蠔油燜豆片 + 椒鹽肉粒炒飯 + 昆明生菜 ( 27-SEP-2023 )

尋晚食剩嘅椒鹽骨

( 27-SEP-2023  WED )

今次破哂記錄   一晚去咗 3 次廁所呀   1 點 3 點 6 點半   真係好在起身精神咋   唔係真係唔得了   下次都真係唔煲老火湯   除非星期六煲   咁星期日可以瞓晏啲   哈哈 ~

早餐食糙米芝士包   但其實芝士唔算多   所以我會再加片芝士 ~

菇場忙呀   咁就唔會洽眼瞓啦 ~

Lunch Time 去 DAISO 買嘢   因為有 9 折   咁問家姐多唔多食雪糕 ?!   佢居然問我係咪幫佢食 ?!   哈哈哈哈   其實我想買隻雪糕匙更比佢啫   不過佢食雪條多啲   咁唔駛買 lu ~

買完再去萬寧買嘢   突然間好肚餓   所以即買牛腩米番場食喇 ~

瘦腩米扣底多蔥   但一定要加辣椒油同醋

仍然忙呀   開心開心 ~

家姐無啦啦打嚟   話尋晚工人同佢講   Berry 次次見到新媽咪太太都嗚嗚嗚咁叫好開心   但妳唔好唔開心呀   因為 Berry 真係好鍾意新媽咪呀   哈哈哈哈   佢咁講真係笑死我呀   不過次次拍片   佢見 Berry 唔理家姐   佢係笑得最大聲同最開心嗰個囉 ~

工人影比家姐   兩條友成日一齊瞓覺㗎   好在 Berry 都跟工人   咁即係代表工人都錫 Berry 呢

放工即走   今晚大塞車   等咗好耐車呀   番到屋企真係要快手快腳整晚餐   差唔多 7 點 15 分先開餐呀 ~

是日晚餐 - 蠔油燜豆片 + 椒鹽肉粒炒飯 + 昆明生菜

蠔油燜豆片 - 咁見仲有蠔汁同冬菇   所以特登買元朗豆片 ($11/4 兩)   其實我唔知 4 兩份量係幾多   係買完先知咁鬼多囉   下次應該問最少買幾多先啱   依家又食剩一半留番聽晚食   唉 ~

椒鹽肉粒炒飯 - 將椒鹽骨剪開一粒粒   再加蛋絲同蔥花一齊炒   里奧大人鍾意食炒飯   不過就唔會成日整啦  好多功夫㗎   哈哈 ~

昆明生菜 - $10/斤 但 $14/2 斤   我本身真係諗住買 1 斤   不過菜婆話 $13/2 斤啦   咁我又買咗 2 斤喇 ~

洗埋碗就去買雪糕   家姐話抵呀   所以我買比里奧大人食   不過佢唔知我買比佢呢 ~

之前特登執好雪櫃   咁先放得落   唔係就無得買 lu ~

家姐話有啲雪條係 $20/條   所以呢個 Family Pack 都抵嘅

里奧大人發達喇   不過我唔會比佢日日食   始終無咩益嘛   唔係家姐話抵   其實我唔會買   哈哈 

沖埋涼就即沖涼喇   食埋冰皮月餅就休息休息 ~

上網睇點樣影相會靚啲   係學到佢點擺法   但真係完全影唔到佢咁靚   呵呵

今晚睇陣 Youtube 同靈修   之後再打機   好在 10 點 45 分都眼瞓   始終唔想晚晚打機打到 11 點咁呢 ~

椒鹽骨 (外賣) + 蠔油燜冬菇鵝掌 + 青紅蘿蔔粟米豬骨湯 ( 26-SEP-2023 )

( 26-SEP-2023  TUE )

尋晚去咗 2 次廁所   但感恩好快瞓得番 ~

早餐食合桃有機穀麥包   之前買咗包日本芝士   但每塊都好薄切切   今朝拎嗰塊   簡直有啲透明嘅感覺   下次都係買番韓國芝士或者 Kraft 芝士算喇 ~

