燒汁牛仔骨 + 蒜蓉脆肉瓜粒 ( 31-JUL-2025 )

開飯先醒起無倒啲汁

洋蔥都好好味㗎

( 31-JUL-2025  THU )

尋晚半夜去完廁所   感恩都好有瞓得番呀 ~

早餐仍然食千層吐司   其實真係好食但真係好油   所以只能間唔中食呢 ~

菇場忙下停下   之後家姐話買咗包青檸味薯片   我都估到啦   次次問完都實會買嘅   一係話試咗好味再買比我   一係就會話特登留番比我咁㗎 ~

Lunch Time 蒸完飯就出去買菜同生果   去買菜啲時間係用得最快   因為唔靚就要去另一檔呢   最後去埋百佳買香蕉就番菇場開餐喇 ~

我一入到菇場   船頭叫我去佢位   原來佢整咗牛𦟌   所以比我試下

唔忙又做自己嘢   呢排有時都會眼瞓   好在出去行下又好啲呢 ~

放工即走   船頭問牛𦟌好唔好食 ?!  我話好食但個芥末醬仲好食呀   阿花都咁講   我問佢喺邊度買 ?!   佢話係自己調   我覺得好勁呀   佢好多汁都係自己調   我就比較懶   多數買現成醬汁囉 

里奧大人又叫我唔好煮   我話你係咪想出街食呀 ?!   佢話唔係   只係想我休息下   其實我有時都衰㗎   煮完好熱無咩胃口呢   臉色唔多好睇㗎   咁佢就知咩事唔敢出聲   哈哈 ~

是日晚餐 - 燒汁牛仔骨 + 蒜蓉脆肉瓜粒

燒汁牛仔骨 - 拎出嚟嘅時候先醒起無刴到啲牛仔骨   我同里奧大人講話今次肯定好韌   如我所料真係好韌啦   里奧大人話咬到牙都軟   食完要睇牙醫   哈哈哈哈 ~

蒜蓉脆肉瓜粒 - 加埋幾隻杏鮑菇   咁無咁單調 ~

洗埋碗抖陣就同里奧大人去做機   但 Full 哂   里奧大人話其實腳有啲痛   所以番屋企沖涼   我叫佢熨衫當做運動呀   哈哈 ~

我就出街行   點知行到一半落雨呀   我仲以為滴水添   不過我都順便睇下餐廳聽日開唔開先   睇完就即跑番屋企   因為啲雨越落越大呀   終於又係成身汗   咁又唔錯呀 ~

里奧大人話我聽朝一定要出去食咁   唔係點解落雨都行去睇   我話始終暑假   驚佢哋放幾日假   我唔想白等完之後去另一間食囉 ~

沖埋涼就休息下先   之後同里奧大人一齊睇 "麻雀樂團"   依家多數錄完先睇   咁唔駛睇廣告   睇完就睇 "真相猜情尋"   估唔到咁快做完   真係好鍾意睇方東昇嘅節目   每次都唔會令人失望 ~

睇多陣 Youtube   差唔多 11 點 15 分先瞓 ~

午餐肉拚台灣一口腸 + 辣椒蒜蓉蒸節瓜 ( 30-JUL-2025 )

( 30-JUL-2025  WED )

臨醒之前發夢   我換緊衫問家姐幾點 ?!   佢話 9 點 15 分   我話要搭的士番工喇   如果搭巴士要 10 點先番到去   咁諗起西瓜上大陸   我唔駛咁趕   之後鬧鐘響 lu ~

