蕃茄蜆肉腸仔長通粉 + 豬腳薑醋 ( 7-SEP-2011 )

( 7-SEP-2011  WED )

尋晚 10 點半喺廳度睇睇下電視就瞓着咗   差唔多 11 點幾   里奧大人就叫我入房瞓   但入到房又唔會即刻瞓到喎 ~

今朝超勁想瞓多 10 分鐘   但都係費事喇    唔想好趕咁食早餐   又唔想遲到呀 ~

今朝啲時間過得好慢咁呀   同 8 卦 M 咗好耐都係 10 點幾 ~

幾咁辛苦眼瞓先等到 Lunch Time 呀   今日有 Lunch Box   不過尋晚啲雞原來好油   整到啲飯都好多油同埋腍哂 ~

個人真係忽冷忽熱咁   應該係作感冒   咁打比里奧大人問佢今日係咪要見客   唔係就想佢早啲番   因為我想早啲食飯休息   之後佢叫我飲杯 Hot Lemon   飲完又好啲喎 ~

依家生果舖無得買車厘茄呀   因為中秋節要做果藍   買貴生果   無理由擺啲賺得咁少錢嘅車厘茄   阻住哂啲位呢 ~

終於放工啦   無咁唔舒服   所以就決定煮飯   去到百佳想買雞翼居然無喎   想買蕃茄又覺得 2 個要 $ 10 好貴唔抵   咁里奧大人又想食啲酸酸咪咪嘢   所以最後買咗支有機蕃茄香草意粉醬同埋熱浪薯片番屋企喇 ~

里奧大人知我唔多舒服   所以 7 點半就喺大陸開始番嚟   算佢啦 ~

是日懶餐 - 蕃茄蜆肉腸仔長通粉 + 豬腳薑醋

蕃茄蜆肉腸仔長通粉 - 我覺得蕃茄醬係無味   所以次次起碼要大半樽先有味   仲要自己加啲茄汁  鹽  豉油先得喎   今次呢樽都唔例外呢   我覺得煮有蕃茄嘅食物都好開心   煮完出嚟好 Colorful   真係唔好睇都好食   更何況係好食呢   哈哈 ~

豬腳薑醋 - 我覺得媽咪知我想食   就成日話自己想食   所以整咗先話我知囉   迫我要嘛   不過依家食下都好嘅   補補身   媽咪今次用 "同珍" 嘅甜醋   估唔到都好好味喎 ~

今晚真邪啦   因為我唔想開包新嘅長通粉   所以煮半包   咁其實係唔夠我同里奧大人食 + 我嘅 Lunch Box 嘅   所以我就食豬腳薑再加薯片   食剩差唔多 20 塊   實在食唔落   因為真係好油   開始想反胃   咁我就放入食物櫃嘅最入面   里奧大人食食下飯好奸笑拎住包薯片咁問點解咁   我就咁笑   問佢包薯片係咪跌咗出嚟   佢話唔係   咁啱望下就見到   之後佢都食埋剩番嗰啲   真係吖   平時真係好日唔望個食物櫃   無啦啦今晚偷食先望喎   邪到不得可了呀 ~ 

冰鮮有機穗香雞 + 炒菜心 by 鐘點 ( 6-SEP-2011 )

( 6-SEP-2011  TUE )

呢幾日勁想食麵   所以今朝就食五香肉丁芝士腸麵餐喇   超級飽呀 ~

唔知做乜鬼   個胃陰啲陰啲 痛   最憎就係咁   因為即係會痛好耐囉 ~

晏晝想食粥   但又驚好熱   想食燒賣粉果   但唔落辣油又唔好食   想食酸辣米線   但唔酸辣不如唔好食   所以最後決定食包算數   唔想諗喇 ~

食完好鬼眼瞓   但又瞓唔着   個胃又痛   勁想番屋企呀 ~

今晚好在有鐘點煮飯   唔係我都無心情煮   今晚媽咪打嚟問我食乜餸   又問我飲咩湯   我話唔想飲湯   媽咪笑住好出奇咁話唔想飲湯 ?!   咁又係喎   我超鍾意飲湯   不過今日個胃唔舒服   唔想飲完湯頂住又食唔到飯   所以唔煲算喇 ~

里奧大人 8 點 45 分番到屋企   我覺得算快㗎喇   所以我食一半份量   再留一半份量陪佢一齊食   咁等佢唔好成日好似一個人食咁悶咁 ~ 

自家制叉燒 + 粟米蛋花湯 ( 5-SEP-2011 )

( 5-SEP-2011  MON )

尋晚里奧大 10 點食咗兩個橙   明知利尿都食兩個   所以我都覺得好出奇   點知佢夜晚去咗幾次洗手間   佢一郁我就會醒   到 7 點幾就話成晚瞓唔到   所以請假   咁我都陪佢啦   我都想清啲大假嘛 ~

真係好邪   9 點 10 分屋企電話響   因為我哋多數飛線番屋企嘛   有個鬼佬打嚟   咁我咪叫里奧大人聽囉   個鬼佬話因為里奧大人留咗口信叫佢回覆   之後又話約咗今日 2pm 去深圳 Office   但里奧大人就話應該係 10 月中喎   再講一大輪   里奧大人就話開電腦 Check Email 再覆番佢   叫佢番低埋電話號碼   之後離奇嘅事發生啦   就係里奧大人突然間同我講話佢係無飛線番屋企㗎   咁即係嗰個唔係佢個客啦   最邪係咁啱佢之前留低咗口信叫鬼佬覆   咁啱又係要去深圳 Office   之後佢打番比個鬼佬   原來係個鬼佬真係打錯電話號碼   我覺得非常搞笑   講咁耐原來先知係搭錯線 ~

