越一越南牛肉粉專門店 @ 荃灣 ( 23-JAN-2018 )

越式香茅豬扒撈檬 ($48) - 豬扒好入味   個醋又酸中帶甜   好味道   因為個醋係靈魂嘛   哈哈



越式香茅牛肉飯 ($52) - 牛肉好入味   個飯有小小硬   但我同表妹都鍾意呢啲口感



法式牛油蒜蓉雞翼 4 件 ($39) - 一放上枱就聞到好香牛油蒜蓉味   又熱辣辣   真係超級勁好味   好想叫埋家姐同里奧大人一齊來食呀



( 23-JAN-2018  TUE )

今朝天色又灰灰暗暗   真係令人心情唔太好添 ~

早餐諗住轉場食新嘢   但份量太多   所以去番老地方了 ~



菇場忙呀   不過好攰囉   無咩心機做   哈哈 ~

8 卦唔食辣   佢覺得食胡椒粉都係辣   佢話之前食早餐   見個女仔食蛋治   但落胡椒粉落啲蛋度   仲要落好多喎   咁我真係未見過咁喎   我話個女仔可能驚啲蛋有腥味啩 ~

我只聽過熱奶茶走奶   熱檸茶走檸檬   其實佢哋即係要茶膽啲濃茶   所以我成日覺得香港人飲咖啡奶茶食好濃   包括我自己在內   所以去旅行飲咖啡   係飲得好舒服   個口唔會好澀咁呢 ~

傾下傾下又到 Lunch Time   今晚去電髮   所以食飽啲   又食酸辣米線喇 ~



唔知係咪飽得滯   4 點左右超級眼瞓   咁我伏喺張枱度啦   我估我真係瞓咗一陣   因為我記憶當中   係一粒聲都無   同埋一開眼又精神咗啲咁   哈哈哈哈 ~

放工即走   今晚去荃灣搵表妹電髮   但 4 點幾佢叫我有比心理準備   佢等陣有嘢做   咁即係要等佢啦 ~

去到荃灣行咗陣都已經 6 點半   咁就搵表妹喇   見佢做緊嘢   咁我睇住電視等啦 ~

等到 7 點半   我話落去行陣   諗住去印尼店買嘢   但堅唔識睇係咩來   所以最後都係走人   哈哈   咁順便買杯咖啡比表妹   佢話好眼瞓喎   之後話尋晚失眠   朝早 5 點幾先瞓到   咁我話仲飲咖啡 ?!

咁繼續等啦   照照下鏡   又想剪短頭髮   因為呢排甩得超級多頭髮   好恐怖   同埋每年電一次頭髮又好傷咁   加上又覺得好悶   所以最後都係剪短 ~

差唔多 8 點 20 分先開始剪   效果非常之好   真係好耐無剪短喇   成個人精神哂   哈哈 ~

佢朋友都話剪短後生咗   我比里奧大人睇啦   佢哋都話後生咗   衰奧直頭話後生十年   不過佢成日都話我長頭髮唔好睇   好憔悴   咁係我無整好個頭啫 ~

大家又一齊傾下偈   講緊啲客 R 嘢 R 到離哂大譜   佢有個朋友好搞笑   個客係咁問有咩送 ?!   佢話: 送妳走   呢下我覺得好好笑呀   哈哈哈哈 ~

傾下傾下都 9 點半   等埋佢埋數就即走喇 ~

表妹係咁話餓   本來諗住去食烤肉   但人哋收 10 點   佢又唔記得今晚有朋友嚟整頭髮   所以最後都係食越南菜算喇 ~

一入去就安排我哋坐 2 人卡位   好迫囉   因為隔離有人坐緊   但其實有好多吉枱   所以表妹話坐另一邊 4 人枱   咁如果多人我哋都會坐 2 人卡位   但妳全場得 3 枱人   做咩要我哋迫埋卡位嗰邊 ~

