感恩下午茶 + 食棧 ( OCT-2007 )

尋日番到屋企差唔多下午茶時間   見到酒樓外面有 10 幾人排隊   所以我唔蝕底又排埋一份   因為呢間酒樓次次都好多人排隊等位   見條人龍唔係太長   博下運氣啦   等咗 35 分鐘就可以入座喇   仲要係里奧大人一嚟到就有枱嗰隻添呀   梗係我一路等一路祈禱   求神保守里奧大人嚟到嘅時候係有位   等佢可以快啲食完快啲做功課呀   所以呢餐下午茶叫做感恩下午茶呢 ~

同里奧大人合力叫咗鴛鴦雙潮 ($11.8) + 粟米花枝餅 ($11.8) + 蘿蔔糕拚馬啼糕 ($11.8) + 生磨合桃露 ($5) + 上素蒸粉果 ($6.8) + 香茜牛肉腸 ($12.8) + 爽脆海哲 ($20) + 叉燒瀨粉 ($14.8)  + 蟹粉小籠包 x 2 ($36) + 碧綠灌湯餃 x 2 ($23.6) + 支裝可樂 ($5)   我同里奧大人從未試過下午茶食咁多嘢   真係要食下停下食下停下先清哂枱面啲嘢食咋   埋單$188.50   我覺得好貴呀   人哋特登去飲下午茶係因為貪平   點之要成左兩舊水找數   之後里奧大人就話梗係啦   博命剔嘢食   又唔知自己剔親都係啲特點優點 ~

雖然食到成 4 點   因為太飽太飽   所以一定要行一陣先番屋企   我覺得係一個好悠閒嘅下午呀 ~

番到屋企里奧大人當然又係咁趕功課啦   而我就做下家務先   因為大食表妹會上嚟我屋企教我做功課   我唔想比人見到我間屋咁亂呀 ~

7 點 15 分左右表妹打嚟話差唔多到我屋企附近   嚇到我同里奧大人嗌救命   點解 ?!   我哋未肚餓呀   仲要係飽嗰隻添呀   但無理由唔同表妹食晚飯家嘛   我哋去咗食越南菜   事先同表妹講到明唔好預我同里奧大人食咁多嘢   因為啲野真係仲未落格   但表妹話佢好肚餓好肚餓喎   所以叫咗 2人餐 ($168)   有咖哩牛腩煲 + 2 件蒜蓉包 + 生菜包 + 春卷 + 炒粉皮 + 椰汁冰 + 薄荷梳打水   我同里奧大人每樣食少少咋   其他嘅表妹真係掃哂呀   勁呀   里奧大人同我講咗句   之前驚表妹食唔哂既疑慮係多餘既 ~

番到屋企唔理三七廿一擺陣做功課   唔想再拖呀   同埋有啲攰想快啲攪掂   我發覺如果真係要認真做功課一定要出去搵地方做   唔可以喺屋企做   因為太多引誘會唔專心   好似我表妹一路教一路問其他野講下其他野   我真係有啲掹   好認真話快啲啦   唔好講啲無謂嘢啦   我好攰呀   咁佢先無咁多嘢講咋   差唔多做完時   里奧大人又差唔多做完出嚟傾咗陣偈   之後就送表妹走 lu ~

整呢樣嗰樣再沖埋涼   又成 12 點幾先瞓呀 ~

麥當勞 ( OCT-2007 )

尋晚要番學   放工就即刻急步走   因為好想去買下野 Relax下先番學呀   去咗九龍城廣場行一陣   好開心呀   因為比我見到我好恨行嘅 $10 店呀   忍唔住行左陣   都幾大喎   好吸引呀   但我要番學呢   所以就好恨心同自己講 "妳嚟買野定番學㗎 ?!"   即刻走去樓上食麥當勞   食咗脆辣雞腿包套餐配可樂   好熱氣呀   但唔想食粉食到成身汗熱辣辣呢   一路食一路個心仲係 $10 店度   好難平伏咁興奮既心情呀   但都要同自己講 "我嚟番學唔係嚟買嘢"   食完真係差唔多時間番學   落去見到 $10 店真係好唔捨得呀   回頭望多次就算喇   之後打比里奧大人   話做完功課一定要帶 3 個環保袋嚟九龍城廣場 $10 店掃貨   我唔想有遺憾呀   里奧大人話我真係黐黐哋線   咁鐘意買嘢 ~

