元綠壽司 ( MAR-2008 )

尋日無啦啦好忙   全部做嘅嘢都好急   真係做到人都顛呀 ~

又係唔想煮飯   所以放工可以慢條斯理咁行去搭車   又可以休休閒閒咁行超市   如果晚晚都可以係咁就幾好呢 ~

唔知點解次次唔舒服就好想食元綠或者係太興乳豬燻蹄飯   里奧大人都覺得好奇怪   不過今次唔去太興喇   因為經過見到只得一嚿好細嘅乳豬   等得里奧大人番到嚟蹳都比人食咗 lu   所以去元綠壽司 ~

去到又唔係咁想食   所以求其叫咗天婦羅蟹柳 / 三文魚 / 螺肉 / 蟹子沙律豆腐皮 / 素魚翅海蜇壽司 + 三文魚手卷 + 帶子裙邊 + 炒雜菜   可能成日都無咩點飲水   所以突然勁口渴   博命飲水   飲到飽哂   都食唔落嘢   但又唔飽噃   所以番屋企食生果算喇   今次埋單 $118   雖然有 Discount   但都係比我想像中貴咗添 ~

不嬲都覺得鬼線人 (Medium) 幾好睇   雖然有個鬼子   但都唔係咁恐怖   家姐尋晚好緊張咁打電話嚟叫我唔好睇鬼線人喎   話個鬼公仔好恐怖   睇完包我瞓唔着喎   比佢咁講   嚇到我死   所以即刻轉去睇有線又睇雜誌   驚唔覺得意按咗明珠台就死喇   啲人成日話睇鬼片唔驚   因為唔會諗   其實點會唔諗㗎   我記得睇貞子時   驚到去咗 6 次洗手間呀   好在坐喺單邊位   唔係比人鬧死   同埋有次睇大逃殺   睇完同朋友去洗手間   走嘅時候猛咁推門   推極都唔開   嚇鬼死   但原來對門係要拉嘅   所以我次次睇完啲恐怖或者驚嚇片   我就會疑心生暗鬼   要隔好耐先可以平復心情㗎   可能細過見過   有童年陰影呀 ~

~~~

尋晚里奧大人話涷   係都要蓋張羽絨被   攪到我有啲熱   一熱我就瞓得唔好   仲要發咗成廿幾個夢   真係慘 ~

今朝好好多喇   有胃口食到早餐   所以就食腿蛋治烘底 + 熱啡 ($15)   落完 Order 見到老細兩公婆   原來坐喺我前兩個位   .如果埋單實會見到我   所以我即刻轉位   如果唔係又要扮好趕咁食就無謂啦 ~

估唔到今朝會咁忙   忙到飲水都唔得閒嗰隻噃   無哂私人時間 ~

晏晝勁開心   因為同媽咪去美心皇宮飲茶   食咗皮蛋桂魚粥 (一窩) + 柚皮鳳爪 + 叉燒包   飽到唔識形容   今餐媽咪請 ~

車仔麵 ( MAR-2008 )

尋晚放工就慢慢冷番屋企   番到屋企第一件事係沖個超級熱水涼   真係舒服到不得了   之後就一路睇電視一路等里奧大人番嚟喇 ~

我唔煮飯而咁啱我唔舒服嘅話   車仔麵就係首選嘅晚餐   又快又方便嘛   由於我當時無咩胃口   但點都要食啲嘢落肚   所以就食咗少少餸   真係食咗好少   因為唔想里奧大人唔夠食   但食開又好想食嘢喎   所以就唯有食兒時零食 "脆脆蝦餅" 頂肚   勁好味呀 ~

食完又中下中下咁睇電視   終於頂唔順   10 點半就瞓覺喇 ~

~~~~

 

今朝都仲係唔多舒服   又無咩胃口   所以又係飲熱維他奶就番公司喇 ~

不過番到公司又無咩嘢   可能有嘢做   仲要係公私兩忙 ~

晏晝有啲胃口喇   食咗腸仔通粉 ($12)   好在有得外賣   因為實在唔想行落街   我覺得出面好大風好涷呀 ~

依排睇必瘦站嘅廣告   真係睇到頭都暈埋   講嘢又快   又用公仔遮住啲肉   又轉嚟轉去想轉移人哋視線咁   講真   Janice 有無瘦過   睇報紙雜誌都知啦   做咩無啦啦咁再做一輯新廣告   做得又求其   比人感覺仲古怪   真係唔明啲人   點解要瘦到排骨咁先至話靚   瘦到營養不良咁   好在我好滿意自己身形   瘦中帶肥   肥中帶瘦咁   哈哈 ~