菇場忙呀   日日係咁就好喇 ~

阿花又比 ASTRO 應援比我呀   勁鍾意

Lunch Time 出去買麵包再去萬寧買 Cream   最後去 MOS BURGER 買埋午餐就番菇場喇 ~

家姐好搞笑   話今日食炒麵無肉   所以佢就買咗燒雞肶番嚟切絲再炒   我話咁叻嘅 ?!   佢話學我喎  我成日咁講   哈哈 ~

仍然忙呀   所以好快就放工咁呢 ~

同船頭阿花傾偈   佢話佢啲 tee 係唔熨   我話我乜都要熨㗎   之後佢話我啲裙都好直   但我都話要睇咩嘢質地   同埋有時擺得太耐都會巢   又要熨多次咁囉 ~

買埋菜同椒鹽骨就番屋企   好在叫里奧大人幫我滾熱啲湯先   因為佢今晚要上堂   如果等埋我番嚟先滾湯   可能趕唔切飲呢 ~

是日懶餐 - 椒鹽骨 (外賣) + 蠔油燜冬菇鵝掌 + 青紅蘿蔔粟米豬骨湯

椒鹽骨 (外賣) - 一盒只係 $45   仲要係擺唔哂落隻碟   真係買仲抵過煮呀   哈哈 ~

蠔油燜冬菇鵝掌 - 仲食剩啲冬菇   聽晚再食 ~

青紅蘿蔔粟米豬骨湯 - 終於飲哂喇   其實一煲湯飲 4 晚最好  咁唔駛飲咁多   但又覺得擺咁耐唔係咁好   所以想 3 日要飲哂囉 ~ 

里奧大人今晚真係上堂前 10 分鐘食完   但我就可以慢慢食喇 ~

洗埋碗再開機洗衫   之後沖涼休息 ~

里奧大人 8 點幾上完堂   今晚好快喎 ~

之後一齊食榴槤冰皮月餅   今次嘅榴槤好濃味   上年無咁濃味㗎   所以覺得好味道   里奧大人話想再食   不過我話我好飽唔想再食   佢話同我一齊食先好味   所以佢都唔食   哈哈 ~

家姐比我嘅貓山王 & 黑刺榴槤冰皮月餅

仍然解凍中

細細個容易入口

今晚打機打到 11 點先瞓   真係好耐無打機   雖然獎賞有 6 個鐘可以玩   但真係無本事玩咁耐   我試過加加埋埋獎賞   係由 11 點到第朝早 8 點添呀 ~

蠔油燜冬菇鵝掌 + 青紅蘿蔔粟米豬骨湯 ( 25-SEP-2023 )

( 25-SEP-2023  MON )

尋晚去咗次廁所   不過都預咗喇   始終夜晚飲咗湯   哈哈 ~

早餐食醬占合桃有機穀麥包   諗住自己食   但里奧大人又起咗身   咁就一齊食啦 ~

菇場忙呀   開心開心   真係鍾意忙多過 Hea 呢 ~

Lunch Time 出去 DAISO 買嘢   之後番菇場食 Flakes + 乳酪喇 ~

忙下停下   好快放工 ~

番到屋企都只係滾熱啲餸同湯   再煮飯同焗熱尋晚食剩嘅螺絲粉就搞掂   非常之簡單 ~

是日懶餐 - 蠔油燜冬菇鵝掌 + 青紅蘿蔔粟米豬骨湯

蠔油燜冬菇鵝掌 - 之前兩個買急凍鵝掌只係 $22   依家要 $32 呀   不過好想食就買囉   上次燜冬菇係無咩味   所以想整多次好味啲咁囉   好感恩今次燜得勁好味呀   里奧大人話啲汁好味   要食多兩啖飯呀   因為佢真係食得好快   身體最誠實呢   哈哈 ~    

青紅蘿蔔粟米豬骨湯 - 今晚繼續飲   飲埋聽晚就飲哂   好在都鍾意飲   唔係咁飲法都幾驚下 ~

洗埋碗就沖涼   抖陣就食紅豆餅   今晚想食啲甜嘢 ~

紅豆餅啲紅豆餡   真係乾到呢   完全涸住好難吞落肚咁

咁開咗焗爐就焗豬肉乾比里奧大人食啦   家姐話買特登貴啲嘅金錢豬肉乾比我   我問點解 ?!   佢話唔駛我將啲豬肉乾切開去喎   其實 $268/半公斤 (500g) 都真係好貴囉   零食咋

睇多陣電視   今晚 10 點 45 分都瞓喇 ~

酸辣鳳尾蝦拚青瓜 + 和牛漢堡炒螺絲粉 + 和牛漢堡蟹柳炒飯 + 青紅蘿蔔粟米豬骨湯 ( 24-SEP-2023 )