番到學校好有心機上堂   所以覺得好快就落堂喇   一路行一路諗 Case Study 行錯方向   咁啱見到里奧大人   原來里奧大人嚟咗接我放學呀   比驚喜嗰隻呀   佢仲以為我扮野行去佢嗰邊添呀   係冤枉㗎   我無扮野㗎   不過我真係好開心   因為真係估唔到里奧大人會接我   佢話到班車先趕度蹳接我放學咋   去度拍巴士門嗰隻   如果唔係就要各自番屋企等㗎喇   真係好感謝神嘅保守帶領呀   之後番到屋企附近食辣魚蛋 ($15) + 腸仔 ($2) + 白蘿蔔 ($4) + 燒賣 ($4)   好好好好飽呀   番到屋企要執下嘢先可以瞓   因為大表妹會嚟我屋企教我做功課呢 ~

~~~~

今日係 Off   瞓到 9 點   因為要去銀行搞野呀   又無咩胃口   所有去咗 KFC 食牛角包 + 阿拉伯加咖啡 ($12) ~

之後番屋企沖涼洗頭就出發去表妹度剪頭髮喇   今次係係咁易修下把秀髮   所以 45 分鐘就搞掂   Perfect 啦   仲有時間比我周圍行下   我好少去荃灣   所以覺得好新奇   又見到有 $10 店呀   不過唔行 lu   因為知道九龍城有   行第啲好過啦 ~

行下行下去榮華買咗金華火腿芯 (特價 $30)   南貨舖嘅菜脯 ($6) + 磨豉醬 ($13) + 辣麵豉 ($14) + 花椒八角 ($6)   好開心呀   因為好難有南貨舖頭㗎   咁樣叫唔叫做買到心頭好呢 ~

鎮江骨 + XO 醬炒甜豆拼龍蝦丸 + 番茄薯仔瘦肉湯 ( OCT-2007 )

尋日叮飯時   聞到有鎮江骨嘅味   好想煮呀   所以即刻 Search 鎮江骨食譜備用   仲諗埋是日
晚餐   就係鎮江骨 + XO 醬炒甜豆拼龍蝦丸+ 番茄薯仔瘦肉湯   之後無無聊聊又放工喇 ~

又於啲鎮江骨係要時間嚟燜    所以一落車就快手快腳去超市買一字排骨($15) 同瘦肉 ($6)   之後再去街市買 3 個番茄 + 1 個細薯仔 ($5) + 1包甜豆 ($12) + 1 磅龍蝦丸($20) 再加多 1 份紅色既梨仔 ($5)   因為未食過呢啲梨仔   所以唔識揀邊份靚啲同甜啲   咁梗係叫阿姐出手啦   佢一路揀一路笑咪咪一路口噏噏咁話靚啲靚啲   揀啲靚啲   食咗 BB 都靚啲   天呀   唔係以為我係大肚婆呀化??我着娃娃裝啫...真係一時大意唔記得縮肚就出事喇   不過我覺得係因為我烏低身揀梨時   有風吹埋嚟   件娃娃裝咪吹起脹卜卜囉   實係咁喇 ~

番到屋企又係好似打仗咁   放低袋洗個臉就嚟㗎喇 ~

