泰亞萊泰式美食 @ 紅磡 ( 23-MAY-2020 )

香茅豬扒湯今邊粉 ($42) - 我要少金邊粉   老闆放上枱就話好似走埋芽菜同菜咁嘅 ?!   但佢話記得我只係少金邊粉   原來廚房真係搞錯咗   所以放番啲芽菜同菜係粉底

海南雞味飯 ($47)

涼粉冰 ($15)

( 23-MAY-2020  SAT )

今朝鬧鐘響   一起身發覺係 7 點 05 分   原來係里奧大人鬧鐘響   咁我都繼續瞓   瞓到 7 點 40 分起身喇 ~

里奧大人起身去廁所   之後話陪我食早餐   我話梗係唔好啦   快啲瞓   難得可以瞓耐啲嘛 ~

早餐食五香肉丁麵   一食啖麵   覺得勁正   因為熱辣辣呀   成身暖哂   可能屋企冷氣好凍   所以真係好想食熱嘢   怪不得睇電視   成日見啲人喺好凍嘅地方食碗麵   覺得食完好暖咁   原來真係嘅   但 Lunch 食又唔會有呢啲感覺   哈哈 ~

菇場唔忙   勁想快啲放工   哈哈 ~

放工去新都城   諗住同家姐食下午茶   差唔多到嘅時候   家姐打嚟話佢架車壞咗   要去柴灣整車   所以一撻着就即去柴灣   咁我話去新都城買嘢先   因為我想買赤小豆扁豆眉豆綠豆花生 ~

買完再周圍行下   又忍唔住買咗 2 條睡裙   我覺得 1 條要 $159 好貴   但着上身真係好鬼舒服   瞓都瞓得舒服啲咁呢 ~

行下買下   完全唔覺餓   但因為我本身拎 1 袋嘢比家姐   加上頭先又買咗幾包豆   加埋就重喇    如果唔係想再行陣囉 ~

咁買埋 Lunch 就去家姐屋企   一開呢個飯盒   覺得自己真係好似個麻甩佬 ~

生炒排骨 + 魚香茄子都好味道   但啲飯就好腍   食剩 1/3 真係食唔落了

Berry 姐勁想瞓   所以我食下飯又行去摸下佢   個飯盒好似食極唔完咁   哈哈 ~

瞓到成條蛇咁

之後抱佢上梳化   居然無反抗   肯定係眼瞓   哈哈

係咁中眼瞓   好得意

雙眼無神   但點都唔瞓喎   昅住我嗎 ?!

一 R 佢   佢就好想瞓咁  

阿呆   妳快啲瞓啦

佢真係想瞓覺   所以我都唔敢郁

個頭 "Sir" 哂落梳化   根本就係眼瞓   但個心太野喇

無啦啦咁嘅衰樣   好似隻鹿咁呀   哈哈哈哈

小姐   妳影完未呀 ?!

佢今次真係攰   因為出面狗吠都唔理呀

佢瞓到咁   係咪開冷氣凍呀 ?!

家姐同姐夫 4 點左右番到嚟   之後妹妹又上嚟   突然間好熱鬧咁 ~

我同家姐講話買咗 2 條睡裙   佢話佢都諗住買比我   真係好在我話佢知買咗咋

妹妹見到家姐雪櫃好多飲品   佢勁鍾意   話如果佢屋企係咁就好   我話其實飲水仲好啦   汽水呢啲真係無益 ~

我 6 點 40 分走人   因為要去里奧大人公司幫手呢 ~

同里奧大人 8 點左右走人   諗住食泡菜鍋但無位   咁轉場食泰國嘢 lu ~

食完抖陣就番屋企   沖埋涼就休息喇 ~

好口渴呀   里奧大人開咗罐啤酒   我都忍唔住飲咗幾啖 ~

今晚 11 點幾都要瞓   聽日番崇拜   要早啲起身呢 ~

豉汁蒸鯧魚 + 辣榨菜絲蒸節瓜粒 + 三味蝦醬炒飯 + 芫茜皮蛋魚片湯 ( 22-MAY-2020 )

好多時用手機影比較暗啲   嘻嘻

( 22-MAY-2020  FRI )

