大家樂 @ 官塘 ( 25-DEC-2014 )

( 25-DEC-2014  THU )

今朝 9 點已經醒咗   不過懶床到 9 點半起身先   咁里奧大人就 10 點起身喇 ~

上星期諗好咗今日去行山   點知落毛毛雨   睇嚟仲要係長命雨嗰隻 ~

好在里奧大人會有 Plan A 同 Plan B   所以可以即轉 Plan   哈哈 ~

落去食早餐   之後番屋企沖涼   抖陣   差唔多 12 點就出門口喇 ~

五香肉丁好辣呀

搭巴士出旺角   點知勁塞車   1 點先出到去旺角   好後悔無搭小巴呀 ~

里奧大人決定自己買 Note 4   咁將部 Note 3 比家姐   家姐最開心啦   佢一早講好話如果里奧大人唔要部 Note 3 就比佢   佢咩都要   哈哈   家姐次次都用里奧大人二手嘢   但如果作壞嘅就唔會比佢嘅   靠害咩   哈哈 ~

其實我本身諗仕買部 Samsung Grand 比家姐   好似都係 $2,300 左右   咁叫做新機嘛   咁里奧大人話佢比部 Note 3 家姐好過   佢又可以買新機   一舉兩得   咁是但啦   我對手機無咩研究   好唔好真係唔知架   次次都係里奧大人買咩比我   我就用咩㗎喇 ~ 

去咗星際買 Note 4 同 1 張 SD Card   之後我又買埋相機套   再行一陣   原來都 3 點   咁就要快啲去食嘢喇   今日好忙   要好好利用啲時間 ~

我嘅豬軟骨小鍋米線 (小辣) - 上次食小辣係唔酸唔辣   咁依家嚟講就啱哂我啦   唔想咁刺激

里奧大人嘅紫菜豬腩肉小鍋米線 (中辣) - 我同里奧大人講話小辣無味   佢都認同㗎   所以佢叫中辣   點知今次好辣   哈哈   本身佢飲凍檸茶   後尾佢再叫多杯凍奶茶解辣   仲飲哂成杯   勁呀   

之後即搭的士去深水埗探 Fat Fat   因為我買咗條頸巾比佢   同埋順便比個福字月曆比佢呢   去到都 4 點 lu   咁坐陣傾下偈   差唔云多 5 點走 lu ~

同里奧大人再去埋高登睇喇叭   之後佢又買多張 SD Card   話平過頭先買嗰度喎 ~

買完即搭地鐵去官塘喇   今晚約咗媽咪同家姐食嘢   不過要里奧大人推媽咪   其實媽咪行到嘅   但落雨濕濕   咁佢又會行得慢   所以叫里奧大人推就最好   可以快好多   哈哈 ~

咁啱我哋同家姐都 6 點半到大家樂   去到啱啱有位   好感恩呢 ~

食食下嘢   家姐無啦啦話姐夫唔想要部紅米   想轉部細啲嘅電話   咁將部紅米比家姐   我同里奧大人聽完之後都驚啦   特登買部 Note 4   之後將部 Note 3 比家姐家嘛   所以我同里奧大人同家姐講   話我哋幫妳睇有咩電話   妳哋唔好買住   哈哈 ~

食完就番媽咪屋企坐陣   8 點幾走喇   家姐車我哋番屋企   咁樣快好多 ~ 

番屋企即沖涼   之後叫里奧大人都好即沖涼喇   因為今晚要飲 Baileys   里奧大人強調話係 17% Alcohol   我話我後生都成日飲啦   懶勁話咖啡奶之嘛   不過依家年紀大喇   飲咗幾啖呢   成身火熱   又酒精上腦勁眼瞓   我又衰喎   無加冰   之後都頂唔順即刻雪幾粒冰   唔係真係飲唔到   好啦   咁我再飲幾啖啦   整頭有胃酸倒流感覺   真係唔知心口定個胃勁痛   個背脊又勁痛   嗰一刻我直頭想話入醫院添呀   痛到呢   好在企一陣之後無咩事咋 ~

