魚片炒油麵 + 菜心苗 ( 23-MAY-2018 )

( 23-MAY-2018  WED )

我蓋冷氣被   所以基本上唔會話熱   但里奧大人就蓋張比較厚嘅唔知乜被   同埋床尾又有另一張冷氣被   成日半夜唔係話凍就話熱   起身幾次換被   又大動作喎   今朝都忍唔住話佢   你咁搞法我真係好似無瞓過咁囉 ~

早餐食雪菜肉絲粉   比哂啲肉絲比 8 卦食   因為我唔鍾意食肉絲   但又唔想食三文治 ~

菇場忙   但無咩 Mood 做嘢咁   可能唔係咁精神啦 ~

Lunch Time 出去買麵包比里奧大人   咁順便買埋吞拿魚包比自己做 Lunch   但其實唔餓   所以 1 點半先食   一路開工一路慢慢咬   呵呵 ~

差唔多 4 點   無啦啦勁眼瞓   托住個頭瞓   之後隻手灘咗落枱度呀   當堂醒咗   咁即係頭先瞓着咗啦 ~

咁過多陣   我又中眼瞓   又瞓着咗呀   勁驚呀真係   8 卦仲打我手機   話叫醒我喎   我即問佢係咪望到我瞓覺 ?!   佢話望到我頭 "dup dup" 呀 ~

放工去街市買銀針粉   居然無哂   咁買油麵啦   又買咗 1/4 個西瓜   今次到我想食呀   哈哈 ~

番到屋企都 6 點半   即預備晚餐喇 ~

我自己食先喇   抖陣就去徑步   徑半個鐘已經 8 點半   啱啱里奧大人放工   咁我番到屋企沖埋涼    再開機洗衫就休息喇 ~

是日懶餐 - 魚片炒油麵 + 菜心苗

魚片炒油麵 - 諗唔到煮咩就炒油麵啦   如果有銀針粉就好囉   唔駛出水咁煩   今晚炒完又洗一大輪   係時候要煮飯喇   蒸個餸就方便呢   唔駛洗爐頭同抹地嘛   哈哈 ~       

菜心苗 - 好耐無食菜   點都要買來食   同埋天氣咁鬼熱   都係鍾意食啲瓜瓜菜菜囉 ~

洗埋碗就食西瓜   今日覺得成個身都好熱咁呀   食完西瓜再食雪條   個身又好似無咁熱咁 ~

里奧大人 10 點半就瞓   我話我都瞓呀   唔知點解好攰咁囉   可能個人好熱氣呀 ~

芥末蜜糖焗雞全翼 + 芒果小丸子 ( 22-MAY-2018 )

呢啲細粒啲

呢啲就大粒啲   因為家姐話想食大粒啲   但食食下又話都係細粒好喎   無咁飽肚   哈哈



( 22-MAY-2018  TUE )

今朝瞓到 9 點要起身喇   起身頭重重   但唔係攰喎   好在沖涼之後又好啲咋 ~   

出去食早餐   番到屋企抖陣就去德福行陣   之後去睇戲 ~





睇 11 點 25 分 "復仇者聯盟 3"   $75一張戲飛咋   遲一場睇要 $120   一個 Double 咁滯   今次又有細爆谷 Coupon 送呢   真係食極唔完   依家仲有 2 張   要 6 月前食埋去呢 ~



我尋日已經同里奧大人講話唔食爆谷㗎   11 點咁早點食呀 ?!   之後佢話佢一定食   咁今日買嘅時候   我話我又食啦   唔係下次連食 3 盒仲慘   咁我話食半盒㗎咋   佢話佢食埋囉 ~

睇到一半   里奧大人問我食哂啲爆谷喇 ?!   我依起鵬牙笑住話係呀   佢又依起鵬牙喺度笑   哈哈 ~

講開笑得衰   咁依家我瞓醒就會將耳塞放入枕頭袋   咁瞓覺唔記得拎都唔駛起身去拎嘛   咁有晚我拎住耳塞瞓喺床度   望住里奧大人笑   佢好大反應話: 黐線   笑乜鬼呀 ?!   妳笑到個樣好恐怖呀 ?!   車   我笑係因為我一瞓喺度就有耳塞   覺得好方便嘛   估唔到佢咁大反應   我估我又加埋啲勝利嘅眼神 (對眼向上望)   佢覺得恐怖囉   哈哈哈哈 ~      

