嘉華大酒樓 @ 官塘 ( 24-MAY-2015 )

豉汁蒸黃立鯧

脆皮乳豬 (例)

椒腐通菜炒牛肉

( 24-MAY-2015  SUN )

今朝 8 點半起身食早餐   之後番屋企沖埋涼就番主日學喇 ~ 

我同里奧大人講   話想將糯米雞嘅料放喺面   咁樣就好似影到太興 Menu 咁樣   不過由於時間關係   所以只能夠擺嚿肉喺面   但我覺得咁樣影仲衰   哈哈  

我超勁眼瞓   所以要飲凍咖啡   

10 點半媽咪打嚟話可以出院   不過佢講嘢唔清唔楚   真係火都嚟   又話依家可以出院   但就話醫生叫佢兩點先出院   之後話已經有哂醫生紙同藥㗎喇   但就叫我一陣去攞藥   之後我都慶   即比里奧大人聽啦   里奧大人都聽到一頭霧水   話叫媽咪一陣叫姑娘打嚟好過 ~

之後都唔理佢喇   番完主日學   奉獻完先接佢出院 ~

去媽咪屋企拎番張輪椅同衫就去醫院   拎埋藥就走喇   今日拎藥超級快啦   得 3 個人拎藥   哈哈 ~

番到媽咪屋企都 2 點喇   咁里奧大人同媽咪上屋企先   我就去買嘢食喇 ~

豉椒排骨炒麵

雪菜火鴨絲燜米

食完就睇電視   里奧大人就做公司嘢 ~

行雷閃電又大雨   諗住今晚叫外賣㗎喇   但估唔到 6 點就停雨   咁出去嘉華食嘢啦   里奧大人想媽咪出去行下 ~

食到 7 點幾就番屋企喇   工人 8 點左右番到屋企   咁我哋完成任務   可以番屋企喇 ~

沖埋涼又休息喇   呢排都勁攰   所以又睇多陣電視   11 點幾瞓 lu ~       

麻酸樂米線專門店 @ 九龍灣 ( 23-MAY-2015 )

咖哩吉列自然豬柳飯 (無公害)

無添加有機龍崗雞米線套餐 - 口水雞個汁好 OK 喎   夠哂辣   哈哈   不過我依家唔係咁想食勁辣嘅嘢囉  

蕃茄榨菜湯底

( 23-MAY-2015  SAT )

今朝 8 點去廁所   所以順便開機洗衫   之後再瞓過喇 ~

10 點要起身  諗住去 Post Office 寄嘢比冰姑   點知落超勁大雨   所以等咗成半個鐘頭先可以去寄嘢   寄完就去食早餐   食完要去惠康買油同 Tempo 盒裝紙巾   之後就番屋企 ~

如果有塊鏡就仲正啦   會變咗 4 份早餐   好壯觀呢   哈哈

番到屋企就沖涼   整下啲文件   眨下眼又 2 點半喇 ~

落去食 Tea   行陣商場就番屋企抖下 ~

5 點半出門口   順便兜埋工人一齊搭的士去探媽咪 ~

媽咪照咗超聲波話無塞到血管呀   感恩感恩   但媽咪好攰   係咁瞓   所以我哋 7 點 45 走喇 ~

落雨呀   所以搭的士走人   又係送埋工人番屋企先    之後我話想去麻酸樂食咖哩豬扒   因為上次睇張相好似好好味咁   哈哈 ~

食完行陣   好感恩搵到對水靴呀   其實真係好多得里奧大人   我上次講完之後   佢就會間間舖頭都會望下   我反而只係望買鞋嗰啲   呢對就係喺 Boutique 買㗎喇   唔係里奧大人望到   我就買唔到呢 ~

$499 有 9 折   即係 $449   都抵喎   同埋我鍾意綠色呢 

鞋底又好   

沖埋涼   抖陣再睇下電視   11 點幾瞓 lu ~ 

稻香 @ 九龍灣 ( 22-MAY-2015 )