住家飯 @ 媽咪屋企 ( MAR-2008 )

尋日雖然無嘢做   但都好開心唔覺悶噃   因為放工會去媽咪屋企食飯呀 ~

去到見到深愛嘅朱朱真係咩煩惱都無哂   真係好想養狗仔   但知自己無咩時間理   同埋最驚係有咩病痛就會擔心到顛   所以里奧大人絕對唔會比我養狗仔   算吧啦   得閒去媽咪屋企玩下朱朱咪算囉 ~

家姐無幾耐就番到屋企 lu   可以開飯喇   有豉油雞 + 辣椒麵豉蒸魚雲 + 芥蘭炒豬潤 + 椰子花膠紅蘿蔔豬𦟌湯   超級好味   好啱我食呀   有魚有肉有菜有湯   簡直係營養均衡呀   如果日日都係咁就好喇 ~

本來今晚喺媽咪屋企瞓嘅   因為里奧大人要大陸開會兼過夜   但我每月一到   所以都係番屋企瞓舒服啲   而里奧大人又擔心一個咁靚咁索嘅靚太唔舒服喺屋企無人照顧   所以幾趕都番屋企囉   成 12 點先番到屋企   沖完涼即刻要瞓覺   因為第朝又要開會   趕頭趕命咁辛苦   真係好心痛   所以啲人成日話唔舒服嗰個人係最嘆   唔駛郁手指指就有人服侍妳   最辛苦反而就係服侍妳嗰個   我覺得好啱聽 ~

~~~~
今朝個肚唔係咁舒服   所以就咁飲一支熱維他奶就算喇 ~

番到公司有嘢都唔做喇   因為個肚唔舒服   淨係成日伏喺枱到   直至到放工都係咁   辛苦到死   又唔想成日請病假   實在唔好意思嘛   因為成日都要覆診同北上睇中醫   咁啱阿 Head 又出 Trip   咁就更加唔好啦 ~

酸梅甜麵豉蒸排骨 + 韓式年糕 + 炒飯 + 節瓜鹹蛋排骨湯 ( MAR-2008 )

尋日真係好鬼多謝鬼妹犧牲鬼咁多睡眠時間同我傾偈   所以尋日啲時間過得好鬼快   真係好鬼開心   愛死鬼妹喇   所以滿腦都係鬼 ~

一早諗好煮咩餸   但又要同時間煲中藥 洗衫 收衫 拖地   所以時間好鬼緊迫   放工即走喇   有車就上   坐下層最入嘅倒頭車位   諗住聽 MP3 瞓覺   但入到隧道無耐   突然 "馮" 一聲   仲要 Feel 到架車震一震...好似撞到嘢咁   架巴士就停鬼咗   真係好鬼驚   但應該唔會係撞到人   因為係隧道入面   之後司機落車 Check 下車軚就開車...行行下又停   又再 Check 車軚之後又開車   又唔講咩事   但我估係爆軚   到出隧道口埋站又唔比人上車   但我聽唔到司機講咩   太遠喇   心諗如果架車有事   唔比人上車咁係咁叫所有人落車呢 ?!   但之後又比人上車   鬼咁奇怪   但我嚇到唔敢再瞓啦   如果唔係有咩事都知呀   唔知點解次次坐樓下都係會遇到爆軚嘅 ~

一落車就要飛去街市買 2 個節瓜 ($10) 就走喇   之前買 $5 份   依家就要獨立咁買   啲嘢真係貴咗好鬼多 ~

番到屋企第一時間切瓜滾湯   之後煲中藥然後拖地   做完鬼咁攰又有啲肚餓   所以食杯低脂乳酪就開始煮飯喇 ~

是日晚餐 - 酸梅甜麵豉蒸排骨 + 韓式年糕 + 炒飯 + 節瓜鹹蛋排骨湯

酸梅甜麵豉蒸排骨 - 次次用猛火蒸會好鬼 "鞋"   所以特登煲飯   放喺飯面蒸   果然真係鬼咁滑喎 ~

韓式年糕 - 年糕用水浸   其實好似係唔需要嘅   就咁拎出嚟解涷就得   但時間鬼咁緊迫   所以用水浸可以快啲軟   再用韓式辣椒醬炒勻   鬼咁好味 ~

炒飯 - 用蔥粒 薑粒 雞蛋加老抽一齊炒   鬼咁方便 ~

節瓜鹹蛋排骨湯 - 本來應該用瘦肉   但買開排骨   所以就用排骨滾節瓜湯   呢個湯好處係有瓜有肉又有湯   又方便又鬼咁有益   懶人首選呀 ~

到食飯時居然唔肚餓   可能之前食咗杯乳酪累事   但點樣都要食   因為越夜食飯會越肥   呢餐飯真係食得好辛苦呀 ~