話咁快就 2 個半鐘   估唔到今次好睇喎   又笑又緊張又有啲感人 ~

睇完就行去 mega BOX 大眾睇旅遊書   3 點幾先去 Ikea 食嘢 ~

里奧大人話無薯格   所以買個包   我話你驚唔夠飽呀 ?!   佢話唔係呀   呢餐太多肉無菜   我話粟米薯蓉薯角咪蔬菜囉   佢真係奇奇怪怪   我煮菜就話好飽食唔落   出街食嘢就會話無菜食   救命

同里奧大人搭電梯   咁我知後面有個小朋友   2-3歲左右嘅   咁無啦啦有隻手掃我後腿   我着裙嘛   勁驚比佢拉起條裙   所以我好大反應望後面囉   嚇到佢哋父母同工人即講 Sorry Sorry   咁係嘛   摸人大脾喎   呢家嘢真係要戒啦 ~

咁我同里奧大人坐喺度睇旅遊書   咁我起身走啦   里奧大人隔離個小朋友啤住我呀   我正想啤番住佢   不過佢爸爸行緊過來叫佢   我先費事啤佢咋   黐鬼線 ~

食完就去買旅遊書   買完即番屋企   因為家姐要嚟我屋企整手機呀 ~

咁我一路行   有人踢我鞋爭 3 次   我頂唔順擰轉頭望   係一個細路女   7-8 歲左右   今日咩事呀 ?!   見親啲細路都係咁怪嘅 ~

大家差唔多時間到屋企   咁家姐等埋我哋一齊番去   佢哋整機   又要做原廠設定   我就整芒果小丸子比家姐食   我本身都諗住今晚整㗎   家姐嚟就一定整比佢食啦   勁簡單 ~

家姐話今日勁似星期日   佢頭先同大食同婆婆食泰菜   咁佢睇緊星期日嘅午餐價錢   所以大食同佢講   今日係星期二   哈哈 ~

等如我頭先都諗緊聽朝又要做 Report 就煩   但聽日星期三嘛   個 Report 只係星期一做㗎咋 ~

整到 6 點幾就搞掂   我送家姐搭車   番到屋企又抖陣先 ~

8 點開餐   唔係出前一丁過期 10 日   我唔會食麵囉   嗚嗚 ~

是日懶餐 - 芥末蜜糖焗雞全翼 + 芒果小丸子

芥末蜜糖焗雞全翼 - 成日唔記得搽油就焗雞翼   所以雞皮又黐住咗 ~

芒果小丸子 - 里奧大人話苦嘅 ?!   我話咩苦呀 ?!   唔好嚇我喎   家姐食又無話苦   我驚係啲芒果壞呀   之後我覺得佢應該係話啲小丸子苦   其實係糯米粉味呀   唔係苦   上次糯米糍嘅皮無苦味係因為我加咗椰漿咋   但椰漿咁嘛   唔係大製作都唔會加囉   哈哈 ~

沖埋涼都 9 點   即刻拎碗甜品比里奧大人食   我就唔食 lu ~

之後熨 2 機衫當做運動啦   其實好攰   不過唔想拖 ~

嘩   唔知做乜鬼   11 點對眼皮開始塌落嚟喇   所以我都自己瞓先喇   叫里奧大人幫我熄手機呢 ~

粟米粒炒豬柳 ( 21-MAY-2018 )

( 21-MAY-2018  MON )

今日星期一   但番工都開心喎   因為聽日佛誕假期   呵呵 ~

早餐食米粉餐   今日唔想食三文治呀 ~



咁我同 8 卦見到渠入 Lift   但我哋唔想同佢同 Lift   所以無入到   個職員都奇怪   有咁多位都唔入去   哈哈   之後我同 8 卦講   我哋就係想遲到嘛   哈哈   但其實都只係 8 點 57 分   一定唔會遲到呢 ~

菇場忙下停下   好快又到 Lunch Time 了 ~

又未餓   所以周圍行下   又買下生果   行到 1 點先買嘢食番菇場   終於覺得熱喇   哈哈 ~



話咁快又放工   番到屋企都即拖地   之後抖下 lu ~

咁我 8 點食嘢先喇   里奧大人差唔多 8 點半放工   咁我又預備煮上海麵佢食啦 ~

是日懶餐 - 粟米粒炒豬柳

粟米粒炒豬柳 - 兩樣都無味   無諗過係咁囉   我上次買咗 2 包 Select 牌字嘅粟米   因為 2 包平啲   但係勁難食囉   又韌又黐牙又無味   豬柳喺 Piago 買   同樣又係 2 包平啲   所以又要快啲清哂佢哋   唔想再見到佢哋呀 ~

