蜜糖焗雞翼 + 焗獅子狗卷 ( 25-APR-2019 )

( 25-APR-2019  THU )

今朝里奧大人出門口   我居然瞓着咗   所以起身濛濛瀧瀧咁呀   因為平時我都已經醒咗   只係懶床唔願起身呢 ~

早餐食腿蛋治   唉   其實食三文治食到好悶   但粉麵又食唔落   加上依家咁熱   唔想行完就即刻食啲熱辣辣嘅嘢   哈哈 ~

菇場忙呀   所以時間非常之快過 ~

Lunch Time 出去行陣   再買酸辣米線番菇場食 ~

咁 8 卦成日去阿爽個位拎香口膠   今日阿爽好大聲同 8 卦話剩番 2 粒   阿爽話自己都無咩食過   之後我咪同 8 卦講好心你自己買包啦   佢話唔想買   因為驚 Non-stop 咁食   所以唔係慳而唔買   我話你唔係慳只係 Cheap   我話見你日日行去食   同自己買包食有咩分別 ?!

好記得嗰時   我買包香口膠同餅乾   佢真係日日行埋嚟食   真係差唔多食哂㗎   我已經覺得條友好 Cheap   咁想食就自己買嘛   食哂人嗰啲都做得出   真心佩服佢   自此之後   我有嘢食都唔會同佢講   但佢仍都會問我有無嘢食   我話好心叫妳老婆買比你啦   佢話佢老婆唔知佢鍾意食咩   我話你同佢講咪得囉   一係你自己買   唔好成日問人拎嘢食啦   男人嚟講真係好 Cheap   之後佢就無再出聲 ~

今日里奧大人喺尖沙咀見客   所以同我差唔多時間番到屋企   咁我放工都即走 lu ~

我一入屋   見佢食包薯圈   個樣仲驚驚哋咁   又話我點解咁早番到嚟   我話唔駛買餸咪早番到囉   諗住偷食唔比我知呀 ?!   呵呵 ~

今晚只係焗嘢   但都要 7 點先有得食 ~

是日懶餐 - 蜜糖焗雞翼 + 焗獅子狗卷

蜜糖焗雞翼 - 呢個焗爐唔多掂喎   焗嘢完全唔似焗嘢咁嘅   搵日焗曲奇餅先   如果焗得 OK 就唔掉   唔係就掉咗去算喇 ~

焗獅子狗卷 - 仲以為有芝士喺入面添   呢 Pack 嘢要 $16   真係唔知點解要咁貴   無味㗎喎 ~

食飯睇番尋晚集 "倚天屠龍記"   睇到小童版張無忌喺度喊   搞到我都喊埋   真係好少一路食飯一路喊   哈哈   佢實在太好戲啦 ~

我應該會睇一次喊一次   里奧大人直頭話我會睇足 100 次   哈哈

洗埋碗就同里奧大人去徑步   徑半個鐘再去超市買嘢   之後就番屋企開機洗衫   沖埋涼就休息了 ~

睇完鐵探又忍唔住睇倚天   睇到張無忌同義父分開   張無忌喺度爆喊   我又喊埋   因為好感動   不過下次都係唔睇喇   唔想瞓覺前喊嘛   哈哈 ~

再上 Youtube 聽陣鋼琴   舒緩下心情先   所以差唔多 12 點先瞓呀 ~   

蠔油節瓜燜雞翼 ( 24-APR-2019 )

( 24-APR-2019  WED )

又瞓得麻麻哋   但感恩嘅係起身都唔係話攰呢 ~

早餐食吞拿魚治烘底   天氣有啲熱呀   要食酸咪咪嘅嘢 ~

菇場忙呀   繼續清埋 2014 年嘅嘢 ~

工人同 Berry 沖涼   我話佢好似好 Enjoy 咁喎   之後家姐話佢又係咁講   但工人話 Berry 頭先係走出去唔肯沖呀   哈哈   不過 Berry 依家連工人都咬呀   好在工人都敢縛住佢   要聽話先得家嘛     

Lunch Time 出去行陣   之後買牛筋丸河番菇場慢慢食 ~

仍然忙   好快放工 ~

今晚去買大樹菠蘿先番屋企   上次買咗番菇場   我個位第日有隻小強呀   勁驚   所以我已經成張枱同櫃桶都徹底消毒   又噴花露水   再喺屋企拎啲藥餌同喺菇場拎盒小強酒店   咁先安心囉 ~