家姐第一時間去拎辣椒豉油

鴛鴦湯底

手打墨魚滑 - 我一放入口   即刻同佢哋講個口感好怪   原來佢哋都覺呀    腍劈劈嘅   下次一定唔會叫

鮮蝦雲吞 / 鳳城水餃 - 好多時都叫嚟食   鍾意佢無乜肥豬肉呢     

紅薯粉 - 口感都 OK

牛筋丸 - 我哋鍾意食丸  

鮮滑牛肉 - OK 呀

( 22-MAY-2015  FRI )

今日 Friday 就真係 Happy Friday 喇   因為聽日 Off   星期一又放佛誕假期   連放 3 日勁正 ~

有啲餓   咁就食芝腿治喇   依家阿姐好醒   我一話烘底   佢就會話大火   我飲奶茶   佢就話小奶   唔駛我講咁多嘢   哈哈   阿姐真係好有 Heart 呢 ~

菇場唔忙   但四大天王番哂嚟喇   係時候要乖乖地做下嘢喇 ~

一田又嚟大減價   所以 Lunch 去買嘢   買完都 12 點 45 分   好感恩排隊只係用咗 20 分鐘   算勁快添喇   因為上次排咗起碼個半鐘   仲要龍尾唔知邊度呢 ~

買完就買粉果同炒米粉番菇場食喇   好耐無食   覺得好鬼正   哈哈 ~

放工去探媽咪   去到巴士站又忍唔住落一田再買西柚汁   咁順便買多 2 樽黑芝麻粉   買完即飛去搭車   好感恩去到即有車呀   所以 6 點 10 分已經到醫院 lu ~

果道太郎魚柳 ($48.90) - 我一心係諗住同家姐 Share 食嘅   咁我比家姐嘅時候    佢第一句話妳又買咗呀 ?!   原來佢同同事講話阿妹鍾意食   所以買包比我   咁我叫佢即打番比同事話唔要啦   一 Pack 已經好夠食喇 



SUNTORY 西柚汁 ($49.90/6 罐) - 里奧大人好鍾意飲㗎   雖然 Expiry Date 係 9 月   但都係想買 12 罐   因為平時好似要 $13.90/罐呢

馬玉山黑芝麻粉 ($39.90) - 又係抵   所以買 2 樽  

三祖紫菜 (無味精) 16 包 ($33.50) - 未食過   不過好似好抵咁   所以買嚟食   希望好食啦   哈哈

天狗網黑椒味 ($17.50 / 2 包) - 我好鍾意食呢種零食    

媽咪瞓覺   瞓到差唔多 7 點半   里奧大人咁啱放工   所以我其實勁想走   因為我好凍呀   但家姐話塞緊車   要 7 點 45 分到   咁就等埋佢啦   探到 8 點 05 分就走喇 ~

今日又照唔到超聲波   咁我問咗姑娘   佢話最快都應該要星期二先可以照   咁無計啦   繼續等囉 ~      

約咗里奧大人去稻香打邊爐   所以坐的士走喇   兜埋工人番屋企   之後再去落淘大 ~

食下傾下   講講下又話我細細個已經好鬼惡死   不過我都認㗎   記得有份工   老闆企喺我面前聽住我傾電話   我都唔驚囉   之後佢話我唔可以傾電話   我好惡死話 : 我唔識路你教我去呀 ?!   有次我去完洗手間   佢又居然話我成日去洗手間   因為去洗手間要經過佢間房嘛   咁我話急尿唔通唔屙呀 ?!   睇住佢塊臉真係紅哂㗎   不過我無理佢   講完即出去 ~

之後家姐仲搞笑   佢話佢第 1 份工比 Admin 鬧   佢只係坐喺自己位喊   唔似我咁鬼惡   又話細個嘅時候   同我一齊行街   有個男人好大力撞到家姐   我好惡咁話邊個撞妳 ?!    死八公   家姐話佢比人撞完   人哋行咗好遠先同我講   可能驚我個男人鍊過   哈哈   依家真係無咩火啦   人大咗   真係唔鍾意嘈嘈嘈   最多黑你臉   哈哈 ~

食到差唔多 10 點就走喇   家姐鍾意食完鹹要食甜   咁但大家都好飽   食唔到雪糕   家姐無啦啦彈咗句話 : 不如買爆谷食   我同里奧大人話佢黐線咩   食爆谷好飽肚㗎   唔好搞我哋 ~