我洗完碗就自己去徑步   徑咗半個鐘   番到屋企都 9 點半   即沖涼再開機洗衫 ~

家姐無啦啦 Send 呢張相來   佢鍾意食嘅嘢就會咁做呢   雖然焦糖爆谷好甜   但唔係成日食嘛   所以買嚟比佢開心下

依家咁熱   鍾意食多汁嘅生果   咁我食咗 1 件西瓜 + 2 個豬腰芒 + 10 粒荔枝   食完半個鐘左右有啲暈呀   最邪係頭先阿 mi 先話我食涼粉唔暈   應該無問題啦 ~

里奧大人話好攰呀   10 點就瞓   我就 11 點幾先瞓呢 ~

脆味批 @ 屋企 ( 20-MAY-2018 )

海鮮闊條麵 - 食唔落呀   留番聽晚食



炸雞又食剩 1 件   又留番聽晚食



( 20-MAY-2018  SUN )

今朝 9 點半起身   沖埋涼就去食早餐   之後番教會喇 ~



崇拜完畢就去德福行下   里奧大人買咗對 keen 涼鞋   之前又話唔買   但着上去話覺得好舒服   咁就買喇   同埋依家 Crocs 唔平囉   4 百幾一對膠鞋真係唔值 ~

買完就去 MCL 買戲飛   之後到我去馬莎買 Corn Flakes   依家咁熱   唔係咁想成日出街買嘢食 ~

家姐手機電用唔到   所以里奧大人去官塘廣場幫佢買   我就喺 APM 行陣   諗住去 MUJI 買防曬   但未翻貨   唉   咁轉場去買罐爆谷比家姐啦   一陣可以比埋佢 ~

焦糖杏仁爆谷 ($139/罐)   想買比家姐好耐   但次次都唔係即時見   因為 10 日內要食哂嘛   我無可能買完擺幾日   咁佢咪要幾日內清哂 ?!   好辛苦啦   哈哈

差唔多 2 點半就去米線陣食下午茶   估唔到里奧大人話要停   話一個月食咗 5-6 次有啲驚   呵呵 ~





食完去一田買壽司   不過好多都係生嘅   里奧大人話唔食喎   咁一場嚟到   我買咗包日本蔥   同埋一盒 Pizza 做儲備啦 ~

今日熱到爆炸   開水喉係出熱水咁   真係洗雞翼都驚洗到熟埋呀   哈哈哈哈哈哈 ~

咁里奧大人沖埋涼就瞓覺   佢話 Highly Recommend 我都沖涼喎   比佢咁講   我都沖啦 ~

尋日喺荃灣買嘅胎菊 ($20) / 柑茶 ($60) / 黑糖陳皮 ($50/2盒) 同 mi Share 每人一盒



阿喂比我食㗎   呵呵

佢就瞓咗半個鐘   我就開機洗衫同熨 2 機衫啦   開咗冷氣做家務就舒服好多 ~

咁我順便抹埋柜同執鞋櫃   里奧大人無啦啦叫我快啲停   以為咩事   原來佢想我休息   不過我話開冷氣做家務無問題喎   同埋今晚唔煮飯   所以都想郁下 ~

又睇下 Youtube 有咩新景點   不過其實來來去去都係嗰啲囉 ~

6 點 Order   等呀等   等到 8 點 15 分先到呀   我唔餓都變咗好餓喇   催咗幾次   次次都話司機喺附近   後尾到里奧大人打番比食店   講咗一陣   咁啱司機就打來話喺門口 ~

食完抖陣都 9 點   即沖涼喇 ~

睇多陣電視   11 點幾都瞓 ~

辣雞煲 @ 阿 Mi 屋企 ( 19-MAY-2018 )

今次唔落辣椒   但炒起上嚟都好辣

豆卜 / 水餃 / 鮮冬菇 - 啲鮮冬菇好大隻呀   我第一次見咁大隻   之後阿 Mi 話啲鮮冬菇係阿喂揀㗎   幾有我心   哈哈



蝦滑 - 阿 mi 話另一間買   都 OK 喎

水魷 - 今次好大隻呀   呢餐樣樣食物都係我叫買㗎   次次去阿 Mi 屋企就最舒服   唔駛買又有得食   感恩呢



白蘿蔔 - 我話因為今日無飲中藥   所以勁想食白蘿蔔呀



( 19-MAY-2018  SAT )