~~~~

今朝里奧大人要見客   所以自己一個人搭車   今朝好鬼趕   所以只可以買燒賣粉果 ($10) 番公司食   再自己沖華田   因為我一定要飲甜嘢中和番啲鹹嘢   真係鬼咁麻煩 ~

個人瞓極都攰   今朝無飲咖啡仲更加攰得犀利   晏晝帶飯   但見到都無咩胃口   太攰喇   所以食完飯   唔鬼理肥唔肥就瞓喇 ~

蠔油燜冬菇雞膇 + 蒜頭豆豉脆肉瓜 + 蘋果豬展湯 ( MAR-2008 )

尋日里奧大人一番到屋企就瞓一陣   我就執嘢   之後睇電視   原來無線做肥肥嘅追思會   好多人參與呀   我覺得肥肥會好開心   因為咁多人懷念佢祝福佢 ~

一路睇一路喊   又驚嘈醒里奧大人   所以唔可以喊得咁大聲   睇見鄧光榮話欣宜無老豆   叫鄭少秋出嚟講嘢   啲人就起哄拍掌   我覺得唔係咁好囉   破壞哂啲氣氛   見到欣宜個樣都好尷尬咁   話哂自己 Daddy   點都唔想有人話 Daddy 囉   同埋呢啲係人哋家事   內裡好多嘢外人喺唔知   做咩要人出嚟解釋啫

羅家英都話佢哋離婚 20 年   要做嘅嘢係額外嘅嘢嚟   鄭少秋又有自己嘅家庭   到鄭少秋做到嘅時候   就話佢哋藕斷絲連    我都好同情鄭少秋   因為傳媒成日話佢唔探肥肥同埋同欣宜食飯   原來係欣宜唔想   想陪多啲媽咪   傳媒咁寫   鄭少秋都唔回應真係好好㗎喇   真係有苦自己知   不過都多謝鄧光榮嘅   比鄭秋有個機會同大家講出真相   欣宜真係好叻   因為佢講呢個係追思會   係想人悼念肥肥   唔想比啲有心人士再做咁多嘢   佢自己知道係咩一回事就得㗎喇   欣宜真係值得令人鼓掌 ~

睇完成個追思會   里奧大人就起身做功課喇   我就睇報紙等煮飯囉 ~

個人突然好攰   但明明瞓夠噃   終於醒起因為頭先喊過嚟   所以個人好攰 ~

但好攰都要煮飯   仲要係提早 1 個鐘頭煮   因為要燜冬菇 ~

是日晚餐 :蠔油燜冬菇雞膇 + 蒜頭豆豉炒脆肉瓜 + 蘋果豬展湯

蠔油燜冬菇雞膇 - 學 MuiMuimui 嘅    因為突然好想食呢個餸   冬菇 10 隻 + 雞膇 6 隻 + 蒜蓉 + 蔥段 + 乾蔥   冬菇學通少咁用豉油 麻油同糖醃   但我就醃咗半個鐘   爆香所有材料就用蠔油 + 老抽嚟燜   燜 1 個鐘多啲   我覺得賣相好掂咁呀   美中不足係啲冬菇好鹹   可能醃得耐得滯   我最鍾意係啲汁杰杰哋咁   撈飯最正   連里奧大人都話好味   真係好開心呢 ~

蒜頭豆豉炒脆肉瓜 - 用蒜頭豆豉炒   其實我覺得煮脆肉瓜都幾煩   太腍唔好食   要爽嘅就要炒下焗下又炒下咁   不過要有口感煩啲都無計啦 ~ 

蘋果豬展湯 - 係隔夜湯   隔咗夜仲甜噃   真係好好好好飲   本來想煲雪梨蘋果湯   但媽咪話煲一樣生果會出味啲   兩隻生果加埋反而唔出味   估唔到又真係喎 ~

