鯖魚拚蝦卷咖哩卷 + 超甜粟米 + 脆門鱔魚皮 (外賣) ( 11-JUL-2025 )

( 11-JUL-2025  FRI )

尋晚係熟睡狀態   即係完全無發夢   今朝鬧鐘響直頭唔想起身呀   仲諗緊係咪里奧大人無熄星期六鬧鐘   哈哈 ~

早餐食叉燒包 + 茄汁薄餅   好味好味 ~

菇場忙咗一陣   但今朝啲時間過得好快咁呀 ~

Lunch Time 蒸完飯就出去行陣   尋日落咗成日雨   今日無咁熱喎   我行咗半個鐘都伙出汗 ~

同阿齋傾開佢隻狗已經 13 歲   個腎有啲問題喇   好記得識佢嘅時候   隻狗仔係幾個月   依家年紀算大喇   佢都好怕隻狗會走   雖然大家把口都話會預咗   但點都好唔想面對呢一日嘛   始終我哋同隻狗一齊生活過   唔係話探佢就當係同佢生活過咁   佢話佢啲朋友又係講得好輕鬆咁   我話因為佢無養過狗囉   嗰啲人永遠唔知我哋嘅痛囉 ~

傾咗成個鐘呀原來   再望個鐘已經 2 點   好在西瓜無行出嚟咋 ~

唔忙又上網睇下嘢   其實個個都係咁   如果大家平排坐   真係勁似網吧呀   哈哈 ~

放工買埋炸魚皮同雞骨草就番屋企   去到巴士站就啱啱有車   感恩感恩 ~

番到屋企就即預備晚餐   點知里奧大人 7 點鬆啲先番到屋企   我今晚仲煮拉麵   所以要等佢番嚟先可以煮   如果煮飯就唔駛等喇   真係邪呀 ~

是日晚餐 - 鯖魚拚蝦卷咖哩卷 + 超甜粟米 + 脆門鱔魚皮 (外賣)

鯖魚拚蝦卷咖哩卷 - 一次過焗真係勁方便   所以咁多家電   我最鍾意係焗爐呀   哈哈 ~

超甜粟米 - 食粟米又係勁方便   因為唔駛浸同切呀 ~

脆門鱔魚皮 (外賣) - 好想食就買啦   不過食咗 2 塊就唔想食   好在可以番咋 ~

洗埋碗就抖陣   之後同里奧大人一齊去做機   都係 25 分鐘   因為今晚比較攰呀 ~

沖埋涼就開機洗衫   搞掂就休息下先 ~

同里奧大人一路食蕃薯糖水一齊睇農夫講鬼故   之後再睇佢另一個節目講鬼故   我睇咗一陣就話唔睇呀   背景音樂同個氣氛好恐怖   我有啲驚呀   哈哈 ~

我要睇陣 BAO Faimly 先瞓呀   不過都係睇到 11 點半先瞓覺 ~