咖哩魚蛋魷魚 ( 19-APR-2016 )

( 19-APR-2016  TUE )

尋晚瞓覺   成日覺得有人摸我   所以今朝問里奧大人係咪佢成日摸我啦   佢話因為驚我凍喎   我話下次摸人細力啲啦   摸到人醒哂   哈哈 ~

早餐無咩胃口   食奶醬多算喇 ~

菇場又係忙下停下   咁都好   坐喺度真你好悶   哈哈 ~         

Lunch Time 出去行陣   條街凍到呢   所以都唔行咁耐喇   買完嘢食就即番菇場 ~

好快又放工   今晚直接番屋企   爽 ~

今晚真係凍呀   又勁大風   好似打風咁   咁啱我預咗今晚拖地   拖完都唔出汗呀   但就好攰囉   哈 ~

執埋 d 嘢就抖陣   里奧大人 8 點先放工呀   餓到我呢   好在之前煲定水   居然番到九龍灣先記得打比我   好在都淥得切意粉   佢番到嚟    就有得食 ~      

是日懶餐 - 咖哩魚蛋魷魚

咖哩魚蛋魷魚 - 想食好耐喇   同埋之前又買咗幾包田師傅咖哩醬   唔想又擺到過期   但我就勁懶囉   就咁煮魚蛋 魚片頭 魷魚同薯仔咋   下次都係煮雞肶好啲 ~            

搞掂哂都 9 點幾   即沖涼喇   之後睇電視   依家睇 Viu 99 台   估唔到都幾好睇   呵呵 ~

其實攰   但又唔眼瞓囉   唔知係咪飽得滯   所以又 11 點半先瞓 ~   

蒸大眼雞 + 腐乳唐生菜 ( 18-APR-2016 )

( 18-APR-2016  MON )

尋晚 10 點瞓   感恩瞓得都唔錯   所以今朝起身無難度   呵呵 ~

早餐食芝蛋治   其實食一半已經好鬼飽 ~

菇場忙下停下   不過所有大粒唔喺度   真係可以 Hea 住做   爽 ~

Lunch 食麥皮   本來想出街   但都係抖下算喇 ~

實在太好   Hea 住等放工 ~

今晚要去街市買餸   其實街市啲嘢真係好齊全   但可惜太污糟   同埋放工時候   十萬人一齊買餸   真係行慢啲都比人話   所以我去開邊檔就邊檔買   好在都近出口   買完可以即走   唔駛又迫餐死先出到去呢   哈哈 ~

番到屋企即刻浸菜   之後蒸魚   今晚清埋最後兩包過期辛辣麵   感覺係一種解脫 ~

里奧大人 5  點喺官塘見客   平時見呢個客   傾半個鐘就搞掂   估唔到今晚傾好耐偈    6 點半先番到嚟   不過佢番到屋企都要等食   哈哈 ~    

是日懶餐 - 蒸大眼雞 + 腐乳唐生菜 

蒸大眼雞 - 清埋呢條又了咗心事   加咗啲魚仔都幾好味   但啲魚仔好有咬口   好在蒸得唔多   唔係咬到牙骹都軟埋   哈哈 ~     

腐乳唐生菜 - 好想食腐乳呀   所以買唐生菜 ~

洗埋碗就煮咖哩   咁聽晚翻熱就得   可以多啲時間做其他家務 ~

搞掂哂都 9 點喇   即沖涼休息   睇陣電視又已經 11 點半   又要瞓喇 ~         

吉豚屋吉列豬扒專門店 @ 九龍灣 ( 17-APR-2016 )

吉列豬柳泡菜湯烏冬鍋

( 17-APR-2016   SUN )

今日媽咪工人放假   所以我 10 點都要起身喇   勁鬼攰 ~

沖埋涼就出發喇   買埋早餐同家姐一齊食   佢會開心啲   樣樣食啲嘛 ~

媽咪都係瞓   所以我哋其實真係齋坐齋食就搞掂   哈哈 ~

我堅攰   咁家姐負責買嘢比媽咪食   12 點幾買碗魚蛋麵比媽咪   我哋就唔食喇   仲好飽 ~

打機傾下偈   工人明明話 3 點番嚟   後尾又話 3 點半   咁是但啦   反正都係坐 ~

媽咪話想飲果汁   咁比盒佢啦   工人話媽咪今朝已經飲咗 1 盒   但媽咪無講   真係衰格   雖然 100 ml 一盒   但都無理由一日飲 2 包啦   口渴就飲水   唔飲就咪飲 ~

咁之後我喺廁所聽到家姐好大聲話媽咪   妳都唔好咁過份吖   原來工人話佢尋日飲咗 5 盒   真係黐線   加上佢有啲腳腫   我咪話囉   有咩事就 Call 平安鐘   唔駛打比我哋 ~