里奧大人依家彈性上班時間   佢早咗起身   同樣我都早咗起身   咁短時間內我好難瞓得着   當瞓到嘅時候   就即係我真正起身嘅時候 ~

不過里奧大人早起身可以去食早餐   咁我都 OK 嘅   比佢有時間嘆下早餐   咁就肯定夠哂精神上班去啦   哈哈 ~

又落雨   掙扎緊着唔着水鞋   但今日 1 piece 係過膝就唔着喇   又唔係 43 吋長腿   哈哈哈哈 ~

早餐食腿蛋治烘底   唔知真係以為我好鍾意食麵包   哈哈 ~

菇場忙下停下   勁開心   因為代表有生意嘛 ~

Lunch 食芝士粟米包   係朝早買定架   里奧大人今日有蓮藕湯飲   真係勁正啦   因為我都好鍾意飲湯嘛   哈哈 ~

幾年前喺有機店買過類似呢啲零食   覺得好好味   感覺又健康   但估唔到之後喺印尼舖頭見到   仲只係 $11/3 包   所以又買番來食呢   但好肯定呢隻唔係有機零食囉   哈哈

無啦啦勁忙   真的好快又 5 點 ~

放工即走   番到屋企即預備   諗住今晚早啲食飯   點知里奧大人要開會   6 點 40 分先放工 ~

7 點幾開餐   其實都算遲   哈哈 ~

是日晚餐 - 豉汁蒸鯧魚 + 辣榨菜絲蒸節瓜粒 + 三味蝦醬炒飯 + 芫茜皮蛋魚片湯 

豉汁蒸鯧魚 - 好耐無食魚   係時候食要食喇 ~

辣榨菜絲蒸節瓜粒 - 食埋兩個節瓜   本身想蠔油燜架   但都係想抖下 ~

三味蝦醬炒飯 - 阿 mi 比我嘅手信   其實間唔中都加啲來食   但第一次用來炒飯   我覺得辣呀   咁里奧大人就話唔想食辣   所以我放上面   留番自己食算喇 ~

芫茜皮蛋魚片湯 - 連續兩晚呢個湯   里奧大人就會知道我對佢幾好呢   哈哈 ~

洗埋碗又大清潔廚房   開埋機洗衫就沖涼喇 ~

睇陣電視   11 點都自己瞓先 lu ~

韭菜餃 (外賣) + 蒸節瓜粒 + 芫茜皮蛋魚片湯 ( 21-MAY-2020 )

( 21-MAY-2020  THU )

今朝里奧大人鬧鐘響   諗住都起身啦   之後里奧大人話依家 7 點咋   咁我都瞓多陣 ~

咁問佢尋晚半夜係咪摸我   因為我覺得好似有人摸我咁   佢話係呀   話我大叫呀   我真係發緊惡夢㗎   見到有人比人殺   總知發咗勁多夢   里奧大人話佢發個夢仲恐怖   佢食完就比錢   點知間餐廳就送金銀衣紙呀   佢話大吉利是   哈哈 ~

今朝早咗出門口   估唔到又撞到多士   原來佢又早出門口 ~

去到茶記都只係 8 點 05 分   居然見到 8 卦   佢又係早咗   做咩今日個個都早咗㗎   哈哈 ~

菇場 4 部冷氣壞哂   有少少焗   好在唔忙   唔係要行來行去   真係暈都似 ~

10 點左右師傅嚟整冷氣   之後聽到佢話要有冷氣嘅話   就要 4 部冷氣一齊開到 16 度   咁即係未整好啦 ~

之後同事問師傅幾時整好 ?!   師傅答話維修完就整好   佢哋企喺我面前對話   我真係差啲笑咗出來   哈哈 ~

Lunch 食菠蘿叉燒包   朝早買定㗎喇   因為晏晝落雨   唔想出去 ~

阿爽真係麻鬼煩   食完飯就係咁吹口哨   之後又一路聽歌一路拍枱   最後仲勁   隻腳都打埋拍子   大佬   鬼上身咩 ~

無啦啦勁忙   好在 4 點幾搞掂   5 點可以準時走 ~

去街市買餸   之後即番屋企   超級勁熱呀   次次買完餸   真係成身濕哂 ~

番到屋企即預備   里奧大人 6 點左右番到屋企   咁叫佢沖涼先 lu ~

今晚 7 點鬆啲開餐   算遲喇   哈哈 ~  

是日懶餐 - 韭菜餃 (外賣) + 蒸節瓜粒 + 芫茜皮蛋魚片湯 

韭菜餃 (外賣) - 1月中買嘅時候   都只係 $26   但依家要 $30 呀   不過就大隻咗   但其實我就鍾意佢細細隻先幫襯   點知依家大大隻   哈哈 ~

