媽咪生日飯 @ 媽咪屋企 ( 8-FEB-2012 )

撈生

荷蘭豆炒鮮魷

冬菇蠔豉燜排骨

蒸撻沙

炒白菜仔

蓮藕瑤柱紅蘿蔔唐排湯


芒果流心 @ 東海堂

( 8-FEB-2012  WED )

好凍啦   真係好想繼續瞓呀 ~

好在食完早餐個人暖好多  同埋飲完杯咖啡真係醒神好多呢 ~

喺菇場做下啲濕碎嘢咁啦   做下 Hea 下等食飯   今日又有 Lunch Box 喇   有個同事話我啲餸好好味咁   有色水真係好緊要呢  唔好食都呃到下人嘛 ~ 

無啦啦又忙喎   我唔太鍾意晏晝先嚟忙   因為會好似好緊張咁呢 ~ 

其實未做完嘢   不過今晚去媽咪屋企食飯   所以都係準時走喇 ~  

今日係媽咪生日   本來諗住出去食飯慶祝   但無啦啦氣溫又急降   媽咪氣管又唔好   所以最後決定屋企食飯算數 lu ~ 

家姐買咗生日蛋糕比媽咪   襯媽咪去廁所嘅時候拎出嚟   媽咪一出嚟見到個蛋糕好開心呀 ~

坐到 8 點半就同家姐一齊走喇   佢話佢同事好鬼孤寒   上年結婚派雙封   今年居然唔派比人呀   啲同事問家姐   佢係咪唔方便   即係話唔知屋企無咪有咩事呀   我覺得好搞笑囉   好心啦   $10 都派一封比人嘛   人哋都會同妳講啲祝賀說話嘛   好過依家比人咁誤會   真係啋鬼過佢啦 ~

今晚里奧大人 9 點先番到屋企   咁都好   可以滾番熱碗湯比佢飲   因為我都好似好耐無煲湯比佢飲咁呀 ~

椒醬肉 + 腐乳油麥菜 ( 7-FEB-2012 )

( 7-FEB-2012  TUE )

今朝又係好潮濕   個人真係顯得特別攰咁囉 ~

好餓呀   所以又食沙爹牛肉通粉餐   我食呢啲餐多數走包   因為真係食唔哂   我見好多人都鍾意將塊方包點蛋黃食   今朝見到個男仔點沙爹牛肉啲湯嚟食   我接受唔到呀   其一味精湯   其二我唔鍾意食浸腍咗嘅麵包呢 ~

又唔係好忙喎   Hea 住過到 Lunch Time 咁啦   食完 Lunch Box 就出去幫菇場買 Tissue   一出門口係好凍   但一入到超市就好鬼焗   最驚係咁樣   好易病 ~

又係等放工   今晚去街市買菜同豬肉   之後就番屋企喇   醃完肉就拖地   諗住 Hea 住煮嘢   估唔到里奧大人話 On the way   我就即刻飛入廚房煮嘢喇   咁番到嚟就可以即刻開飯呢 ~

是日懶餐 - 椒醬肉 + 腐乳油麥菜

椒醬肉 - 之前同里奧大人食潮州菜   佢唔鍾意食凍冰冰嘅椒醬肉   所以我今晚就整比佢食喇   加咗一隻指天椒嚟煮   個味就香好多呢   我自己覺得   同埋好開心佢都好話好味道呀 ~ 

腐乳油麥菜 - $5 一份大大份   所以要分 2 餐食   本來想炒   不過里奧大人咁快番到屋企就改為淥喇   最緊要快嘛 ~

食完飯   洗完碗就開機洗衫   再熨衫抹櫃抹書房抹廁所   做完個人有啲散呀   但一做開又想做囉   同埋聽日可以休息唔做家務喇 ~

蕃茄肉醬意粉 ( 6-FEB-2012 )

( 6-FEB-2012  MON )