飲杯酒啫   都好似好辛苦咁   哈哈哈哈哈哈哈   仲有大半支點算好呀 ~

其實咖啡酒都好特別   酒精會令人眼瞓   但咖啡又會令人提神   咁所以頭先有啲眼瞓   之後鬼打咁精神   所以今晚 1 點先瞓到呀   好在聽日放假咋 ~   

叙苑粉麵茶餐廳 @ 九龍灣 ( 24-DEC-2014 )

( 24-DEC-2014  WED )

一起身   個天色都唔係咁好噃   希望呢兩日唔好落雨啦   想去行山呀 ~

早餐食奶醬多   正想咬落去嘅時候   8 卦打嚟話嚟緊   之後唔夠 10 秒就見到佢   無啦啦咁快嘅   食完之後去買喉糖   喉嚨痛呀 ~

菇場忙呀   反正今日無得放早   做下嘢啲時間快過啲囉 ~

今日去買頸巾比媽咪同家姐   之後買車仔麵番菇場食   好耐無食喇   好有新鮮感   哈哈 ~

準時開工   差唔多 3 點幾就搞掂 lu   之後又 8 卦 Skype 到放工   有嘢都唔做呀   當自己放 4 點   哈哈 ~

放工去荷里活廣場嘅榮華換臘腸   搭扶手電梯都要等陣先上到去呀   勁多人   所以我換完臘腸就走喇 ~   

搞掂即番屋企 lu   好感恩里奧大人 6 點 40 分可以放工   番到嚟九龍灣都係 7 點 10 分   因為今晚想 7 點幾要去到教會   因為次次請藝人講見証都好多人㗎   咁要快快食嘢   食完即去教會攞位   因為媚媚同男朋友都嚟呢 ~

今晚度度食肆都好多人   真係唔好食嗰間都會有人排隊等呀   哈哈 ~

食完即去教會   啲位都比人坐得 8899   好感恩我哋可以 4 個一齊坐   但媚媚同佢男朋友 8 點半先到囉 ~

10 點崇拜完畢   諗住一齊去松記食糖水   但有好多人排隊囉   所以唔食 lu   因為佢哋仲有下場   咁我哋都番屋企喇 ~

沖完涼   睇下電視   12 點瞓 lu ~

茄汁煎虎蝦 + 齋滷味 (外賣) + 蠔油唐生菜 ( 23-DEC-2014 )

( 23-DEC-2014  TUE )

尋晚我自己蓋張 B-duck 珊瑚絨被   半夜工更凍鬼醒呀   哈哈  最後都要捐番入羽絨被   里奧大人話我成個身都係凍冰冰呀   嚇到佢即刻幫我係咁捽係咁捽   之後我又覺有啲熱   哈哈 ~

今朝天陰陰呀   感覺勁寒囉   我沖完熱水涼都覺得凍呀 ~

一齊搭 Lift   幾個女仔都好高   里奧大人話好少見到咁喎   多數有高有矮咁   所以我今次好突出喎   佢最鍾意笑我矮同埋肥   呢啲先係正宗福相   咁都唔識   哈哈 ~

早餐食芝腿治烘底   睇多陣報紙就要番工 lu ~

菇場唔太忙   不過大粒全部唔喺度   真係好 Free 囉   所以有嘢都慢慢做   嘻嘻 ~

勁想食酸辣米線   但問準里奧大人先   佢話我呢排食得太多立雜嘢   又辣雞   叫我唔好食喎   咁好啦   食韭菜水餃麵啦   落咗 1/3 湯匙嘅豆板醬都覺得辣添 ~

次次食完湯粉麵再行街   就會覺得好熱   係出汗添呀 ~

喉嚨突然好痛   吞口水都好痛添   唔通頭先辣得滯 ?!   千奇千奇唔好病呀   難得假期   如果病咗好掃慶囉   所以即沖杯柚子蜜   不過都係無咩用   哈哈 ~

