2018年5月22日星期二

芥末蜜糖焗雞全翼 + 芒果小丸子 ( 22-MAY-2018 )




~ 呢 d 細粒 d



~ 呢 d 大粒 d   因為家姐話想食大粒 d   但食食下又話都係細粒好喎   無咁飽肚   哈哈



( 22-MAY-2018  TUE )

今朝瞓到 9 點要起身喇   起身頭重重   但唔係攰喎   好在沖涼之後又好 d 咋 ~   

出去食早餐   番到屋企抖陣就去德福行陣   之後去睇戲 ~





睇 11 點 25 分 "復仇者聯盟 3"   $75一張戲飛咋   遲一場睇要 $120   一倨 double 咁滯   今次又有細爆谷 coupon 送呢   真係食極唔完   依家仲有 2 張   6月前要食埋去喇 ~



我尋日已經同里奧大人講話唔食爆谷架   11 點咁早點食呀 ?!?!   之後佢話佢一定食   咁今日買嘅時候   我話我又食啦   唔係下次連食 3 盒仲慘   咁我話食半盒架咋   佢話佢食埋囉 ~

睇到一半   里奧大人問我食哂 d 爆谷喇 ?!   我依起鵬牙笑住話係呀   佢又依起鵬牙喺度笑   哈哈 ~

講開笑得衰   咁依家我瞓醒就會將耳塞放入枕頭袋   咁瞓覺唔記得拎都唔駛起身去拎嘛   咁有晚我拎住耳塞瞓喺床度   望住里奧大人笑   佢好大反應話: 痴線   笑乜鬼呀 ?!?!   妳笑到個樣好恐怖呀 ?!?!?!   車   我笑係因為我一瞓喺度就有耳塞   覺得好方便嘛   估唔到佢咁大反應   我估我又加埋 d 勝利嘅眼神 (對眼向上望)   佢覺得恐怖囉   哈哈哈哈 ~      

話咁快就 2 個半鐘   估唔到今次好睇喎   又笑又緊張又有 d 感人 ~~~~

睇完就行去 Megabox 大眾睇旅遊書   3 點幾先去 Ikea 食嘢 ~

里奧大人話無薯格   所以買個包   我話你驚唔夠飽呀 ?!?!   佢話唔係呀   呢餐太多肉無菜   我話粟米薯蓉薯角咪蔬菜囉 @@   佢真係奇奇怪怪   我煮菜就話好飽食唔落   出街食嘢就會話無菜食   救命 @@



同里奧大人搭電梯   咁我知後面有個小朋友   2-3歲左右嘅   咁無啦啦有隻手掃我後腿   我着裙嘛   勁驚比佢拉起條裙   所以我好大反應望後面囉   嚇到佢地父母同工人姐姐即講 sorry sorry   咁係嘛   摸人大脾喎   呢家嘢真係要戎咯 ~

咁我同里奧大人坐喺度睇旅遊書   咁我起身走啦   里奧大人隔離個o靚仔啤住我呀   我正想啤番住佢   不過佢爸爸行緊過來叫佢   我先費事啤佢咋   痴鬼線 ~~~~       

食完就去買旅遊書   買完即番屋企   因為家姐要黎我屋企整手機呀 ~

咁我一路行   有人踢我鞋爭 3 次   我頂唔順擰轉頭望   係一個細路女   7-8歲左右   今日咩事呀 ?!?!?!   見親 d 細路都係咁怪嘅 @@

大家差唔多時間到屋企   咁家姐等埋我地一齊番去   佢地整機   又要做原廠設定   我就整芒果小丸子比家姐食   我本身都諗住今晚整架   家姐黎就一定整比佢食啦   勁簡單 ~



家姐話今日勁似星期日   佢頭先同大食同婆婆食泰菜   咁佢睇緊星期日嘅午餐價錢   所以大食同佢講   今日係星期日   哈哈 ~~~~

等如我頭先都諗緊聽朝又要做 report 就煩   但聽日星期三嘛   個 report 只係星期一做架咋 ~~

整到 6 點幾就搞掂   我送家姐搭車   番到屋企又抖陣先 ~

8 點開餐   唔係出前一丁過期 10 日   我唔會食麵囉   嗚嗚 ~

是日懶餐 - 芥末蜜糖焗雞全翼 + 芒果小丸子

芥末蜜糖焗雞全翼 - 成日唔記得搽油就焗雞翼   所以雞皮又痴住咗   唉 ~

芒果小丸子 - 里奧大人話苦嘅 ?!   我話咩苦呀 ?!?!   唔好嚇我喎   家姐食又無話苦   我驚係 d 芒果壞呀   之後我覺得佢應該係話 d 丸子苦   其實係糯米粉味呀   唔係苦   上次糯米糍嘅皮無苦味係因為我加咗椰漿咋   但椰漿咁嘛   唔係大製作都唔會加囉   哈哈 ~   

沖埋涼都 9 點   即刻拎碗甜品比里奧大人食   我就唔食 lu ~

之後熨 2 機衫當做運動啦   其實好攰   不過唔想拖 ~

嘩   唔知做乜鬼   11 點對眼皮開始 dup 落黎喇   所以我都自己瞓先喇   叫里奧大人幫我熄手機呢 ~~~~

沒有留言:

發佈留言