今朝同家姐食早餐   本來佢唔駛番工㗎   但後尾佢同事想佢一齊番   咁就番啦 ~

家姐係咁話好熱   但我話唔熱喎   可能我沖完個涼啦   之後佢覺得好奇怪   正路只有我嗌熱嘛 ~







食下傾下   家姐又話佢間公司好猛鬼   有次佢同男同事肥仔企喺家姐個位度一齊傾偈   點知枱面包零食飛咗落地   佢兩個呆咗   之後肥仔就話等我幫妳執番   咁其實大家知咩事   同埋肥仔係見到鬼㗎   家姐講完呢句   我即刻起雞皮 ~

佢另一個男同事仲勁   係直頭嚇到面青青走出來   事緣有晚佢 9 點幾放工   咁諗住去廁所走人啦   一入去見到水龍頭長開住水   諗住整停去   但因為係免觸式嘅水龍頭   搞咗好耐都唔得   突然間支光管跌咗落嚟   差少少就跌正佢頭頂   佢勁驚啦   當時得一個人咋   要是有咩事都無人知囉   咁最後佢都知咩事㗎喇   警告佢唔好再搞囉   所以佢即走喇 ~

家姐話公司嘅舊寫字樓仲恐怖   同事見住筆筒啲筆升起   再跌番入筆筒   有個同事就夜晚 OT   見到張櫈喺度係咁轉   我覺得呢下堅恐怖囉 ~

朝早聽都 OK   但夜晚一定唔聽㗎   哈哈 ~

食到 8 點 45 分   之後一齊行去搭車   家姐呢次醒喇   唔再企喺司機位隔離同我拜拜   哈哈哈哈 ~

菇場唔忙   但其實係我無 Mood 做   呵呵 ~

放工即坐小巴去荃灣   去到差唔多 1 點 50 分   等埋里奧大人就一齊行去上海姥姥喇 ~

好在阿 Mi 喂攞咗位   我咃 2 點鐘都到了 ~

勁餓呀   唔知係咪開心得滯   我真係次次去阿 Mi 或者去家姐屋企   就一定好餓㗎 ~

招牌小籠包 ($38) - 好味呀   皮薄有肉汁   呢個有驚喜   



醋拌香辣海蜇 ($66) - 我超勁鍾意食海蜇㗎   估唔到阿喂話叫大份   咁就正喇   哈哈



三鮮鍋貼 ($42) - 阿 Mi 點㗎   難得佢點菜   因為好多時佢都比哂我哋揀呢

脹卜卜   勁想一嘢 "鍊" 爆佢   哈哈



上海炒年糕 ($65) - 果然同阿喂係同類人   我成日想食炒年糕   但里奧大人食炒粗   我無可能食得哂成碟年糕囉   同埋佢又唔鍾意食   所以今餐食得好開心



排骨炒粗麵 ($68) - 里奧大人點㗎   次次食上海嘢都指定排骨炒粗麵



蔥油餅 ($32) - 我無啦啦想食咋   但里奧大人唔食   唔緊要   我食埋



豆沙鍋餅 ($40) - 阿 Mi 居然記得里奧大人之前想食豆沙鍋餅   所以話一齊食   因為份量都多呀



一路食一路傾   多嘢講到好似十年無見過咁   好在我哋講嘢頻率快   唔係就真係天黑都未講完   哈哈 ~

因為我哋係邊個叫邊個清   咁阿 Mi 又問我幾級肚餓 ?!   我話十級   佢個樣呆咗咁   好搞笑   我十級唔餓妳就話驚啫   呵呵 ~

今餐 Lunch 我一定要請   因為阿喂之前送咗個袋比我嘛   請佢哋食飯真係差啲反枱咁滯   係都唔比我請   呢個時候   里奧大人就最心   因為用到我啲錢   哈哈 ~

今日我哋 3 個主要係陪里奧大人買 4 個骨嘅褲   阿喂之前都買咗啲褲   咁介紹比我哋去睇下   所以阿 Mi 一早講定話帶我哋荃灣一日遊   佢哋就朝早送完機就即去買定餸   咁就多啲時間睇衫呢   感激感激 ~

里奧大人喺男人店買咗 2 條短褲 + 1 條 4 個骨褲   好似買咗 $650   最搞笑佢一試穿出來   阿 Mi 同我就話 OK 呀   衰奧以為我哋玩嘢咁   但我哋梗唔會啦   唔好睇一定講囉   唔想行出來影衰我哋   哈哈 ~

