放工好開心好開心...因為約咗家姐睇佢嘅新居...有自己嘅屋企真係好好...因為點裝修都得...同埋又唔駛每兩年就要搬...改地址都改到煩啦...同埋搵屋仲煩
尋晚搭地鐵時同家姐講好想食煎釀三寶...但好難買到...估唔到家姐屋企附近有得買...所以即刻買咗 $5/4 件試下...雖然 d 三寶樣衰衰咁....但原來好鬼好味架...真係有驚喜呀
之後上到家姐屋企參觀...又唔錯噃...最正係開窗之後都唔係好嘈...又對住園境...正呀
我最鍾意係有 club house...最正係有得玩 gym...篤波同打網球...我真係好 like 打網球...但無人肯做我對手...因為我實在太..."勁抽"...喇...係無人接到我發嘅球...因為唔係出哂界就係唔過網...一係就將 d 波打完左邊到右邊...打到人地都話我係咪顛架 ??想走死人咩
其實家姐尋晚有朋友去佢屋企打邊爐...但見媽咪去睇大戲得我一個人食飯...所以係都要陪我...所以我就拿拿聲去麥當勞食至尊漢堡餐 ($24.5)...個餐係配薯角...都幾好味...好在家姐幫口薯角....唔係就sai 哂架喇...之後同一齊家姐搭 van...因為架 van 可以到大家嘅屋企...太好喇
番到屋企見到深愛嘅朱朱撲兩撲就上床仔瞓...覺得佢係有d唔舒服...應該係想作嘔格...點知真係抱兩抱就嘔...真係陰公咯...所以尋晚我有 d 悶...因為唔可以攬住深愛嘅朱朱"灘"喺梳化度睇電視...因為佢要瞓覺覺...好在尋晚套 "兩妻時代" 又幾好笑啫...唔係就悶 c 我咯...睇完就瞓覺 lu
今朝同媽咪...家姐...深愛嘅朱朱去一間可以偷雞帶狗入去嘅餐廳食早餐...食左火腿麵 + 奶油多 + 熱咖啡...係一個餐黎架...$18 又幾抵喎...今朝媽咪請食早餐...我仲抵呀
晏晝帶飯...因為媽咪尋晚特登煮多 d 比我帶飯嘅...有發菜蠔豉炆豬手 + 炒荷蘭豆蝦乾 + 清炒芽菜...好好食呀
呢幾日唔駛飲中藥...要等到 1/12 北上覆診後先再飲...太好喇...因為一早空肚飲真係好攞命....呢幾日我會好好珍惜唔駛煲藥嘅日子...因為煲藥真係好困身架
今日好開心...因為朋友 cc 出院...聽佢把聲仲精神過我...仲有最開心係佢既傷口唔痛...唔駛咁辛苦嘛
真係好邪呀...家姐尋晚先同我講話一對 d 工人好呢...d 工人就會得吋進呎...點知頭先家姐打黎話個工人將自己 d 衫同埋家姐果 d 一齊開機洗...家姐問做咩一齊洗...工人答無嘢...再問都係答無嘢...慶到家姐話唔識講就一齊去 agent 度用印尼話講...之後仲衰...個工人話家姐咩都唔得...隔離工人個太太咩都得...嘩...呢句話真係令到家姐發顛呀...因為工人話想放假就比佢放...如果喺屋企有客人黎...叫佢做到 11 點幾得喇...家姐之佢偷懶...但無話佢 (家姐心態係有邊個打工嘅唔偷懶呢)...點知個工人就用人地嘅好嘢黎比...人地衰嘅又無講...激到家姐話以後妳唔好有任何要求呀...我咩都唔會比架....我會記住妳講呢句說話架...哼...個工人今次真係唔衰攞黎衰咯
凡事謝恩, 因為這是 神在基督耶穌裏向你們所定的旨意. (帖撒羅尼迦前書 5 : 18)
沒有留言:
發佈留言