魚香茄子 ( 25-MAR-2014 )

( 25-MAR-2014  TUE )  

好在尋晚無熱醒啫   但反而里奧大人話熱醒咗   奇怪 ~

早餐食腿蛋治   都真係好飽下 ~

菇場唔太忙   加上所有大粒又唔喺度   真係要好好享受一下呀   哈哈 ~

Lunch Time 同 PMS 出去食   不過我講明唔食飯   所以去食水餃米   食完再行陣就番菇場 lu ~

放工唔駛買餸   番到屋企就燉肉汁   之後抖陣先預備晚餐   今晚 7 點一定要煮飯   因為我想徑步 ~

里奧大人 7 點 15 分打嚟話放工   不過我都係自己食先喇   唔想嘥時間等 ~

是日懶餐 - 魚香茄子  

魚香茄子 - 用魚香茄子醬再加埋鹹魚一齊炒   好味好多呀   不過如果將啲茄子走油就更加靚仔   下次試下半煎炸先   咁唔駛嘥咁多油   嘻嘻 ~       

等佢食埋   幫佢洗埋碗就出去徑步喇   最搞笑我着波鞋嘅時候   里奧大人同我講話   妳真係徑步㗎 ?!   原來佢由始至終都以為我講笑呀   哈哈 ~

8 點 20 分出門口   徑咗 4 個圈   差唔多 15 分鐘   都夠㗎喇   因為我本身都好攰   唔想徑太耐呢 ~   

沖完涼就睇 "心計"   今晚 11 點要瞓喇   好鬼攰呀 ~

蜜糖豆炒牛柳 + 日式麻醬青瓜 ( 24-MAR-2014 )

( 24-MAR-2014  MON )

尋晚瞓到半夜熱醒呀   條頸有好多汗添呀   要起身用紙巾抹乾   初初我仲以為自己發緊夢   仲諗住沖個涼   之後去完廁所   再定一定神   見到都差唔多天光   咁就唔沖喇   唔係沖完一陣起身又沖   好攰㗎 ~

早餐食米粉餐   食完有啲熱   但一陣番到菇場又凍到震   太極端喇 ~

又要做 Report   好在 11 點搞掂   之後又有嘢做 ~

大老闆拎咗 2 大樽醃蘿蔔比我哋食   擺喺雪櫃入面   不過無人想食啦   因為成陣屁味咁呀   一開雪櫃就聞到   好難頂 ~   

家姐今日陪我 Lunch   佢揀咗韓食家   其實淘大都有間   不過無試過   但食完今餐之後就應該唔會再食囉   哈哈   唔係難食   不過真係好一般囉 ~

韓式香辣炒年糕 - 年糕都煙韌   但個汁無味呢

傳統炸醬麵 - 家姐話睇親韓劇都見到有人食炸醬麵  仲要食到個咀黑媽媽好污糟   但就好似好好食咁   所以家姐就叫嚟試囉 

紫菜卷 (泡菜豚肉) - 想食咋   我覺得泡菜豚肉飯好味啲   哈哈      

同家姐行陣一田   之後佢要去尖沙咀   我就陪佢等 Shuttle Bus 呢 ~

放工去超市買餸   好似好耐無去街市咁   不過話時話   我都好耐無煮飯 lu ~
              
番到屋企即燉肉汁   之後預備晚餐   最後就開機洗衫   終於可以抖陣喇 ~

7 點半準時煮飯   點知里奧大人打嚟話放工   不過我照煮喇   最多食住等佢番嚟   我唔想咁夜仲要喺度洗嘢   想快啲煮完快啲洗呢 ~  

今晚我食辛辣麵   咁里奧大人就食出前一丁   佢勁開心啦 ~

里奧大人同我講話今晚同同事一齊走   佢同事問佢係咪買飯盒番屋企食 ?!   佢話唔係   老婆有煮飯   佢同事當堂雙眼發光   之後佢同事問係咪煮完擺入雪櫃   番到嚟自己叮熱 ?!   佢話唔係   會裝喺暖壺入面   番到屋企食都係熱辣辣嘅   佢同事雙眼再度發光   之後問里奧大人   你老婆係咪放好早 ?!   佢答同事話係可以煮到飯   同埋佢又鍾意煮嘢食   哈哈   講到我幾好咁噃 ~