里奧大人拎啲嘢番屋企先   我就送家姐搭巴士   好感恩去到即有車呀 ~

番到屋企即 Pack 嘢   之後先沖涼   再睇下電視   12 點半先瞓 ~          

元氣壽司 @ 九龍灣 ( 21-MAY-2015 )

( 左 ) 三文魚壽司 / 羅勒香草赤海蝦壽司  
( 右 ) 三文魚腩壽司 / 油甘魚壽司 / 吞拿魚壽司  左口魚裙邊壽司

軟殼蟹手卷

蟹子沙律

鵝肝壽司

花之戀 - 會員優惠   食滿 $200 就送嘅

玉米蝦船壽司

炸蝦天婦羅壽司

蟹肉三文魚子丼

飛魚子軍艦

炸蝦卷 - 凍嘅

( 21-MAY-2015  THU )

今朝里奧大人又上大陸   咁我又係叫佢帶參蜜之後就瞓咗   咁無啦啦又醒醒地咁   其實以為自己無瞓過   咁仲諗緊點解里奧大人仲唔沖涼   因為無水聲嘛   我即起身望下個鐘   原來係 6 點 52 分   佢其實都出咗門口㗎喇   之後我就醒咗瞓唔着   我估係因為媽咪入咗醫院   有啲擔心   所以瞓唔到呢 ~

等到 7 點半鬧鐘響就起身 lu   呢幾個月朝早只係沖涼   都唔洗頭喇   我覺得反而啲頭髮唔 Jel   最正係慳番唔小時間   因為我唔鍾意吹頭   好鬼熱咁   哈哈 ~

無咩胃口   食奶油豬啦   甜甜地 ~

菇場唔忙   可以做自己嘢 ~

出去食 Lunch   其實想食油炸鬼   但慣咗叫炸兩   所以食到好鬼飽   難得無雨   咁周圍行下啦   咁買完嘢就番菇場 lu ~ 

無啦啦個人情緒好低落   又眼瞓咁   所以要食朱古力   都好味喎   果然同家姐口味一樣   哈哈 ~ 

放工即走   今晚無塞車   所以 6 點 10 分到醫院喇 ~

感恩對腳去哂水腫   但仲未照到超聲波   所以仲要留院呢   媽咪又攰攰哋想瞓覺咁   我就直頭攰添啦   所以真係唔想講嘢   要抖下先 ~

家姐 7 點幾到   里奧大人咁啱到上水   話同埋我哋一齊食飯   咁都好   可以食多啲嘢   哈哈 ~ 

傾下傾下就 8 點   要走喇 ~

搭的士走人   送埋工人番屋企先再去九龍灣   今晚去元氣食壽司   但我話要上屋企開機洗衫先   哈哈 ~

差唔多 8 點半去到元氣   里奧大人又啱啱到   好感恩有卡位坐呀 ~

食完再去食雪糕   之後凍鬼到呢   哈哈 ~

我今晚唔食得太多凍嘢   所以只能同家姐 Share 食   石板街好味呀

叫里奧大人番屋企先   我就送家姐搭車   好感恩去到即有車呀   我可以快啲番屋企沖涼   哈哈 ~

沖埋涼就食榴槤   之後睇陣電視   11 點半瞓喇 ~   

Subway (外賣) ( 20-MAY-2015 )

Spicy Italian  

( 20-MAY-2015  WED )

今朝里奧大人好早起身上大陸   所以鬧鐘一響   我第一時間叫佢記得帶參蜜   之後我就即瞓番 lu ~

早餐食菠蘿油   因為突然好想食菠蘿包塊脆皮   哈哈 ~

菇場唔忙   勁正   因為呢排好攰 ~

Lunch time 出去買嘢   之後再買車仔麵番菇場食   今次食銀針粉   原來好鬼飽肚   最後食唔哂   嘥哂添 ~

奶茶少奶唔落糖   家姐話好苦   哈哈     
   

4 點幾媽咪打嚟話覆診之後要入院   因為對腳腫   可能隻腳要做通血管手術   問佢幾時覺得腳腫 ?!   佢又話成個星期   我話感覺腳腫就要去睇醫生啦   真係無鬼氣話佢 ~