咁叫佢比杯水   佢只係比 1 杯水   呢下就真係好怪囉   兩個人點會比 1 杯水   做嘢完全無 Heart   定係我應該要講明 2 杯水呢 ?!   但我朝早去茶記   8 卦話要杯水   阿姐都會比 2 杯   因為見到我哋係 2 個人嘛 ~

食下傾下   講開越南嘢   我成日話點滴咖啡好飲   佢縐哂眉頭話係咪滴漏咖啡呀 ?!   哈哈   笑死我   其實我記得個滴字   好在佢糾正番我咋   唔係肉酸嫂啦 ~

我同表妹一樣   又係鍾意食撈檬啲醋   我鍾意食越南春卷又係因為啲醋   但我話次次食完春卷   隻手會濕哂咁   佢又係   因為我哋係浸醋   啲醋多得滯   咁包住生菜   啲醋係咁漏出來   漏到落手心都係   但里奧大人唔會㗎   食得好乾淨   哈哈 ~

今晚我請食飯   其實佢話請我㗎   差唔多走嘅時候   佢都拎起張單找數   係都話比   不過我話我請啦   話哂佢收我親戚價嘛   同埋我話下次等埋大表來先佢請啦 ~

佢諗住去麥記食雪糕   不過已經 Closed 咗   佢又唔想入去排隊   所以唔食喎 ~

之後送我去搭小巴   因為我成日話去邊度食飯都無問題   最緊要佢要送我去小巴站   日光日白已經認唔到路   何況夜媽媽 ~

坐車勁想瞓呀   所以即同表妹話食飽好眼瞓   估唔到佢都話係   但大家都係中途站落車   所以唔可以瞓呢 ~

番到屋企都已經 11 點   即沖涼洗頭   其實唔想洗   但真係接受唔到出咗街唔洗頭   哈哈 ~

頭又未乾   加上又飽   所以都係上 Youtube 睇嘢   差唔多 12 點先瞓 ~

豉汁豆卜蒸排骨 + 節瓜鹹蛋魷魚湯 ( 22-JAN-2018 )

( 22-JAN-2018  MON )

今朝里奧大人送車尾   所以話同我食埋早餐先番工喎 ~





菇場忙呀   但好鬼眼瞓呀   哈哈哈哈 ~

咩事呀   真係攰到瞓得着咁 ~

Lunch Time 出去食水餃米   食完行陣就番菇場 ~

仍然眼瞓到爆   頂唔順飲咖啡添呀   真係好少會咁 ~

放工去買餸   番到屋企預備哂嘢就拖地   咁又無咁眼瞓喎   呵呵 ~

里奧大人 7 點半放工   咁其實我都煮好哂嘢   一番嚟就有得食 lu ~

佢一入屋就問我係咪整排骨 ?!   原來豉汁係咁大陣味嘅 ~

是日懶餐 - 豉汁豆卜蒸排骨 + 節瓜鹹蛋魷魚湯

豉汁豆卜蒸排骨 - 之前上 Youtube 睇人整餸   見到呢個餸就好想食   因為勁想食豆卜   我買咗 $20 腩排   但份量唔係好多   好在無買 $15 咋   唔係比人鬧 ~

節瓜鹹蛋魷魚湯 - 又懶又想飲湯   呢個最好   起碼有啲瓜粒食下   哈哈 ~

今晚唔徑步   因為真係完全無動力郁呀   洗埋碗都即沖涼休息喇 ~

里奧大人 10 點半瞓   我 10 點 50 分都瞓添呀   咁都好   真係想早啲瞓囉   太夜瞓對皮膚都唔好呢 ~

辣汁焗雞翼 + 齋滷味 (外賣) + 蠔油娃娃菜 ( 21-JAN-2018 )

( 21-JAN-2018  SUN )