蒸節瓜粒 - $12/4條好抵   咁就今晚食 2 條   聽晚再食 2 條   咁就唔駛再買菜 ~

芫茜皮蛋魚片湯 - 今晚點都要滾啲下火湯比里奧大人飲   佢一見到碗湯就問係咪下火湯 ?!   醒喎今次   我話今晚仲比我見到 2 份梳羅魚   上次行哂成個街市都無呀   但因為我想連續兩晚都滾呢個湯   所以唔買梳羅魚喇   對你幾咁好呀   哈哈 ~

洗埋碗就即沖涼   抖陣就食糖水 ~

我同里奧大人講   今星期你啲同事比咗好多嘢我哋食   真係排住隊食㗎 ~

蕃薯西米露   好好味呀   但就超級超級飽肚

家姐又影 Berry 姐比我睇   話佢瞓得好林呀   諗起有次我攬住 Berry   家姐問我仲鍾唔鍾意 Berry   我話點解咁問 ?!   佢話 Berry 依家大隻咗   我話關咩事呀 ?!   佢唔大隻我就驚啦   同埋大隻唔大隻都係 Berry   我當然鍾意佢啦   黐孖根

睇下電視   今晚 11 點唔夠都瞓喇 ~

午餐肉煎雙蛋出前一丁 + 牛油多士 + 芝士焗年糕粟米 ( 20-MAY-2020 )

( 20-MAY-2020  TUE )

里奧大人鬧鐘無響   好在我今朝 7 點半起身咋   其實依家都係覺得早 5 分鐘起身好啲   咁唔駛咁趕   可以慢慢換衫先出門口 ~

早餐食吞拿魚治烘底   好耐無食   覺得好味   哈哈 ~

菇場忙呀   咁里奧大人 Send 咗張芝麻糊嘅相比我睇   我以為 11 點幾呀   原來只係 10 點   無諗過咁早食芝麻糊嘛 ~

Lunch Time 出去行陣   咁打比里奧大人問佢食咩啦   佢話依家飲緊蕃茄湯   今日真係好多嘢飲喎   呢個星期   佢啲同事又整甜品又煲湯   真係好有口福   最開心係我都受惠   哈哈 ~

好想食濃味嘢   所以食牛雜河   我係雜河走腸少河多蔥多辣椒油   麻煩呀呢 ~

菇場忙下停下   好快 5 點 ~

同里奧大人同步落車   所以一齊番屋企 lu ~

我叫佢沖涼先啦   咁唔駛咁趕 ~

預備哂晚餐材料   我都即拖地喇 ~

是日晚餐 - 午餐肉煎雙蛋出前一丁 + 牛油多士 + 芝士焗年糕粟米

午餐肉煎雙蛋出前一丁 - 諗住一半厚切一半薄切   厚就易切   但薄呢   一切就散開哂   哈哈 ~

牛油多士 - 里奧大人同事嘅自家制麵包   星期日比㗎喇   今晚一定要食啦 ~

芝士焗年糕粟米 - 唔想就咁粟米咁單調   所以加 Mozzarella Cheese 同年糕一齊焗   簡單又好味 ~

搞掂哂都接近 8 點   里奧大人要準備開會喇 ~

我就開機洗衫   沖埋涼就休息下 ~

抖陣就食芝麻糊   係姑奶喺星期日整比我食㗎   要食埋佢喇 ~

里奧大人差唔多 10 點先開完會   佢 10 點半都瞓喇   我就 11 點先瞓 ~     

京蔥五花腩 + 白菜仔 ( 19-MAY-2020 )

影完相就再加汁   撈飯一流   哈哈

( 19-MAY-2020  TUE )

感恩尋晚都瞓得唔錯   起身都精神 ~

早餐食奶醬多   諗唔到食咩呀 ~

菇場勁忙   好快 Lunch Time ~

難得無落雨   所以出去買魚片頭米粉   順便買雞骨草比里奧大人 ~

忙下停下   好快 5 點放工 ~

買埋京蔥就番屋企預備   今晚里奧大人 6 點番到屋企   佢好搞笑   問我可唔可以沖涼先 ?!   我話當然可以啦   沖完涼乾淨舒服咁食   不知幾爽    你話我沖涼先就唔得啫 ~

是日晚餐 - 京蔥五花腩 + 白菜仔

京蔥五花腩 - 1 條京蔥都要 $7   都幾貴喎   不過唔想得肉咁單調   一心諗住整紅燒肉   但做唔到糖色   勁唔開心呀   里奧大人話唔緊要啦    呢個都好味道呀 ~

