蜜汁叉燒 + 蔥粒炒飯 + 瑤柱粟米蛋花湯 ( 4-APR-2013 )

( 4-APR-2013  THU )

今日係清明節假期   所以又可以瞓到自然醒   不過瞓到 9 點半都醒咗 lu ~

里奧大人話去 Mega Box 飲茶   因為今日陪唔到我   咁陪下我去飲茶 Hea 下喎 ~

咁即刻沖涼洗頭出發喇   坐小巴過去最好   因為行去又遠   坐的士又貴   Shuttle Bus 又唔知等幾耐   早餐未食都無力行啦   所以坐小巴係最好嘅選擇 ~

本來想去潮宮   不過入面無人食嘅   所以去番御苑皇宴喇 ~

杞子上湯鮮竹卷 - 估唔到係齋鮮竹卷   我鍾意食呀

潮州蒸粉果 - 皮薄餡靚   皮夠煙韌  料又幾多  又無咩肥豬肉   正呀

蟹子燒賣皇 - 幾好味喎   無豬味   哈哈

安蝦鹹水角 - 新鮮炸起   好味到呢

家鄉煎薄撐 - 都 OK   不過太飽肚喇   下次都係唔叫好啲

古法馬拉糕 - OK 啦   對飽肚嘢食   無咩興趣   哈哈

飲完都 12 點   又周圍行下啦   去大眾睇下書   估唔到有得坐添喎   勁有誠品 Feel   最正係無咩人嘛 ~

之後去 Sinomax 買 Candy Neck Cushion   $278 再有 8 折   抵呀   之後里奧大人再買羽絨枕頭 只係 $199 咋   再去埋十蚊店買樽就走 lu   因為個商場好鬼焗呀   非走不可 ~

坐 Shuttle Bus 去德福   去到都差唔多 2 點   去埋旅行社問資料就去 Food Court 食嘢   我就買 KFC 番屋企食 ~

KFC Tea Set (家鄉雞下脾茶餐) $19.9 咋   抵食   因為食完好飽    話時話   點解會係雞全翼嘅 

里奧大人瞓晏覺   我就睇電視   睇睇下都瞓着   瞓咗半個鐘都有添呀   其實仲想瞓   不過唔喇   費事夜晚瞓唔到仲慘 ~

6 點開始煮飯   估唔到 7 點半先食得 ~

是日懶餐 - 蜜汁叉燒 + 蔥粒炒飯 + 瑤柱粟米蛋花湯

蜜汁叉燒 - 下次真係唔好怕肥   要買肥嘅梅頭   咁樣焗出嚟無咁乾呀 ~ 

蔥粒炒飯 - 之前買咗 $2 蔥   用嚟炒飯真係好正 ~

瑤柱粟米蛋花湯 - 都懶得買菜   開罐粟米湯算 lu ~

搞掂哂所有嘢就沖涼   之後就沖涼休息喇 ~    

洋蔥豬扒 + 瑤柱燜節瓜 ( 3-APR-2013 )

( 3-APR-2013  WED )

又潮濕天氣   快啲有陽光啦   無咁多菌嘛 ~

早餐食麵餐   超級勁飽 ~

菇場靜啦   有幾個同事請假   其實請到假真係唔錯   由復活節開始放   請多幾日假   咁就有 11 日假期   幾咁爽呀   不過復活節去旅行又係超級貴   一個 Double 真係唔化算囉   我覺得係離譜添呀 ~

早餐食咁飽係有原因   就係晏晝食麥皮呀   好在買細包   唔駛日日食 ~

放工去拎中藥   之後去街市買梅頭   再去超市買醬料就番屋企 lu ~

煮完餸都差唔多 8 點   里奧大人又未放工   所以我自己食先喇 ~

是日晚餐 - 洋蔥豬扒 + 瑤柱燜節瓜

洋蔥豬扒 - 今次跟高師傅食譜   但食譜啲汁係啡紅色好靚仔   我都煮唔到呢個效果嘅   下次再試下先 ~

瑤柱燜節瓜 - 之前整過㗎喇   方便又好味 ~  

里奧大人 9 點幾先番到屋企   幫佢洗埋碗就沖涼喇   舒服哂 ~ 

龍蝦丸冬蔭功麵 + 青紅蘿蔔粟米豬橫脷湯 ( 2-APR-2013 )