鎮江骨 - Recipe 話買 1 斤一字排骨或者 1 斤金沙骨   但我唔知 1 斤即係幾多   同埋覺得金沙骨係需要多啲時間黎燜   所以決定買 $15 一字排骨喇   首先醃排骨   校好調味料   炒香啲排骨再加調味料加水   燜左半個鐘...嘩..好在自己心血來潮睇下煲野咋...唔係又煲燶㗎   因為一開蓋已經無哂水   差少少就燶喇   嚇到我即刻熄火呀   好在見到有啲杰杰地嘅汁喺啲排骨度   好正呀   我就係想煮到咁   不過如果再多啲汁就更好囉   呢個骨我係混合幾款 Recipe 嚟整嘅   係以自己方便同屋企有咩醬料為大前題㗎   買嗰時覺得好多   但煮出就好鬼少   多個人就真係唔夠食   但我同里奧大人就啱啱好   連埋帶飯喎   啲骨就鹹咗啲   可能用多左生抽嚟醃   而個汁就好好味 ~

XO 醬炒甜豆拼龍蝦丸 - 首先拻衣   再加鹽飛水然後放落冰水度 Keep 住啲色   龍蝦丸又飛下水   無咁 Dirty   之後加埋 XO 醬炒炒炒搞掂   啲豆好爽   但成個餸唔夠惹味  比樽 XO 醬樽面呃咗呀   寫到大大隻 Extra Hot   咪就住就住唔敢落咁多囉   驚里奧大人頂唔住呀   點知一啲味都無 ~

番茄薯仔瘦肉湯 - 切番茄薯仔瘦肉   水滾一野掉哂落去滾   唔想再滾呢個湯   無味嘅   唔通 3 碗水多得滯 ?!   但兩碗水又唔過面喎   唔通番茄唔夠多所以唔甜 ?! 唔通滾得唔夠時間 ?! 

我唔駛煮飯時   覺得 Recipe 無咩用   依家無 Recipe 無我呀...仲有最正係市面有 n 咁多醬料呀 At least 我可以同人講識煮麻婆豆腐   回鍋肉吖   唔識煮啲人就以為好勁   其實只要妳有一包醬料喺手   整咩都得啦   駛鬼自己再調味咩 ~

尋晚食完飯即刻同里奧大人急步去 OK 換甜品書呀   驚無呀   本書原價 $118   依家買儲兩個 U Magazine 印花加 $18 就可以擁有喇   番到屋企即刻睇   整一樣野要用好多材料   我極其量只會整佢其中一款既曲奇同西米露   其他 No Way 啦   因為個廚房實在唔可能再容納咁多野呀 ~

今朝好開心呀   因為唔係咁多人排隊等車   我 8 點 50 分到左公司附近添呀   真食可以好享受我既早餐喇   食咗吞拿魚治烘底 (走牛油) + 熱央 ($15)   仲可以一路睇雜誌一路慢慢咀嚼   好正呀 ~

晏晝帶咗飯   所以可以一路食一路上網   好悶但唔想出街   因為出面太焗喇 ~

打邊爐 ( OCT-2007 )

又係好攰   又係心大心細煮唔煮飯好   打比里奧大人問下佢想點先 ~

我: 老公   打唔打邊爐呀 ?!   樓下間酒樓平呀   $65 咋

里奧大人: 吓   咁熱邊有得打邊爐㗎

我: 有   點會無喎   酒樓啲冷氣咁大   點會熱喎   你好似唔係好想咁嘅   算啦   無所謂啦   我煮飯吖

之後里奧大人再打比我話: 等我番到屋企睇下樓下間酒樓有無得打先   再打比妳啦   妳睇下我對妳幾好   睇下妳睇第時會唔會好似我對妳咁好咁嚟對我   無非都係想講呢句 ~