早咗食飯早咗洗碗   因為想睇肥肥追思會   因晏晝有啲無睇到 ~

~~~~

又再一次證明自己夜晚食生果   朝早起身係特別肚餓   所以想減肥都要食芝蛋治烘底 + 熱啡 ($15)   因為晏晝帶飯   唔想成日坐喺公司食嘢   好悶啫 ~

又係發霉   CC 又唔得閒理我   好在要埋頭苦幹 Update Blog   唔係時間唔知點過 ~

又到食飯   又係尋晚嗰啲   冬東菇雞膇入哂味但好鹹   所以食埋半包 M&M 朱古力中和番 ~

我終於醒起   因為我食番中藥   受中藥嘅健脾開胃影響   所以成日都好開胃咁   原來唔係我大食呀   哈哈 ~

椰林閣 @ 大埔 ( MAR-2008 )

我覺得食完 Pizza 真係可以飽成日   所以都幾辛苦下~

由於呢排好乾燥咁   里奧大人又生痱滋   所以就蘋果湯比里奧大人潤一潤下喇   去超市買豬展 ($20)   再去街市買 6 個蘋果 ($20) 就可以番屋企喇 ~

番到屋企已經 5 點   問里奧大人想幾點食飯   佢話 6 點半吖   我即刻話唔好呀   食咗 Pizza 好飽   咁早食唔落   又要煲湯   唔好咁早喇   其實我遲早比佢丙   成日問完佢幾點食飯   佢答咗之後就話唔好   咁不如直接話幾點食飯好過喇   問完人又話唔好   好似講廢話咁 ~

煲完湯已經 7 點半喇   又係好想食海南雞飯   但想食果間實會好多人   求其去椰林閣食算喇   平時呢個時候好多人排隊   但今次無人排   覺得有問題   本來想走   但睇到有 "正宗海南雞飯 "   所以就入去試下 ~

同里奧大人 Share 食海南雞飯套餐 + 西冷扒拌意粉 (黑椒汁)   雞無味   飯係雞油飯   最特色係薑蓉係酸   甜酸醬係鹹   無黑豉油極到失望   而個西冷扒仲攪笑   拌菜嘅意粉多到睇見到驚   黑椒汁鹹到甩肺   呢餐真係好難食   再問里奧大人呢餐 OK 嘛 ?!   佢都係話難食   埋單 $120 咁嘅價錢又難食   之得去大家樂好過呀   平幾十又好食   食完行一陣消化下就番屋企喇 ~

番到屋企就飲湯   里奧大人飲完 1 碗又 1 碗實屬少見   因為個湯實在太清甜喇   呢個湯都好方便   材料只不過係 6 個蘋果 + $20 豬𦟌 + 適量南北杏 +  3 粒蜜棗   煲 2 個半鐘   但好甜好潤   下星期我會再煲嚟飲 ~

~~~~

今朝番祟拜   10 點 15 分要起身   求其食啲唔係咁飽嘅早餐   就係炒麵 + 燒賣 + 磨菇粟米粥 ($17)   見未夠鐘   天氣又好   所以就同里奧大人行路去教會當做運動   不過行到番教會就覺得好熱   真係有啲唔慣有太陽呀 ~

祟拜完同里奧大人去熟食中心食馳名豬扒麵   但太多人就唔等   之後再諗住食馳名魚蛋粉   又係太多人   里奧大人話唔好嘥時間等   唔等喎   好失望咁去魚蛋粉隔離擋食炸醬麵 + 雲吞牛丸麵 ($31)   係平但唔好食   最慘係望到隔離食緊魚蛋粉啲人嘛   有得睇無得食   好在飲番杯至愛嘅胚牙珍珠奶茶   如果唔係真係會好唔開心㗎 ~

食完去樓下街市買餸   因為我根鍾意去有冷氣嘅街市買嘢   我覺得好乾淨   啲嘢又唔係貴先好嘛   一大嚿薑只不過係十蚊   有多雜嘢買   所以順便買咗木薯粉 酸薑 米粉 酸梅麵豉   之後再買排骨 ($15)   經過亞婆豆腐花再買支豆漿同腐乳 ($25)   一大個環保袋裝到盤滿砵滿   好開心呀   不過真係難為里奧大人假期都要咁辛苦拎嘢啫 ~