放工去買菜   之後即番屋企喇 ~

浸好菜   抖陣   差唔多 7 點先煮飯   估唔到 8 點先搞掂   煮完就即沖涼喇 ~

沖完涼諗住食啦   咁里奧大人打嚟話放工   咁我食住粟米等佢啦   之前剩咗 2 條唔好嘥嘛   等佢番嚟嚟淥丁麵比佢食   我就食餸 ~

是日晚餐 - 茄汁煎虎蝦 + 齋滷味 (外賣) + 蠔油唐生菜

茄汁煎虎蝦 - 呢幾隻好大隻   所以煎得比較耐啲   今次好有心機煎㗎   同埋啲蝦好彈牙  今次啲茄汁整得好好味呀   勁開心 ~

齋滷味 (外賣) - 問里奧大人想食叉燒定齋滷味   佢話食齋滷味   因為我鍾意食   算佢啦   記得我鍾意食 ~

蠔油唐生菜 - 屋企仲剩 2 條粟米   咁里奧大人唔鍾意食粟米   但點都要食啲菜嘛   咁買唐生菜啦   夠方便嘛 ~

洗埋碗   9 點幾終於可以休息喇 ~

今晚食埋哂啲乳酪   其實咁鬼凍唔想食   但唔想眼冤   今晚我清哂粟米 + 乳酪   短期內唔想再食呢兩樣嘢 ~

唔多舒服咁   所以 11 點瞓喇 ~

錦日本料理 @ 九龍灣 + 地瓜丸蕃薯糖水 ( 22-DEC-2014 )

特色刺身飯 (沙律 & 迷你牛肉烏冬)

天婦羅蕎麥麵

( 22-DEC-2014  MON )

呢幾朝都懶床 10 分鐘先起身   因為被竇入面暖笠笠   唔捨得出去呀   哈哈 ~

今朝想食芝腿治   點知阿姐寫錯芝蛋治   咁算啦   呢個阿姐好好人   費事佢難做 ~

番到菇場   做埋 Report 就可以 Hea 過 ~

里奧大人打嚟話佢放 5 點   但我仲未知有無得收早噃   本來想去銅鑼灣   但諗諗下都係唔好喇   驚好多人   同埋勁塞車囉 ~

今日有 Lunch Box   食完之後又落去行   條街勁凍   所以行百佳   又去昅下澳洲保利牛奶   人都顛呀   每 Pack $25 咋   仲要唔係咩特價喎   但之前睇係原價 $40.x   搞咩呀   即打比媽咪   叫佢一陣去睇下係咪真係 $25 ~

1 點 48 分終於收到 Email 通知 4 點放工   我仲諗住無得放早添   都唔明點解次次都要咁遲先通知   奇奇怪怪 ~

4 點即走喇   番到屋企煲定蕃薯糖水   咁今晚就咁翻熱就得 ~

家姐公司派嘅聖誕禮物   家姐話 Teresa Festival 係貴嘢喎   我未聽過呀   哈哈

我覺得無咩味噃

家姐無啦啦 Whatsapp 話我知今晚做冬買咗盒齊老未   好好味道呀    好在我知佢係講齋滷味   佢話我明咪得囉   咁又係  哈哈 ~

里奧大人 5 點 45 分先放工   咁我越坐越凍喎   所以 6 點都出門口去錦攞位喇 ~

好在里奧大人 6 點 20 分就到   因為我好餓呀   慘啦   依家天氣凍   好似成日想食嘢咁   我唔想咁呀   我要減肥 ~

食完就去德福行下   因為想買手機比家姐   但諗緊 Trade-in 定買紅米好囉 ~

咁去 Zara 睇衫   又比里奧大人買咗件褸   成日叫我唔好買嘢   次次又自己買嘢   又貴喎   我買嘢呢   又話我買買買   衰 ~

番到屋企都 8 點幾喇   沖埋涼就整蕃薯糖水   食完暖笠笠   里奧大人好驚食我煮嘅糖水   因為佢成日話太多料   蕃薯糖水只係食蕃薯   紅豆沙只係食紅豆   哈哈 ~

咁我刷牙嘅時候   里奧大人無啦啦問我去唔去西安   最搞笑係電視劇嘅對白係 "去唔去又點呀 ? "   真係超爆笑呀   接得啱啱好   哈哈 ~

勁攰呀  11 點就瞓喇 ~

Chubby's Pizza 脆味批 (外賣) @ 屋企 ( 21-DEC-2014 )