今朝 10 點起身   沖埋涼就去食早餐喇 ~

食店好焗  食到一半覺得好唔舒服   但點都食埋去啦 ~

之後行出商場   覺得個人好舒服   但已經太遲   因為已經焗到有啲眼瞓   哈哈 ~



好在崇拜期間唔眼瞓咋  唔係就大鑊 ~

崇拜完畢去德福   諗住用埋張 $50 Cash Coupon   里奧大人一心買波鞋   依家無啦啦買咗另一款嘅鞋 ~

買完就佢番屋企做公司嘢   我就去 Taste 買酸齋 ~

好攰呀   但又瞓唔到   更加無 Mood 做家務   咁睇下電視啦   差唔多 3 點先出去食下午茶 ~

番到屋企又瞓唔到   咁開機洗衫啦 ~

真係唔知做咩   到 5 點左右無啦啦眼瞓到呢   一瞓就瞓到 5 點半呀 ~

里奧大人話我啲鼻寒聲好大   但佢將電視機音量收細呢   我鼻寒聲又會細聲   咁搞笑嘅   下次叫佢錄嚟聽下先 ~

今晚真係求其煮   本來諗住煲湯   但個人完全唔在狀態   所以都係比自己抖下 ~

是日懶餐 - 辣汁焗雞翼 + 齋滷味 (外賣) + 蠔油娃娃菜

辣汁焗雞翼 - 星期二已經解凍   再唔食就真係要掉㗎喇 ~

齋滷味 (外賣) - 夜晚買係 $18   中午買就要 $22   但好想食   所以貴啲都買啦   哈哈 ~

蠔油娃娃菜 - $6.9/Pack   之前買嘅娃娃菜成日都有好多一點點黑色   但真係唔知食咩菜好   咁就買佢啦   好在無黑色一點點咋 ~

洗埋碗就去徑步   徑 20 分鐘算喇   因為要拿拿聲番屋企沖涼   之後食生果 ~

9 點幾先開始食生果   其實覺得好夜   最怕半夜又要去廁所   哈哈 ~

水姑尋晚買比我哋   估唔到口啲菠蘿咁甜   但其他就無咩味

食完又睇下電視   11 點 20 分即瞓   真係搞咩   今日咁攰   定係之前成日太夜瞓   係時候要補眠喇 ~ 

美心皇宮 @ 九龍灣 ( 20-JAN-2018 )

貴妃脆蝦球 ($88) - 啲花生又 "益" 又苦嘅

栗子雞煲 ($98) - 咁價錢   但質數同客家好棧差唔多喎  



涼瓜班頭腩煲 ($128) - 味道好一般 



什菌素燒豆腐 ($78) - 我無食呀   



一品砂鍋飯 ($108) - 呢個幾好味   飯夠乾身   但唔多覺有好多材料囉   



菠蘿生炒骨 ($78) - 好一般   



滑蛋炒蝦仁 ($82) - 成碟無乜點食   之仲叫咗個南乳齋煲 ($78)   又係成煲拎走   姑奶話留番星期一食   我想講話叫咁多餸把鬼咩   明明 5 個餸都食唔哂   又話要加餸   仲話一係叫 1 個   一係叫 3 個   唔可以叫 7 個   麻鬼煩   叫 1 個咪得囉   依家多咗 2 個又要拎走   黐鬼線

( 20-JAN-2018  SAT )

今朝同家姐食早餐   呢兩次都係大家食完個包已經飽飽哋咁   反而叫 2 個麵餐都無咁飽咁喎 ~



居然食唔哂 3 塊叉燒   家姐好少嘥嘢   所以佢真係好飽

8 點 45 分就走人   如果唔駛番工就好   哈哈哈哈 ~

菇場忙   但無 Mood 做添 ~

放工即走   里奧大人 12 點已經出深水埗買嘢比佢姐夫   咁我就番屋企等佢 ~

之前喺淘咗幾個櫃桶仔   又買咗幾個膠兜   係時候要執下嘢   所以唔覺唔覺又 3 點幾 lu ~

里奧大人差唔多番到嚟   咁就一齊去食下午茶喇 ~

食完就去萬寧換被   因為家姐成日話張被最正係有 2 張 (1 冬 1 夏)   又可以落機洗   同埋加大只係 $588   咁以雅芳婷呢個牌字來講   又真係好抵嘅   咁我就換啦   好在家姐比齊印花我咋 ~

