住家飯 @ 姑奶屋企 ( 25-JAN-2017 )

百樂門外賣嘅苦瓜炒魚腐

油麥菜

糯米雞 - 姑奶知我鍾意食   特登買比我食   里奧大人就食排骨飯呢

( 25-JAN-2017  WED )

尋晚瞓得唔錯  起碼無發夢   哈哈 ~

早餐食魚柳包   今次塊魚柳好大件   所以好似食極唔完咁呢 ~

菇場忙下停下   仲諗住會無嘢做添 ~

Lunch Time 出去買年貨   買完都已經 1 點   咁諗住外賣麥記   但見有位坐就食埋喇 ~

今日所有大粒唔喺度   勁 Free 呀   唔駛就住就住上網 ~

放工去商場等里奧大人   度度都係買年貨   但我都唔會買 lu   我連全盒都掉埋添呀   反正都係自己食   都唔駛特登新年買糖果啦   平時都可以買嚟食   呵呵 ~

里奧大人 7 點 15 分放工   之後一齊去姑奶屋企喇 ~

食完抖 15 分鐘又出去行   行完都已經 9 點半   即沖涼休息 lu ~

今日好攰   加上無電視睇   又係 10 點 45 分即瞓喇 ~

住家飯 @ 姑奶屋企 ( 24-JAN-2017 )

唐記買嘅糯米雞   姑奶完全無蒸熱   但個心直頭係凍嘅   大佬   買咗都有半日啦   點可以就咁食㗎

茄子豆角肉鬆 - 外賣嚟㗎   味道又 OK 喎

生炒排骨 - 一見到就嚇死人   咁嘅色真係好恐怖   每人食咗一嚿咋   我叫姑奶唔好再買呢啲啦   佢話見多人買所以買   我真係忍唔住話   唔係人買妳就買   見到啲色水咁樣都唔好買啦   呢張相影出嚟係燈紅咋   實情係桃紅咁色   好恐怖囉

炒菜心苗 - 無拻芯嘅   所以我都無咩點食   唔想下下咬出嚟呀

花膠烏雞湯 - 2 姑奶煲㗎   咁佢話驚好腥   叫姑奶落嚿薑   所以呢碗湯變咗又辣又腥   勁難飲   連我鍾意飲湯都飲剩 1/3 碗呀   我覺得腥到好似人哋浸完海味啲水咁呀

( 24-JAN-2017  TUE )

今朝起身又係凍凍哋   又話呢一兩日回暖   真係唔覺囉 ~

早餐食腿蛋治   下次食烘底先   我覺得咁樣會無咁飽呢 ~

菇場唔忙呀   都正常嘅   工廠都差唔多收爐 ~

Lunch Time 出去行陣   再去買酸辣米線   我買完就見到阿蟲入嚟   之後仲話下次叫我幫佢買埋   我彩佢都傻啦   成日跣我   仲想我幫佢買 Lunch   我一定唔會囉 ~

仍然 Hea 過   放工就去超市睇賀年禮品   之後就等埋里奧大人放工喇 ~

里奧大人差唔多 7 點放工   諗住工廠放假唔會咁忙添 ~

今晚好似得 2 盒燒味飯   所以我去唐記買糯米雞   里奧大人話我真係好想食   成日提住要食   哈哈 ~

番到去見到有餸有飯嘅   之得唔買糯米雞啦 ~

食完抖陣就同里奧大人去徑步   徑咗半個鐘   食完行下真係舒服好多呢 ~

番到去就即沖涼   依家無咩電視好睇   所以 10 點 45 分都瞓喇   咁都唔錯   呵呵 ~

甘味讚岐手打烏冬 @ 官塘 ( 23-JAN-2017 )

雜錦鍋燒讚崎手打烏冬 ($69) - 里奧大人話麻麻哋喎

雞軟骨餃子捧 ($30) - 都幾好味   但好油

日式炒雜菜 ($38) - 人生第一次食咁難食嘅雜菜   塊椰菜係超級腍   有啲霉霉哋嘅感覺囉

讚崎手打烏冬 ($20) - 都好大碗   好抵食呀

( 23-JAN-2017  MON )