早餐食千層吐司   好味道呀   焦糖部份係脆卜卜真係好鬼正 ~

菇場 3D   咁一定上網啦 ~

Lunch Time 蒸完飯就出去商場行下   行夠半個鐘再買祛濕茶   買完就番菇場開飯 lu ~

仍然繼續上網   開心開心 ~

呢包喺日本買㗎   因為 9 月到期要快啲食埋去   口感煙煙韌韌   依家香港有得買啦   我會買包比定姐食   睇下佢係咪覺得都煙韌先   哈哈

放工即走   番到屋企已經見到里奧大人   咁我就會煮快啲   哈哈 ~

今晚食拉麵   因為唔係咁想食飯 ~

是日晚餐 - 午餐肉拚台灣一口腸 + 辣椒蒜蓉蒸節瓜

午餐肉拚台灣一口腸 - 無醃到肉又唔想買外賣   所以就焗呢啲餸喇 ~

辣椒蒜蓉蒸節瓜 - 我覺得節瓜真係好味道   同埋又可以帶飯   以前鍾意滾節瓜湯   不過依家好耐無滾湯 lu   因為唔想半夜去廁所呀 ~

洗埋碗就煮蕃薯糖水   之後做陣小清潔   搞掂就沖涼喇 ~

一路食糖水一路睇 "麻雀樂團"   之後又玩陣 "上海麻雀"   希望唔好上癮啦 ~

家姐真係次次都係咁   我話唔要就會問點解 ?!   其實里奧大人都係咁㗎   佢哋唔會答 "哦"   同埋會好奇怪點解我會唔要   哈哈

同里奧大人一齊睇 "真相猜情尋"   又 11 點先瞓呀 ~

孜然雞翼 + 辣椒蒜蓉唐生菜 ( 29-JUL-2025 )

( 29-JUL-2025  TUE )

感恩一覺瞓天光呀   臨醒之前發夢同里奧大人要去飲   但仲有兩個鐘先開始   所以去阿妹屋企打牌   之後鬧鐘響 lu ~

早餐仍然食芝士包   真係好好味呀 ~

食完就去里奧大人公司坐陣   番到菇場啱啱黑雨   好在番得切咋 ~

阿齋話我連風扇仔都抹   呢度係妳第幾個家 ?!   我話第二   之後我話屋企反而無咩點抹    因為無咩塵嘛   佢即刻話即係呢度先係妳第一個家   哈哈 ~

11 點 10 分終於紅雨   因為我想出去行下呀   如果黑雨就出唔到去嘛 ~

Lunch Time 蒸完飯就出去行陣   落雨就一定行商場㗎喇   去 iEAT 買蕃薯再去 A1 買麵包   之後行多陣就番菇場開飯 lu ~

唔忙就做自己嘢   咁啲時間就會過得勁快 ~

放工即走   番到屋企都要即預備晚餐   里奧大人 6 點半番到屋企都要等陣先食得呀 ~

是日晚餐 - 孜然雞翼 + 辣椒蒜蓉唐生菜

孜然雞翼 - 都唔係咁夠味   下次要重手啲先得 ~

辣椒蒜蓉唐生菜 - 好耐無食生菜   係時候食下喇   其實鍾意淥生菜   真係淥幾淥就搞掂   好快有得食   哈哈 ~

洗埋碗抖陣就同里奧大人去做機   不過呢兩日做維修   所以無得做   真係好搞笑囉   其實頭先同里奧大人講話好攰唔係咁想做機   但又想郁下   諗住做 15 分鐘就算 ~

開埋機洗衫就沖涼   抖陣就熨 2 機衫   我都係主力熨底衫褲同襪   其他留比里奧大人熨 lu ~

今晚都係睇 "麻雀樂團"   仍然覺得幾好睇   哈哈 ~

睇完又睇陣 Youtube 再同里奧大人睇 "真相猜情尋"   不過睇錄咗嗰啲   我睇到 11 點 10 分都瞓覺先喇 ~

金菇瑤柱燜伊麵 + 豉油王肉絲炒麵 (外賣) ( 28-JUL-2025 )

真係好味又抵食   我同里奧大人仲可以帶埋 Lunch Box 添呀

( 28-JUL-2025  MON )

感恩一覺瞓天光呀   今朝 7 點 19 分都起身整早餐 lu ~

早餐食芝士包   係家姐喺嘉多娜買比我㗎 ~

里奧大人呢塊就好多芝士

菇場忙呀   好在 11 點左右搞掂 ~

阿花一見到我就話好清爽   船頭同小說都話我剪到咁短   不過我之前啲頭髮都係留到膊頭   其實唔係好長啫   但家姐工人都係話我頭髮好長喎 ~

Lunch Time 蒸完飯就出去買菜   之後買埋啤酒就番菇場開飯喇 ~

買夠 10 罐

突然好忙   搞掂之後就忙下停下又 Skype   所以好快放工 ~

今晚諗住買芝麻雞   如果無就去買下午茶   里奧大人話不如佢直接買下午茶好過啦   咁又係嘅 ~

食完抖陣就同里奧大人一齊去做機   做 25 分鐘就夠喇   因為有啲攰 ~

番到屋企即染髮   之後沖埋涼就食生果 ~

估唔到 "麻雀樂團" 又幾好睇喎   又可以追下劇   希望唔好有感情線啦   哈哈 ~

里奧大人話食涼粉   咁我整芒果涼粉比佢食喇

睇多陣 Youtube   今晚又係 11 點先瞓 ~

壽司郎 @ 紅磡 ( 27-JUL-2025 )