今日個天灰灰暗   又好濕   真係無咩 Mood 呢 ~

好想食鹹鹹甜甜早餐   所以食菠蘿包餐喇 ~

忙到無停手   Lunch Time 先可以抖一抖   今日有 Lunch Box   食完想瞓   但又瞓唔到 ~

食完又忙啦   忙到 4 點鐘   所以今日啲時間過得好快 ~

其實好攰好唔想煮   但又唔知里奧大人幾點番到屋企   我又唔想等   所以都係煮飯算喇 ~

本來諗住拖地   不過天氣咁潮濕都係唔拖喇   所以早啲預備晚餐   整完就沖涼   乾乾淨淨開餐就最開心呢 ~

是日懶餐 - 蕃茄肉醬意粉 

蕃茄肉醬意粉 - 今次買咗 1 磅百合茄   其實睇啲色都覺得無咩味   不過估唔到真係無咩味   好在我煮嘅時候落咗調味   唔係更無味   所以我拎定黑椒粒 + Tabasco 比里奧大人   因為我覺得無味佢就覺得更無味呢   問佢好唔好味   佢扁哂咀擰哂頭話無味   哈哈哈哈   我話將來煮啲餸都會慢慢清淡   依家比你習慣下先呢 ~

其實里奧大人差唔多 9 點先番到屋企   佢食飯   我就食零食   佢食完又做嘢喇   見佢做嘢咁辛苦   真係自己點攰都要煮餐住家飯佢食囉   雖然未必好味   但話哂無味精   同埋喺屋企食嘢真係舒服好多囉   食嗰個喎 ~

ME.N.U @ 九龍灣 ( 5-FEB-2012 )

素翅蘑菇忌廉湯

芝士焗金粟火腿螺絲粉

板板脆炸雞 / 格格脆薯

鮑魚雞粒熱鍋飯


紅豆冰

( 5-FEB-2012  SUN )

勁呀   今次瞓到 11 點 45 分先醒   本來叫里奧大人去麥當勞買包番屋企食   不過佢話想出去食早餐喎 ~

食完再去商場買花   屋企有花真係有啲生氣咁呢 ~

食完藥就開機洗衫再熨衫   里奧大人又要做公司嘢   我睇睇下報紙都瞓咗   差唔多到 3 點半就醒喇   又出去食 Tea 喇 ~

今晚唔煮喇   所以喺屋企睇下報紙雜誌又瞓着咗   6 點半起身就出去食嘢喇 ~

今次啲藥食完好攰   同埋頭暈暈   不過又係嘅   啲藥係等妳瞓覺   休息多啲   咁就快啲好番哂啦 ~

標記樂園潮州粉麵菜館 @ 旺角 ( 4-FEB-2012 )

潮州椒醬肉 ( 例 $40 ) - 原來係凍嘅   所以里奧大人唔多鍾意   加上 d 肉粒好硬  唔係咁好食囉

滷水鵝片 ( 大 $85 ) - d 肉好鞋   好失望

滷水鵝掌翼 ( 例 $58 ) - 我一個人食哂成碟   因為我超鍾意食鵝掌翼   但呢間麻麻地好食   都係荃灣陳記好味 d 

潮州蠔仔肉碎粥 ( 碗 $42 ) - 呢個最好味   可能夠熱呀   哈哈

( 4-FEB-2012  SAT )

呢排周身骨痛   所以請假北上按摩呀 ~

問里奧大人幾點起身好   佢話自然醒   不過我瞓到 9 點半都醒咗   里奧大人都醒咗   所以我話去鴻星飲茶 lu ~  

水晶蝦餃皇 / 鮮蝦炸雲吞 / 越式脆蝦腸粉 / 蜜汁叉燒包 / 懷舊馬拉糕 / 牛肉煲仔飯

但鴻星啲服務質數真係差到呢   我覺得係不知所謂囉   我坐喺好入嘅卡位   佢可以隔咗 3 張枱問我飲咩嘢茶   都黐鬼線   我唔會丫大喉嚨同妳講我飲咩茶囉   大佬   妳以為街市呀   之後佢死死哋過嚟問我飲咩囉   之後我覺得張枱好暗   所以轉另一張   佢就叫另一個同事執好張枱   又講咗好多次話張卡花哂轉嚟轉去   我張卡一早已經比人畫咗   再寫枱號   咁我黑哂面話我係轉咗一次枱   妳唔好用轉嚟轉去嚟形容   同埋張卡本身已經畫花咗   唔關我事   之後佢驚驚哋話驚比啲收銀話畫到咁花   黐鬼線 ~  