尋晚瞓得唔錯   所以起身無難度   呵呵 ~

早餐食芝腿治   依家飲咖啡少奶都唔覺苦 lu   之前飲到乸口乸面架真係   但我真係接受唔到多奶   飲完條脷好 "鞋"   唔鍾意咁呢 ~

菇場忙呀   11 點幾先搞掂   又可以 Hea 喇   爽呀 ~

今日有 Lunch Box   食完發覺兩邊臉好哂呀   好似血壓高咁   因為啲薑蓉好辣   直頭辣過指天椒呀   但個身又唔熱喎 ~

3 點有得食下午茶   仲要係司機請   原來係同事話佢兩年前贏咗 2 獎   司機話如果妳搵到相就請啦   點知同事真係搵到張相   哈哈 ~

今次快喇   4 點 15 分有得食   平時起碼 5 點   試過 5 點 15 分先開始食   所以勁趕   哈哈 ~

不過食完都差唔多 5 點喇   收拾心情等放工 ~

放工去美心拎蘿蔔糕   再去大孖買辣椒醬同話梅肉   之後番屋企喇 ~

里奧大人 6 點 40 分放工   咁我坐多陣先出發 lu ~

其實唔太餓   但里奧大人話佢勁餓   咁就去食烏冬啦   不過依家無咁好食囉 ~

食完行陣   再去 H&M 買 3 條 Legging   咁里奧大人周圍行住等我   因為 H&M 太多衫   好多塵喎   我話手機無電   叫佢唔好行咁遠   咁我試完 OK 就打比佢   問佢嚟唔嚟比錢   之後佢話比錢先打比佢   咁佢比完之後就話   頭先又話電話無電嘅 ?!   點解打比我比錢又打到嘅 ?!   我話   頭先試褲嘅時候特登熄咗電話儲電   咁先可以打到比你咋   講完出嚟   我都忍唔住笑   哈哈 ~

買完就去姑奶屋企   沖埋涼   睇陣電視都瞓喇   今晚好似好凍咁   所以 10 點 45 分已經要瞓喇 ~ 

住家飯 @ 家姐屋企 ( 22-JAN-2017 )

茄汁蝦碌 - 今次個汁稀咗呀   唔係更好食呢

髮菜蠔豉冬菇 - 家姐工人話煮比我食㗎   知我上次鍾意食冬菇   我好感恩身邊所有人都好錫我呀

生菜螺片 - 無咩點食呀   因為已經好飽

蒸魚 - 工人成隻碟跌咗落鑊入面   所以條魚 "鄧" 到散哂   哈哈   我哋叫佢慢慢啦   又唔急

炒芥蘭 - 好爽甜呀

新鮮雞 (半隻) - 我覺得半隻都好多   所以我都夾咗幾嚿   加埋冬菇就做埋聽日嘅 Lunch Box

一大碗薑蔥蓉 - 家姐話咁大碗嘅 ?!   之後姐夫出嚟又話咁大碗嘅 ?!   原來家姐同工人講話我好鍾意食   所以整咁大碗   但佢哋又無咩點食   咁我話比我帶埋做 Lunch Box  啦   唔好嘥嘛

石斟花旗參 - 我飲半碗咋   我驚花旗參太涼呀

麻蓉湯丸 - 阿喂尋日介紹㗎   所有買盒比家姐同姑奶試下   都幾好味   好滑呀   同埋個餡唔甜呢

( 22-JAN-2017  SUN )

今朝 9 點半醒咗   但最後都係瞓到 11 點呀   番唔到教會 lu ~

沖埋涼就去食早餐   食完都 12 點幾   咁就過咗半日喇 ~

里奧大人本來要去舖頭幫手兩個鐘   但今晚要去屋企做節   咁又搵唔到水姑   所以最後都唔去喇   時間太趕呀 ~

開機洗衫又熨埋衫   再沖杯貓屎咖啡   其實過哂期   但仲係好香   所以照飲 ~

搞掂就抖下喇   差唔多 4 點先去食下午茶   其實我可以唔食   但里奧大人就會話可以食啲嘢   咁即係餓啦   哈哈 ~

家姐 6 點車我哋去姑奶屋企放低啲嘢   之後就去家姐屋企 lu ~

真係好鍾意去家姐同阿 Mi 屋企   因為真係好乾淨   真係吸啖氣都清爽過人㗎   唔明點解里奧大人屋企人可以咁污糟   救命 ~

7 點幾開始食飯   食完就食湯丸   傾多陣偈   9 點就車我哋番屋企喇 ~

沖埋涼就休息   今晚 11 點都瞓 lu ~

打邊爐 @ 阿 Mi 屋企 ( 21-JAN-2017 )