放工即去睇佢啦   又落超大雨   行咗唔駛 10 秒   條褲同對鞋已經濕哂   慘 ~

6 點半先去到病房   我比媽咪激死   一早叫佢上房就話我知床位   佢又熄電話   好在我打比工人啫   唔係要問嚟問去先煩啦   大佬   已經攰   又成身濕哂   真係諗定一陣點樣話佢   諗呀諗   諗到搭多咗一層電梯   又要行番落去   真係抵死   哈哈 ~          

睇到新聞   原來已經係紅雨喇   唔怪得咁大雨啦 ~

問媽咪係咪要做手術 ?!   又話唔知   咁我話上網睇到   話做呢個通血管手術只係局部麻醉   傷口只係 2mm   佢驚到想喊咁   最搞笑係之前佢打比家姐   叫家姐唔駛驚   我都同家姐講話無人驚   只係佢自己懶係扮唔驚啫   又話個手術要麻醉㗎 ?!   大佬   點都要界一刀啦   唔麻醉妳都痛啦係咪呀 ?!   之後我再問佢隻腳幾時開始腫   佢又話前兩日   呢下我就慶   頭先又話一星期    依家又話兩日前   講緊係相差 5 日   唔好成日等到有事先睇   如果唔係今日覆診   咁就慘啦成日應做唔做 ~

又話做通血管手術   問佢佢又話唔係   佢唔咁講   我點會無啦啦上網搵資料呀 ?!   成日講嘢一嚿嚿   我話妳唔清楚就唔好講啦   講多錯多   真係衰過唔講 ~

咁我去問姑娘啦   真係好感恩當值姑娘 7 點食完飯就會上病房   當時係 6 點 55 分   如果我遲啲問   姑娘又可能去做其他嘢   未必見到佢㗎喇   真係非常感恩 ~

姑娘話醫生覺得媽咪腳腫   所以叫佢留院 Check 下   依家排期照超聲波   睇下血管塞咗幾多   之後食藥或者打針   但就唔駛做手術   同埋最緊要唔係因為心臟同糖尿而腳腫呢   今日仲會改埋血壓丸   等血壓指數好啲 ~

婆婆阿姨又係咁打嚟   家姐同哋地講咗話睇完打比佢哋啦   短短半個鐘打咗 12 次嚟   大佬呀   同緊姑娘講緊嘢㗎   我知佢哋係好緊張   但妳都比啲時間我啦   所以我校靜音   我真係覺得好煩   同埋我一陣都會打比佢哋   可唔可以比啲時間我抖下呢 ?!

之後媽咪就要抽血同照心電圖   我比媽咪激到我好掹   婆婆阿姨又係咁打嚟   搞到我好煩   所以我都唔想講嘢   我唔想一開口就鬧人 ~

里奧大人 7 點半打話已經喺深圳   咁我叫佢喺上水食嘢先啦   唔係番到嚟食就太夜喇 ~

媽咪又買咗榴槤要我拎走   血壓高一定唔可以食榴槤   不過我估佢係諗住買比我   聽晚食飯嘛   咁我同工人 7 點 50 分走喇   因為 8 點之後會有好多人搭的士   唔想咁遲走   同埋襯依家無落雨 ~   

之後問佢   媽咪有無食榴槤   佢話有食呀   所以我話血壓高係自己攞嚟衰 ~

一落車又落大雨   個天都要教訓我   成日鬧媽咪   哈哈 ~

幫埋里奧大人買麵包   再去 Subway 買包就即番屋企喇 ~

沖埋涼先食   真係頂唔順對腳醃鹹魚咁醃呢 ~

里奧大人 9 點幾番到屋企   問我點解食 Subway   佢以為我同家姐一齊食   知我一個食食   話之得陪我食   佢同家姐好搞笑   成日覺得我一個人食嘢好慘   哈哈 ~

我同佢都勁攰   所以 11 點即瞓喇 ~