黑椒豬扒 + 油麥菜 ( 24-MAR-2017 )

( 24-MAR-2017 FRI )

今朝都 OK 好天   起碼唔好落毛毛雨就得喇 ~

早餐明明叫餐蛋治   點知比咗蛋牛治   咁是但啦 ~



菇場唔忙   我都唔想忙   哈哈 ~

Lunch Time 出去買酸辣米線   今次又覺得好好味喎   可能今次係好想食 ~

仍然唔忙   可以 Hea 等放工   爽 ~

放工即番屋企   抹下嘢就開機洗衫   好快就 7 點半   諗住抖下   咁啱里奧大人放工   咁我都要預備了 ~

今晚整印尼撈麵   以前里奧大人唔鍾意乾撈麵㗎   依家話可以食   因為佢有時 Lunch 都去 Circle-K 買印尼撈麵   話都幾好味喎 ~

是日晚餐 - 黑椒豬扒 + 油麥菜

黑椒豬扒 - 之前買嘅巴西豬扒   本來諗住掉㗎   但諗諗下之前都食咗啦   都唔爭在喇 ~

油麥菜 - 今日 Lunch Time 去買定   咁夜晚又唔駛特登行去買   勁正 ~

搞掂哂就沖涼   原來已經 9 點幾   食埋沙律就休息喇 ~

之前解凍咗 10 條蟹柳   諗住食得哂   咁尋晚只係食咗 2 條   今晚都食鬼埋去喇   下次真係 5 條就夠咯   好鬼飽肚呢



11 點幾都瞓喇   聽日 BBQ   要儲足精神呢   哈哈 ~

吉豚屋吉列豬扒專門店 @ 九龍灣 ( 23-MAR-2017 )

( 23-MAR-2017  THU )

又係灰灰暗暗   潮潮濕濕咁嘅天氣   不過無落雨已經好好呢   下星期又急凍   真係要小心身體呢 ~

早餐去大家樂食啦   8 卦想食好耐   咁陪佢啦   唔係就日日問去唔去㗎喇   哈哈 ~

菇場唔忙   咁就好喇 ~

Lunch Time 出去超市買嘢   之後再去 7 仔買 Lunch 就即番菇場喇   已經 1 點幾呢 ~

菇場仍然唔忙   爽呀   呢排想 Hea   哈哈 ~

放工去九龍灣補牙   上星期啲牙好似成日一食完嘢   就牙就攝住啲嘢咁   加上又痛痛哋   所以驚蛀牙   所以 Book 咗今晚睇牙 ~

隻牙有少少翻蛀   但最主要係隻牙崩咗少少   所以有嘢攝住咁   補番就無事   吖大個口成半個鐘   攰到呢 ~

搞掂哂都 6 點半   補隻牙要 $500   其實我唔知第度係咩價錢   我只知道今次都貴囉   哈哈   真係要好好保護牙齒呢 ~

咁我再周圍行陣   里奧大人 7 點幾打嚟話放工   咁我行多陣再買埋 3 個泰國木瓜   今次買咗 $62   其實買生果都好貴   哈哈   買完就去吉豚屋喇 ~

里奧大人一坐低就話一陣要買木瓜   佢話有啲鼻敏感   我話真係邪   我就係頭先特登去買幾個木瓜比佢 ~      

食完又話要食雪糕   仲話雪糕唔飽 ~



番到屋企就沖涼   之後就食沙律 ~

加咗脆煙肉碎同蟹柳   好味道呀 



睇多陣電視   11 點左右都瞓 lu ~

豆豉鯪魚炒白蘿蔔 + 菜心 ( 22-MAR-2017 )

( 22-MAR-2017  WED )