家姐慶到呢   又話媽咪成磚佛咁   好心就郁下啦   我就真係喺度冷笑呀   之後一句車埋去   真係無見過啲人懶得咁緊要 ~   
    
咁一出門口   我話妳終於知慶嘅感覺喇 ?!   反而我無咩嘢   我依家同媽咪講嘢都無語氣㗎   有時都啤住佢添㗎   都唔明點解可以懶得咁緊要   如果郁多啲   手腳真係唔會咁腫   但係都唔郁   我無辦法   鍾意入院就入院啦   但唔好諗住我會晚晚探囉 ~

約埋里奧大人一齊食下午茶   因為我未餓   唔想食咁多   3 個人 Share 兩個下午茶就最好   食完都 5 點   之後里奧大人番屋企做公司嘢   我就同家姐去睇披肩   陪埋佢買 Muffin 就送佢搭巴士   到我番到屋企已經 6 點   今日啲時間過得好快咁喎 ~

我突然間好餓   所以 6 點 45 分出去食嘢喇   里奧大人話食完就買雪糕番屋企食   我就唔食喇   好鬼飽呢 ~

抖多陣就沖涼   里奧大人都做哂公司嘢   咁一齊睇戲啦   不過我睇睇下都開始眼瞓   所以我話要瞓喇   今晚 10 點瞓覺   勁早呀   哈哈 ~

新之食 @ 官塘 ( 16-APR-2016 )

豬油渣削麵 (酸辣湯底) - 豬油渣完全無炸過

豬油渣 + 豬潤麵 (酸辣湯底) - 里奧大人一定叫豬潤   要我補血呀   

生菜 (東坡肉汁)

( 16-APR-2016  SAT )

今朝 9 點幾已經醒 lu   里奧大人又醒埋   所以去食早餐 lu   佢知我鍾意去靚記   所以一起身就話去靚記食早餐   嘻嘻 ~

食完就各自去銀行整嘢   搞掂哂都 11 點 15 分   即番屋企喇 ~   

里奧大人仲勁   差唔多 11 點 45 分先番到嚟   之後比份保險嘢我   話送比我嘅禮物   我以為係啲保險資料   點知佢話真係保單嚟㗎   哈哈 ~

今日雖然 Off   不過都唔出街喇   喺屋企抖抖算 ~

2 點幾去食嘢   番到屋企抖陣   6 點出發去姑奶屋企   教佢用部抽濕機   原來個裝水桶好鬼難開   都無諗過添 ~

美式手撕雞堡套餐   加 $4 轉厚切薯條   兩樣都唔好食囉   手撕雞好鹹   食完好口渴 

唔係好大個之嘛   所以唔信廣告係正常   呵呵   

7 點幾走喇   食埋嘢就去舖頭幫手   9 點幫到半夜 4 點呀   攰到我呢 ~

搞掂哂即打的番屋企   沖埋涼   5 點先瞓呀 ~

蛋花粟米湯 ( 15-APR-2016 )

( 15-APR-2016  FRI )

今朝 8 點半起身   好感恩個肚唔痛   只係有口啲扯住   但就真係碎料啦   哈哈 ~

去完 Taste 買個吞拿魚包做 lunch   之後打的番菇場   諗住買魚肉燒賣啦   點知無哂   又要食奶油多 ~

菇場忙下停下   無胃口食早餐 ~

Lunch 食埋早餐件奶油多   上下網又 1 點半  開始有啲攰   但頭先又瞓唔到   嗚嗚 ~

今日有人請食 Tea   但 5 點先到   實在太感恩喇   因為里奧大人今晚見客   我仲諗住去食埋 Tea 先番屋企   點知依家有人請食 Tea   可以慳番筆   呵呵 ~

食完抖陣就放工喇   番到屋企即沖涼休息 ~

睇下雜誌   又睇下電視   7 點又開始有啲餓   咁又好喎   可以食埋 lunch 嘅吞拿魚包 ~

我覺得有沙律醬嘅吞拿魚包最好即刻食   因為擺得耐有陣酸叔味咁   哈哈

越坐越凍   但無開冷氣喇喎   同埋勁想飲熱嘢   雖然已經 9 點   但都照飲粟米湯   飲完成身暖哂   爽呀 ~

里奧大人 11 點幾先番到屋企   同佢傾下偈   等埋佢沖涼   所以成 12 點幾先瞓呀 ~

油雞飯 + 叉鴨飯 (外賣) ( 14-APR-2016 )

( 14-APR-2016  THU )