番到屋企都 6 點 15 分   因為尋晚已經燜好雞翼   今晚再加啲節瓜就搞掂   里奧大人 7 點幾番到嚟都可以即刻開餐 lu ~

是日懶餐 - 蠔油節瓜燜雞翼

蠔油節瓜燜雞翼 - 今次味道非常之好呀   送飯一流呢 ~

洗埋碗就食生果   沖埋涼就熨衫   今晚要熨 3 機衫   所以唔徑步喇 ~

我叫里奧大人熨一半   留番一半比我熨   因為我都要郁下 ~

里奧大人今晚 11 點唔夠都瞓   我又未眼瞓   所以靈修半個鐘   差唔多 11 點半先瞓呢 ~

韭菜餃 (外賣) + 炸魚皮 (外賣) + 蠔油菠菜 ( 23-APR-2019 )

( 23-APR-2019  TUE )

喺唔太眼瞓嘅狀態下瞓覺   我都知瞓得唔係咁好㗎喇   成晚發夢   仲好記得喺度大叫 ~

一開手機   加拿大嘅堂妹問我   里奧大人係咪 FB Add 佢   哈哈哈哈   做咩個個都問我㗎   不過又係嘅   FB 已經咁多年   晨早應該 Add 咗㗎啦   好少依家先開 Account 囉 ~

今朝仍然焗熱   但我都着長袖呀   因為菇場實在太凍喇 ~

早餐食奶醬多   無咩胃口咁 ~

菇場唔忙   不過個人有啲攰   無哂 Mood   哈哈 ~

我同家姐講話 Berry 姐又大隻咗   家姐話糟糟又係咁講   話我哋成日講嘅嘢都係一樣呀

Lunch Time 無出去   又食冬蔭功湯河 ~

放工即走   去牛下街市買西瓜   買開果檔無西瓜   就去另一檔買   去買韭菜餃   多人果檔又無開   去另一檔買   諗住買皮蛋又無開   唔係咁邪呀嘛   間間都無開   哈哈 ~

街市超焗熱   我真係買嘅時候係慢慢行   已經有啲暈咁滯   之後一上車都即合埋眼抖下   但一落車仲死   雙腳無力   勁驚暈呀   西瓜又重喎   勁辛苦   我覺得行番屋企   感覺好似行咗半個鐘咁呀   但其實好近 ~

番到屋企抖陣先   咁又好番好多   之後就浸菜   抖陣再拖地 ~

里奧大人 7 點左右番到屋企   等多陣就可以食得喇 ~

是日懶餐 - 韭菜餃 (外賣) + 炸魚皮 (外賣) + 蠔油菠菜  

韭菜餃 (外賣) - $24 有 20 隻  算抵呀   同埋都幾大隻   又多韭菜先好   里奧大人話第時買好過自己包   因為好味過我包果啲囉   勁傷心   但我話唔得喎   咁我買咗個餃子盒咪得物無所用囉   我要包呀 ~

炸魚皮 (外賣) - 呢檔麻麻哋   都係菇場附近果間好味啲 ~

蠔油菠菜 - $7/斤咋   今晚食半斤先   我依家食得太多菜會頂胃   好煩呀 ~

洗埋碗再燜蠔油雞翼   搞掂哂都 8 點幾   即出去徑步喇 ~

其實今晚好攰   但又好想郁下   因為呢排周身骨痛   覺得郁下係好啲囉 ~

今晚徑 25 分鐘   番到屋企即沖涼   抖陣再開機洗衫 ~

睇埋電視再打陣機   11 點半都瞓 lu ~

聚興樓 @ 官塘 ( 22-APR-2019 )

手撕雞飯 ($23) - 今次要小辣   我發覺次次食完麻辣   個肚都搞搞下咁   所以食小辣穩陣啲

  
瑞士汁雞肶飯 ($25) - 無諗過里奧大人叫瑞士汁囉   佢唔係咁鍾意甜嘅汁家嘛   定係佢唔知咩係瑞士汁呢   哈哈

麻辣雞腎 ($22) - 都係小辣

( 22-APR-2019  MON )

