孜然焗雞翼 + 蒜蓉蒸節瓜粒 ( 23-NOV-2022 )

( 23-NOV-2022  WED )

尋晚瞓得麻麻哋   因為係咁發夢   好在沖完涼就醒哂喇 ~

早餐食芝士包   里奧大人就醬占包 ~

菇場唔太忙   咁抖下啦 ~

Lunch Time 去一田掃貨   今次多咗人呀   所以 12 點 50 分先番到菇場呀 ~

今次買得唔算多   因為家姐唔要薯片

快快口食 Flakes + 鈣思寶   好在細細包容易食咋 ~

菇場仍然唔忙   又同 8 卦傾波經到放工 ~

放工即走   今晚 9 點睇波   所以做咩都要快   哈哈哈哈 ~

是日懶餐 - 孜然焗雞翼 + 蒜蓉蒸節瓜粒

孜然焗雞翼 - 又係佢呀   因為唔知煮咩好   哈哈 ~

蒜蓉蒸節瓜粒- 本身想滾湯   但都係懶   就咁蒸熱算喇 ~ 

洗埋碗就即沖涼   之後等睇波   里奧大人就熨衫 ~

今日喺一田買嘅嘢   薯片就貴咗   其他就同上次一樣價錢

座山牌脆豬肉條 ($19.9/包) / MACKIE'S 烤安格斯牛扒薯片 ($39.9/2包)

KETTLE 手製海鹽味薯片 ($39.9/2包)

YUKA 提拉米蘇杏仁朱古力 ($79.9/2包) / 日本萬能和風昆布鰹魚汁2倍 ($29.9/2支)

日清牛奶朱古力脆米批 ($17.9/2盒) X 6 

睇德國對日本   雖然我支持德國   但日本真係踢得唔錯   所以最後德國對日本係 1:2   仲要唔係12 碼都無 1 球添   唉 ~

MACKIE'S 烤安格斯牛扒薯片   里奧大人鍾意食厚身薯片   我都 OK 嘅

今晚 11 點左右瞓   如果睇波都係要呢個時間瞓 lu ~

泡菜炒豚肉 + 節瓜鮮冬菇湯 ( 22-NOV-2022 )

( 22-NOV-2022  TUE )

尋晚瞓得都唔錯   但如果瞓得林啲就好喇 ~

鬧鐘未響其實都已經醒   不過都係想灘多陣先   哈哈 ~

早餐食醬占包   感恩身體都 OK ~

菇場忙下停下   叫做有啲嘢做都好 ~

Lunch Time 行咗陣   諗住買酸辣米線點知無開   咁買牛雜河啦   今日好想食濃味嘢 ~

阿齋問我食咩餸 ?!   我話米線無開啦   肯定妳咀咒我無得食   佢係咁笑住話無呀無呀   因為我次次食酸辣米線   我都問佢食唔食 ?!   食就幫佢買埋咁呢 ~

菇場唔忙   安守本份等放工   哈哈哈哈 ~

番到屋企都預備晚餐   今晚涼涼地好舒服   唔駛開冷氣呢 ~

是日晚餐 - 泡菜炒豚肉 + 節瓜鮮冬菇湯

泡菜炒豚肉 - 好想清哂盒泡菜   所以又炒豚肉   最緊要快同埋可以帶到飯 ~

節瓜鮮冬菇湯 - 星期六食剩鮮冬菇   今晚點都要食埋去喇 ~

洗埋碗就開機洗衫   沖埋涼就食生果   9 點準時睇丹麥對突尼西亞 ~

下次就咁買豬肉乾好啲   牛肉乾太大陣牛味了   哈哈

場波真係麻麻哋好睇   無乜組織咁   所以 10 點 40 分都瞓覺 lu ~  

泡菜汁豚肉鍋 + 雞扒夜貓大碗飯 (外賣) ( 21-NOV-2022 )

( 21-NOV-2022  MON )

尋晚瞓得都 OK   今朝鬧鐘未響都起身了 ~

早餐食原味瑞士卷   都幾好味道   依家都會食下蛋糕   因為驚成日食麵包會食到好悶   其實我鍾意食鹹嘅早餐多啲   但朝早要番工就一定唔想烘多士炒蛋囉   好似由朝做到晚咁   咪搞我   哈哈哈哈 ~

菇場忙咗陣   之後又 Hea 咯 ~

Lunch Time 唔出去喇   真係唔想又亂買嘢   所以食杯麵   哈哈 ~

唔太忙就同 8 卦傾波經   又同阿花吹水   所以時間勁快過   話咁快放工 ~

每月一到好攰   今晚唔煮喇   買埋外賣先番屋企呢 ~

沖埋個靚涼先開餐   好在今日里奧大人幫我開機洗衫   我可以做少一樣家務 ~

里奧大人去做機   我就靜靜哋睇聖經   居然睇咗 1 個鐘   對我嚟講係奇蹟   希望以後都係咁就好了 ~

睇到差唔多 8 點半   里奧大人都番到嚟   叫佢快啲沖涼喇 ~

9 點睇世界盃   英格蘭對伊朗   英格蘭入第 3 球   里奧大人話 6 比 0   我話 6 比 1   之後我真係贏咗呀   但最後加時伊朗射 12 碼   所以賽果係 6 比 2 呀   我同里奧大人話輸波呀   里奧大人話我黐線   講到自己賭波咁   哈哈哈哈 ~