之後再去買柑茶同胎菊   一齊買嘢勁開心   因為可以知道大家嘅口味   同埋可以 Share   始終有啲份量太多   但有啲又買 2 罐就平啲咁嘛 ~ 

行呀行   阿 Mi 又話好熱   佢話熱就真係好熱㗎喇   最離奇我又唔覺好熱   我仲着中袖外套   不過之後行行下都熱喇   成臉都係汗   但我唔敢抹㗎   因為我搽咗防曬   下次都係唔理喇   佢次次見我成臉汗   個樣好似好驚咁   哈哈哈哈 ~

行到唔知咩商場   個冷氣超勁凍   正呀 ~

去 OCC 買咗 2 條褲 + 1 對太陽眼鏡 (貨品買 2 送 1   送嘅價錢係以最低嘅計算)   好似買咗一千定咩   唔記得添   男人們就開心啦   輪住試褲   之後阿喂都買咗副太陽眼鏡 ~

我無啦啦個胃有啲痛   咁啲腸直頭好似扯住咁痛添呀   之後阿 Mi 話我無飲水   咁又係喎   多嘢講又出汗   加上又唔飲水添   咁最搞嘢係我頭先一落小巴就想去廁所   但要排隊就唔去啦   再之後都完全唔記得去廁所呢回事呀 ~

本來想買嘢飲   不過阿喂話番屋企飲啦   所以即打的番屋企 lu   原來已經 5 點幾喇 ~

一入屋換私家拖   咁我都唔記得自己腳爭貼咗膠布   阿 Mi 見到話啲膠布做咩甩甩下咁   之後就即比個防刮腳貼比我   仲幫我貼埋   哈哈   堅懶到出汁 ~
  
今次要做番上次未做嘅嘢   就係要阿 Mi 幫我整 FB 嘅嘢   好感動佢記得   因為上次實在太多嘢傾   我講完之後   完全唔記得咗呢回事添 ~

搞掂哂就到兩個男人上網睇嘢   咁我哋就去廚房整嘢   其實我只係企喺度嘅啫   但我都要比人炒 ~

最搞笑我同 Mi 話要煲定白蘿蔔水   以為佢唔記得   點知原來一早煲好咗   哈哈 ~

好好笑   依家我同阿 Mi 一入廚房   佢就好自然叫我食條朱古力   因為我次次都會睇佢個玻璃兜裝住啲咩嘢零食 ~

7 點 15 分左右開餐   今晚唔買咁多嘢   但我食嘅就樣樣都有   堅感動   自己都會買餸   所以覺得有人買埋比妳食   真係好幸福㗎   瓜菜水果又重   仲要唔係話要一個地方可以買哂喎 ~

食呀食傾呀傾   勁開心呀   今日超勁開心   因為早午晚都見到我最愛嘅人   呵呵 ~ 

9 點 45 分就食涼粉   阿 Mi 話食完辣雞煲要清清熱   隔半個鐘又食紅火龍果 ~

阿 Mi 調咗片糖汁   里奧大人又話驚甜唔要   我話片糖都有益㗎   唔好成日話甜   又唔係日日食   之後佢食咗啖涼粉   又話要啲片糖水   係咪煩呀   哈哈

紅火龍果   我聽到阿 Mi 講話食剩一粒   之後佢食埋佢   可能佢聽得我講多   成日話里奧大人成日食嘢食剩一粒   飲剩一啖

又食又拎   阿 Mi 上次話唔記得比包豬肉鬆比我試   所以今日一嚟到就拎比我   我好感動呀   因為佢仲擺喺心度   我覺得佢勁似我家姐咁   漏咗比嘢我呢   就好似欠我咁   但其實佢哋自己食就可以啦   係都要留比我㗎   勁感動

10 點幾 Call 車   話咁快 11 點 15 分就番到屋企 ~

沖埋涼抖陣   都 12 點先瞓 ~

黑椒牛仔骨 + 鹹蛋瑤柱角瓜湯 ( 18-MAY-2018 )

( 18-MAY-2018  FRI )