白菜仔 - 尋晚食剩半斤   今晚清埋佢喇 ~

諗住今晚唔駛大清潔廚房   點知頭先將五花腩落鑊   啲油彈到周圍都係   咁唔大清潔唔得啦 ~

沖埋涼就休息   之後睇電視 ~

好味呀

今晚 11 點都瞓喇   呢排個人好攰咁 ~

冬菇燜雞翼 + 白菜仔 ( 18-MAY-2020 )

( 18-MAY-2020  MON )

尋晚瞓得麻麻哋   半夜去咗 2 次廁所   下次都係早啲飲湯好啲 ~

真係好唔想起身咁呀   好少會咁樣   好在沖完涼又精神啲咁呢 ~

早餐食腿蛋治烘底   今朝想食鹹嘢 ~

一番到菇場就要執番好啲嘢   原來西瓜已經幫我放好電腦   仲幫我拎埋 3 個箱回位   所以我可以好快手搞掂 ~

原來本身枱面好污糟㗎   好在阿後叫清潔姐姐上來幫我抹咋   我都好奇怪   點解張枱咁乾淨   不過我番來都一定會再大清潔呢 ~

忙咗陣就可以抖   但每月一到   個肚有少少咁扯住   唔係咁舒服囉   最慘係會好攰 ~

Lunch 食菠蘿叉燒包   今朝買定架   因為今日會落大雨呢 ~

仍然抖啦   個人超級攰   同 8 卦傾開都諗住無得放早   點知 4 點收到訊息話放 5 點   咁又好喎 ~

5 點都準時走   買埋菜先番屋企 ~

番到屋企都無抖呀   要預備晚餐㗎喇 ~      

是日晚餐 - 冬菇燜雞翼 + 白菜仔

冬菇燜雞翼 - 諗住蠔油燜雞翼   原來得半湯匙蠔油   所以即轉用生抽老抽燜喇   呢個餸主角係冬菇   雖然只係燜咗 40 分鐘   但都入哂味呀 ~

白菜仔 - 里奧大人條脷生瘡呀   因為一星期食咗兩次 Pizza   所以買白菜仔清清熱氣 ~

洗埋碗就開機洗衫   之後沖涼喇 ~

食埋木瓜就休息   里奧大人話幫我熨衫   我話唔好成日話講幫我   啲衫唔係只係得我囉   咁我煮飯都唔會話幫你煮飯嘛 ~

今晚里奧大人 10 點 20 分就瞓覺   我就 11 點都瞓喇 ~

香菇豬肉燒賣 + 潮州粉果 ( 17-MAY-2020 )

( 17-MAY-2020  SUN )

8 點 55 分起身   即煲水沖咖啡同預熱焗爐 ~

梳洗之後就食早餐   抖到 10 點先做大清潔 ~

依家難得唔駛番崇拜   所以都會大清潔屋企   再大清潔廚房同廁所   難得有時間呢 ~

唔經唔覺   搞咗 3 個鐘   啲汗係咁滴   真係勁爽   依家無做運動   好難會有咁多汗嘛 ~

家姐話開冷氣   Berry 就即瞓覺   幾鬼嘆

沖埋涼就抖下   2 點出發同里奧大人去南記食嘢喇 ~

食完就去姑奶屋企拎嘢   搞掂哂都接近 4 點   即打的番屋企喇 ~

出一出街真係成身汗   所以又要沖涼   咁里奧大人沖完涼都瞓陣 ~

佢 6 點左右起身   咁啱我都開始預備晚餐 lu ~

今餐又係九唔搭八   燒賣粉果就過期一星期   蒜蓉包同 Pizza 就尋晚食剩   蔬菜湯就係上星期五   所以今餐一定要清哂呢幾樣嘢   哈哈 ~

之後同里奧大人講話燒賣粉果係過期   佢話之前先同同事傾開過期食物   佢話佢對過期都幾有經驗呀   衰 ~

咁佢話飲咗我之前特登買比佢嘅咖啡   飲咗 3 次都好眼瞓   所以比哂同事   我話係貴嘢嚟㗎  (其實只係 $80 左右)   之後我話我都只係飲 UCC 廿幾蚊一樽嗰啲咖啡粉咋   佢個樣有啲心痛咁啦   之後我話我唔會買 Cheap 嘢比你㗎   佢個樣好慘話咩叫做 Cheap 嘢 ?!   呢句好笑   又真係好難講比佢知 Cheap 嘢嘅定義   哈哈 ~

洗埋碗就開機洗衫   之後沖涼休息喇   今日真係做咗成日咁 ~

今晚 11 點都自己瞓先   可能今日出咗好多汗   個人比較攰呢 ~