一上車好似上左雪房咁   涷到震呀   落車之後成對肉臂仲係冰涷㗎   好在有帶披肩   唔係肯定涷死   最討厭呀   因為有幾個後生仔喺度扮勁大大聲咁講嘢   嘈到死   好在我又有帶 MP3   唔係肯定煩死呀 ~

坐到半路   里奧大人打電話嚟

里奧大人: 有得打邊爐喎   $98/位   打唔打呀
我: 咁貴嘅   之前 $65 咋噃   打喇   我煮飯啦
里奧大人: 打囉   唔緊要啦   依家咩都加   無 $65 㗎喇   打囉   間唔中一次半次
我: 唔喇   我煮飯啦

里奧大人: 好啦   妳話事啦

之後我都仲係爭扎緊點好   因為實在太想打邊爐喇   終於隔左一陣打番比里奧大人話都係去打邊爐咯   里奧大人話好呀   先到先等吖   其實我好驚里奧大人話我好煩呀   又打又唔打   係咪女人係咁煩嘅呢 ~

我哋叫咗個鴛鴦湯底 (沙爹/清湯)   由於係自助形式   所以我自行拎咗幾款菜同粟米蘿蔔   等啲湯底甜啲   再叫咗豬潤 + 芝士腸 + 黑椒牛丸 + 鯪魚滑 + 墨魚滑 + 鯇魚片 + 水魷魚 + 公仔麵 + 兩碟肥牛兩罐汽水 一罐啤酒   今次勁呀   食得哂啲嘢   食唔哂鍋入面啲野要罰 $100/1 磅㗎   淨係強調鍋入面啲嘢食   咁如果係無食過嗰啲   係咪會循環再用呢 ?!   雖然啲野食就麻麻哋   個湯底又無味   不過算啦   自己買料番嚟都要成百蚊   仲要食前食後洗餐死   又要特登開大啲冷氣   埋單只係 $194   抵既抵既唔駛洗野又有冷氣嘆   算吧啦算吧啦 ~

等埋單時    我 Show 喺超市買嘅戰利品比里奧大人睇   係一個 $2 既膠盒   係一個有埋整茸板既膠盒 (唔識點講)   真係好抵好抵㗎   里奧大人都用好欣賞嘅眼光話真係好抵嘅   仲加多句總之妳買到野就開心   唔理平同貴   係㗎   今次仲買到有用嘅平野仲好開心呀   就咁 Cheap Cheap 哋買個唔知咩牌子既膠盒都要 $10 啦   依家 $2 咋   我趕時間咋   唔係我肯定掃貨呀   好遺憾只買得一個   之後又無無聊聊咁講埋覆 Email 啲樣衰嘢   之前做 Merchandiser 好忙   成 7 點仲要覆 Email 比廠 (個心已經飛咗喺屋企)   手快快打咗 "X 小朋友" 我都唔知   第朝阿 Head Highlight "X小朋友" Send 番比我   我先知咋   佢話知妳好忙   所以係唔小心打錯啫   妳知啦   打速成係打完 "小" 字會出啲有關連嘅字   想按 5 (姐) 點知手快快按咗 4 (小朋友)   所以依家一打 "X 小姐" 就會不期然會諗番呢單樣衰嘢呀   對於我嚟講   真係畢生難忘呀 ~

尋晚里奧大人唔舒服   係咁包雲吞   話因為陪我打邊爐所以引發唔舒服喎   10 點 20 分 就瞓覺喇   見佢咁慘   同佢按咗一陣頸同 Shoulder   叫做做番啲嘢咁囉   唔係有排話我呀 ~

無幾耐   我都瞓 lu ~