阿 Mi 一出嚟就排好哂所有食物   仲話好似自助餐咁   哈哈   咁我叫里奧大人比啖紅酒我飲吖   我好口渴   佢好愕然話 "口渴飲紅酒" ?!   我想濕下個口之嘛   你估真係一啖咩   哈哈

椰子雞煲 - 因為阿 Mi 知我鍾意飲湯呢   唔該哂笠笠   咁我同佢話其實清水都得啦   佢個樣好驚又高 8 度話清水點得㗎 ?!   笑死我   我話我可以唔飲湯   蘸辣椒豉油就得㗎喇

脆肉鯇 - 呢份要 $106   原來會搭個魚頭   阿 Mi 將魚頭做埋湯底

響鈴 - 我想食好耐   咁牛丸哥哥有得賣   就整包試下   但佢哋話有陣油益味呀   所以最後都掉哂   嘥咗阿 Mi 特登煎香佢呢

 
半隻雞 - 呢度 $79.9   原來依家半隻雞都咁貴   不過最後都食剩好多   要留番比阿 Mi 了

牛丸哥哥嘅水餃幾好味呀   啲蝦好爽   同埋我鍾意有啲木耳絲   爽爽哋好味道   最怕成隻係肥豬肉呢   今次買咗 1 打水餃 + 1 打雲吞 + 半打魚皮餃   但食唔哂呀   好在可以留得番

炸魚皮 - 今次又買 2 包   但其實份量好少    今次又係好脆好好味   里奧大人知我鍾意食   就會話熱氣唔食   所以佢唔衰嘅時候真係超級好呢   哈哈

豆卜 - 阿 Mi 屋企物資   其實我都幾鍾意食豆卜   但豆腐就麻麻哋

旺菜 - 又係阿 Mi 屋企物資   其實咁都好   一齊清哂啲嘢食   又唔駛特登買菜   咁仲有廣島蠔 4 隻   又清埋去   但阿 Mi 成日強調話每人得 1 隻咁多   但叫做淥淥下有啲新嘢食   哈哈

( 21-JAN-2017  SAT )

今日約咗阿 Mi 阿喂一齊飲茶行山   我校咗 8 點 15 分起身   咁鬧鐘響唔出奇吖   但里奧大人就好驚咁   原來佢校咗手機 8 點響呀   點知無響   因為佢將電話夾喺懶人棍度   夾住開關個制   所以熄咗電話呀   真係好在我有校鬧鐘   咁我哋又習慣關電話   有信息都唔知   到時就大鑊喇 ~

遲咗 15 分鐘   就咩都要快手快腳啦   哈哈 ~

今日請咗假   因為如果我放工入到去荃灣   再食埋嘢先行山就好夜喇   依家好快天黑   所以我寧願請半日假好過 ~

搭地鐵就即通知阿 Mi   今次去稻坊   但唔識路   靠里奧大人開 GPS 搵路   不過成日會斷囉   最後去到大會堂問路人   我哋先識去咋   我好少行到咁遠   勁緊張   哈哈 ~

我去埋麥記買杯熱咖啡先去酒樓   勁想買薯餅食   不過都係唔好喇   始終我好少飲茶   都係想食多啲點心呢 ~

去到見到阿 Mi 喂喇   我哋應該遲咗起碼 20 分鐘呀   Sorry Sorry ~

我哋坐卡位   阿喂坐入面   咁里奧大人坐阿喂隔離   我放低背囊   件褸都未除   佢哋已經傾緊偈喇   快過我同阿 Mi 呀 ~

超級餓呀   每人點幾樣點心   食下傾下   好快 11 點半   其實我哋預咗 10 點開始飲   11 點半就要飲完茶   咁我哋遲咗成 20 分鐘   諗住啲時間都會順延   估唔到無喎   預期進行   感恩感恩 ~

呢個麻麻哋

 

炸嘢都 OK 呀

煎堆仔唔錯   都幾煙韌   同埋啲餡唔太甜   好似係芋蓉餡

芋角都 OK

鳳爪排骨飯 - 終於食到啦   不過啲飯好腍   唔係就更加正

唔知咩包   我無食到呀

泰醬鴨掌 - 入口覺得有啲酸味   以為變壞咗   後尾記得係用泰醬先無咁驚咋   但味道唔係好夾咁

珍珠雞 - 想食糯米雞好耐   但依家應該無咩酒樓會有啦   咁大隻   如果一人一隻坐 2 個鐘   酒樓應該蝕哂大本   哈哈   咁珍珠雞都照食咯

     