見到有個叫拯救遺棄動物嘅機構   所以就用 $30 買咗個豬仔相架   雖然唔知幫唔幫到啲小動物   但我覺得好過唔幫囉 ~

去到 A1 又買番上次食果個芝麻火腿芝士包 ($12)   今次差咗啲   小咗好多料咁   不過都好食嘅
唔知點解   我唔係咁鍾意用酒醃嘢同煮嘢   咩酒都係   可能我次次飲得多酒就會周身痕   所以好怕酒   喺街市見到支迷你雙蒸酒就即刻買   最緊要係唔 "阻掟" 嘛...呢支我估坐底都可以用成年 ~

住家飯 @ 奶奶屋企 ( MAR-2008 )

尋日都幾得閒   無無聊聊咁過   睇得電腦多又眼濛又眼瞓   真係幾慘 ~

又唔駛諗煮咩   因為夜晚去奶奶屋企食飯   唔駛煮又有湯飲   幾嘆呀 ~

放工行一陣   再去 Baking Warehouse 買咗磚黑朱古力 ($44)   諗住遲啲整 Brownies   希望成功啦 ~

我估我真係未必會減到肥   因為太為食   所以計劃有變   依家完美減肥計劃就係多食多做運

動   少食少做運動   如果知道當日要熨衫同拖地嘅話   因為會消耗好多體力   咁我就會獎勵自己   比自己食適量零食先做嘢   咁就唔駛自己咁辛苦啦   不得不承認   呢個計劃真係超級完美呀 ~

終於等到里奧大人放工去奶奶屋企喇   尋晚奶奶同姑奶仲比埋生日利是我添呀   好開心呢   話說原來好耐之前奶奶叫里奧大人番屋企食飯   因為要比利是我   但里奧大人唔記得同我講   咁啱上星期日我就同里奧大人講   不如星期五去奶奶屋企食飯   順便比埋家用奶奶啦   里奧大人先醒起之前奶奶叫過佢番屋企食飯   又會咁啱嘅   所以我同里奧大人講   要加強語氣同奶奶強調   係我主動話番屋企食飯   唔係為咗封利是食飯㗎 ~

傾多陣偈就開飯 lu   是日晚餐有花膠螺片烏雞湯 + 魚 + 白灼蝦 + 白切雞 + 芥蘭炒臘肉   好好味   所以食半碗飯   咁樣可以食多啲餸   但好似食極都唔飽咁嘅   所以番到屋企再食生果同適量魚皮花生 ~

尋晚瞓到半夜突然好肚餓   我覺得次次食完生果   到第二朝起身會好餓   但今次早咗喺半夜發生   但唔食生果唔得家嘛   真係煩 ~

~~~~

呢排瞓極都唔夠   所以我坐車時居然瞓着咗   真係好想番屋企瞓覺呀   瞓醒就諗通咗   我覺得自己要真正豁出去喇   同里奧大人去赤丸食腸蛋出前一丁 + 熱檸茶   真係飽到吖 ~

番到公司呢   又係發霉   個個都發霉   不如改番五日算啦 ~

晏晝要同媽咪配眼鏡   所以媽咪就話想去 Pizza Hut   食咗超級至尊細薄餅 + 拚盆 + 蒜蓉包 + 椰子雪糕啫喱冰   我已經盡量食到自己飽為止   真係食到想嘔   因為啲蒜蓉包好油好漏   但好好味   最後都食剩兩塊 Pizza 同啲小食   所以拎走比工人食   唔好嘥嘛   埋單 $217   我覺得幾貴   如果我張 Discount Card 用到就好啦   有 9 折呀...

之後同媽咪去亮視店 (即前高登) 配眼鏡   再買個金絲柚 ($25)   我又覺得好貴咁   但自己又想食    媽咪又話靚   所以叫阿姐揀個靚嘅   我話唔要皮喎   佢就叫個阿伯開咗去   但阿伯依依哦哦   話唔開㗎喎   我話妳個同事話開㗎喎   之後佢又再依依哦哦   我最憎人依依哦哦   我咪慶囉   我話又無寫明原個嘅唔開   你唔好開喇   拎番嚟呀   但佢又係都要開埋比我   真係顛㗎 ~

送完媽咪搭車就番屋企喇   真係好攰   上車無幾耐就瞓着咗   仲 Feel 到自己頭中中嗰隻添呀 ~