~~~~

今朝車程比平時早咗成 10 分鐘   所以可以慢慢品嚐我嘅早餐   腿蛋治 (走牛油) + 熱咖啡 ($14)   慢慢品嚐真係好 Relax   覺得份腿蛋治特別好食   希望之後都可以咁啦 ~

今日有野做呀   太好喇   啲時間過得快啲嘛   晏晝要食番前晚嘅栗子東菇燜雞翼同紅米呀   食到反眼嘔白泡呀   經此一役   我對呢樣餸已經失去哂所以嘅興趣喇   真係要抖番十年八年先會再掂佢呀 ~

一路做野一路發夢   好想同里奧大人去旅行呀   因為里奧大人係會貼身照顧我㗎   買嘢食野絕對唔會手軟   最多番嚟怨我嘥嘢啫   可以買新衫去旅行   又可以影好多相   又可以買野   又可以 Relax   十幾萬樣好呀   好想好想再去多次日本   泰國同韓國呀   又好想去德國呀   因為我好鍾意德國國家隊㗎   好想見到 Frings Klose Lehmann Kahn 呀   好想去英國見波歷克呀   好想去美國見奇連士文呀   好想好想唔駛番工周圍去玩呀 ~

又好想里奧大人同我講   妳鍾意買咩咪買咩囉   幾錢唔緊要㗎   我比啦   最緊要妳開心   妳開心我就開心㗎喇   好呀   醒下啦 ~

栗子冬菇燜雞翼 + 豆豉鯪魚炒油麥菜 (嘔血版) ( OCT-2007 )

尋晚放工時好攰好肚餓   所以去奇華買左包南乳小鳳餅 (即係雞仔餅) $12 有 5 塊   排隊時食咗兩塊   當堂飽哂   其實細細好鍾意食雞仔餅同南乳餅   所以爸爸成日買好多番嚟   就係咁食到驚咗   係呢一兩年先無咁抗拒咋   其實某程度上我係想諗番童年時嘅回憶好開心呢 ~

一路坐車一路爭扎   煮飯定唔煮飯好呢   想煮咖哩雞翼   但又想栗子燜雞翼 (之前煲湯剩咗 20 粒栗子)   打邊爐但又想食上海嘢   點算好呢   人生太多選擇喇   不過為咗里奧大人   唯有犧牲自己   剝削自己休息嘅時間黎煮飯啦   後步履緩慢咁行去街市買棵菜就番屋企喇 ~

番到屋企無幾耐里奧大人就番到喇   好開心啦   見到佢個公事包脹卜卜   又見到有個紙袋   以為佢送個 MTR 嘅 Keroro 比我   都無嘅   嗰刻真係對佢恨之入骨呀   哈哈   所以之後叫佢做野囉   就係幫我開罐豆豉鯪魚   因為好難開   次次開都係開得頭同尾   中間部份係永遠都開唔到   煮嗰時要"撬"去再用筷子撩啲鯪魚出嚟   好煩呢   諗住自己可以省咗啲功夫   點知突然聽到里奧大人 "呀" 一聲   原來成罐鯪魚跌咗落地下呀   天呀   真係激到嘔血呀   成地成枱都係油   仲彈到我個布袋都有添   成間屋都散發住鯪魚味呀   之後佢即刻用熱水拖地   我再叫佢用梘液洗個袋   再用滴露浸地拖呀   我唔想拎住個袋同埋拖地時每個角落都有鯪魚味跟身呀   忙完指令就開始煮晚餐喇 ~

栗子冬菇燜雞翼 - 栗子係之前煲湯剩落   雞翼 (9 隻) 就係前一晚醃定   再加幾隻浸軟咗嘅冬菇囉   我多數係煎香啲雞翼 (半熟) 再落冬菇同栗子   兩三湯匙蠔油同少少豉油   大火燜一陣就細火燜半個鐘   又幾好味噃 ~

豆豉鯪魚油麥菜 - 我多數用鯪魚起鑊   因為啲鯪魚好多油   連油都慳番呀   之後加埋啲菜係咁炒炒炒   但炒到咁上下覺得點解無味出嚟嘅   原來嗰罐係鯪魚   唔係豆豉鯪魚嚟   好在屋企有豆豉咋   即刻用熟練既刀法剁碎去   之後再係咁炒炒炒   幾多呀   但點解頭先跌瀉時好大陣鯪魚味嘅 ~

尋晚用咗 40 分鐘嚟煮飯   我覺得成績十分好呀   里奧大人仲話好好味添   真係老懷安慰咯   之後里奧大人話切蘋果食呀   呢排佢都幾好   成日都主動切生果比我食   仲係切片添   唔係成個隊埋嚟嗰啲喎   不過佢都係懶底   因為尋晚見佢係自己拎住個蘋果嚟係咁咬係咁咬   咁點解唔切埋佢呢 ~