今日用新嘅手機   因為保護幕同機套已經到手   里奧大人幫我搞掂哂   依家過資料都好方便   起碼我唔駛由頭再寫過   原來之前里奧大人問咗點過資料   如果係我買就慘   咩都唔會問   哈哈 ~



搞掂哂都 7 點半   係時候出發去食飯喇 ~

今晚同姑奶食生日飯   佢哋一家再加 2 個姑奶   今晚個場變得好細   因為間咗好多房   所以特別嘈   嘈到我有啲頭痛   尋晚又比個女人嘈到頭痛   食餐飯都咁辛苦   嗚嗚 ~

我影相   姑奶又問影來做咩 ?!   我真係忍唔住話呢個問題我答咗九萬幾次   唔好再問我啦 ~ 

其實我真係覺得好煩   一係妳唔好問   人哋答咗妳唔該記住   問一次五次唔係問題   但我答咗妳咁很多次都仲問問問   咁就唔該妳唔好問喇 ~

食到 10 點幾都走喇   諗住去萬寧買嘢   不過已經收舖 lu ~

番到屋企都即沖涼   睇多陣電視   12 點先瞓 ~

米線陣 @ 官塘 ( 19-JAN-2018 )

滋味二人餐 ($172)
川辣口水雞 - 好味呀   可能我太想食   但就唔辣嘅





白裡紅蒜泥白肉 - OK 啦 



濃湯冬菇唐生菜 - 隻冬菇好香冬菇味   唔係廢話來㗎   哈哈



梨水豬軟骨米線 (麻辣蕃茄湯)



五香牛腩米線 (農場蕃茄湯)



青檸薏米水 - 飲第 1 啖好鬼甜   之後要狂篤青檸   但都覺得甜   里奧大人就要椰汁紅豆冰



其實張枱好細   好在都擺得哂咋    



( 19-JAN-2018  FRI )

今朝無咁凍   但落毛毛雨   個天又暗喎   即係又到回南天啦   最鬼煩   哈哈 ~

早餐食芝蛋治   我食完半件   8 卦已經食完佢個通粉餐   我飲咗幾啖咖啡   因為都好熱下嘛   但佢已經飲哂佢杯熱飲   我食早餐真係要慢慢食   始終唔係話太餓   同埋都未瞓醒咁   唔可以一來到就係咁食咁囉   所以我成日話 8 卦係唔咬嘢囉   因為無可能會食得咁快 ~



菇場忙呀   夠哂充實嘅半日 ~

Lunch 食健康餐   我發覺天氣凍真係唔可以食健康餐   一到 4 點就會餓   但夏天又唔會覺得餓㗎喎 ~

仍然忙啦   對數字對到眼瞓   哈哈  ~

放工即走   番到屋企就抖下   等埋里奧大人放工就出去食嘢 ~

依家多數睇 Youtube   睇人教煮嘢食   但就要寫低囉   齋睇真係唔記得㗎   最羨慕啲人成日話去到街市見到咩新鮮就煮咩   我覺得佢哋好勁   同埋好有口福   哈哈哈哈 ~

里奧大人 7 點半放工   我都出門口喇   今晚又好想食米線   所以又去米線陣喇 ~

坐隔離嘅女人講嘢好大聲   直頭係好似講埋比我聽咁   唉   搞到我有啲頭痛   依家年紀大   如果太嘈嘅話   我就會頭痛 ~

頭先睇人煮嘢食睇到好餓   所以今晚要食個 2 人餐   但食完之後   我同里奧大人講話要隔一排先好去米線陣 ~

一望手機原來已經 8 點 40 分   要即飛去淘寶拎嘢喇   佢哋收 9 點呀   好在食飽嘢   有氣有力可以行得好快   哈哈 ~

又要拎 2 大袋   不過好在都唔重   但就大件囉   所以拎起來好唔方便 ~

番到屋企就開機洗衫   之後即沖涼 ~

里奧大人就睇 Youtube   我 11 點 40 分都自己瞓先喇   今晚好攰咁   係咪天氣影響呢 ?!

