鯖魚拚蝦卷咖哩卷 ( 19-JUL-2025 )

( 19-JUL-2025  SAT )

尋晚發夢見到菜仔呀   好似延續落去咁   哈哈   個夢仲要係傾完偈就幫佢執嘢   執到 2 點 55 分先走呀   之後鬧鐘響 lu ~

今朝把聲拆咗呀   可能尋晚成日大笑又多嘢講呀 ~

同里奧大人出去食早餐   呢樣係我星期六番工最期待嘅   哈哈 ~

菇場唔忙就同阿花 Whatsapp 啦   話咁快又 12 點 ~

放工即走   里奧大人話要開會   我話無問題啦   我去惠康買嘢先   之後番屋企放低   搞掂就收到里奧大人電話話放工喇 ~

諗住食口水雞飯   點知放假無開   咁食米線啦   里奧大人話去食台灣嘢   不過我話唔想行咁遠呀   我好肚餓呀 ~

食完就去買菜買麵包   再去 HKTmall 買陽光香印提子   里奧大人就要番公司處理 Urgent 嘢喇 ~

番到屋企即沖涼洗頭   頭先流汗流到好似喺水入面撈上嚟咁呀 ~

抖陣又要執下嘢   尋晚買咗啲乾貨又要放入雪櫃嘛   呢排其實個人比較攰   好多時買完啲嘢求其放喺度就算   我都頂自己唔順呀   哈哈 ~

山渣 ($11/包) / 雪梨乾 ($25) / 生熟薏米 ($20) / 南北杏 ($20) / 蜜棗 ($18)

醫生日記鵝油辣椒 ($59) / 張財記辣椒醬 ($49) / 大孖醬料新彊孜然粉 ($15) / 香茅粉 ($15) / 悅和醬園鎮江香醋 ($15)

抖陣就熨 2 機衫   里奧大人 4 點左右先番到屋企 ~

睇新聞見到 "天文台考慮淩晨改發 8 號風球"   咁真係打得成風   今次都預咗打得成   因為今日全日都風平浪靜呀 ~

我又係想嘔咁   可能頭先又流咗成身汗呀   但我徑步爆汗又唔會咁㗎喎 ~

今晚煮個通粉比里奧大人   我就咁食少少餸就可以了 ~

是日晚餐 - 鯖魚拚蝦卷咖哩卷

鯖魚拚蝦卷咖哩卷 - 今次買嘅鯖魚實在太多骨   本來想一次過煮 4 條   不過今晚無胃口囉   真係好唔想再見到啲鯖魚呀   哈哈 ~

洗埋碗就開機洗衫   里奧大人去做機   我就休息下喇 ~

同里奧大人差唔多 9 點半先睇 "貴公子"   估唔到幾好睇喎   我第一次睇金宣虎做戲咋   覺得佢做戲都好好   同埋幾靚仔呀   哈哈 ~

今次都好爽甜   以前細個好鍾意食細細粒無核嘅青提子   不過之後都好耐無出了

終於睇到 11 點半   之後睇多陣 Youtube 笑下先瞓呀 ~