仲以為 12 點前埋單有優惠   點知原來 11 點   好在我又無諗過 Hea 住飲啫   所以可以 11 點前埋單   我覺得鴻星正價又唔值喎 ~

番到屋企沖涼就走人喇   好感恩搭到 11 點 45 分嘅直通巴士   啲藥嚟料   所以我喺車度都瞓咗   12 點 20 分已經到咗皇崗   都好快喎   但我仲未瞓醒咁囉 ~

今次又係 1 個鐘頭腳   2 個鐘頭身   按腳嘅時候都應該瞓着咗   到按身嘅時候   我話主力按腰   按摩師一摸話好硬   我覺得係我做完手術之後成日就住傷口嚟行   整到條腰依家好痛囉 ~

按完食埋個餐就走喇   食完都差唔多 5 點   里奧大人知我想買相機套   所以話出旺角    出到旺角佢見到美心快餐   無啦啦話想食西多士   所以就入去食喇 ~

食完行去信和買麵粉   好多人呀   買完就行去食潮州菜   之後諗住買相機套   不過唔啱囉   所以坐小巴番屋企喇 ~

腸仔出前一丁 + 煎釀三寶 (外賣) ( 3-FEB-2012 )

( 3-FEB-2012  FRI )

今朝明明想食雪菜肉絲米粉   但唔知點解叫咗榨菜肉絲米粉   不過算啦   榨菜我都鍾意食嘅 ~

Holiday Mood 呀   有嘢做都慢慢做呢 ~

無啦啦作發燒同感冒   即沖杯薑茶   不過好似無咩用 ~

買飯盒番菇場食   諗住瞓陣   又瞓唔到 ~

係咁打噴嚏又流鼻水   放工即刻睇醫生喇   我同醫生講我咁咁咁   但醫生又無講我係咩病喎   以前啲醫生會主動話妳知咩病   依家妳唔問佢哋唔會講   最緊要妳快啲走唔好阻住下一個嚟睇   同埋以前一咳就會有喉糖   依家無啦   如果有都可能加番十蚊 1 Pack 咁囉 ~

睇完醫生再去超市買嘢   之後番到屋企再開機洗衫同熨衫   咁晏晝打比里奧大人問佢可唔可以早啲番   我唔舒服想出去食飯   之後早啲休息   佢話要見客   所以應該無問題   點知我 8 點半仲未收到佢電話   所以就自己煮麵食算喇   點知一煮麵呢   佢就打嚟話走得   係咪咁邪呀 ~

如果佢早 10 分鐘打嚟就好啦   我唔駛煮麵   咁之後佢話買煎釀三寶做餸   我話是但啦   最緊要快   因為我好想快啲食完洗碗休息呢 ~

是日懶餐 - 腸仔出前一丁

腸仔出前一丁 - 好鬼餓呀   所以淥 2 條腸仔   勁有早餐 Feel ~

星悅鮮廚 @ 官塘 ( 2-FEB-2012 )

豉椒炒蜆

海參扒豆苗

滷水拚盤 ( 掌翼 / 豬腸 / 雞腎) & 紅燒乳鴿

( 2-FEB-2012  WED )

今朝凍凍咃咁喎   唔知仲會凍幾耐呢   凍都唔緊要   最緊要唔好落雨呢   我真係覺得落雨好麻煩囉 ~

唔多肚餓   所以早餐食奶醬多 ~  

菇場忙咗陣就等 Lunch Time 喇   今日又 Lunch Box   留咗好多炒飯   食咗 2/3 要停一停   飲杯熱茶消滯先可以再黎過 ~

放工同媽咪去屋企附近食飯   差唔多食完里奧大人就打比我   話見完客   所以喺皇崗坐直通巴士番香港    太好喇   好難得可以 7 點 15 分就番到九龍灣呢   所以我陪佢食   本來佢想去鐵匠食拉麵   但兩個人入去食一個麵就好肉酸   所以就去大快活算數   食完行陣就番屋企喇 ~

番到屋企佢又有 Urgent 嘢要覆   不過我都預咗佢做嘢   咁我情願佢早啲番屋企做嘢   好過晚晚做到咁夜番屋企   話哂喺屋企做嘢可以見住佢嘛 ~