我好懶   只係焗熱所有嘢   再加茄汁撈勻再焗熱   所以整到個玻璃盒好污糟   哈哈

( 24-SEP-2023  SUN )

尋晚去咗 2 次廁所   但感恩起身都精神   因為今日好多嘢要做   所以一定要精精神神呀   哈哈 ~

同里奧大人食早餐   咁我話食沙爹牛麵   隔離枱個男人又話佢都食沙爹牛麵   之後我咖啡少奶少甜   佢又話要少甜   之後我同里奧大人唔知講咩   佢話妳咪咁傻啦   呢句我都笑咗出來   唔知以為我哋 4 個一齊坐咁呀   哈哈 ~

食完就去里奧大人公司   今朝我要執好哂啲圖書   其實之前執咗一部份   再等到今朝我得閒   先可以執另一部份   終於執好哂   但其實仲有另一邊未執   不過我唔執住喇   因為已經散哂呢 ~

抖咗陣都要番崇拜   完畢就即去買午餐比里奧大人   因為佢今日要開會 ~

好想食酸辣鳳爪   所以買迷你海南雞飯喇 ~

食完就去街市買餸   里奧大人就去開會 lu ~

番到屋企即刻煲湯   之後執好個雪櫃再執好書枱   搞掂哂已經接近 5 點 ~

呢包特選厚花菇好似 $115      

里奧大人 5 點幾番到屋企真係算早   我抖多陣就預備晚餐 ~

是日晚餐 - 酸辣鳳尾蝦拚青瓜 + 和牛漢堡炒螺絲粉 + 和牛漢堡蟹柳炒飯 + 青紅蘿蔔粟米豬骨湯

酸辣鳳尾蝦拚青瓜 - 特登留番酸辣鳳爪嘅汁   再加鳳尾蝦同青瓜   天氣熱食呢啲涼拌就最正呢 ~ 

和牛漢堡炒螺絲粉 - 仲剩番啲螺絲粉   所以今晚清埋去喇   咁里奧大人聽日有 Lunch 食喇 ~

和牛漢堡蟹柳炒飯 - 完全唔記得有盒白飯   咁今晚一定要整啦   又順便清埋 8 條蟹柳   依家冰格得番好少嘢   無咩幾何 ~

青紅蘿蔔粟米豬骨湯 - 青紅蘿蔔各 1 條 + 2 條粟米 + 南瓜同栗子各半磅 + $40 西施骨   好耐無飲老火湯   所以覺得好味道呀   哈哈 ~   

洗完碗就燜餸   搞掂哂就開機洗衫 ~

沖埋涼就同里奧大人一齊睇 "思家大戰"   今日好攰呀   但反而 11 點先眼瞓 ~

刕舙馫麵館 @ 紅磡 ( 23-SEP-2023 )

麻辣東坡肉刀削麵 ($48) - 我真係諗過成件東坡肉放入口㗎   但最後都無咁做   只係食瘦肉   係咪好嘥料呀   哈哈

麻辣香酥排骨 (滷水) 刀削麵 ($48) - 但如果一碗排骨刀削麵得 2 件排骨   咁樣真係好少喎

我再加豬手 ($9) - 呢個好味道呀

( 23-SEP-2023  SAT )

今朝早咗成半個鐘起身呀   咁啱里奧大人都起埋身   所以陪佢食早餐   之後我就出發去家姐屋企 lu ~

因為家姐同姐夫食咗早餐   咁家姐就咁陪我食 ~

家姐話有 2 件多士算多   我話平時唔係咁嘅咩 ?!   不過講講下又係喎   但得 1 塊嘅話   多數係厚多士呢

之後佢話突然間有少少餓   咁我仲有 1/3 未食嘅牛肉麵   就叫佢食埋去啦   再叫佢食多 1 隻蛋同件多士   哈哈 ~

食完就去家姐屋企   乖女 Berry 撲到我呢   仲要係發出怪叫   好似我遺棄咗佢之後見番面咁興奮   哈哈 ~

眼神話我知   妳影夠未 ?!

