘢   買咁多煲咁多碟做咩 ?!   得兩個人用   買到好似廿幾人用咁   成日話無衫要買衫   買完啲衫又唔見妳着   又係買到成柜都係   吓 ?!   下冊二百字   如果我可以喊到就好啦   用眼淚攻擊   我諗個個男人都會受啩   但我唔會   我只會對佢 "咀篾篾"   因為我好唔認同佢所講嘅嘢   買得多嘢係令到女人會好有安全感   男人你唔明㗎喇 ~

麥當勞之至尊漢堡餐 ( NOV-2007 )

尋日里奧大人要北上開會兼過夜   所以尋晚係我嘅 Free Time ~

放工好開心好開心   因為約咗家姐睇佢嘅新居   有自己嘅屋企真係好好   因為點裝修都得   同埋又唔駛每兩年就要搬   改地址都改到煩啦   同埋搵屋仲煩 ~

尋晚搭地鐵時同家姐講好想食煎釀三寶   但好難買到   估唔到家姐屋企附近有得買   所以即刻買咗 $5/4 件試下   雖然啲三寶樣衰衰咁   但原來好鬼好味㗎   真係有驚喜呀   之後上到家姐屋企參觀   又唔錯噃   最正係開窗之後都唔係好嘈   又對住園境   正呀 ~

我最鍾意係有 Club House   最正係有得玩 GYM 篤波同打網球   我真係好鍾意打網球   但無人肯做我對手   因為我實在太 "勁抽" 喇   係無人接到我發嘅球   因為唔係出哂界就係唔過網   一係就將啲波打完左邊到右邊   打到人哋都話我係咪顛㗎 ?!   想走死人咩 ~

其實家姐尋晚有朋友去佢屋企打邊爐   但見媽咪去睇大戲得我一個人食飯   所以係都要陪我   我就拿拿聲去麥當勞食至尊漢堡餐 ($24.5)   個餐係配薯角   都幾好味   好在家姐幫手食薯角   唔係就嘥哂㗎喇   之後同一齊家姐搭小巴   因為架小巴可以到大家嘅屋企   太好喇 ~

番到屋企見到深愛嘅朱朱撲兩撲就上床仔瞓   覺得佢係有啲唔舒服   應該係想作嘔格   點知真係抱兩抱就嘔   真係陰公咯   所以尋晚我有啲悶   因為唔可以攬住深愛嘅朱朱 "灘" 喺梳化度睇電視   因為佢要瞓覺覺   好在尋晚套 "兩妻時代" 又幾好笑啫   唔係就悶死我咯   睇完就瞓覺 lu ~

~~~~

今朝同媽咪.家姐 朱朱去一間可以偷雞帶狗入去嘅餐廳食早餐   食咗火腿麵 + 奶油多 + 熱咖啡   係一個餐嚟㗎   $18 又幾抵喎   今朝媽咪請食早餐   我仲抵呀 ~

晏晝帶飯   因為媽咪尋晚特登煮多啲比我帶飯嘅   有髮菜蠔豉燜豬手 + 炒荷蘭豆蝦乾 + 清炒芽菜   好好食呀 ~

呢幾日唔駛飲中藥   要等到 1/12 北上覆診後先再飲   太好喇   因為一早空肚飲真係好攞命   呢幾日我會好好珍惜唔駛煲藥嘅日子   因為煲藥真係好困身 ~

今日好開心   因為 CC 出院   聽佢把聲仲精神過我   仲有最開心係佢嘅傷口唔痛   唔駛咁辛苦嘛 ~

真係好邪呀   家姐尋晚先同我講話一對啲工人好呢   啲工人就會得吋進呎   點知頭先家姐打嚟話個工人將自己啲衫同埋家姐嗰啲一齊開機洗   家姐問做咩一齊洗   工人答無嘢   再問都係答無嘢   .慶到家姐話唔識講就一齊去 Agent 度用印尼話講   之後仲衰   個工人話家姐咩都唔得   隔離工人個太太咩都得   呢句話真係令到家姐發顛呀   因為工人話想放假就比佢放   如果喺屋企有客人嚟   叫佢瞓到 11 點幾得喇   家姐之佢偷懶   但無話佢    家姐心態係有邊個打工嘅唔偷懶呢   點知個工人就用人哋嘅好嘢嚟比   人哋衰嘅又無講   激到家姐話以後妳唔好有任何要求呀   我咩都唔會比㗎   我會記住妳講呢句說話   個工人今次真係唔衰攞嚟衰咯 ~

凡事謝恩, 因為這是 神在基督耶穌裏向你們所定的旨意. (帖撒羅尼迦前書 5 : 18)

驚險的 75 折元綠壽司 ( NOV-2007 )

尋晚放工即刻去探 CC   見佢做完手術後都好精神   我個心安樂哂   傾到 7 點幾我就走喇   趕住同里奧大人食晚飯呢   等車時突然間喺度諗   係咪應該比人休息下   唔好同人講咁多野呢   女人真係好多野講呀 ~

晚餐同里奧大人去元綠   因為用埋 11 月底前用嘅 75 折 Coupon 同埋一客免費迷你花之卷囉   同里奧大人拿拿聲 Order 蟹籽 / 蟹籽沙律豆腐皮 / 仲魚 / 火陷帆立貝既壽司 + 吉列炸蝦卷 + 蠔情卷 + 三文魚手卷 + 冷辣辣麵 +  鐵板豆腐 + 迷你花之卷 (3 個麥嘜印花免費贈送)   埋單 $129...因為有 75 折   所以咁平 ~

我尋晚入到元綠真係嚇鬼死我   因為我比 7 折 Coupon 佢哋啦   佢哋話 7 折係用到 6 點   嚇到我有啲頭暈   之後鎮定啲再摷銀包仲有無其他 75 折 Coupon   好在有咋   唔係唔抵嘛    一心諗住 7 折先嚟食咋   依家 75 折都好嘛   今次唔知點解好快飽   仲有啲食到想嘔嘅感覺   我食嘅次序係冷辣辣麵   蟹籽沙律豆腐皮之後再花之卷   樣樣都有醬   所以食到花之卷時已經唔   .好想嘔   啲醬好漏呀...搞到我無咩胃口食其他壽司添呀   激死   唔怪之得里奧大人成日都話啲沙律醬好漏啦   經過尋晚咁食法   真係覺得好漏 ~

番到屋企里奧大人忙覆 Email 同寫 Meeting Report   而我就熨下衫   之後沖涼再睇 Keroro DVD   好正呀   睇卡通片真係令人好開心   唔駛一路睇一路諗   多麼的舒服呀   真係好多謝里奧大人用私已錢送呢幾套 Keroro DVD 比我呀 ~

睇左一隻 DVD 後再玩 NDS 太鼓   玩到 12 點幾先瞓 ~