太攰喇   所以 11 點就瞓 lu   發夢醒咗   啱啱想瞓番正自己個位   點知鬧鐘響呀   見個天落雨仲要快啲起身   因為實塞車同埋好多人排隊等車   搞到我唔記得查精華素就出門口喇   今日唔會太陽曬掛 ~

~~~~

今朝都好趕   但都去超市買咗 XO 醬先   因為驚晏晝落雨同埋驚放工去買會做番正價呀   所以買咗左先囉   發顛   之後加快腳步番公司   附近食早餐   食芝士火腿菠蘿包 + 涷鴦 ($15)   今次真係要大啖大啖咁食   因為遲大到呀   點解遲大到都要食埋早餐先番工 ?!   因為我想比自己 Relax 下   幾分鐘都好   同埋早餐午餐都喺公司食   好悶啫   再加埋無野做   真係會悶死 ~

番到公司無幾耐   Send SMS 比里奧大人話"為咗佢   我幾趕都買左支 XO 醬比你呀"   之後里奧大人 Send 咗啲相比我   心諗   啲相尋晚搞掂哂啦   Send 咩比我呀   一開原來係 MTR 嘅 Keroro 呀   真係好好好好好好開心呀   望住個 Mon 喺度笑咗好耐呀   估唔到里奧大人又會記得喎   因為我已經諗住同里奧大人講今日自己會去買㗎喇    點知里奧大人咁早已經買咗   我真係開心死   今朝又會咁啱大家買咗大家想要嘅嘢   不過我着數好多   哈哈 ~

晏晝食番尋晚啲餸   帶埋飯仲有栗子雞翼剩番喺度   唔係今晚都仲要食呀化   諗住出街行下   見到個太陽就打消呢個念頭 lu   因為今朝無搽防曬呀   索性睇報紙算喇   一起身見隔離同事食馬拉糕同大包   個大包好似塊面咁大呀   真係睇見都飽   但又令到我好想食喎 ~

每月一次之元綠壽司 ( OCT-2007 )

尋日同里奧大人一齊做功課   真係不得不佩服佢嘅專心   可以成日喺間書房到做做做   而我呢   就無佢咁勁喇   不過   我都有坐定定兩個鐘睇書做功課㗎   覺得對於自己呢啲懶人嚟講已經好勁㗎喇 ~

食飯前比自己抖下   寫下 Blog   睇下報紙咁   而里奧大人就睇下新聞咁   之後就去食飯喇   依期家用少咗   要慳啲錢   所有要去元祿食   因為有 75 折 ~

食咗蟹子 / 素魚翅 / 蟹子沙律 / 天婦羅蟹柳 / 三文魚既壽司 + 三文魚手卷 + 吉列炸蝦卷+ 蠔情卷   其實食嚟食去都係得嗰幾款   有啲悶   因為我同里奧大人唔係咁好魚生   小食又多數係炸   拉麵又太飽   又得兩個人   真係無咩選擇   不過 75 折大過一切啦 ~

番到屋企先知有煙花睇   所以快手快腳沖涼   咁就可以一路食薯片一路飲啤酒一路睇煙花喇   尋晚食咗暴君薯圈   辣到爆炸呀   仲辣過阿婆薯條呀   所以飲左少少啤酒中和下   呢排發現自己飲親啤酒或紅酒塊臉都唔會紅   咁係咪代表我個肝功能好呢 ?!   之前睇電視話飲酒唔臉紅係好㗎   唔通我真係睇左中醫之後個肝好咗 ?! 因為中醫師話要醫好個肝先再可以調理身體   唔好做咩都無用喎   好彩次次都話我個肝好靚啫   唔係唔知睇到幾時先完呀   不過我都睇左 6 個星期 lu   中醫師話 OK   可以停藥唔駛睇喇   太好喇   其一唔駛趕去睇   其二唔駛煲藥   其三唔駛空肚飲藥真係好難頂㗎   其四就係可以慳錢呀 ~

~~~~

今朝真係好唔想起身   可能之前兩日都瞓到 10 點   不過我唔會懶床   覺得嘥自己時間   橫掂喺車度可以瞓   所以即刻輕輕彈起身 煲藥 刷牙 沖涼 洗頭.吹頭.換衫 Gel 頭   半個鐘頭內要搞掂   務求 8 點前出門口   因為要排長龍等車呀 ~

今朝比自己食腿蛋治 (走油) + 熱咖啡 ($15)   慢慢咁咀嚼   易消化啲無咁肥呀   唔知點解杯咖啡飲到我想嘔白泡呀   但唔飲唔得   因為我心理上極需要它 ~