想走呀 

都係用嗰招   用零食引佢

頭先見到有隻狗好似 Berry   不過大隻過 Berry 嘅   所以我影咗隻狗比家姐睇   家姐話就係呢隻喇   之前有個男人話佢隻狗同 Berry 好似樣   佢仲話佢隻 3 歲喇   家姐話 Berry 5 歲添啦   佢好愕然   哈哈   因為好多時啲人覺得細隻=細年紀嘛   哈哈

同家姐傾偈啦   之後又一齊睇下相   咁我比我同家姐細個嘅相比工人睇   佢又比番我哋睇佢細個   但係做花女化哂妝嘅   家姐話佢好似長洲飄色咁   哈哈   不過真係好似㗎   因為佢化到塊臉好白呢 ~

工人聽日去元朗   咁家姐叫佢買豬肉乾   我整鬼佢話要 20 包   即係 20 磅   工人第一時間呆咗再話佢同朋友無咁多錢喺身呀   笑死我   佢反而唔擔心拎咁多袋好重   哈哈 ~

今日忍唔住幫家姐執好個櫃上面嘅嘢   之後再執好張枱嘅嘢   同佢執完真係整齊好多   拎起上手都易啲啦 ~

家姐話話如果里奧大人見到咁整齊   會問係咪我老婆幫手執 ?!   呢句好笑 ~

 

執開有條路   最後幫佢執埋佢間房嘅嘢   佢好笑呀   因為我之前幫佢將唔同文件入 Folder 嘛   佢話佢無整亂㗎   我話當然無整亂啦   妳根本無將文件放入 folder   只係放係 folder 上面 ~

咁我幫佢執完就整齊好多啦   我話我幫妳執嘢係唔會掉妳嘅嘢   同埋如果要掉就一定問準先掉㗎 ~

差唔多 1 點就走人喇   睇到 Apps 話幾分鐘後有車   所以家姐陪我追車   最搞笑工人同 Berry 又一齊跑呀   但佢哋仲跑得快過我哋呀   哈哈哈哈   不過最後都追唔到   咁陪 Berry 行街街啦 ~

頭先追車   始終戴住口罩係勁辛苦嘛   真係熱上加熱   我又係咁流汗   真係抹極都不斷流汗   家姐叫咗我抹幾次   之後話我個咀唇都白埋   不過我話唔駛驚啦   一陣坐車可以抖下   哈哈 ~

里奧大人同事想食麥當勞   咁我都去麥當勞買午餐比佢哋啦 ~

等餐嘅時候   我聽到職員 A 同 B 講話魚柳包走魚柳走醬   我以為聽錯   但佢再講多次魚柳包走魚柳走妯醬   再同個印度女仔講 Chesse Only ~

我同家姐講啦   佢話我聽錯印度女仔講呀嘛   我話係職員用廣東話廣㗎   我識聽㗎   哈哈   之後佢話有個同事食齋   都會叫魚柳包走魚柳 ~

去到里奧大人公司都已經差唔多 3 點   午餐變為下午茶   哈哈 ~

我食完抖陣都要出發去整牙套   今次終於搞掂哂喇   唔駛成日掛住要整 ~

之後我話想洗牙   醫生又話唔駛洗   我話幾年喇喎   佢話睇過我啲牙真係唔駛洗呢 ~

經過樓上   買咗包特選厚花菇同開心果   所以番到屋企都要 5 點幾   里奧大人就 6 點幾先番到屋企   咁我話出去食晚餐喇 ~

我好少見到半邊月亮

食完都即番屋企   今日大家都好攰呀 ~

番到屋企都大清潔廚房先   因為想抹好耐呢   搞掂哂就開機洗衫   沖完涼抖陣就食甜品 ~

家姐同事整嘅桂花糕同芒果布甸   兩個都好味道呀   因為有好多材料   哈哈

今晚都係睇下 Youtube   所以 11 點幾先瞓 ~

Add Some Thai Restaurant @ 官塘 ( 22-SEP-2023 )

泰式什錦海鮮炒金邊粉 ($118) - CC 話食金邊炒   我都鍾意食㗎   酸酸咪咪好開胃   最開心係有泰國蝦片   出面買好貴㗎   十塊唔夠就要廿蚊雞   我唔捨得買嚟食呢

原來材料份量都唔少㗎   有青口魷魚等等   同埋啲蝦都幾大隻   唔係蝦毛

曼谷經典手打蝦餅 (2件) ($48) - 呢個好味呀   口感好彈牙   同埋都好大件   唔怪得一碟 2 件   兩個人真係絕對夠食呀   哈哈

蒜蓉炒椰菜苗 ($68) - CC 話唔食馬拉盞   咁其實蒜蓉都好食嘅   呢個炒得好味道呀   如果我自己炒到咁   我真係會開心到喊   哈哈

( 22-SEP-2023  FRI )

