鳳城水餃 (外賣) + 青紅蘿蔔粟米螺頭豬骨湯 ( 13-JUL-2025 )

( 13-JUL-2025  SUN )

今朝同里奧大人一齊起身   食埋早餐就去佢公司幫手喇 ~

諗住今日探 Berry 㗎   但家姐唔得閒   不過咁都好   我每月一到有啲攰   唔係咁樣滕嚟滕去呢 ~

搞掂就拎戰車去黃埔買餸   因為唔想拎咁重嘢   同埋想買多啲嘢呢 ~

買青紅蘿蔔粟米   買完去豬肉檔買西施骨   之後去價真棧買嘢 ~

今日正價有 9 折   所以即買 4 罐尚霖小屋黑芝麻粉 ($39) + 3 包盛珍香蒟蒻椰果 ($13)   再幫家姐買罐粗粒花生醬 ($28 特價)

買完再去惠康買麵包   再去成興隆買 3 Pack 排骨粒   買完又去超人燒鵝買半隻燒鴨   最後去袁記雲餃買水餃雲吞   望下隻錶已經 11 點鬆啲   所以番轉頭去新占記買鳳城水餃喇 ~

買埋水餃雲吞就載滿一架車   燒鴨就手拎喇   上次擺喺啲嘢上面   因為啲嘢擺得唔平均   燒鴨啲汁漏哂出嚟   好在有膠袋袋住咋   唔係真係抹到暈呢   哈哈

番到屋企已經 11 點半   原來用咗兩個鐘時間買嘢   不過我一個人買嘢就會慢慢睇下咁嘅   難得星期日輕輕鬆鬆唔駛趕嘛 ~

煲埋湯就即沖涼洗頭   一陣瞓覺就唔駛開多部冷氣   哈哈 ~

里奧大人 2 點半番到屋企   可以即刻開餐喇 ~

袁記買咗半磅韭菜鮮肉餃拚鮮肉雲吞   我初初覺得好少   所以加多 2 隻鳳城水餃喇

半隻燒鴨 ($70)   諗住係晚餐   不過都無食過

3 點 20 分瞓到 4 點 10 分   我覺得自己無郁過咁呀 ~

起身整下呢樣嗰樣   之後再熨埋衫   咁又已經 5 點半喇   里奧大人啱啱起身 ~

是日晚餐 - 鳳城水餃 (外賣) + 青紅蘿蔔粟米螺頭豬骨湯

鳳城水餃 (外賣) - 中午食剩㗎   今晚當晚餐   因為飲湯食湯渣好飽   食唔落燒鴨同飯呀 ~

青紅蘿蔔粟米螺頭豬骨湯 - 我加咗 $50 西施骨   仲有 3 條紅蘿蔔+1條青蘿蔔+1條粟米   所以今次個湯都好清甜呢 ~

洗埋碗抖陣   咁唔覺好攰   所以同里奧大人一齊去做機喇 ~

番到屋企即開機洗衫   之後沖涼休息 lu ~

呢期啲豬腰芒都幾甜   仲只係 $18/3 磅   不過真係唔敢成日食   上次狂食之後濕疹發作呀   感恩唔駛睇醫生咋 ~

無得睇 "中年好聲音" 同 "臥底旅行團"   我覺得好悶呀   里奧大人話估唔到我會咁講   哈哈 ~

睇下 Youtube   今晚 11 點都要瞓覺喇 ~