( 2-APR-2013  TUE )

4 日假期眨眨眼就完 lu   不過今日星期二都好   好似番少一日咁嘛   同埋番埋聽日又放清明   好似好多假放咁   唔錯唔錯 ~

早餐食芝腿治烘底   我食哂嘅時侯   隔離枱阿伯就用紙巾抹枱   將啲麵包碎向我嗰邊掃   我已經望住佢   唔好咁自私嘛   之後就將張紙巾掉去我對面   人哋食完個湯碗度呀   幾驚彈咗啲湯出嚟呀   頂佢   我即刻啤住佢啦   大佬   我杯咖啡仲未飲㗎   衰格 ~

阿 Head 無番   我做埋少少嘢就 Free Time 喇 ~

今日有 Lunch Box   呢排最好帶 Lunch Box   因為依家好多時都落雨   好煩呢 ~

放工去牛頭角拎中藥   之後就番屋企啦   里奧大人又上咗大陸   又唔知幾點放工   我都唔買餸喇   就咁煮麵算   最緊要方便 ~

雖然天氣潮濕   但都忍唔住拖地呀   開機洗衫之後就抖半個鐘   抖完就煮嘢食喇   早啲食早啲沖涼早啲休息 ~  

是日懶餐 - 龍蝦丸冬蔭功麵 + 青紅蘿蔔粟米豬橫脷湯

龍蝦丸冬蔭功麵 - 諗住淥西刀魚丸   點知一開冰格就見到之前食剩嘅幾粒龍蝦丸   咁淥埋去啦   唔係又唔記得食㗎喇   第 1 次食呢款麵   估唔到好味道呀   麵嘅質地好似福字麵   冬蔭公湯底又酸酸辣辣   正呀   下次去泰國一定要入番 2 箱慢慢嘆呢 ~

青紅蘿蔔粟米豬橫脷湯 - 尋晚家姐拎嚟都無飲   咁今晚就飲埋去喇 ~

里奧大人 9 點幾先番到屋企   我就煮西刀魚冬蔭功麵比佢食   個麵份量其實好細   所以我煮 2 個比佢   咁先夠飽   之後佢做完公司嘢就食雪糕批   食完又話滯   依樣嗰樣   話要飲包石榴汁消滯喎   仲問我食唔食   飲唔飲   我話唔啦   刷咗牙唔想再食嘢飲嘢呀 ~

蒜蓉蒸蝦 + Sambal 炒通菜 ( 1-APR-2013 )

( 1-APR-2013  MON )

要好好享受埋最後一日嘅假期喇   即係唔出街   喺屋企休息 ~

10 點醒咗   梳洗之後就去食早餐喇 ~

食完番屋企抖陣就去睇中醫   之後買埋餸就番屋企 lu ~

里奧大人要做公司嘢 lu   咁我就睇電視   睇下雜誌咁啦   抖到 3 點先食 Tea ~

油渣麵 - 無厘味道   辣榨菜又無味
煎釀多寶 - 隻尖椒辣呀   但魚蛋好腥囉

腸粉 - 都 ok 啦   不過應該唔會再嚟呢間食 

番到屋企里奧大人就瞓陣   我唔瞓呀   要煲中藥嘛   之後上網睇嘢   睇到 6 點就開始煮飯喇 ~

媽咪煲咗紅蘿蔔湯   所以家姐差唔多 7 點就拎湯比我   搞掂就番屋企食飯   辛苦佢啦 ~

是日晚餐 - 蒜蓉蒸蝦 + Sambal 炒通菜

蒜蓉蒸蝦 - 買咗 $29 半斤海蝦   不過今次細隻啲   本來想煎嘅   但又唔想咁熱氣   所以試整蒜蓉蒸蝦   但里奧大人話味道同出面食有啲唔同   不過都好食   咁都好啲 ~