番到公司快手快腳做埋星期六未做完嘅野   要趕住同 CC MSN 呀   同 CC MSN 係我番工晚原動力嚟㗎 ~

晏晝好鬼開心諗住去赤丸食冷烏冬   好多人排隊呀   點等喎   最後食牛丸米加菜 ($18)   顛㗎   有成 5 粒牛丸同半碟菜呀   超大碗呢   點食得哂啫   食牛丸同啲菜都 7 成飽啦...所以食唔哂啲米粉呀   嘥哂添   之後去馬莎買咗支香水比家姐   再去 Market Place 行一陣就番公司喇   出面好鬼大風   有啲涷添呀   希望放工既時候唔好落雨啦 ~

番到公司又係等放工   究竟係好定唔好呢 ?!   話我知啦唔該 ~

黑椒牛仔骨意粉拌西蘭花 ( OCT-2007 )

尋日同里奧大人完 Tea 就去買室內無線電話   再去超市買梳打水   因為之前買左嗰 4 個青檸   點知無得買梳打水   是鬼但買雪碧算喇   務求係唔想再見到啲青檸啫 ~

由於里奧大人要瞓下   所以我就做下啲唔會嘈醒佢既家務同埋預備晚餐啲嘢先   浸西蘭花   切洋蔥粒   淥意粉   做完就喺梳化擺好個陣嚟睇書   點知里奧大人瞓醒   仲第一時間坐喺我個陣度添   咁唯有拖地啦   拖完地就準備晚餐喇   就係黑椒牛仔骨意粉拌西蘭花   牛仔骨 3 條 ($30)   我用韓國既烤牛肉醃料嚟醃左成晚   食嗰陣時會好入味   由於之前已經整好哂嘢   所以就咁炒意炒   連洋蔥一齊炒   同淥熟啲西蘭花   話咁快就搞掂 ~

幾慘呀   .頭先煎煎下牛仔骨先醒起無哂黑椒汁   搞到突然精神緊張   好在冷靜一會後   記得仲有包老李既黑椒雞柳醬   突然覺得自己好鬼醒   做人格言係買咩都係買左先係無蝕底嘅   所以啲人成日見到我個蚊型廚房有唔少嘅醬料 (10 樽 8 樽)   調味料 (10 樽 8 樽)   粉 (糯米粉 澄麵粉 + 粘米粉 + 麵粉 + 自發粉等等   油 (菜油 + Oliver Oil + Vanilla + 香油 Lemon 香油+ Pandan)   仲以為我煮野食好勁添呀   我都想呀   .其實真係好多野想煮   但好多都唔識呢   不過記得 Recipe 要用既材料咪買定先囉   費事突然間想整又要周圍搵材料   費時失事嘛   係咪 ?!   做咩突然咁多野講既 ~

我覺得個賣相唔錯啦   至於味就唔駛講   梗係 OK 啦   多謝老李出手相助呀   唔係點得嚟咁好食呀 ~

之後里奧大人又忙做功課喇   我就洗埋碗即刻沖涼   因為睇亞蘇   之後想睇書   但個頭好重   入唔到腦   所以開番電視睇   搞呢樣嗰樣   搞到成點先瞓   好在第日唔駛番工啫 ~

~~~~

諗住瞓到幾點就幾點起身   唔校鬧鐘   都好彩 10 點就醒咗   .唔係瞓得太耐又無哂啲時間做野   同埋又可以去大家樂食早餐呢   同里奧大人 Share 奶醬厚多士配熱咖啡 + 魚柳蛋 + 蘿蔔糕 + 麥皮配熱檸茶   好 Relax 呀   如果可以朝朝早同里奧大人食早餐就好喇   番到屋企洗埋衫   我就真係開始認認真真睇書做功課喇 ~

差唔多 2 點又要預備午餐 lu   好慳家呀   我食番尋晚剩左既意粉   加啲黑椒炒幾炒   而里奧大人就食番前日剩咗嘅水餃   再加多個米粉比佢就搞掂   食完大家又再努力做功課喇   至於晚餐呢   里奧大人命令出去食喎   話如果我煮飯會無時間做功課喎   又幾好人噃 ~