指定 1 + 2 組合 (大批 + 招牌肉醬意粉 + 小食拚盤 $178)
環遊世界 (薄批) - 餅底唔脆

炸物全部唔脆嘅   而雞翼就好香蒜蓉味   今次啲嘢食差哂喎

我哋個個都好飽   所以無食過   咁留番比我做聽日嘅 Lunch Box

( 21-DEC-2014  SUN )

今朝 9 點半起身   梳洗之後就食早餐喇 ~

好似條裙

我同里奧大人講今朝食齋包   因為尋晚食完啲甜品好滯   之後佢話其實佢唔食都得㗎喎   但我想飲咖啡   所以要去食早餐   我話佢都好勁囉   話唔食都得   但又可以食一個米粉餐

沖埋涼   抖陣就番教會   今次決定參與兩樣事奉   其實之前成日已經想參與   但就無招募   咁今次兩樣都有   真係神嘅安排呢   感恩感恩 ~

崇拜之後諗住拎嘢去舖頭洗   點知舖頭好忙   咁唔去 lu ~

尋日幫家姐買咗蛋糕比姐夫   所以家姐 1 點鐘就嚟到我屋企   里奧大人順便幫家姐 Update 個電話   之後我就陪佢買聖誕禮物   買完都差唔多 2 點幾就去食嘢   不過家姐唔食喇   話超勁飽   佢條腰好痛   話留喺屋企做按腰好過   咁坐得無耐家姐打嚟   仲以為佢想嚟食   原來打嚟問我食咩   唔知係咪為食嘅人先會咁做嘅呢   我同家姐成日問來問去   問今日食啲咩   今晚食啲咩咁㗎   里奧大人就唔會問呢啲   哈哈 ~ 

好感恩 3 點半就搞掂   家姐可以早啲番屋企喇 ~

今晚家姐又要拎部電腦比里奧大人 Update 嘢   所以唔駛煮飯   勁開心   哈哈   我同里奧大人講   真係得番星期日有時間做自己嘢咁   即係睇下雜誌呢啲呢   平時放工   番到屋企做哂所有哂   個人都攰   無咩心機睇   佢叫我唔好煮飯咪得囉   咁我又唔會囉   我放得早   唔煮飯真係唔好囉   成日出街食真係好無益   佢做嘢咁辛苦   有啖住家飯食好啲家嘛   點唔好食呀   都話哂喺屋企   坐得舒舒服服咁食啦 ~  

4 點幾飲湯   之後里奧大人瞓晏覺   我就上網呀  打機咁啦 ~

家姐喺台北買比我嘅豬肉紙   原來已經過期 5 日   好在比我發現咋   家姐話點解咁耐仲未食   我話無時間食   一係食完飯就好飽   所以食唔落   同埋依家我又無咩習慣食零食咁呢 

里奧大人 6 點醒咗   一齊諗下食咩好   初初諗住 Pizza Hut   但又驚等位好耐   但又唔想太早去攞位   因為要喺屋企整電腦嘛   如果又等又食   整埋電腦會驚家姐好夜走   咁我突然諗起咩咩雞外賣 Pizza   所以就決定外賣 Pizza 喇   之後 Whatsapp 個 Menu 比家姐   家姐打嚟第一句話好邪呀   佢話餵狗食嘢嘅時候   諗住不如去 Pizza Hut 外賣自取 Pizza   再諗諗下   不如叫咩咩雞個 Pizza 餐仲好   又可以同時整電腦   喺屋企食又舒服好多喎 ~

6 點半落咗單   之後我即沖涼喇   勁鍾意沖完涼先食嘢   家姐 7 點幾到咗   但 8 點 Pizza 先到呀   等咗個幾鐘   真係唔餓變餓呀   哈哈 ~

食完抖陣   9 點幾搞掂好哂部電腦喇   咁家姐都番屋企 lu ~

今晚整呢樣嗰樣   11 點半先瞓添~

富豪東方酒店 (儷廊咖啡室) @ 九龍城 ( 20-DEC-2014 )

三文魚刺身好多筋呀   壽司飯唔掂   串燒好鞋好韌   咁諗住飲碗熱湯抵底   碗龍蝦湯鹹到呢   之後問兒甥女   佢都話好鹹呀   食第一碟咋   已經知出事   哈哈