Sambal 炒通菜 - 終於清哂樽 Sambal 醬喇   依家要努力清醬料呀 ~

好耐無煮飯洗碗咁呀   好在我又唔會懶開一條路   因為里奧大人做嘢咁辛苦   成日出街食   我會覺得自己好衰呢 ~

潮樓 @ 旺角 ( 31-MAR-2013 )

滷水鵝片 (例牌) - 呢度 $80 一碟   同標記差唔多價錢   但環境服務味道就潮樓好好多啦   標記坐得唔舒服   但都要加一服務費

玉蘭菜脯炒飯 - 表弟都鍾意食炒飯   呢個炒飯好味呀   好乾身   我炒到咁好食嘅話   里奧大人必定開心到流眼淚呀
海皇冬瓜盅 - $68 咋   4 個人食都食唔哂

鮑魚肉碎粥 - 表弟婦食   我哋無食   佢要食清清哋呢  
鹹酸菜 - OK 呀   因為我哋其實未餓   食呢啲等自己開胃啲   哈哈

功夫茶 - 表弟婦每次飲茶   都會問係咩茶   好似好鍾意飲茶咁噃   呢度茶比較難解釋   哈哈

( 31-MAR-2013  SUN )

加拿大嘅表弟同表弟婦前晚到咗香港   所以今朝同埋姑姐姑丈一齊過嚟媽咪屋企附近飲茶   約咗 10 點   所以我哋要 9 點鐘起身梳洗   家姐仲勁   9 點 20 分已經到咗酒樓 ~

姑姐佢哋差唔多 10 點先到   依家好好多喇   以前佢哋成日約 9 點到酒樓   難得假期   真係想瞓耐啲嘛 ~

好在里奧大人喺度咋   我都唔知原來表弟婦係智利人   表弟中文又唔得    不過識聽唔識講   都算勁喇 ~

全程由里奧大人做親善大使啦    見佢哋傾得十分之開心   未停過   咁都好   原來佢哋係 Honeymoon   首站係香港 1 星期   之後去越南 2 星期   最後去夏威夷 1 星期就番加拿大 lu ~

食完就上媽咪屋企坐喇   又文化交流下咁啦   我真係勁羨慕外國啲生活   唔係成日都做做做   星期日真係休息唔做嘢   咁之後傾到里奧大人大陸 Office 啲同事   佢話佢哋食完就會有半個鐘瞓覺   表弟婦問佢係點瞓   好難想像呀   咁里奧大人話全公司會燜哂燈   之後啲同事就會拎 Pillow 放喺枱就瞓㗎喇   表弟婦覺得好 Funny ~

差唔多 2 點幾   姑姐姑丈想帶佢哋去志蓮靜苑   之後再由大表哥帶佢哋上山頂   但落雨濕濕   去山頂真係無咩嘢睇到   咁本來里奧大人想約水姑嘅   但水姑又唔得閒   所以里奧大人就做表弟嘅 Tour Guide 喇 ~

坐的士去志蓮靜苑   行完之後   表弟話想去九龍城寨   不過我同里奧大人都唔識   但表弟話有 Map   到番轉頭我哋要跟佢去呀   呵呵   不過啲雨都開始大喇   所以去荷里活廣場食嘢先   再諗諗去邊 ~

去越棧食 Tea   再周圍行   帶佢哋去 Uniqlo 同 H & M   去到 H & M 排隊比錢嘅時候   有個女仔望住我   我又望住佢   佢同我笑   其實嗰下我好驚   因為心諗無啦啦做咩同我笑   但我又覺得佢好熟面口   以為係里奧大人個朋友   之後我再冷靜啲諗一諗   原來係我同事   佢唔化妝個樣   我完全認唔到呢   真係好邪   上次我放假喺九龍灣又見到佢   今次放假去鑽石山又見到佢 ~  