都唔錯呀

上湯鮮竹卷 - 鴛鴦色都有嘅

飲完茶   我叫里奧大人一定要買個包   因為佢頭先食得好少嘢   咁買埋麵包就打的去城門   去埋廁所   12 點 10 分開始行喇   由阿喂帶路   呢段路係阿喂上次介紹我哋行   但行行下發覺唔一樣   原來我哋上次行咗另一邊方向呢   即係行多咗路   哈哈 ~

又話好凍喎   好在我最後着件中袖衫咋   唔係熱到顛都似   我成身汗嘅時候   阿 Mi 話仲係覺得暖   救命 ~

一落車   兩對夫妻就好自然咁解體呢

行到堤壩就叫里奧大人搽防曬   好驚佢再次曬傷囉   之後又比阿 Mi 搽埋   好在佢都話唔立黐黐   萬寧職員果然好介紹呢 ~

又係兩男兩女組合   其實咁都幾好   又見到個老公   又可以同老友一齊傾密偈   之後行行下又 4 個人休息下   又傾下偈咁   其實次次都係我話要抖   無計啦   我肥嘛 ~

今次算好喇   邊行邊傾   又唔係話好索氣   呵呵

                    

我帶咗一盒朱古力同 6 支珍寶珠   行到攰可以食啲甜嘢補充糖粉   最緊要係夠輕   哈哈   行咗 2 個幾鐘   阿喂有啲餓啦   真係好在帶定盒朱古力   唔係驚佢餓暈呀 ~

差唔多行完 lu

好似行咗 3 個鐘零 10 分鐘   如果唔係我成日抖   可能更加快 lu ~

好多人等小巴   阿喂話起碼 3 架   咁諗住打的   但又無的士   咁就行路落去搭巴士啦   我話總知唔駛上斜同上樓梯就得㗎喇   同埋想爭取時間快啲開局呀   哈哈 ~

搭 73X 落荃灣   我唔記得阿喂教阿 Mi 搭幾號巴士   之後阿 Mi 話係無嘅   咁阿喂喺度好開心咁笑   仲話等兩個鐘都無車就搞笑喇   衰得佢吖   枉我哋信佢   我哋搭唔到車仲喺度笑 ~

我哋要分頭行事買嘢   真係第一次咁㗎咋   哈哈   阿喂同里奧大人就早幾個站落車   我同 Mi 就總站落車 ~

4 點左右到荃灣   阿喂要食雞   咁就去 AEON 睇啦   但無半隻   所以即轉場去一田買雞同椰子水   之後去街市買蘿蔔   再去買炸魚皮同水餃雲吞   最後買埋芫茜同蔥就打的番屋企喇   同阿 Mi 真係急步衝呀   真係最緊要快   佢話直行就直行  轉彎就轉彎   唔好問   最緊要快 ~

好在我依家行得快咋   唔係要我行咁多轉買嘢   我會覺得好辛苦   哈哈 ~

原來佢哋只係早過我哋 5 分鐘番到屋企   佢哋拎完嘢就去買湯丸同炸雞同洗衣液   應該比我哋輕鬆好多啦 ~

阿 Mi 特登買咗對拖鞋比里奧大人   我話佢就好啦   有私家拖   哈哈   之後里奧大人好認真話下次帶埋私家酒杯嚟喎   咁都好   即係有歸屬感啦   哈哈 ~

5 點 15 分開始食炸雞   快快趣食完就陪阿 Mi 整湯底   咁淥好哂啲魚片頭蘿蔔   一陣一開枱就有得食   阿喂就負責擺陣等我哋呢 ~

食熱氣嘢   里奧大人一定要飲啤酒呢

                     

啲雞炸到好乾呀   好在之前喺 KFC 拎咗好多胡椒粉   "沈"咗落去都 OK 啦   但都係無咩味   反而醃蘿蔔就好酸   勁正

5 點 50 分正式開局   我同里奧大人唔識玩話事啤   所以我哋要試玩幾次   同埋用埋籌碼試玩   咁先可以知道點樣跟呢 ~

玩咗幾舖都掌握到   最後試玩果舖   我就每次落 $1,000 同 $5,000 (真錢無可能發生)   咁呢舖阿 Mi 贏咗呀   但佢之後又行開咗   咁阿 Mi 一坐低就係咁笑   之後拎哂枱面嗰 2 萬幾呀   嚇到我哋 3 個呆咗   之後我話呢舖仲係試玩喎   佢個樣失落到呢   接受唔到呢個現實呀   笑死我   哈哈 ~