是日懶餐 - 蜜糖豆炒牛柳 + 日式麻醬青瓜  

蜜糖豆炒牛柳 - 想快啲清哂啲牛扒   呢個餸真係唔錯   因為有菜有肉   一碟搞掂哂   唔駛洗多樣嘢   呵呵 ~   

日式麻醬青瓜 - 上星期買㗎喇   諗住整沙律   不過雪櫃無位擺   所以撈麻醬食算喇 ~

洗埋碗就沖涼   里奧大人就要做公司嘢   所以陪唔到我睇 "心計" lu ~

今晚成 11 點半先瞓   我覺得好似好夜咁 ~

嘉華大酒樓 @ 官塘 ( 23-MAR-2014 )

金菇鮮竹蒸花尾躉頭腩

原籠蒜香糯米蒸羔蟹仔

炸乳鴿

金銀蛋莧菜

( 23-MAR-2014  SUN ) 

今朝 10 點起身   食完早餐就番屋企抖陣   之後番教會 lu ~

崇拜完畢就去超市買雜果罐頭   唔知點解無啦啦想食雜果沙律呢 ~

差唔多 3 點去食 Tea   行多陣就番屋企   今晚里奧大人同事搞 Farewell Party   所以佢 4 點半就出門口 lu   好唔慣星期日一個人喺屋企添 ~

我約咗媽咪 家姐同姐夫食晚飯   不過媽咪要打針   所以要早啲食飯   咁 6 點都要去到酒樓 lu ~

食完就上媽咪屋企拎嘢   之後家姐車我番屋企   里奧大人都差唔多時間番到九龍灣   原來佢同另外一個同事早啲走   唔怪得咁早啦 ~

又一齊睇 "心計"   已經成為一個習慣 lu   不過只可以睇到 11 點   聽日要番工嘛 ~

勝利大排檔 @ 九龍灣 ( 22-MAR-2014 )

椒鹽豆腐

涼瓜炒牛肉

蜜椒頭抽豬扒 - 我問水姑係咪 10 年都會食呢個餸   佢諗都唔駛諗就答係   我哋都忍唔住笑

( 22-MAR-2014  SAT )

里奧大人今朝陪我食早餐   所以我 7 點 45 分起身啦    平時我 8 點起身嘛   佢居然唔信喎 ~

食完早餐就番菇場喇   好難得星期六係 9 點前番到去   哈哈 ~

諗住做私人嘢   點知又係星期六忙啦   好在做咗個幾鐘就搞掂 ~

因為里奧大人今朝去完大酒店   所以佢喺大埔食埋 Lunch   咁我放工都去大埔 Join 佢一齊行街喇 ~

企咗半個鐘巴士   腳都軟呀   差唔多 2 點到喇   咁里奧大人喺巴士站接我   之後就周圍行下 ~

又食番冬蔭功湯金邊粉   不過我唔會再去   因為啲人無禮貌   落完 Order 就飛張單落枱度   以前成日食就好客氣   依家無嚟食就咁態度   完全接受唔到囉 ~