黑椒洋蔥炒豚肉 ( 18-JAN-2018 )

( 18-JAN-2018  THU )

感恩一覺瞓天光   我發覺 12 點幾瞓   就會一覺瞓到 7 點半   但 11 點幾瞓   多數半夜會去一次廁所咁   不過 12 點幾瞓又真係好唔健康喎    但我又想一覺瞓天光   哈哈 ~

早餐食米粉餐   今日好想食濕嘢 ~



菇場勁忙啦   諗住 Hea   點知忙到乜咁 ~

Lunch Time 出去行陣   再買嘢食番菇場 ~

仍然忙   做完自己嘢又要做新嘢   勁充實 ~

放工去買綠豆沙   番到屋企就抖陣   7 點去徑步 ~

徑半個鐘就番屋企預備晚餐   諗住煮咖哩白蘿蔔   點知個蘿蔔爛咗了   激鬼氣   好在冰格長期有雜豆咋   我覺得每餐有蔬菜好啲 ~

咁又諗住煎米餅啦   點知啲冷飯仲係太硬   點扑都扑唔爛   完全無黏性   仍然係一粒粒   咁唔整喇   就咁炒飯算喇   呵呵 ~

里奧大人 8 點半番到屋企   我先啱啱搞掂 ~

是日懶餐 - 黑椒洋蔥炒豚肉 

黑椒洋蔥炒豚肉 - 初初想煮焦糖洋蔥豚肉   但見攰攰哋   都係唔煮新嘢   想快啲手搞掂   哈哈 ~

洗埋碗就叫里奧大人食綠豆沙   原來已經 9 點半 ~

我遲啲都會試煲綠豆沙   不成功就頭痕   哈哈

糖村嘅太子妃糖真係超級好味   味道同口感係樂家杏仁糖   但樂家係死甜   糖村係香甜呢

沖埋涼就休息   里奧大人 11 點都瞓   我就 11 點幾瞓 ~

齋素鮮菇水餃 ( 17-JAN-2018 )

( 17-JAN-2018  WED )

尋晚一覺瞓天光   今朝鬧鐘都未響都起身喇   收完衫先刷牙沖涼 ~

早餐食奶油多   以前食奶油多係好好味架   麵包烘到脆脆哋   又多牛油同煉油   依家只係搽得大半塊   所以食多士其實真係好鬼乾   哈哈 ~

菇場忙呀   話咁快又 12 點半 ~

做到個人有啲顛   所以要食刺激嘢醒醒神 ~



仍然忙   好在 4 點幾搞掂   次次諗定想清自己嘢嘅時候   硬係有嘢做   真係邪 ~

放工即走   里奧大人今晚無得番香港呀   話工廠爆大鑊   要佢留低解決問題   希望佢搞得掂啦 ~

初初以為佢整鬼我   但原來係真係無得番香港   嗚嗚 ~

又唔駛煮飯   咁去超市再去 759 買下嘢啦   番到屋企都已經 6 點 45 分   咁抖陣就煮嘢喇 ~

呢度全部都有 66 折   所以好抵   呢包濃湯粟米零食   初初出嘅時候就成日買來食   之後食到有啲驚   咁前晚家姐無啦啦話見平就話佢知   咁即係想食啦   我就買 4 包比佢囉   佢話前晚食覺得好好味喎   



7 點幾食嘢   洗埋碗就去徑步   又徑半個鐘 ~

洗埋衫就沖涼   之後熨衫   搞掂哂就食齋燒鵝   2 月到期㗎喇   記得食好食 lu   呵呵 ~

里奧大人食完飯仲要開工   好在 9 點幾都可以沖涼休息 ~ 

家姐之前喺陳意齋買比我食㗎   不過我覺得好乾   同埋無咩味咁 

After Eight 朱古力又係家姐買比我㗎   薄薄一片最正   同埋最緊要係薄荷味   哈哈 



睇 Youtube 睇到完全唔知時間   一望個鐘已經 12 點半   要即刻瞓喇 ~