今朝里奧大人上大陸   叫埋佢帶參蜜   我都即刻瞓番 lu ~

又落毛毛雨   又見唔到陽光   加上又潮濕   呢啲天氣好難頂呢 ~



菇場忙呀   好在 11 點幾搞掂哂 ~

Lunch Time 去萬寧買嘢   再周圍行多陣就買麵包番菇場食呢 ~

仍然忙下停下   好鬼攰呀   哈哈 ~

放工即走   番到屋企即浸菜   之後整沙律   搞掂哂就拖地   之後開機洗衫   抖咗 10 分鐘   差唔多 7 點半就預備煮嘢喇 ~  

是日懶餐 - 豆豉鯪魚炒白蘿蔔 + 菜心 

豆豉鯪魚炒白蘿蔔 - 完全唔夾   哈哈   但我話想食白蘿蔔   咁又有菜心   所以咪唔用油麥菜炒囉 ~

菜心 - 加埋啲豆豉同辣椒豉油   唔好嘥 ~

我同里奧大人講話今晚做咗好多嘢咁   仲以為係星期一   無計啦   之前幾日成日作感好攰   咩都無做過 ~   

佢食食下飯   同我講話我體溫好高   因為佢話我尋晚無蓋被   所以覺得我熱   咁開風扇之後我又真係蓋番張被喎   但其實我唔係咁鍾意啲風吹住個肚呢   之後佢話瞓到半夜出汗   心諗點解開完風扇仲會熱到出汗 ?!   之後話我同佢蓋埋一張被   我體溫好高   將佢熱醒   哈哈   佢話諗住坐梳化過下冷河先瞓   不過見都差唔多起身   所以話都係照瞓喎   哈哈 ~

洗埋碗就拎碗沙律比里奧大人食   我真係忍唔住話無醬其實唔係叫沙律   佢話鍾意咁食   我咪話囉   咁同食蘋果有咩分別 ?!   佢話唔駛切就有粒粒蘋果食   所以鍾意食呢個 "沙律"   我心諗   我切粒粒蘋果最花時間呀   我就唔食沙律住喇   因為我想凍啲先食呢 ~



搞掂哂就即沖涼   之後再熨 2 機衫   10 點半先搞掂   勁攰呀 ~

今晚 11 點幾瞓   好在有睡意   哈哈 ~ 

海天宴會廳 @ 鯉魚門 ( 21-MAR-2017 )

豉椒炒蟶子 - 好大隻呀   我係一 "抽" 咁夾添呀   仲以為係兩隻   原來係 1 隻   不過個汁唔夠惹味   但蟶子就好彈牙爽口

豆腐木瓜魚湯 - 都 OK 呀   



避風塘炒蝦 - 個料唔得惹味   又唔辣   但蝦就好彈牙爽口   



蒜蓉蒸扇貝 - 都唔記得咩口感同味道了   



陳皮蒸鮑魚 - 好味道   估唔到都好大隻同彈牙   我都唔知係咪用彈牙嚟形容   哈哈 

椒鹽瀨尿蝦 - 都幾多肉架   家姐仲食到好多膏   但個料頭又係唔得   我覺得係無咩味   



老虎斑 - 我唔識英文係咩   咁佢哋講笑話係 Tiger Fish   之後無啦啦講 Mickey Fish   因為佢哋講講下   講咗老鼠斑呀   笑死我   呢條魚好大條   同埋肉質唔係好 "鞋"   勁好味   

芝士焗龍蝦伊麵 - 估唔到個芝士汁勁好味喎   好香芝士味又唔漏



炒芥蘭 - OK 呀   



薑蔥焗蟹 - 我好飽呀   只食咗啲薑蔥   呢個料頭又好味喎   



生果盤



酒樓嘅自家制椰汁桂花糕   都幾好味     



( 21-MAR-2017  TUE )

尋晚瞓夠   今朝都精神   但仍然覺得有啲作感嘅感覺   頭重重咁囉 ~

早餐食芝腿治   今次好多牛油   所以食完有啲滯 ~

   