呢碟係里奧大人㗎    之後佢食啲咩都無影 lu   

蒸石斑魚 / 日式煮牛扒 - 兩樣都好 "鞋"   牛扒仲要好韌添   仲衰過我煮   哈哈
椰菜仔 - 食到最後苦嘅   但上網睇睇過人哋話煮椰菜仔食   最後係有苦味

片皮鴨 - 又係好 "鞋"  

翡翠螺多沙   凍蝦係霉嘅

雖然知道壽司飯難食   但勁想食黃蘿蔔   所以先食咋   食埋呢碟之後   我無拎過任何嘢食 lu   我真係覺得所有食物都唔掂呀   其實家姐都話呢間好難食   佢對呢間好有印象   因為佢朋友話請佢食自助餐   家姐勁鬼開心   點知呢間係咁難食囉   佢講嘅時候都 "乸" 埋哂塊臉㗎   依家真係好明白佢當時感受啦   哈哈      

無嘢好食   影下蛋糕咁啦

想食蛋白餅好耐   不過有啲硬   肚臍餅嗰粒糖仲好味   哈哈   真係咩料呀   無樣好食都好難得下喎   

馬卡龍   擺喺凍櫃入面   因為係雪糕餡   我覺得全場最好食囉   食咗 2 個   仲有食咗 "蝦根" 雪糕   因為有我鍾意嘅焦糖味   但就好難 "北"   所以里奧大人幫我 "北" 咗半個雪糕匙咋

每人送 2 隻生蠔 - 大隻就大隻   但唔係咁新鮮咁   唔係脹卜卜嘅 

火焰雪糕 - 人圍我圍啦   之後我係咁嘩嘩聲   好玩呀   哈哈   因為啲細路又跟住嘩嘩聲   勁搞笑

我啲兒甥仔女唔知我影到火燒呢刻   係咁講 "舅母妳影慢咗喇"   我話得喇   依家全場都知我影慢咗喇   哈哈

火燒後欄   哈哈

( 20-DEC-2014  SAT )

今朝家姐要去銀行搞嘢   所以尋晚就約定我食早餐   所以 7 點半起身 lu ~

咁我依家無哂數據   無得 Whatsapp   咁就要用訊息聯絡啦   咁我 7 點 54 分開電話見到有訊息   見到家姐嘅訊息話已經到寶達   咁 8 點一定到唔到淘大 Delifrance   咁即打比佢   問佢邊度落車   佢話九龍灣地鐵站   咁我話轉去 Oliver's 食早餐   反正佢又送我坐車番工   咁唔駛佢行嚟行去嘛 ~

咁我到德福廣場   見到前面個女人見褸好熟面口   之後再望佢個袋   原來係家姐   因為好少見佢行得咁慢   所以無諗過係佢囉 ~

咁我去叫早餐啦   叫完就同家姐講   佢都好快到德福喎   佢話唔算快啦   我話 5 分鐘咋喎   佢話咩呀   到寶達嘅時候係 7 點 45 分   到德福係咁上下啦   我話妳比我嘅訊息時間係 7 點 54 分喎   佢以為我講錯同睇錯   咁即比佢睇啦   真係 7 點 54 分 Send 比㗎喎   原來訊息係用開機時間嚟計嘅   咁就唔係咁好啦   如果我 8 點幾開機已未落樓   咁家姐咪等到傻 ?!  

同家姐食下講下   9 點鐘即走   好在一落去就有小巴   9 點 15 分番到菇場 ~

頭先開咗支喺泰國買嘅潤唇膏   搽完之後覺得甜甜哋幾好味   比家姐搽下   佢話都好味   咁比佢啦   咁番到菇場照下鏡   個咀唇好似有啲紅色   個樣當堂好精神咁   之後無耐家姐打嚟   問有無發覺個咀唇好紅   我話有呀   咁我之前唔肯定個 Sales 係咪講呢支潤唇膏有色   咁依家終於知係有色啦   最搞笑家姐話佢照鏡時個咀勁紅   好似發燒咁   講講下又幾似發燒   哈哈 ~