尋晚半夜又係去咗 2 次廁所   但今次就比較易瞓得番   感恩感恩 ~

里奧大人話呢 4 粒係咩 ?!   我即刻望地下啦   原來佢話喺枱面嗰 4 個無花果   咁其實無花果係用 "粒" 定係用 "個" 嚟做單位嘅呢 ?!   哈哈 ~

因為青 BB 未熟嘛   所以唔放雪櫃   但其實都熟咗好多咁呢

早餐食合桃有機穀麥包   今朝想食甜嘅   所以就搽果占喇 ~

里奧大人話我做咩係咁 "鄧" 件麵包   仲話我 "鄧" 咗好耐   我話驚有麵包碎嘛   想 "鄧" 哂啲碎落隻碟度   咁咪唔會食到成枱都係麵包碎囉

菇場忙下停下   咁就最好   好過 Hea 嘛   哈哈 ~

Lunch Time 一定要出去   因為要買無花果比 CC 同埋麻糬比家姐   買完哂嘢即番菇場食 Flakes + 乳酪   好耐無食又覺得幾好味   哈哈 ~

CC 都好鍾意食無花果呢   所以買盒比佢喇   

($18/3 個)   所以買比家姐係 4 個芝士味 + 2 個芝麻味

里奧大人今朝 Whatsapp 話我買比佢包豬肉乾有陣 "益" 味   所以打去佢公司搵佢啦   點知佢又未番到   咁阿妹問邊位搵佢 ?!   我話其實係想搵妳多啲   因為想佢幫手試食係咪有陣 "益" 味   哈哈 ~

佢話我同平時把聲好唔同喎   好斯文同好溫柔咁   我話鬼咩   公司咁靜   我係用隻手蓋住個咀先講嘢㗎   所以咪好細聲咁囉   如果有人打我手提傾私人嘢   我要出公司外面傾㗎   唔係就會全世界都知我講咩呢 ~

菇場唔忙   可以抖下 ~

放工即走   今晚終於約到 CC 食生日飯   本來約咗上個月㗎   但佢要整牙   咁改到今日先食呢   開心開心 ~

同佢對上一次見面係 2019 年 12 月   好記得係中午飲茶   因為要坐得耐   哈哈   之後疫情大爆就無再見面 lu ~

本身諗住去另一間泰菜館   不過佢話佢食過   份量好多   3-4 人食先得   咁我話一係咁   去到附近睇有咩食店唔限時用餐就入去食啦 ~

因為落緊毛毛雨   都唔係咁想浪費時間搵   我話去 ADD SOME THAI 啦   我之前食過都唔錯㗎 ~

我哋係第一枱客   咁就好喇   可以揀位坐   哈哈 ~

真係一坐低就傾傾傾   餐牌都唔得閒睇住   實在太多嘢想講喇 ~

我問 CC 我講嘢大唔大聲 ?!  佢話咩話 ?!   咁即係佢聽唔到我問咩啦   之後佢條友話以為我扮斯文要溫柔咁講嘢喎 ~

不過佢話其實覺得我係無氣講嘢咁   我話真係呀   呢星期每月一到呀   元氣大傷 ~

真係一路食一路傾   因為好耐無見嘛   好多嘢要 Update   但大家再傾開   呢幾年大家都改變咗好多   特別係對人處事方面   好多嘢都放開咗   因為無可能為咗啲無謂人而令自己唔開心嘛 ~

有職員話 Last Order   嗰時好似 8 點幾   但真係唔記得添   咁我哋無再 Order 其他食物   又繼續傾傾傾   之後職員話差唔多收舖   要埋單先   咁呢下就真係要醒水   即埋單即走啦   哈哈 ~

第一枱客人   但係最後一枱走   下次約埋里奧大人同兔兔再傾過 ~

感恩都好快有車   所以 10 點半都番到屋企 ~

沖埋涼就抖下   但個胃頂住頂住   可能食咗嘅金邊粉   因為凍咗比較硬嘛   不過頭先真係掛住傾   唔係咁想食嘢住   哈哈 ~

睇多陣電視   今晚差唔多 11 點半先瞓 ~