菇場唔太忙   但好鬼凍啦   又鼻塞塞   所以即食粒特效傷風必理痛打底 ~

Lunch Time 即飛去食麻辣米線   食完真係好好多喎   個人無咁寒   再買埋麵包比里奧大人就番菇場喇 ~



好嘢   Hea 到放工   今晚同加拿大姑姐同表弟食海鮮   所以約家姐喺油塘大本營等   家姐 6 點半左右到   之後再一齊行去鯉魚門呢 ~

里奧大人 4 點先喺深圳見客   差唔多 7 點幾先番到香港   所以都唔預佢喇   佢可以去姑奶屋企食飯 ~

好有遊客區 Feel   



家姐居然叫我影牌坊   我話勁喎   居然識話影牌坊   之後佢話見個個都咁影   仲問我駛唔駛企喺牌坊前面影   幫我影張相   當我自由行嗎 ?!   哈哈
  


望到啲船   覺得好似入咗長洲



估唔到有生果檔   我以為全條街都只係買海鮮呢 



家姐話向呢個方向   再向前行行行   要是我自己去   佢都只會教我係咁向前行行行   但佢唔知我係無嚟過鯉魚門囉

喺呢檔 "年香園" 買咗豬肉乾同合桃   佢哋比我哋試食肉乾嘅份量都多喎   因為喺其他舖頭   叫佢哋比啲嚟試食   會剪到手指甲咁細   根本試唔到味   但佢哋地係一塊剪開 4 塊比妳試食喎

買完就去姐夫朋友光光屋企   因為我想見下隻柴犬呀   一開門就嘈到呢   原來佢哋養咗 8 隻狗   不過住村屋就有哋方比佢哋走   如果唔係成日困住都幾慘 ~

柴犬同哥基





之後一行人去酒樓喇   今日姐夫同佢朋友超超兩公婆車姑姐同表弟周圍去呀   去粉嶺食齋   又去山頂赤柱淺水灣   感恩今日都算好天   佢哋可以周圍影下相 ~

咁姐夫嘅朋友光光兩公婆幫我哋訂海鮮   姐夫又叫埋佢哋   我其實覺得唔係咁好啦   自己屋企人 Gathering   做咩叫埋自己朋友   咁即係你都預咗唔會招呼姑姐啦   佢朋友又係怪   明知人哋屋企 Gathering 就咪嚟啦   同人又唔熟   但請超超兩公婆就應該喇   佢哋真係帶住姑姐周圍去嘛 ~

今晚係佢朋友多過自己屋企人同姑姐食飯   古古怪怪   要飯聚就搵第日嘛   真係唔知點諗嘢 ~

我哋坐露天坐位   初初覺得熱   但佢哋話望住個海好靚   我心諗   黑媽媽望到啲咩呢 ?!

咁我坐喺姑姐隔離   家姐同姐夫就坐喺朋友隔離   其實咁樣真係唔好啦   自己親戚   點都要坐喺佢哋隔離家嘛   咁我一定會夾餸比姑姐同表弟先嘅   之後姐夫幾乎每樣餸一上枱   就叫我夾   其實我覺得好煩   你咁緊張   你自己夾比佢哋啦   同埋唔駛碟碟都叫我夾   我根本就會夾   之後家姐都頂唔順鬧姐夫   話唔駛成日叫阿妹夾啦   佢自己識夾比姑姐   成日好似點工人咁做嘢   咁事實我本身都好想開口話 : 不如你夾好無 ?!   唔駛你成日叫   但費事啦   全場之後靜哂都似 ~ 

喺呢間 "海天宴會" 食飯   



樓梯上面有張枱   如果坐呢張枱就應該睇到海景   日頭嘅話  

望住呢個海景食飯
   


佢哋話呢隻係賭船

食下傾下都 9 點幾喇   同埋唔走唔得   因為落緊毛毛雨喇   好在食完飯咋   感恩感恩 ~

今晚家姐請食飯   呢餐好似 $4,300   好在啲嘢都好新鮮好味道啫   呵呵 ~

超超車埋我哋出去   咁我去到官塘就落車   佢哋就去家姐屋企參觀下 ~

番到屋企   里奧大人仲做緊公司嘢   之後我話買咗蜜汁豬肉乾   佢就即刻話想食   哈哈 ~

兩個唔同部位嘅豬肉乾  (每包 $40)   合桃就買半磅 ($40)