菇場唔忙呀   其實係有嘢唔願做   因為真係好無 Mood 呀 ~

放工即走喇   搭小巴去 Mega Box   估唔到同里奧大人差唔多時間到   實在太好   唔駛等嚟等去嘛 ~

去咗 AEON 拎積分表   再行一陣就去食嘢喇 ~

豬骨湯拉麵

韓國泡菜豬肉鍋定食   仲以為無咩湯添

都幾辣   送飯一流   哈哈   我覺得講送飯一流   好似男人咁

今次里奧大人倒得靚啲   因為無倒瀉

上次話里奧大人論盡倒瀉哂   原來真係會倒瀉   哈哈   

食完去超市買嘢   好感恩想買嘅嘢都做緊特價   仲要有 95 折   感覺好似抵好多咁   最開心係買到張 Casablanca 嘅 B-DUCK 厚身珊瑚絨被   因為屋企得張薄身嘅珊瑚絨被   想買張厚身囉   最鍾意啲質地係滑雪雪   又 Soft   勁正呀 ~   

再買埋枕頭就搭 Shuttle Bus 番屋企   都已經 5 點 lu   抖多 1 個鐘就出門口喇   去到巴士站即有巴士   好感恩呢 ~

我同里奧大人食完雞煲邊爐之後就生痱滋   到依家都未好番   要清下啲熱氣

$168 送隻杯   仲要 95 折   真係唔買唔得囉   今次講明聖誕節一定要飲呀

大三角朱古力 - 我叫里奧大人送比我食   因為我細細個嘅時候   爸爸成日買比我同家姐食㗎   兒時回憶呀   咁我同里奧大人講話好想喊   佢即刻話佢成日送嘢比我㗎啦   我話唔係因為你送嘢而想喊   係我好掛住爸爸想喊咋   懶叻   我之前已經買咗 Pack 迷你   分咗一半比媽咪   今次就分咗啲大三角比家姐

之前我買咗 1 包比里奧大人   覺得 $36.9 都算抵   點知依家 AEON 買 $25 定 $26   我即刻顛咗啦   我話要買 1 包 "鄧" 番勻條數呀   之後里奧大人話買 2 包啦   咁樣我會好過啲   哈哈

今晚里奧大人屋企做冬   Book 咗 6 點半富豪食 Buffet   因為可以坐耐啲   咁酒樓多數得個半鐘   次次都無時間傾偈   同埋特別趕咁   一嚟就嚟幾個餸   好似想妳快啲食完快啲走咁   唔係咁鍾意囉 ~

食下傾下   今年佢哋仲搞埋抽獎添   就係每 1 個人抽 1 個 Number   咁抽到份禮物呢   就將份禮物比另 1 個人   到抽第 3 個抽獎時   其中一個兒甥女見有人抽到份禮物係曲奇餅   就係咁話比舅父舅母   哈哈   我話想要嘛   佢好乘㗎   好記得有次燒嘢食   我叫里奧大人燒塊麵包比我食啦   佢燒到燶哂   我咪發脾氣話佢囉   之後兒甥女無啦啦比塊燒得好靚嘅麵包比我呀   當時佢無話燒比我㗎   但佢睇到我話里奧大人囉   所以呢個兒甥女係好細心   我嗰次做完手術   佢嚟探我   我按住傷口想咳   佢已經企身拎杯水比我喇   里奧大人就掛住傾偈   都係女仔細心啲   哈哈 ~

之後里奧大人同我講   話晴晴要寄聖誕禮物比我哋   但原來係想寄錢比我哋呀   因為佢幫人補習   賺到啲錢就分哂比 Daddy 媽咪姨媽舅父舅母呀   真係勁乖   咁當然唔可以寄錢啦   份禮物實永遠收唔到都似   哈哈   其實佢有呢份心意   我哋已經好開心好開心㗎喇 ~

我抽到芒果乾   里奧大人抽到燕麥曲奇   Ritz 餅係水姑   佢話唔食   咁我要埋啦   哈哈

我今次買咗頸巾送比爺爺麻麻同埋姑奶   佢哋開心呀   因為無諗過我會送禮物比佢哋嘛   其實我都驚佢哋唔嚟   但又唔想問姑奶   驚姑奶講比爺爺聽嘛   咁就無哂驚喜呢 ~

話咁快就 9 點半 lu   我哋同姑奶坐的士走喇 ~

番到屋企即沖涼   睇陣電視   12 點先瞓 ~