睇波就會食薯片飲啤酒   咁先有 Feel

我又好鍾意講六合彩 Number   但其實我唔會買   有次開口中咗 3 個字都不知幾開心   極級無聊   哈哈 ~

頭先 10 點半開始好眼瞓   以為變番正常時間   但其實係應該飲咗兩啖啤酒囉   睇完波都即刻瞓   因為已經 11 點 10 分了 ~

香菇雲耳椰菜鮮肉餃 & 韭菜鮮肉餃 (外賣) + 椰菜 ( 20-NOV-2022 )

1 磅烏冬食 3 餐確係抵食

( 20-NOV-2022  SUN )

今朝同里奧大人一齊番工   咁我又精神喎   里奧大人都話我咁夜瞓都起到身   我話係啦   完全話醒就醒   但其實我 6 點幾已經醒咗添呀   一覺瞓天光真係多數瞓6-7個鐘咁呢 ~

食埋早餐又同頂爺傾下偈咁   之後番崇拜了 ~

皇太后個孫結婚   所以比張餅卡比我   實在太有心呢

叻叻又比盒茶比我   今日大豐收呀   哈哈

12 點半完畢就番屋企   里奧大人 2 點先放工   好在我整定午餐   等佢沖埋涼就可以即刻食呢 ~

食完抖陣就去做運動   里奧大人話今日對腳好攰   所以喺屋企休息休息 ~

我都係做 20 分機咋   番到屋企沖完涼就熨衫   今日要熨 3 機衫呀 ~

4 點開始熨衫   真係天光熨到天黑咁   我同里奧大人講話個天咁快黑   應該入秋了   里奧大人笑住話入冬啦   仲入秋   哈哈哈哈 ~

里奧大人負責熨深色衫   所以佢都熨咗 1.5 機咁滯   哈哈 ~

6 點左右預備晚餐   今晚好快手喇   7 點已經食得 ~

是日懶餐 - 香菇雲耳椰菜鮮肉餃 & 韭菜鮮肉餃 (外賣) + 椰菜

香菇雲耳椰菜鮮肉餃 & 韭菜鮮肉餃 (外賣) - 我鍾意食餃子   但里奧大人覺得啲皮厚   不過呢間都唔算厚皮呀   今次個汁加咗山西陳醋   可惜我重手得滯   所以好酸   哈哈哈哈 ~

椰菜 - 今晚都淥埋嚟食   好鬼驚又雪到變冰 ~ 

洗完碗就開機洗衫   之後沖涼了 ~

$35/2 盒好抵呀   所以即買   估唔到仲好甜添呀   里奧大人話有咩好食 ?!   我話咁問真係唔知點答你好喎   我自己鍾意食   同埋覺得好食咋   哈哈

同里奧大人一齊網上敬拜   之後再睇 1 集 SPY 就瞓覺   因為已經 11 點半   開始眼瞓喇 ~  

粢飯 + 上海粗炒 ( 19-NOV-2022 )

 ( 19-NOV-2022  SAT )

今朝 8 點半起身   因為要陪里奧大人去睇醫生呀   佢條頸仍然敏感呢 ~

睇完都 9 點 45 分   咁食埋早餐先番屋企 ~

食完就番屋企   坐到 11 點 15 分就搭的士去大酒店   今日要去 A 弟兄嘅安息禮拜 ~

1 點左右完畢   因為比較趕時間   所以又搭的士走喇   但搭的士都要接近一百   我覺得好貴呀   依家唔係非必要都唔係咁捨得搭的士呢 ~

里奧大人要番工   咁食埋午餐先走   家姐又嚟埋一齊食   實在太開心啦 ~

食下傾下時間好快過   里奧大人都要番工 lu   咁我同家姐就繼續傾   之後去超市買嘢 ~

去街市買餸同餃子   之後又買生果   行嚟行去咁   哈哈 ~

買完番屋企   但唔記得買蔥   又要再去買   點知番到屋企見到碗糯米   原來又唔記得買油炸鬼   真係激死我啦   明明第一樣記得又唔買住   依家又要再出去買   嗚嗚 ~

差唔多 6 點 45 分先真正番到屋企呀   真係腳都斷咁滯   今日行咗 14,000 步呀   真係好夠皮啦   仲係要揹住個袋嚟行   所以更加攰 ~

買咗呢盒雪糕 Ice Cream Bars ($49) 買比里奧大人試下   希望佢鍾意食啦 

番到屋企要快快手預備晚餐   里奧大人 8 點放工   但我要 8 點半先可以開餐呀 ~

是日晚餐 - 粢飯 + 上海粗炒

粢飯 - 好想整呀   但始終蒸糯米要時間   所以真係只得星期六日整   今次條油炸鬼好粗   糯米飯都包唔哂咁滯   我又無買保鮮紙喎   只係用保鮮膠袋係咁壓咋   所以今次整得好樣衰囉 ~