每人賭本有 5 萬

玩玩下   阿 Mi 就拎罐啤酒糖出嚟一齊食   呢罐係我買比阿喂嘅聖誕禮物   但阿 Mi 係都要等埋我哋先一齊食呢

里奧大人研究點樣開   之後阿 Mi 開比佢睇呢   啤酒味就一定無   但我鍾意食 JB 呢隻糖   係鍾意佢唔會黐牙呢

玩緊 21 點   阿 Mi 手指指   可能有人出千   哈哈

估唔到話事啤都好玩   太細嘅牌就一定唔跟啦   咁里奧大人連續兩舖都係 A 啤   我哋仲更加唔跟啦   之後阿 Mi 見枱面係 $140 籌碼   話里奧大人都好啦   咁都可以執 $130   之後里奧大人話 $100 係佢自己拎出嚟㗎   只係執 30 個咋   仲話諗住細細哋睇下有無人跟   點知無人跟   黐啦   跟你嗰個真係黐啦   咁有舖阿喂大我 $9,500   里奧大人話做咩唔跟   我話 $9,500 呀   點跟呀 ?!   咁我問番佢會唔會跟囉   佢都話唔會跟   頂佢吖 ~

襯里奧大人去廁所   咁阿喂教我玩三公   我條數都未計好   咁阿 Mi 又教緊我   阿喂已經即刻話我輸   拎走 $10   第二舖又係咁比人快手拎 $10   終於遇上老千了    前後真係唔知有無 30 秒 ~

玩到 7 點就停喇   要預備晚餐喇   7 點半搞掂   買埋現成嘢真係快手好多呢   呵呵 ~

7 點 45 分開餐   食下傾下又 10 點   食埋生果就陪阿 Mi 洗嘢   搞掂哂又開局喇 ~

今次玩鋤大 D   阿喂話要 $100 隻喎   是但啦   又唔係真錢   哈哈 ~

我同里奧大人都玩過鋤 D   但就唔會賭錢嘅   所以以為輸咗只係比一個人錢   原來要比 3 家㗎   咁我哋又唔係咁識點 "諸"人牌   有舖阿 Mi 已經係雙炒格   咁里奧大人咁啱有大 D   阿喂教里奧大人點出牌   咁 Mi 一定輸硬   連帶我哋都可以贏錢   笑到我哋死死下   不過里奧大人都會照出大 D   因為見光死   無可能唔出呢   但出咗都輸啦   而阿 Mi 都要雙炒   呢舖佢輸咗 5 千幾呀   就係咁   我同里奧大人之後就出哂 5 隻先   咁起碼唔會比人炒   哈哈 ~

阿喂笑得勁開心呀   笑到下一舖呀   阿奧都笑到流眼水   阿喂應該同晴晴同一類人   見人輸開心過自己贏呀   哈哈哈哈 ~

不過當自己比人炒時   真係堅心痛   有舖以為自己 A夫好勁   點知阿 Mi 出 7 夫   里奧大人出 J 夫   搞到仲諗住慢慢拻 3 隻 A   里奧大人見我出 A夫就問點解頭先有人出蛇   我唔出喎   阿喂即刻話頭先我忍囉   所以最後點都要出   比佢睇穿哂添 ~

阿奧就緊張到出 6 隻牌   一係就夫打阿 Mi 4 條 10   笑死我   不過我就仲勁   話自己葵花 D花大過阿喂紅心 D   我真係想出牌㗎   好在阿 Mi 話佢係同花筍 A2345 喎   哈哈   唔怪得我想出牌時   阿 Mi 個樣好驚訝咁啦   哈哈 ~

咁本來諗住食湯丸   但大家都好飽   同埋玩得實在太開心   都係繼續玩 ~

笑下玩下又到 1 點   係時候走喇   里奧大人今次贏 2 萬幾   我就贏 $1,368   阿喂好似輸萬幾   阿 Mi 好似輸 4 千幾   本來輸咗要大懲罰㗎   但因為太夜   咁留番下次先罰 ~

20 分鐘番到屋企喇   真係好快   之後即沖涼   搞掂哂都 2 點 15 分   即瞓喇 ~