香茅豬扒越式湯濛 - 都幾多豬扒   碎上就最好啦   成塊咬好麻煩

意式紅豆奶茶 / 綠茶咖啡 - 個 Menu 影杯綠茶咖啡好靚   好有層次   原來真實係落色素

最後同佢哋去女人街   夠哂 Local 喇啩   不過來來去去都買嗰啲   佢哋無咩興趣   之後再去波鞋街   佢哋話美國仲平 ~  

本來諗住去九龍城食泰菜   但佢哋無車番屋企   所以最後決定去潮樓   因為有得 Book 位   如果無都唔知去邊食好   無理由帶佢咃食西餐嘛 ~

又係食   不過表弟婦腸胃唔係咁好   所以食好少嘢   同埋要食清啲嘅嘢   咁又係   旅行最驚水土不服   都係小心啲好呢 ~

差唔多 9 點就走喇   送佢哋到地鐵站   之後我哋就坐小巴番屋企喇 ~  

今日好鬼攰呀   番到屋企即沖涼   好在可以休息埋聽日呢 ~   

Pizza Bird 脆意雞 (外賣) ( 30-MAR-2013 )

黑松露蒜香雞柳意粉

海鮮闊條麵

環遊世界 (薄批)

( 30-MAR-2013  SAT )

今朝約咗媽咪同家姐去稻香飲茶   所以我 9 點 10 分起身沖涼洗頭就落去稻香攞位   估唔到里奧大人都醒埋   因為我諗住佢瞓到好晏   打包點心比佢食算呢 ~

要搭枱呀   唔係唔知要等幾耐   都唔想嘥時間等囉 ~

媽咪同工人到咗先   之後就到里奧大人同家姐呢   飲到差唔多 12 點   里奧大人同媽咪上屋企先   我就同家姐去美心拎蛋糕喇 ~

鮮蝦腐皮卷 / 翡翠叉燒腸 / 鴛鴦雙潮 / 川汁抄手 / 鮮蝦炸雲吞 / 豉汁蒸鳳爪 / 鹹肉糭 / 黃金銀絲卷 / 香煎地瓜餅

抖陣就開始打牌喇   3 點食 Tea   咁我就煲埋中藥   之後再打 ~  

打到 8 點開餐   之前諗住同媽咪去鴻星   但估唔到媽咪話想食 Pizza   咁仲好   因為我真係麻麻哋中菜呢 ~

9 點幾佢哋都走喇   仲落緊毛毛雨   所以叫里奧大人幫手送媽咪佢哋搭的士   咁我就執嘢喇 ~

難得假期   里奧大人又 Relax 喇   咁都好   幾驚又話要做公司嘢呀 ~

太興 @ 九龍灣 ( 29-MAR-2013 )

魚香茄子肉鬆煲 - 好惹味呀   送飯一流

回味菠蘿咕嚕肉 - 我覺得好似豬頸肉咁呀

青檸柑梅冰 - 好甜

( 29-MAR-2013  FRI )

超勁開心呀   連續 4 日假期終於開始喇 ~

瞓到 10 點半   今朝去麻酸樂食早餐   坐得好舒服同埋好靜   唔知係咪因為好多人去哂旅行呢 ~

特級炸醬米線 - 見到 Menu 有隻辣椒   仲以為辣   原來係甜嘅   配米線好怪呀

腸仔煎蛋配牛角酥 - 凍冰冰嘅牛角包   唔係牛角酥

午餐肉椒醬粒粒公仔麵 - 無特別

咖啡 - 好飲

食完就番屋企抖陣   呢排個人真係好攰咁   完全無動力做家務呀 ~  

抖到 1 點半就去牛頭角睇中醫   睇完都 2 點半喇   之後 Join 埋里奧大人喺屋企樓下等   諗唔到食咩   又去金姆指 lu ~

里奧大人繼續做公司嘢   我就灘抖   家姐同事比咗太興 $40 Cash Coupon 比家姐   佢唔要就比我   所以今晚去太興食飯喇 ~

今晚里奧大人終於可以 Relax 喇   睇埋戲都成 12 點幾先瞓   假期真係好唔想咁早瞓呢 ~