上海粗炒 - 其實係炒炒烏冬   我買咗 1 磅手打烏冬   再加幾隻鮮冬菇同半棵椰菜   我無加肉呀   咁樣食都唔錯 ~

洗埋碗就開機洗衫   沖埋涼再食栥飯   頭先我食咗兩啖咋   煮完好攰想抖下先食 ~

又睇下 Youtube   里奧大人 10 點幾瞓覺   我就 12 點先瞓呀   今晚唔係咁眼瞓咁囉 ~   

肉碎炒油麵 + 粟米蘑菇蛋花湯 ( 18-NOV-2022 )

( 18-NOV-2022  FRI )

感恩瞓得都唔錯   里奧大人話瞓到 5 點幾醒咗   之後好難先瞓得着   我話下星期咁早起身唔驚啦   可以起身睇世界盃   哈哈 ~

早餐食朱古力麻糬   因為尋日里奧大人食咗 2 件斑蘭蛋   如果今朝得 1 件   我驚佢唔夠飽   所以特登再買個麻糬呢 ~

好似比人打扁咗嘅樣子咁   哈哈

菇場唔太忙   同阿花 Whatsapp 咁啦   因為我要 Update 寶貝啲資料   哈哈 ~   

Lunch Time 出去行   行咗 45 分鐘   天氣涼涼哋行街最舒服   最後買埋腸粉就番菇場食喇 ~

仍然唔太忙   不過做下呢樣做下嗰樣   又放工了 ~

放工即番屋企   今晚雖然煮得好簡單   但都要 7 點先開餐呀 ~

是日晚餐 - 肉碎炒油麵 + 粟米蘑菇蛋花湯

肉碎炒油麵 - 尋晚食剩嘅炒肉碎   咁今晚再用嚟炒麵   真係方便又好食㗎 ~

粟米蘑菇蛋花湯 - 好似好耐無飲   係時侯要清下啲罐頭呢 ~

洗埋碗就開機洗衫   之後再大清潔   搞掂哂就沖涼喇 ~

原味無咁好味道

睇下電視同 Youtube   今晚 11 點半先瞓 ~

生薑燒汁炒豬肉 + 自家制豬腳薑 + 白菜仔 ( 17-NOV-2022 )

今晚食更加好味道

( 17-NOV-2022  THU )

瞓晚瞓得都唔錯   因為無開冷氣   起碼我無熱醒   真係講都唔信   11月中仲要開冷氣   依家天氣反常哂   第時香港應該無冬天㗎喇 ~

早餐食斑蘭瑞士卷   味道唔錯喎   無咖啡味咁甜 ~

菇場忙呀   開心開心 ~

Lunch Time 又出去行下   今日好想食牛雜河呀   真係好耐無食咁嘛   今次啲牛雜份量多咗   同埋扣底嘅河粉都多咗喎 ~

菇場仍然忙呀   所以話咁快放工 ~

放工去買麻糟   之後即飛番屋企煮飯喇 ~

今晚又焗又蒸  差唔多 7 點 15 分先開餐 ~

是日懶餐 - 生薑燒汁炒豬肉 + 自家制豬腳薑 + 白菜仔

生薑燒汁炒豬肉 - 有支生薑燒汁都唔錯   唔駛自己調味嘛   我都鍾意食洋蔥   所以煮呢個餸係超級方便又好味呢 ~

自家制豬腳薑 - 真係擺到差唔多到期先食   咁今晚我唔食飯就食埋去啦   食完幾嚿薑   真食成身熱哂   哈哈 ~

白菜仔 - 食埋又轉另一樣菜   不過其實都係睇下邊啲菜係襟擺先買㗎   唔想日日去買菜呀 ~

我呢排夜晚都好少食飯   所以多數蒸一盒韓國白飯   里奧大人食一半   之後一半就帶飯   今晚佢食得好快   因為我煮完要抖下先食   我話佢食完我都未開始食   咁佢即刻唔敢食咁   我覺得自己咁講勁衰呀   其實佢見到啲餸快快食   好過唔想食啦   我真係要好好管理一下自己啲情緒了 ~

洗埋碗又抖下   之後同里奧大人去做機   呢排最多做 25 分鐘   我做得太耐   瞓覺條腰會痛囉   等慢慢 Warm Up 完先做耐啲   唔係做幾日又痛又唔做得仲慘 ~

沖埋涼就食生果同齋燒鵝   之後再定定睇 "法政先鋒 5" 同 "超能使者"   估唔到 "超能使者" 都幾好睇喎   咁家姐又有睇   咁廣告時間就一齊傾下劇情   因為我有時早瞓無睇   唔知講乜鬼呢   哈哈 ~ 

今次嘅齋燒鵝又係好新鮮   勁好味呀

今晚又 11 點半先瞓覺呀   真係覺得好夜咁 ~