Subway ( 外賣 ) @ 屋企 ( 20-MAY-2015 )

Spicy Italian  

( 20-MAY-2015  WED )

今朝里奧大人好早起身上大陸   所以鬧鐘一響   我第一時間叫佢記得帶參蜜   之後我就即瞓番 lu ~

早餐食菠蘿油   因為突然好想食菠蘿包塊脆皮   哈哈 ~

菇場唔忙   勁正   因為呢排好攰 ~

Lunch time 出去買嘢   之後再買車仔麵番菇場食   今次食銀針粉   原來好鬼飽肚   最後食唔哂   嘥哂添 ~

奶茶小奶唔落糖   家姐話好苦   哈哈     
   

4 點幾媽咪打黎話覆診之後要入院   因為對腳腫   可能隻腳要做通血管手術   問佢幾時覺得腳腫   佢又話成個星期   我話感覺腳腫就要去睇醫生啦   真係無鬼氣話佢 ~

放工即去睇佢啦   又落超大雨   行咗唔駛 10 秒   條褲同對鞋已經濕哂   慘 ~

6 點半先去到病房   我比媽咪激死   一早叫佢上房就話我知床位   佢又熄電話   好在我打比工人啫   唔係要問黎問去先煩啦   大佬   已經攰   又成身濕哂   真係諗定一陣點樣話佢   諗呀諗   諗到搭多咗一層電梯   又要行番落去   真係抵死   哈哈 ~          

睇到新聞   原來已經係紅雨喇   唔怪得咁大雨啦 ~

問媽咪係咪要做手術   又話唔知   咁我話上網睇到   話做呢個通血管手術只係局部麻醉   傷口只係 2mm   佢驚到想喊咁   最搞笑係之前佢打比家姐   叫家姐唔駛驚   我都同家姐講話無人驚   只係佢自己懶係扮唔驚啫   又話個手術要麻醉架 ?!   大佬   點都要界一刀啦   唔麻醉妳都痛啦係咪呀 ?!   之後我再問佢隻腳幾時開始腫   佢又話前兩日   呢下我就慶   頭先又話一星期    依家又話兩日前   講緊係相差 5 日   唔好成日等到有事先睇   如果唔係今日覆診   咁就慘啦成日應做唔做 ~

又話做通血管手術   問佢佢又話唔係   佢唔咁講   我點會無啦啦上網搵資料呀 ?!   成日講嘢一嚿嚿   我話妳唔清楚就唔好講啦   講多錯多   真係衰過唔講 ~

咁我去問姑娘啦   真係好感恩當值姑娘 7 點食完飯就會上病房   當時係 6 點 55 分   如果我遲 d 問   姑娘又可能去做其他嘢   未必見到佢架喇   真係非常感恩 ~

姑娘話醫生覺得媽咪腳腫   所以叫佢留院 check 下   依家排期照超聲波   睇下血管塞咗幾多   之後食藥或者打針   但就唔駛做手術   同埋最緊要唔係因為心臟同糖尿而腳腫呢   今日仲會改埋血壓丸   等血壓指數好 d ~

婆婆阿姨又係咁打黎   家姐同佢地講咗話睇完打比佢地架啦   短短半個鐘打咗 12 次黎   大佬呀   同緊姑娘講緊嘢架   我知佢地係好緊張   但妳都比 d 時間我啦   所以我教靜音   我真係覺得好煩   同埋我一陣都會打比佢地   可唔可以比 d 時間我抖下呢 ?!?!?!?!?!?!?!?!

之後媽咪就要抽血同照心電圖   我比媽咪激到我好掹   婆婆阿姨又係咁打黎   搞到我好煩   所以我都唔想講嘢   我唔想一開口就鬧人 ~

里奧大人 7 點半打話已經喺深圳   咁我叫佢喺上水食嘢先啦   唔係番到黎食就太夜喇 ~

媽咪又買咗榴槤要我拎走   血壓高一定唔可以食榴槤   不過我估佢係諗住買比我   聽晚食飯嘛   咁我同工人 7 點 50 分走喇   因為 8 點之後會有好多人搭的士   唔想咁遲走   同埋襯依家無落雨 ~   

之後問佢   媽咪有無食榴槤   佢話有食呀   所以我話血壓高係自己攞黎衰 ~

一落車又落大雨   個天都要教訓我   成日鬧媽咪   哈哈 ~

幫埋里奧大人買麵包   再去 Subway 買包就即番屋企喇 ~

沖埋涼先食   真係頂唔順對腳醃鹹魚咁醃呢 ~

里奧大人 9 點幾番到屋企   問我點解食 Subway   佢以為我同家姐一齊食   知我一個食食   話之得陪我食   佢同家姐好搞笑   成日覺得我一個人食嘢好慘   哈哈 ~

我同佢都勁攰   所以 11 點即瞓喇 ~