芝麻雞 (外賣) + 粟米蘑菇蛋花湯 ( 3-JUL-2025 )

( 3-JUL-2025  THU )

感恩瞓得都唔錯   因為我驚食咗榴槤會熱醒嘛   反而今次到里奧大人話半夜流汗熱醒咗呀 ~

今朝又係里奧大人出去買早餐   買咗餐蛋治 Share 食   我覺得食蛋治係飽好多咁㗎 ~

里奧大人陪我等車   因為班車早咗呀   所以依家好早番到菇場呢 ~

菇場忙咗陣   搞掂就做自己嘢 lu ~

阿細番咗嚟   所以請公司同事飲茶   我哋張枱坐齊人   咁阿怪遲嚟就坐老闆嗰枱   之後阿輸叫佢坐我哋張枱啦   佢勁嬲㗎   又啤啤共又口噏噏   等阿姐開多個茶位期間   佢又走咗出去   番埋位仲恐怖   黑哂臉咁望住手機   之後又摺摺聲   嚇死阿蟲   咁到點心上枱   佢又坐正喺阿 B 同阿蟲中間   如果佢挨近阿 B 同阿蟲其中一邊都無問題   依家佢咁坐就變咗兩邊得少少位咋   本身阿蟲同佢個位中間係上菜位嘛   佢咁坐法咪阻到人上菜囉 ~

船頭好聲氣叫佢坐過啲   因為係上菜位   佢好大反應話呢個唔係上菜位嚟㗎   我走喇唔食喇   真係發神經   咁阿輸問咩事   阿蟲咪講番出嚟囉   西瓜話係咪去洗手間呀 ?!   我話唔係呀   佢話唔食呀 ~

等點心期間   阿 B 講咗好多阿怪嘅怪嘢比我哋聽   雖然知佢顛   但做埋啲嘢真係難以想像 ~

叫點心嘅時候   我咩都話好呀   阿蟲話下次要封住我個咀   之後阿花都話個個都唔敢叫   所以我幫佢哋叫咋   我哋叫咗29 碟嘢呀   只係食剩少少炒麵+2件紅米腸   不過有啲都比咗隔離枱食嘅   哈哈

阿花話我夾哂比人食   之後就話都叫做食得哂吖   同埋其實好哋真係幾大食   阿花喺度大笑呀   話幫妳食哂先咁講   叫我收聲呀   哈哈 ~

阿怪一番到嚟   即行去小說個位好大聲又無禮貌咁問 System 嘅嘢   佢自己剔咗又話唔知邊個剔   講嚟講去都係嗰句   之後小說好大聲同佢講: 講完 走   阿怪勁樣衰咁番埋位   但又死唔斷氣咁繼續講   又講到口窒窒   因為佢自己衰咗嘛 ~

阿怪話個 Apps 點解全公司有得佢無 ?!   小說話呢個 Apps 全公司都唔會用   同埋都諗住剷走㗎喇   阿怪又重覆講話個個都有點解佢無 ?!   小說話咁西瓜電腦裝嘅 Apps 係咪妳都要裝埋一份呀 ?!   人有妳有   係咪做咩都要通知妳呀 ?!   阿怪即刻收聲   好在小說夠惡   唔會比佢蝦到囉 ~

唔忙就繼續做自己嘢喇   放工就去買雞骨草   咁我慢慢行嘛   差啲走咗班車呀 ~

買埋芝麻雞就番屋企預備晚餐   里奧大人 6 點半番到屋企   不過仲未食得呀 ~

芝麻雞 ($49 免斬)

是日晚餐 - 芝麻雞 (外賣) + 粟米蘑菇蛋花湯

芝麻雞 (外賣) - 唔想煮餸呀   所以去大家樂買隻雞   只係 $49 (免斬)   估唔到幾好味喎   鹹鹹香香咁   同埋啲肉唔 "鞋" 呀 ~

粟米蘑菇蛋花湯 - 本身買咗茄子   不過中午食得太飽唔想食咁多嘢   所以飲粟米湯喇 ~

洗埋碗就沖涼   之後叫里奧大人幫我染髮喇 ~

同里奧大人一齊睇 "旅行最緊要近"   不過半個鐘好快睇哂   睇完又睇下 Youtube 咁啦 ~

呢幾盒提子又爽脆又甜   可惜糖份高啦   唔係真係想晚晚都食呀   哈哈

睇到 11 點有啲眼瞓   要即刻入房瞓喇 ~