其實仲有劏魚嘅畫面   但我覺得好恐怖

職員介紹嘅   但唔記得係咩

獨立包裝嘅薑片   咁樣做法雖然唔環保但都理解嘅

開餐

特製軟殼蟹卷 ($22)

鹽烤日本產帆立貝 (迷你飯) ($22)

大切中吞拿魚腩 (迷你飯) ($17)

飛魚子軍艦 ($12)

特盛甜蝦 ($12)

鮮蝦天婦羅 ($12/碟) X 3

炙燒芝士鮮蝦 ($12)

蝦三味 ($17)

鹽烤日本產帆立貝 ($22)

大切麻油鹽漬目鉢吞拿魚 ($17)

赤蝦二貫配飛魚子 ($17)

芥末章魚軍艦 ($12)

我哋算少喇   見到啲人疊咗幾棟好壯觀㗎   哈哈

( 27-JUL-2025  SUN )

今朝同里奧大人一齊食早餐   食完再去佢公司坐陣就去家姐屋企喇 ~

家姐今朝要幫手出去做嘢   因為糟糟要去接機   不過我都會照探 Berry   因為今日唔探要等下個月中呀   我唔想隔咁耐囉 ~

Berry 一見到我   又尖叫又怪叫又喊咁聲嚟撲我   原來有一個月無探佢呀   可能真係有機會掛住我都未定   哈哈 ~

又係成日抓

Berry 波

工人食嘅蕃薯包早餐   佢真係好鍾意食甜嘢

好嗲咁

之後挨落我度瞓覺呀

轉嚟轉去

有時覺得家姐講嘢真係好搞笑   真係當 Berry 係人咁   哈哈

讚完就 "得" 住我喇

瞓咗一陣覺

同 Berry 玩下又同工人傾下偈   眨下眼已經 12 點鬆啲   家姐啱啱番到屋企 ~

家姐一番嚟就餵佢食杜蟲藥

好期待咁   因為有芝士粒

其實餵佢有難度㗎

工人都好錫 Berry 㗎   慢慢咁氹住餵呢

呢個樣好似細個嘅時候

家姐有個大嘅 Porter 袋   但裝埋電腦就好重   所以想唔要   我話比我啦   我正想買個大袋呀   依家我可以慳番   哈哈 ~

傾下傾下又差唔多走人喇   家姐同工人 Berry 送我搭車   去到啱啱有車   感恩感恩 ~

同里奧大人去大家樂食下午茶   食完之後去剪髮   里奧大人就番屋企瞓陣先 ~

我唔餓   所以 Share 食呢 Set 下午茶就最好

今次又試下另一間速剪   估唔到剪咗 20 分鐘咁耐呀   師傅仲要好有心機   所以真係超感恩呀 ~

我諗住前面剪短同修下髮尾   點知我要嘅髮型係要剪短   出嚟嘅效果相當唔錯呀   因為成日差唔多髮型真係有啲悶呢 ~

一入屋   里奧大人話個新髮型好好睇呀   我話個樣精神好多最緊要   哈哈 ~

好快又已經 4 點   咁都開機洗衫同熨衫喇   今晚就可以休息下 ~

家姐買比我嘅零食   Hand Cream 就係家姐之前買咗好多   所以叫佢比支我   因為我差唔多用哂呀

抖陣就出去   因為里奧大人要幫公司買電熱水煲   所以去黃埔食嘢喇 ~

里奧大人話去食壽司   我以為係去壽司郎   原來佢係話去另一間日本餐廳   不過唔見上次想食個套餐   所以我話去壽司郎呀 ~

去到等 40 個號碼   但啲人不斷出出入入   所以等啦   點知原來都等咗 1 個鐘   咁啱里奧大人要覆公司嘢咋   咁就唔覺咁耐呢   哈哈 ~

初初唔太餓   但等咗咁耐就開始覺得餓呢 ~

我哋覺得今次啲食物好新鮮呀   之前食真係唔係咁樣囉   所以有機會會再嚟食   但一定要早啲拎位   哈哈 ~

食完去 AEON 買熱水煲   再買 2 條大毛巾就走人喇 ~

呢款大浴巾嘅質地真係好柔軟   所以買 2 條試下先   好用就再等有折先嚟買   我揀黃色   之後里奧大人話我真係好鍾意黃色

難得出開去   順便買埋糖水就番屋企   今晚都係好焗熱呀   流咗好多汗個人真係好舒服好多 ~

沖埋涼抖陣   之後一路睇 "臥底旅行團 5.0" 一路食糖水 ~

睇多陣 Youtube   今晚 11 點先瞓覺 ~