今朝瞓到 11 點 10 分   勁精神呀   哈哈 ~

沖埋涼就去食早餐   番屋企抖陣   1 點 20 分就出發同婆婆食下午茶 ~

約埋家姐同大食一齊去金坊   我同里奧大人就攞位先 ~

人齊就叫嘢食喇   食下傾下好快又 3 點幾   咁喺婆婆屋企坐陣先 ~

泰式魚蛋魚片 (遊船湯河)

炸芝士蝦丸 (配小食)

泰式牛肉 (遊船湯河)

黃咖哩汁配蒜蓉包條 (配小食)

冬蔭功湯香茅豬扒金邊粉 - 我哋要加辣   佢唔知係咪寫錯加酸   我同家姐同里奧大人都話個湯底好酸

海南雞飯 - 最正常係呢個飯   我哋每人叫咗 1 杯椰汁沙冰   不過無味嘅

泰式咖哩角 / 青芒果絲沙律 (配小食) - 沙律賣相嚇死人 

家姐上次去旅行   所以同事同佢開咗 FB   大食問我係咪大表開咗 FB ?!   點解唔 Add 佢 ?!   我叫佢自己問大表   點知家姐同大食講   我係特登唔 Add 妳嘅   唔得嘅咩 ?!   哈哈哈哈   大食呆咗呀   我哋無諗過家姐咁講囉 ~

我問家姐   機構有無覺得好奇怪   做 Berry 嘅保姆最後領養埋佢 ?!   家姐話原來好多個人都係咁呀   個個都衰係佢哋手上   哈哈哈哈 ~

家姐話有個直頭明明做 1 隻貓嘅保姆   之後養埋   依家總共養咗 8 隻貓呀 ~

咁事實係喎   相處雖然只係短短 2 個月   但真係有感情家嘛   我都只係探過 Berry 兩次   都成日心掛掛佢   何況同佢相處嘅人呢 ~

領養 Berry 真係一種緣份   真係覺得整定係家姐要養佢咁   有 3 次機會佢係要去機構比人領養   但家姐真係唔得閒去   其實家姐都唔捨得   唔係佢唔會因為真係我話養就養啦   係佢照顧 Berry 家嘛   我講話養就易啫   責任始終都係家姐   不過我話將來 Berry 老咗要睇醫生   要人陪要人帶   我願意去做呢樣嘢囉 ~

食完就一齊陪婆婆出去行啦   但大食要 4 點走人   所以都喺屋企附近兜個圈就算喇   今日非常之焗熱   都無本事行得遠 lu ~

差唔多 4 點左右就走喇   大食自己搭地鐵   我哋就同埋家姐坐巴士   感恩 4 分鐘後有巴士 ~

家姐喺九龍城轉車   我哋就去德福   頭先里奧大人比咗個 Power Bank 比家姐   所以要去小米買番個呢 ~

無啦啦好想食雪糕   所以去麥當勞喇   食完都 5 點幾   但又未餓   所以都係番屋企喇 ~

家姐上次喺 Circle K 換比我㗎   好鍾意佢對眼   哈哈

Folder & 記事簿   實用嘢   但其實我屋企係超級多 Folder 同簿囉

同里奧大人唔知講開啲咩   我話佢係中能   因為佢未去到低能   但又上唔到高能   之後我好認真問佢點解無人話人哋係高能嘅 ?!?!   勁嘢嚟㗎喎   佢即刻話有無人會鬧妳係靚女呀 ?!   哈哈哈哈哈哈   鬧人梗係衰嘢㗎啦 ~

抖到 7 點去食飯   之後再去超市買嘢   番屋企抖陣   8 點半去徑步 ~

今晚的起心肝徑步喇   雖然天氣好焗熱   但唔理喇   反正我都只係急步呢 ~

自己去完旅行   磅數有上無落咁   今年仲諗住減 18 磅家嘛   真係唔肥已經偷笑 ~

徑咗 20 分鐘都走喇   番到屋企都即開機洗衫   之後沖涼休息喇 ~

估唔到 "鐵探" 又好睇喎   好耐無試過坐定定睇劇集呢 ~

聽日要番工   今晚 11 點半都要瞓喇 ~

塘廈曼佧特國際大酒店 ♡ 中山。東莞 (純玩 2 天半團) DAY 3 ( 21-APR-2019 )