食飽就行喇   行到差唔多 4 點就去大埔墟   諗住食傷心酸辣粉   不過已經無咗 lu ~

其實我對腳好攰   諗住去麥當勞買杯雪糕坐低啦   但去到之後要即走   因為超級勁焗 ~

咁唔再周圍行咯   都已經 5 點   一陣又要去舖頭   所以就坐 74X 番九龍灣喇 ~

無啦啦勁想食麥樂雞   咁就食埋先番屋企 ~

執完嘢就即去舖頭喇   之後都搞到差唔多 7 點半先去食飯   食到差唔多 8 點半就番舖頭拎嘢   之後再去水姑屋企坐陣呢 ~

諗住出門口走啦   連門都開埋   不過水姑無啦啦又講嘢   之後關門再傾   傾到 10 點半 ~

打的番屋企   一入屋即沖涼喇   再睇埋 "心計"   12 點幾先瞓 ~      

乳酪啫喱好抵呀   因為一田做緊特價   只係 $15.9/2 個   所以買咗 12 個   

朱古力喺多慶屋買嘅   又係好抵   $10/3 排   買咗 6 排

車仔麵 (外賣) ( 21-MAR-2014 )

( 21-MAR-2014  FRI )

今朝身體 OK 呀   仲有胃口食早餐   我要補充體力呀 ~

菇場忙到呢   對手完全無停過 ~

本來諗住食杯麵   不過都係想出去行行抖抖氣呢 ~

行到 1 點   之後喺一田買壽司番菇場食 ~

食完抖陣又開工啦   多到唔知做邊樣好   我覺得今日做咗一年嘅嘢咁呀 ~

差唔多放工就搞掂   感恩感恩 ~

放工番屋企喇   沖完涼就開機洗衫   再執下嘢就抖 lu ~

里奧大人 8 點放工   所以叫佢買車仔麵番嚟食   因為我勁想食呀   哈哈 ~

食完就睇 "心計"   睇到 11 點幾都瞓 lu ~      

八寶燒味飯 (外賣) ( 20-MAR-2014 )

( 20-MAR-2014  THU )

今朝 7 點半起身   沖埋涼洗埋頭   之後個肚有啲痛   但都接受到嘅   不過想抖多陣   叫里奧大人自己出門口先   我瞓到 8 點半先打的番菇場 ~

買咗腸粉 + 咖啡番菇場食   不過無咩胃口   食咗 3 嚿腸粉咋 ~

勁眼瞓呀   好在所有大粒都唔喺度   我可以合埋眼抖抖 ~

11 點幾有嘢做   但真係不在狀態   所以晏啲先做 ~

Lunch Time 諗住食埋朝早啲腸粉   不過凍咗真係勁難食   所以食咗 1 嚿就掉咗喇 ~

好喇   抖到 4 點 15 分   終於有番啲精神   咁就開行 turbo 做嘢喇   做做下有啲餓   好在有朱古力餅頂住   唔係暈都似 ~

PMS 見我有胃口食餅   佢又請啲零食比我食   嘻嘻 ~

放工即走喇   差唔多番到屋企收到 PMS 電話   傾咗 2 個鐘   好攰呀   傾完就即刻開機洗衫喇 ~

里奧大人知我唔舒服   所以 7 點就放工喇   仲話買太興燒味飯套餐   咁我可以飲例湯 ~

所以我都同里奧大人講   雖然呢幾日身體上唔太舒服   但見你咁細心   都覺得好心點甜   同埋無咁辛苦   哈哈 ~

佢食完就做公司嘢喇   差唔多 9 點幾就做完 lu   所以又一齊睇 "心計" ~    

11 點都瞓喇   但唔知係咪飲咗寶礦力   所以又唔係咁眼瞓   但又無嘢好睇   點都試下瞓囉 ~

燻蹄 (外賣) + 粟米蛋花湯 ( 17-MAR-2014 ) + ( 18-MAR-2014 ) + ( 19-MAR-2014 )

( 17-MAR-2014  MON )

尋晚瞓得唔係咁好呀   所以今朝勁唔想起身囉 ~

早餐食奄列餐   諗住走嘅時候見到阿爽   咁就一齊傾下偈咁啦   等埋佢食完就一齊行番菇場呢 ~

星期一朝早特別忙   仲要對住啲數字就更慘   明明 30 但打咗 35   我已經 Check 咗幾次   不過我多數臨出 Email 再 Check 多次嘅   真係好好彩咋   唔係 send 咗出去就煩啦   因為要比老闆同阿頭睇嘛 ~

