蜜糖豆炒牛柳 + 日式麻醬青瓜 ( 24-MAR-2014 )

( 24-MAR-2014  MON )

尋晚瞓到半夜熱醒呀   條頸有好多汗添呀   要起身用紙巾抹乾   初初我仲以為自己發緊夢   仲諗住沖個涼   之後去完廁所   再定一定神   見到都差唔多天光   咁就唔沖喇   唔係沖完一陣起身又沖   好攰架 ~

早餐食米粉餐   食完有 d 熱   但一陣番到菇場又凍到震   太極端喇 ~

又要做 report   好在 11 點搞掂   之後又有嘢做   woo ~

大老闆拎咗 2 大樽醃蘿蔔比我地食   擺喺雪柜入面   不過無人想食啦   因為成陣屁味咁呀   一開雪柜就聞到   好難頂 ~   

家姐今日陪我 lunch   佢揀咗韓食家   其實淘大都有間   不過無試過   但食完今餐之後就應該唔會再食囉   哈   唔係難食   不過真係好一般囉 ~

韓式香辣炒年糕 - 年糕都煙韌   但個汁無味呢

傳統炸醬麵 - 家姐話睇親韓劇都見到有人食炸醬麵  仲要食到個咀黑媽媽好污糟   但就好似好好食咁   所以家姐就叫黎試囉 

紫菜卷 ( 泡菜豚肉 ) - 想食咋   我覺得泡菜豚肉飯好味 d   嘩哈哈哈      

同家姐行陣一田   之後佢要去尖沙咀   我就陪佢等 shuttle bus 呢 ~

放工去超市買餸   好似好耐無去街市咁   不過話時話   我都好耐無煮飯 lu ~
              
番到屋企即燉肉汁   之後預備晚餐   最後就開機洗衫   終於可以抖陣喇 ~

7 點半準時煮飯   點知里奧大人打黎話放工   不過我照煮喇   最多食住等佢番黎   我唔想咁夜仲要喺度洗嘢   想快 d 煮完快 d 洗呢 ~  

今晚我食辛辣麵   咁里奧大人就食出前一丁   佢勁開心啦 ~

里奧大人同我講話今晚同同事一齊走   佢同事問佢係咪買飯盒番屋企食   佢話唔係   老婆有煮飯   佢同事當堂雙眼發光   之後佢同事問係咪煮完擺入雪柜   番到黎自己叮熱   佢話唔係   會裝喺暖壺入面   番到屋企食都係熱辣辣嘅   佢同事雙眼再度發光   之後問里奧大人   你老婆係咪放好早 ?!   佢答同事話係可以煮到飯   同埋佢又鍾意煮嘢食   哈哈   講到我幾好咁噃 ~

是日懶餐 - 蜜糖豆炒牛柳 + 日式麻醬青瓜  

蜜糖豆炒牛柳 - 想快 d 清哂 d 牛扒   呢個餸真係唔錯   因為有菜有肉   一碟搞掂哂   唔駛洗多樣嘢   呵呵 ~   

日式麻醬青瓜 - d 青瓜上星期買架喇   諗住整沙律   不過雪柜無位擺   所以撈麻醬食算喇 ~

洗埋碗就沖涼   里奧大人就要做公司嘢   所以陪唔到我睇心計 lu ~

今晚成 11 點半先瞓   我覺得好似好夜咁 ~