( 21-APR-2019  SUN )

今朝 8 點 15 分起身   沖埋涼就去食早餐喇   我同里奧大人講話今朝要食夠 2 個鐘早餐    但最後只係食咗 45 分鐘   因為無咩啱食   哈哈 ~

天色仍然唔係咁好

我叫里奧大人影我跳   但影出嚟嘅效果都好恐怖   哈哈

自助早餐劵

餐廳入口

無咩人咁噃

麵包 & 蛋糕區

有幾款蛋糕

炸饅頭

炸燒賣

蒸包

生果唔吸引

我哋坐呢度

坐近窗邊都幾舒服

呢期去旅行   好鍾意早餐食粥

里奧大人份早餐真係亂七八糟   哈哈

我食㗎   求其擺埋一碟   所以都唔好話里奧大人咁多   哈哈   炸鏝頭好味呀

里奧大人嘅甜品

聞到美極味道好香   所以食隻煎蛋

食完就番上房執嘢   抖陣就喺酒店入面行下   11 點就出發去食飯喇 ~

Auntie 話塘廈都好玩㗎   感恩有酒店呢本小刪子

里奧大人即影相

好大聲話最緊要影美食圖

瞓喺度睇電視   睇睇下係會想瞓   哈哈

健身

花園平台

按摩

熱烈歡迎

好多人 Check-out 喇

我都唔例外   3 日 2 夜都係拖喼好

我同里奧大人講   第一次跟團   領隊係完全唔講嘢   大佬   介紹中山係基本啦   等人哋認識下嘛 ~

12 點 20 分又食中午飯   雖然我大食   但未至於 3 個鐘頭要食一餐囉   哈哈 ~

之後團友無啦啦講話呢個領隊真係唔會講多句嘢   只係講話就到要落車喇 ~

好大張枱   起碼可以坐 14 人 ~

莞邑碌鵝宴 - 團友話好多黑色嘅雞毛   所以我唔敢食   但里奧大人夾咗隻雞肶   佢咬咗啲皮就話比我試啖   我一見到就話未熟咁嘅   好唔明點解佢唔識分啲肉係生定熟囉   佢其實係咪由細食到大㗎

呢個釀豆腐好鹹

湯

菜係好味   但好油啦

酸菜炒臘味

無食呀

估唔到啲蛋都係好鹹   團友話味覺失去甜   呢餐飯簡直係失敗中嘅失敗   哈哈哈哈

無食

我喺大陸好少食魚   因為我好驚多骨   同埋驚好腥

望出去

我哋坐太陽湖呢間房

呢餐飯樣樣都係鹹   連飯都好似煮成生米咁   口感似糯米飯   好在我都唔餓咋   唔係就慘了 ~

1 點集合出發去星河城 Shopping Mall   坐半個鐘頭就到㗎喇 ~

領隊叫我哋 2 點半集合   最遲 2 點 45 分   有團友話 2 點半就 2 點半啦   我都想講囉   話一就一吖嘛   咩叫最遲 2 點 45 分呢 ?!

@ 星河城 Shopping Mall

落車轉左手邊就係星河城   我哋差唔多行最後   見到團友去哂右邊   之後里奧大人即同領隊講啦   個領隊如夢初醒咁話我落去跳團友行番左邊先啱   真係黐黐哋

呢個燈箱好搞笑

商場有啲焗

好想食嘢   所以買個麵包   RM10/個   職員話 RM10/個   RM18 有 2 個   再唔記得幾錢有 3 個   唔怪得頭先有個女人買好多個啦

大地震個名都幾搞笑

里奧大人問職員入面係咩 ?!   佢答: 優格   里奧大人即問我係咩   我話乳酪呀

係環保   但如果夏天就好熱囉

搭扶手電梯   依家好多都係如果無人搭就會郁得好慢   咁我哋一搭就係正常咁郁啦   之後里奧大人話如果行得快   個扶手電梯都會加快㗎 ~

我好好奇囉   咁樣好似好危險咁   咁我行啦   但無快到噃   之後佢喺度大笑呀   話咩無快到呀   妳急步行落去咪快好多囉   頂佢吖   哈哈哈哈 ~

@ SPAR   入面有間超市   但好鬼焗   所以買完幾個杯麵就走人喇

紅色蟹籽 ?!