尋晚瞓得唔錯喎   唔通飲咗中藥真係好瞓 ?!   但又覺得咁又唔係咁好喎   始終無可能靠藥瞓得好家嘛   等我再試多幾晚先 ~

早餐食腿蛋治   其實好想食米粉餐   不過今日遲咗   同埋咁趕咁食   食完成身汗都似   都係咪搞 ~



仍然做埋個長命 Report   聽 8 卦講呢個 Report 原來又係廢嘅   佢哋最後都係做個假數   咁老闆睇咗就唔會問 3 問 4   我頂   都唔知做來做乜   浪費我時間 ~

Lunch Time 出去食   第一次一個人食 Lunch Set 呀   好似好大食咁   哈哈 ~

食完去銀行   再行幾個大運先番菇場   大佬   頭先食咁多嘢 ~

番到菇場仍然做 Report   差唔多放工前搞掂哂 lu ~

放工去買餸   買咗 2 條角瓜   再買 1 磅妃子笑 + 1/4 個西瓜 + 1 梳皇帝蕉   估唔到都幾重 ~

之後我去買包茶瓜   順便買 4 隻鹹蛋   檔主拎住包茶瓜   好緊張同我講話茶瓜係用嚟煲皮蛋㗎    我話我知呀   哈哈 ~

番到屋企就即醃牛仔骨   之後切好西瓜就抖抖喇 ~

7 點幾滾湯   我自己飲先   飲完都 8 點   諗住徑步   但里奧大人放工放工   咁唔徑啦   不過依家啲天氣好焗熱   唔徑都好   藉口多多添   哈哈 ~

里奧大人拎埋淘寶嘢就番屋企   都差唔多 9 點了 ~

是日晚餐 - 黑椒牛仔骨 + 鹹蛋瑤柱角瓜湯 

黑椒牛仔骨 - 第 1 次唔用黑椒醬汁   其實依家都盡量唔買咁多醬汁㗎喇   咁屋企一定有黑椒粒   所以上網睇黑椒汁食譜   原來好簡單㗎咋   里奧大人又話好味道   之後我問佢 100 分比幾多分 ?!   佢比 90 分   我話下次最少要 95 分   哈哈哈哈 ~

鹹蛋瑤柱角瓜湯 - 我想買絲瓜   但見好多人買角瓜   咁我問個師奶呢隻角瓜點食 ?!   佢話炒好好食㗎   我話煲湯呢 ?!   佢話滾湯就有   無人煲湯㗎   哈哈   其實我係想講滾湯   咁所以我又買 2 條啦 ~

洗埋碗都差唔多 10 點   沖埋涼就開機洗衫 ~

同里奧大人一齊睇 Youtube   睇定多啲資訊   希望到時可以用到啦  ~

睇到成 12 點幾先瞓呀   好在有睡意   唔係越睇越興奮就慘喇   哈哈 ~ 

牛下新城 @ 九龍灣 ( 17-MAY-2018 )

我首先食咗 2 嚿紅蘿蔔   之後就慘喇   個胃即刻頂住   已經夠慘啦   點知食個肉餅仲慘   係難食到一個點呀   腍劈劈嘅   無牙都食到喎   係咪開得太多水呀 ?!   總括 $37 (3 餸 + 1 飲品) 係抵   但應該唔會有下次了



煎釀三寶 (9 件)   最衰食完蘿蔔頂住個胃   唔係可以好好享受呢個 3 寶



里奧大人食腸粉   因為我話要食哂啲飯 



( 17-MAY-2018  THU )

早餐食豬扒包餐   次次食呢個包就覺得自己好麻甩咁   哈哈 ~



菇場忙呀   諗起初初番菇場就悶到震   同依家簡直係天淵之別呀   不過忙其實仲好   個腦會郁嘛   同埋反而會有動力夜晚去煮飯同做運動   如果太 Hea   反而悶到咩嘢都唔願做咁㗎   唔通真係辛苦命 ?!

今朝又開始飲中藥   最緊要有覺好瞓   哈哈 ~   

Lunch Time 出去買車仔麵   反正唔太餓   所以排隊都無所謂   番到菇場都 1 點   可以慢慢食半個鐘   食完又開工 lu ~

好在要少銀針粉   咁先食得哂   



雖然忙到黐咗線   但有啲眼瞓呀   可能頭先排隊嘅時候太曬 ~

放工去德福睇冷氣機   之後又去馬莎行下   里奧大人 7 點放工   咁等埋佢一齊去食飯 ~

食完就番教會聽嘢   9 點半左右完畢   即番屋企喇 ~

沖埋涼就休息   之後又睇下 Youtube   11 點幾都瞓 lu ~