香辣乾鍋雞 + 招排生炒骨拚泰式豬扒 + 腐皮卷 + 酸齋拚齋鴨腎 (外賣) ( 7-APR-2026 )

( 7-APR-2026  TUE )

今朝 9 點醒醒哋   咁里奧大人叫我瞓多陣   之後一瞓瞓到 10 點半呀 ~

但發咗好多夢囉   臨醒個夢係同阿花出 Trip 去 Cambodia   但我係喺家姐屋企出發   因為出機場好近   咁起飛前 1 個鐘先起身   拿拿聲刷牙換衫   去到機場係起飛前 20 分鐘   我話仲未 Check-in   里奧大人即刻叫我打比阿花問國泰喺邊條 Line   但我 Whatsapp 只有視像通話   咁我同里奧大人講佢會上埋鏡   之後鬧鐘響 lu   個夢係超級緊張   所以雖然係自然醒   但起身嘅時候好似扎醒咁囉 ~

咁起身就開焗爐焗麵包   聽到叮一聲諗住拎出嚟   點知原來無開焗爐又要再等   哈哈 ~

早餐食迷你朱古力牛角包+日式迷你牛角包   尋晚喺 Cantevole 買㗎   $24/8 件都抵食   同埋又好味呢 ~

食完抖陣就開機洗衫   搞掂就沖涼   抖陣就熨衫 ~

唔知係咪做咗一輪嘢   覺得好餓呀   所以 1 點半都出門口去佐敦食午餐喇 ~

成都老城口水雞 ($58) - 呢個嘅口水雞真係好好味   雖然四川擔擔麵都好味   但下次都想食飯   咁可以撈埋啲汁   哈哈

四季老壇酸菜魚 ($68) - 份量都多呀   不過都食得哂   因為我想食魚

食完就去裕華行下   估唔到又有康樂祺   不過無得玩呀   因為 2 張枱都有人呢 ~

行完食品部就去蓮花買齋   最後去埋權發買淨餸   其實 $53 都算抵   話哂起碼唔駛自己煮嘛   哈哈 ~

最後買埋芒果糖就走喇   今日好焗熱   所以好想番屋企呀   哈哈 ~

芒果果汁軟糖 ($75) - 里奧大人鍾意食㗎   所以買大包   可以拎番公司請同事食

睇 Apps 顯示 4 分鐘就有車   行到去啱啱好就有車   感恩感恩 ~

里奧大人喺房睇電腦   我就喺廳瞓咗 1 個鐘呀   佢話佢都有瞓呀 ~

雖然已經 5 點 20 分   但都係同里奧大人一齊去做機   咁今晚食完飯就可以休息喇 ~

做完機都要預備   今晚只係焗熱就搞掂   勁方便呀 ~

是日晚餐 - 香辣乾鍋雞 + 招排生炒骨拚泰式豬扒 + 腐皮卷 + 酸齋拚齋鴨腎

香辣乾鍋雞 - 呢個辣辣哋幾好味㗎   同埋我鍾意食蓮藕㗎 ~

招排生炒骨拚泰式豬扒 - 因為帶飯   咁實會叫菜類菜式呢 ~

腐皮卷 - 好似 $22   都幾多餡料呀   下次有機會再去就一定買嚟食 ~

酸齋拚齋鴨腎 - 我買大盒 ($55)   因為難得出去佐敦   哈哈   同埋真係好味道嘅 ~

洗埋碗就沖涼休息   睇多陣 Youtube   今晚 10 點 45 分都瞓覺 lu ~