今朝 8 點 50 分起身   打番菇場請病假就繼續瞓番 lu ~

尋晚個肚都痛㗎   扯住扯住   所以都瞓得唔好   但好在唔駛沖熱水涼   唔係仲攰   哈哈 ~

瞓到 12 點幾諗住醒   但又想瞓    之後一瞓就瞓到 2 點半   感覺到呢 2 個鐘係熟睡   勁正呢   所以一起身都好精神   好感恩個肚唔痛   最開心係居然肚餓呀   好在里奧大人尋晚買咗朱古力卷蛋番嚟   我可以食一件頂肚呢 ~

之後睇電視同睇雜誌   再開機洗衫   我覺得呢下最勁   有精神做埋呢啲嘢   哈哈 ~

今日里奧大人全日喺出面見客   之後佢 6 點幾打嚟問我餓唔餓   我話都餓呀   佢話咁唔行 Fair   快啲買嘢比我食   好難得我話餓呀   哈哈 ~

里奧大人見我咁好胃口就最開心呢   之後再拻橙比我食   但我真係食到先勁   可能真係好餓   尋晚無食嘢嘛 ~

我同佢講話頭先開機洗衫   佢話真㗎 ?!   佢都無諗過我有精神開機洗衫嘛   希望之後嘅每月一到會越嚟越舒服啦 ~

10 點半瞓   個肚有啲扯住痛   不過都接受到   但如果唔痛就更好啦   哈哈 ~

翠河餐廳 @ 官塘 ( 12-APR-2016 ) + ( 13-APR-2016 )

粟子燜滑雞煲

中式牛柳 - 搵笨嘅   係大家樂早餐果啲牛扒之嘛

 

( 12-APR-2016  TUE )

今朝好凍咁喎   又要着番件抓毛有帽 One Piece   本來想着多件冷外套   但又好似好誇張咁   所以唔着喇   最多雙手插袋保暖   哈哈 ~

今朝里奧大人喺九龍灣見客   所以又陪我食早餐喇   好開心呢 ~

菇場唔忙   做下自己嘢咁囉 ~

Lunch Time 好快又到   菇場實在太凍   所以我都要食熱嘢   諗住行陣   但又落毛毛雨   加上又好鬼凍   我覺得好似冬天咁呀   最後都係買酸辣米線番菇場食算喇   食一半已經唔想食   可能唔餓   同埋有啲厭   哈哈   但無理由咁嘥家嘛   咁慢慢食囉   食咗大半個鐘   由好熱變到凍哂   哈哈 ~

凍呀凍   真係凍到有啲頭痛   加上又眼瞓   勁想番屋企   哈哈 ~

終於放工   今晚同媽咪 家姐食飯   咁我上媽咪屋企先 lu   但真係好鬼攰   我居然瞓着咗呀   應該瞓咗 20 分鐘   一醒已經係 6 點 45 分   之後家姐話嚟緊   咁我哋都出發喇 ~

食完就同家姐去萬寧   之後番媽咪屋企   坐到 8 點半就走喇   勁攰   想早啲番屋企休息 ~

今晚里奧大人 7 點先見完客   佢去唐記買飯盒番屋企食   之後又喺泰昌買咗 3 個蛋撻   話買 2 送 1 好抵喎   留番 1 個比我食   好到呢 ~

我番到屋企抖陣   食埋蛋撻即沖涼喇   睇多陣電視   10 點半即入房瞓   呢排好鬼攰   10 點已經開始眼皮 Dup 哂   但好衰㗎   試過入房瞓又瞓唔到   可能未係瞓覺時間   所以次次等到 10 點半先入房   反而就即刻可以瞓到呢 ~

( 13-APR-2016  WED )

今朝勁反胃   應該今日嚟料㗎喇   呵呵 ~

早餐食芝腿治   無咁油膩 ~

菇場忙下停下   之後真係每月一到   個肚唔痛   但有少少唔舒服   所以都係食定止痛藥   再敷暖水袋   勁正呀   哈哈 ~

Lunch Time 又瞓唔到   但想有啲熱嘢暖暖肚   所以沖咗杯芝麻糊   夠哂飽肚 ~

仍然忙下停下   勁想瞓添呀   之後又嘔   好在今次唔勁   同埋無之前咁辛苦   唔知係咪呢排成日飲杞子龍眼茶呢 ?!  

放工即去睇醫生   今次睇新醫生   感恩登記連睇只係 20 分鐘   可以早啲番屋企嘛 ~

沖個超勁熱水涼   之後就 Hea 等里奧大人   佢 7 點放工   不過我無胃口呀   所以佢話番屋企煮丁丁 ~

感恩   真係無之前咁劇痛   同埋雖然嘔咗幾次   但都無話好辛苦   係咪都想嘔咁   起碼我今日可以番到工呢 ~

個人真係好攰   所以今晚 10 點都瞓 lu ~