沖埋涼都差唔多瞓   其實都 11 點幾   但我唔可以即瞓㗎   因為沖完涼個身好熱   吹完頭個頭又好熱   要是即瞓   好似瞓喺張火床咁   哈哈 ~

福源餐廳小廚 @ 官塘 ( 20-MAR-2017 )

拔絲咕嚕肉 - 好味就好味   但真係好熱氣   哈哈



羅漢齋炒麵又係好味又熱氣   所以里奧大人番到屋企要即飲啤酒食熱呢  



( 20-MAR-2017  MON )

又嚟勁潮濕天氣   好在又唔係話好攰咁咋 ~

早餐食腿蛋治   今次麻麻哋好味噃 ~



菇場做埋 Report 可以 Hea   無啦啦打咗 2x 個噴嚏   之後開始頭重重喇   應該係作感冒 ~

好在西瓜唔喺度   我可以間唔中合埋對眼抖下 ~

Lunch Time 出去買菜   之後買埋嘢食就番菇場喇 ~

食完嘢諗住舒服啲   不過仍然頭重重 ~

里奧大人 3 點去上環見客   諗住今晚煮飯   但最後我都話唔煮喇   唔係咁舒服   想出去食   咁可以早啲休息 ~

差唔多 4 點就勁忙   好在放工前搞掂哂 ~

放工即走啦   里奧大人已經到咗福源 lu ~

食完就番屋企   里奧大人就做公司嘢   我就沖涼   之後開機洗衫   晾埋衫都 9 點   咁睇多陣電視啦   但里奧大人話我睇睇下電視都瞓着咗   我再望下個鐘   原來已經 10 點   不過我都瞓覺喇   個人唔係咁舒服   瞓多啲快啲好呢 ~  

龍華酒店 @ 沙田 ( 19-MAR-2017 )

金牌燒乳鴿皇 - 表弟無食呀   可能佢覺得咁大堆頭好恐怖   哈哈  



沙田滑雞粥 - 只能講個粥好綿   但無咩味   同埋得幾嚿雞咋  



懷舊大良野雞卷 - 仲以為齋腐皮卷添   都幾好味   個漿好似好厚咁   但食落又唔係喎        



鮑粒野菌炒鴨鬆 - 生菜包好味   但食到好 "呢 Hea"   因為次次包好拎住放入口   咁啲菜嘅水會漏出嚟   隻手都會濕哂   唔鍾意囉

翡翠加拿大鳳凰蚌 - 個蚌都唔爽脆嘅   定係本身口感係咁呢 ?!



燕窩虎奶菇燉土雞 - 我飲咗一碗呀   死得   呢餐仲有懷舊豉油王炒麵同灼油麥菜   不過我無影呀   擺得太遠了   



( 19-MAR-2017  SUN )

今朝鬧鐘響咗   里奧大人問我番唔番教會 ?!   我話唔番呀   想瞓多陣   因為呢排瞓得唔好   瞓極唔夠咁   慘 ~

一瞓就瞓到 12 點   姑奶打嚟話佢哋 2 伯情況唔好   要即去醫院   咁我同里奧大人都即刻沖埋涼就出發   之後姑奶又話佢未食嘢   咁我哋話各自食   食完再 Join 埋一齊去醫院 ~

早餐食蒸飯   諗住清清哋   但食到一半原來都好飽下   不過飽都好   因為要頂到今晚 6 點半呢

 
姑奶喺舖頭打的   咁叫佢接埋我哋   點知佢話的士佬話唔識去   佢要喺我哋屋企落車   我就話奇啦   要是司機唔識去   一上車講咗目的地   就已經講話唔識去啦   點會中途先同佢講唔識去㗎   都唔知佢點用司機講   里奧大人都話費事問   因為佢做嘢係咁上下   真係頂佢唔順 ~