Lunch Time 又未餓   所以又出去行陣先買嘢食番菇場呢 ~

今日個肚都係扯住扯住   我估都係差唔多每月一到啦   所以我放工都睇醫生   拎定假紙 ~

我又想快啲食飯   但又唔想出去食   所以就買燻蹄番屋企做餸   我好鍾意食燻蹄㗎   嘻嘻 ~

是日懶餐 - 燻蹄 (外賣) + 粟米蛋花湯

燻蹄 (外賣) - 我話要最細隻   想 $40 左右咁啦   師傅拎咗隻出嚟   要 $52   我話唔想要咁多   佢幫我切到 $38   呢個師傅好好人呀   因為我無諗過佢會幫我切囉   同埋上次個師傅話要一隻隻咁賣家嘛 ~  

粟米蛋花湯 - 懶人首選   飲完成身暖笠笠真係好鬼正 ~

食飽搞陣就沖涼喇   呢兩日無打比家姐   有啲唔慣   因為星期日家姐多數會 Whatsapp 問我飲唔飲茶   我夜晚又會 Whatsapp 問家姐食咩   不過我尋日好攰   想 Whatsapp 嘅時候又做咗其他嘢   咁今日想 Whatsapp 比家姐求其噏啲嘢   但又忙到唔記得   所以今晚一定要打比佢囉   之後佢居然都話尋日無 Whatsapp   今日又無傾電話好唔慣呀   所以佢都話如果我今晚唔打比佢   佢都會打比我呢   搞笑 ~      

里奧大人 8 點放工   今晚唔駛點煮   所以可以好好服侍佢   佢話想食腐乳   我話邪啦   我今晚又係想食   不過無食囉   佢幾驚連佢都無得食呀   哈哈 ~   

今晚 10 點幾就瞓喇   今日真係超級勁攰呢 ~

( 18-MAR-2014  TUE )

尋晚半夜個勁想嘔   都知係每月一到㗎喇 ~

9 點起身同菇場請假   之後就瞓  lu ~

今次無咁痛喎   唔通真係唔食叮嘢 ?!   如果唔嘔就更好啦 ~

瞓到 5 點幾都出廳咯   再瞓嘅話   驚今晚瞓唔着呀 ~

睇陣電視就沖個熱水涼   不過其實都係睇下瞓下咁   里奧大人差唔多 8 點先喺大陸放工   所以要 10 點先番到屋企   咁我望下佢   傾兩句就入房瞓 lu ~

( 19-MAR-2014  WED )

今朝 8 點半起身   個人勁暈呀   幾經辛苦先行到的士站呀   一上車即合埋眼喇   其實都唔知有無瞓着咗添呀 ~

買咗多士同咖啡番菇場食   不過仍然無胃口   咖啡都只係飲咗一啖咋 ~

個肚有啲痛   但都接受到嘅   唔係死去活來嗰啲痛   其實已經好感恩好感恩喇 ~

 
又忙喎   想抖下都唔得   總知邪啦   忙完諗住抖陣又忙   忙完抖陣又忙咁   嗚嗚 ~

lunch Time 又瞓唔到   咁就食埋件多士啦   買咗 2 件   留番 1 件晏啲先食   好後悔買 2 件呀   格硬食真係好辛苦囉 ~

放工即走啦   去埋海皇買菜干豬骨粥就番屋企喇 ~

沖完熱水涼再抖陣就食粥   食咗 1/3 碗已經好反胃   真係次次食海皇啲粥都係咁㗎喎   我唔想行遠啲咋   唔係會去海景買粥囉 ~

里奧大人今晚 9 點喺大陸放工   所以要喺大陸食埋嘢先番屋企   唔係餓壞都似 ~

等呀等   差唔多 11 點就番到屋企喇   又係傾兩句之後我就入房瞓喇 ~