呢啲魔芋爽係近年好 Hit 嘅零食

買咗 2 個杯麵   好香黑椒味㗎

有個 "打令小寶"

我又想食麵包喇   係咪勁奇怪呢   番工食就覺得悶   但去旅行又好想食包喎

里奧大人話好似魷魚

RMB18 一個真係好貴   我想唔買   但里奧大人話唔係成日食   咩都試下啦   買啦

跳彈床

2 點半到集合地點   去另一個景點 ~

里奧大人無啦啦 Check 下我嘅脈搏   里奧大人成日話我心跳好快   不過中醫都咁講   話同我打脈   心跳得好大力同埋 "B B 卜卜咁 ~

咁我左手按自己脈搏   用右手按里奧大人脈搏   但唔就手   之後佢就右手按我脈搏   再叫我用自己左手按自己脈搏   我話咁樣點對比大家嘅脈搏呀 ?!   個衰佬喺度大笑   諗住如果我咁做就開口話我㗎喇   哈哈   衰得佢 ~

無車牌嘅車

拎住個包上去   諗住坐住嚟食   但原來無地方坐   哈哈

嘩

死咗就掉咗去嘛

我唔明點解要貼花紙落龜背囉

我好驚 Hamster   成隻老鼠咁   哈哈

熱

蕃茄 ?!

呢個鐵架真係危危乎

2019

唔知咩花

好大個花盤

大家都有部私家車   哈哈

里奧大人話風生乜起 ?!   我話應該風生水起啦

里奧大人係都要我拎住來影

呢間美好生活體驗館都有嘢睇   但好焗囉

@ 百合花卉小鎮

5 點食晚飯   真係食唔落喎   每樣試下就算喇 ~

上次同小組旅行就係嚟呢間食店食晚飯呀  但今次食早飯   哈哈

@ 六約山莊

行呀行

有盞燈好似就跌就跌咁

新鮮腐竹

行到最高先有得食   哈哈

一大盤白飯

客家三杯鴨宴 滷水鴨 ?!

酸菜五花腩

炒什菜

南瓜 &芋頭

腐竹肉碎   今次都唔係點相機食先咯   所以啲餸喺我面前先影呢

客家釀豆腐   都係河源嘅客家釀豆腐最好味道

炒菜心

香蕉薄餅

喺大陸食雞係好滑   但呢隻唔得囉   不過都唔緊要啦   反正無咩胃口食   哈哈

河魚池

今次好多腐竹喇

睇電視見過人哋整腐竹   真係要好有心機同耐性呢

6 點坐車去羅湖火車站   其實 6 點半已經到咗   但個司機肯定唔識路   喺度兜圈   里奧大人話佢好肯定無用 GPS   無理由會咁兜法囉   Auntie 仲搞笑話好吖   玩多 3 日   依家好似睇樓團咁   喺住宅外圍睇周圍環境   哈哈 ~

大叔仲搞笑   話依家好似入咗迷宮咁   兜來兜去   我同里奧大人笑到死死下   佢哋啲語氣好搞笑   講出來唔笑㗎   簡直係冷面笑匠   講真   其實呢班團友個都好好脾氣   無鬧過領隊及司機㗎 ~

我問里奧大人點解無意見書嘅 ?!   我想寫下意見喎   里奧大人話佢夠膽比咩 ?!   咁又係 ~

我次次跟團一定會比多啲 Tips 比領隊   再額外比 Tips 個司機   但今次肯定唔會   我覺得佢無擺我哋客人上心   簡單如點名佢都懶做   大大話話 51 人   真係少一個都煩啦 ~

里奧大人話我   係咪睇咗第 4 次呢個精武館呀   哈哈哈哈

其實我好怕喺羅湖搭車   因為實在太多人   但深圳灣口岸一定無車飛   所以點都要搭火車轉地鐵啦 ~

搭頭等都要等下一班車先有位坐   感恩可以坐到孖位 ~

買埋餈飯就番屋企   我第一時間係開機洗衫   之後先沖涼 ~

沖完涼都成  10 點   見有啲餓   所以同里奧大人 Share 一個杯麵   佢幾咁快答我話好呀 ~

成 12 點先瞓   好在聽日假期   可以瞓晏啲 ~