去到醫院   佢 2 伯都仲有微弱心跳   之後我哋出去坐下傾下偈   正想諗住走人   點知佢 2 伯情況突然惡化   最後都好舒服咁走咗   因為睇住部機無哂數字   咁之後坐多陣就走喇 ~

姑奶老公車我哋去官塘   約咗家姐 4 點 40 分喺巴士站等   大家前後腳到巴士站   無耐就有巴士喇   感恩感恩 ~

落車都係 5 點 20 分   咁直接去龍華喇   落雨濕濕唔想周圍行 ~

好舊式嘅文字   我覺得好靚  



要再上一段路   先到食飯嘅地方



好似大陸咁   因為我覺得大陸地方好鍾意掛燈籠

我覺得好老土   哈哈

去到無耐   大表哥就到   之後我哋都出去影下相   影完番入酒樓   啲表哥陸陸續續都到喇 ~

里奧大人離遠望到 "嫩鴿肥雞" 呢 4 個字就喺度笑



佢係都要影到為止   其實佢次次一見個肥字呀 豬字呀就會大笑   神經的嗎 ?!

@ 龍華文化村   



視察環境 

酒樓分咗 2 邊   一邊裝修靚啲嘅   但有人唱歌   表哥話怕嘈   所以揀另一邊喇   咁我哋坐嗰邊就係白光燈嘅   我覺得好似啲齋堂咁   哈哈 ~        

咁我同家姐去洗手間   但我唔知喺邊家嘛   行咗入頭先另一邊嘅入面   個侍應話洗手間喺出面呀   中入嚟做咩 ?!   我頂佢吖   鬼知洗手間喺酒樓出面咩 ~

今晚係同加拿大番嚟嘅姑姐同表弟食飯   依家姑姐都係湊下孫   自己又行得走得   可以周圍去   以前番香港就難   依家真係隨時番嚟都得呢 ~

Book 咗 2 圍枱   表哥們佢哋一枱   我哋就同姑姐們一枱   睇番表弟啲細個相   個樣係同依家一樣   我覺得好得意   因為有啲係細個同大個唔同樣㗎 ~

食下傾下   咁姑姐話聽日想去赤柱   問我搭咩車   姐夫教佢哋搭巴士   我就話你唔好當佢喺香港生活先得㗎   叫佢睇住個燈箱   咁就會知邊個站落車   我心諗如果壞咗咁點 ?!  同埋一陣改路就唔知邊度落車啦   附近又無地標   佢哋又唔熟   表弟又唔識中文同講廣東話   即係得姑姐一個人記哂所有嘢   仲要佢第一次去赤柱添   之後表嫂就叫佢坐地鐵去中環再轉巴士   咁先大路嘛   同埋起碼問到人   你教佢哋去到筲箕灣中途站落車再問人   搭咩巴士去赤柱   人哋實識答妳咩 ?!   但佢哋搭地鐵   起碼可以問職員嘛 ~

不過姐夫話佢同朋友星期二放假   可以車姑姐去赤柱同淺水灣   咁就好喇   唔駛又左轉右轉   又有人帶路 ~

最搞笑之後表弟同里奧大人講   佢真係唔識搭巴士   話只識搭 Subway   因為方便又清晰指示   我哋咪話囉   連姐夫係香港人都唔識搭巴士去   咁何況係你哋呢   哈哈 ~

食完又影下相   咁就 9 點幾   係時侯番屋企喇 ~

呢餐每人 $213   團購都要咁價錢   咁又唔值喎 ~

里奧大人仲搞笑   話只係食粥同炒麵咋喎 ?!   點解會揀呢間 ?!   其實揀其他酒樓都得   起碼食好啲咁囉 ~   

同家姐佢哋一齊坐 89 號番屋企   番到屋企已經 10 點 15 分喇   諗住即沖涼   點知加拿大堂妹打嚟   一傾傾咗 1 個鐘   依家佢廣東話好咗好多   里奧大人直頭話我似同香港人傾偈咁呀   哈哈 ~

收完線即沖涼   吹埋頭   成 12 點先瞓呀 ~