燻蹄 ( 外賣 ) + 粟米蛋花湯 ( 17-MAR-2014 ) + ( 18-MAR-2014 ) + ( 19-MAR-2014 )

( 17-MAR-2014  MON )

尋晚瞓得唔係咁好呀   所以今朝勁唔想起身囉 ~

早餐食奄列餐   諗住走嘅時候見到同事 "阿爽"   咁就一齊傾下計咁啦   等埋佢食完就一齊行番菇場呢 ~

星期一朝早特別忙   仲要對住 d 數字就更慘   明明 30 但打咗 35   我已經 check 咗幾次   不過我多數臨出 email 再 check 多次嘅   真係好好彩咋  唔係 send 咗出去就煩啦   因為要比老闆同阿頭睇嘛 ~

Lunch Time 又未餓   所以又出去行陣先買嘢食番菇場呢 ~

今日個肚都係扯住扯住   我估都係差唔多每月一到啦   所以我放工都睇醫生   拎定假紙 ~

我又想快 d 食飯   但又唔想出去食   所以就買燻蹄番屋企做餸   我好鍾意食燻蹄架   嘻嘻 ~

是日懶餐 - 燻蹄 ( 外賣 ) + 粟米蛋花湯

燻蹄 ( 外賣 ) - 我話要最細隻   想 $40 左右咁啦   師傅拎咗隻出黎   要 $52   我話唔想要咁多   佢幫我切到 $38   呢個師傅好好人呀   因為我無諗過佢會幫我切囉   同埋上次個師傅話要一隻隻咁賣家嘛 ~  

粟米蛋花湯 - 懶人首選   飲完成身暖笠笠真係好鬼正 ~

食飽搞陣就沖涼喇   呢兩日無打比家姐   有 d 唔慣   因為星期日家姐多數會 whatsapp 問我飲唔飲茶   我夜晚又會 whatsapp 問家姐食咩   不過我尋日好攰   想 whatsapp 嘅時候又做咗其他嘢   咁今日想 whatsapp 比家姐求其 up d 嘢   但又忙到唔記得   所以今晚一定要打比佢囉   之後佢居然都話尋日無 whatsapp   今日又無傾電話好唔慣呀   所以佢都話如果我今晚唔打比佢   佢都會打比我呢   搞笑 ~      

里奧大人 8 點放工   今晚唔駛點煮   所以可以好好服侍佢   佢話想食腐乳   我話邪啦   我今晚又係想食   不過無食囉   佢幾驚連佢都無得食呀   哈 ~   

今晚 10 點幾就瞓喇   今日真係超級勁攰呢 ~

( 18-MAR-2014  TUE )

尋晚半夜個勁想嘔   都知係每月一到架喇 ~

9 點起身同菇場請假   之後就瞓  lu ~

今次無咁痛喎   唔通真係唔食叮嘢 ?!   如果唔嘔就更好啦 ~

瞓到 5 點幾都出廳咯   再瞓嘅話   驚今晚瞓唔着呀 ~

睇陣電視就沖個熱水涼   不過其實都係睇下瞓下咁   里奧大人差唔多 8 點先喺大陸放工   所以要 10 點先番到屋企   咁我望下佢   傾兩句就入房瞓 lu ~

( 19-MAR-2014  WED )

今朝 8 點半起身   個人勁暈呀   幾經辛苦先行到的士站呀   一上車即合埋眼喇   其實都唔知有無瞓着咗添呀 ~

買咗多士同咖啡番菇場食   不過仍然無胃口   咖啡都只係飲咗一啖咋 ~

個肚有 d 痛   但都接受到嘅   唔係死去活來果 d 痛   其實已經好感恩好感恩架喇 ~ 

唉   又忙喎   想抖下都唔得   總知邪啦   忙完諗住抖陣又忙   忙完抖陣又忙咁   嗚嗚 ~

lunch time 又瞓唔到   咁就食埋件多士啦   買咗 2 件   留番 1 件晏 d 先食   好後悔買 2 件呀   夾硬食真係好辛苦囉 ~

放工即走啦   去埋海皇買菜干豬骨粥就番屋企喇 ~

沖完熱水涼再抖陣就食粥   食咗 1/3 碗已經好反胃   真係次次食海皇 d 粥都係咁架喎   我唔想行遠 d 咋   唔係會去海景買粥囉   唉 ~

里奧大人今晚 9 點喺大陸放工   所以要喺大陸食埋嘢先番屋企   唔係餓壞都似 ~

等呀等   差唔多 11 點就番到屋企喇   又係傾兩句之後我就入房瞓喇 ~