~~~~

好眼瞓呀   雖然知一定會遲到   但都要喺出面食完早餐先番工   食咗營養豐富嘅蛋牛治烘底 + 熱鴦 ($15)   好滿足好滿足 ~

番到公司要慢慢做   因為之前出錯單   好驚再做錯   所以慢慢做慢慢對   原來慢工出細貨真係講得好啱   所以我以後做咩都會用呢個宗旨做人 ~

晏晝突然好想食豬扒   所以買豬扒 + 通菜 + 米線 ($13)   真係又再次嚇餐死   Order 完記得我散紙包張 $20 今朝用咗   好在仲有 $18 散紙咋   唔係都唔知叫唔叫人撩番塊豬扒出嚟好呀   我下次都係唔好嫌煩拎銀包買野食先得喇 ~

香茅煎雞翼 + 菜心 + 炒飯 ( NOV-2007 )

晏晝番到屋企   里奧大人就瞓晏覺   而我就睇報紙   尋日行經 7-11 同 Circle K 都好奇怪   因為只係得蘋果日報   無哂東方日報   心諗唔知係咪有大事件 ?!   所以同里奧大人不惜一切咁耗盡所有腳骨力   行到有東方日報買既報紙檔   原來係講有對父母將 5 個女留喺屋企   任由佢哋喺屋內同屋外大小二便   而兩夫婦就成日出街蒲   留低啲仔女喺屋企   但好怪就係話搞分居   但又一齊去蒲喎   都唔知啲報紙邊句真 ?!   不過點都好   番低啲 小朋友喺屋企真係好唔啱   好危險家嘛   如果真係咁想成日去玩   就不如唔好生啦   仲要生 5 個咁多   做人父母要有責任照顧家嘛生咗又唔養又唔教   最憎呢啲咁無責任嘅父母呀 ~

睇完報紙再睇陣雜誌都成 3 點幾   里奧大人話頭重重唔食嘢   叫我自己食喎   所以就求其食咗個辛辣杯麵   食完無耐里奧大人就話不如出去食嘢   我話唔係化   啱啱食完杯麵點食呀 ?!   所以又求其煮咗個腸仔福麵比里奧大人食算喇   早啲出聲話食嘛   咁我可以唔駛咁慘食杯麵   又唔駛咁慘煮麵你食嘛   仲要話啲腸仔唔好食   要煎先好食 ~

尋日終於搞掂份讀書報告   太好喇.   仲差 1 份報告未做呢 ~

里奧大人都好乖仔   因為主動煲藥仲洗埋所有野添   可能係見我特登煮麵比佢食令到佢心生感動呀 ~

之後我就開始預備晚餐喇   就係香茅煎雞翼 + 菜心 + 炒飯

香茅煎雞翼 - 將 3 支香茅切條   再用豉油 糖 麻油 胡椒粉 粟粉醃 2 個鐘   切香茅嘅時候覺得好香   原來食嘅時候係無味嘅 ~

菜心 - 太攰   居然唔記得拻 "依"   好在唔多渣 ~

炒飯 - 用蔥粒 + 蛋 + 老抽 + 生抽嚟炒   懶人飯 ~

薑蓉 - 因為唔想嘥咗啲蔥   所以整薑蓉   同埋覺得好似多樣餸咁 ~

整完哂所有嘢就同里奧大人去跑步   好舒服呀 ~

番到屋企即刻食橙   唔知咁會唔會肥嘅呢 ~

~~~~

今朝里奧大人要北上   我又可以早啲出門口   但今朝車程慢咗   所以買炒米粉 + 熱咖啡 ($17) 番公司食   其實想喺公司沖咖啡   但硬係覺得提唔到神   所以都係要飲出面嗰啲 ~

番到公司都有嘢做   但今日開始好悶喇   因為朋友 CC 入院做小手術   出院又要抖下   所以唔知要悶幾耐喇 ~

晏晝帶飯   可以慳錢但悶死 ~

諗番起星期五晚發既夢   唔小心打爛個藥煲   之後鬧鐘響就醒咗喇   點知星六晚真係打爛咗個樽   掃完地以為無事   無着到拖鞋點知比玻璃碎 "吉" 到腳板底呀   痛到吖   又流血   嚇死呀   之後里奧大人同我用黃藥水消毒再貼膠布   行路我都唔咁腳板掂地呀   因為好痛呀   好耐之前試過發夢仲咗六合   我醒嘅時候仲記得啲號碼   所以放工即刻去買   但一個字都無中嘅   點解今次打爛嘢又會夢境成真呀 ?!