之後里奧大人問我飲唔飲茶   我叫佢瞓下先啦   晏啲先食   咁我又瞓唔到喎   所以出廳睇雜誌   睇到差唔多 10 點半就超過餓喇   食咗啲點心麵   不過食完個胃就超痛   勁想叫里奧大人快啲起身食早餐呀   佢 11 點半先起身   我話快啲梳洗食嘢   我個胃好痛呀 ~

又係飲茶喇   不過今次去稻香   麻麻哋好食啦   但鴻星又無乜傳統點心   唔想來來去去都食嗰啲 嘛 ~

食完去惠康買梅頭   諗住買 $10/2 包嘅菜心   不過真係買唔落   1 包得 7 條   太少喇   所以最後決定整粟米湯算數喇 ~

番到屋企個胃又痛喎   里奧大人就話沖杯蜜糖水比我飲會好啲   飲咗真係舒服咗啲   之後我就執衫喇   我發覺做完手術之後個人好似懶咗咁呀   無乜原動力去分類啲衫   所以有時見里奧大人搵衫都有啲艱難   所以尋日的起心肝執衫   同埋其實最主要喺難得里奧大人唔攰又有時間執佢啲舊衫出嚟   因為成日想捐出去嘛   終於比我哋執哂啲舊衫出嚟   足足 30 磅   清咗 2 個櫃桶   爽呀 ~

差唔多 3 點半先食 Tea   執完衫好攰   唔想行咁遠   近近哋去大家樂   呢個時間無乜人   靜靜哋好舒服呀 ~

難得里奧大人可以同我一齊食晚飯   所以都係早啲準備   早啲食就多啲時間消化呢 ~

是日懶餐 - 自家制叉燒 + 粟米蛋花湯焗

自家制叉燒 - 買咗 $ 20 梅頭   整出嚟仲少過喺太興買 $20 叉燒咁呀   下次都係就咁喺太興買算喇 ~

粟米蛋花湯 - 無買菜嘛   所以就實係粟米湯呢 ~

好想食雪糕呀   因為要清埋啲朱古力針   過咗期幾日㗎喇   家姐依家感冒都食唔到雪糕   咁就等我食啦 ~

打邊爐 @ 大快活 (九龍灣) ( 4-SEP-2011 )

穀飼牛肉 4 oz - 地獄湯底 / 韓式牛肉石頭窩飯

( 4-SEP-2011  SUN )

好感恩呀   估唔到 10 點起咗身   咁就去食早餐啦   之後再番教會 ~

差唔多 1 點 15 分先崇拜完畢   我哋就即刻番屋企喇   因為約咗家姐一齊去舖頭   咁一齊食 Tea 之後就各自歸家 lu ~

干炒黑椒牛肉意粉 / 肉醬焗意粉 / 西多士

好想打邊爐呀   不過里奧大人唔想   所以我就話去大快活喇   我有我打   佢有佢食其他嘢   食完再行去幫媽咪買床褥   之後原來當日收據可以當 $200 現金買嘢   所以我哋又買咗床單喇   計番條數等如 8 折   真係好抵囉 ~

麥當勞 @ 灣仔 ( 3-SEP-2011 )

( 3-SEP-2011  SAT )

呢朝同 8 卦食早餐   因為我哋諗住試哂菇場附近啲茶餐廳   睇下邊間好食就當飯堂喇 ~

星期六呀   我覺得真係無人會有 Mood 做嘢囉 ~

同里奧大人 & 姑奶一齊去鴻星飲下午茶   姑奶順便燉冬蟲草湯比我飲   不過酒樓嘈到爆   又對住風口   吹正我個頭   所以飲完要即刻走   我唔想病 ~

飲完茶就各自歸家   Hea 到 6 點就出發去灣仔會展聽佈道會   主題係 "窮 No Way 富 OK?"   由林以諾牧師講道   會場可容納 8,000 人   好感恩全場爆滿   期望更加多人可以信主   為主作鹽作光呢 ~

8 點開始   10 點半結束   但實在驚會同一時間一齊走   所以大會就用分流方式   我哋係第一批走呀   因為我哋遲到呀   哈哈 ~

我哋本來諗住去尖沙咀食米線   不過去到都應該關門   又諗過去南記   但原來關 11 點   咁無計啦   又唔想番到九龍灣先食   所以去附近麥記食   估唔到同樣咁多人   同埋好多都同我哋一樣   聽完佈道會先開餐呢 ~ 

豆豉涼瓜燜支竹 + 炒年糕 + 紅豆沙 by 鐘點 ( 2-SEP-2011 )

( 2-SEP-2011  FRI )

Happy Friday 喇   不過今朝等咗 20 分鐘巴士先上到車   差唔多 8 點 45 分先落車   但我照去食我豐富嘅早餐囉 ~

菇場忙咗陣就等 Lunch Time 啦   8 卦又約我食 Lunch   朝早飲咗杯凍咖啡好反胃   所以叫佢諗食咩 ~

我真係唔想食飯囉   所以就叫咗沙爹牛肉包 + 凍檸茶   食完同佢行陣商場就番菇場 lu ~

唔知係咪飲咗杯凍檸茶呢   無啦啦覺得好餓呀   雖然食咗個包   但都好餓囉   好在有馬仔   都頂到下 ~

尋晚媽咪唔舒服   所以今晚放工去媽咪屋企睇下佢   同埋媽咪又整咗豬腳薑醋   咁順便拎埋啦   好感恩佢都幾精神   之後家姐又番埋嚟   佢哋有佢哋食飯   我就唔食喇   因為今晚鐘點煮咗嘢嘛   我都係旨在睇下媽咪   反正里奧大人喺大陸都唔會咁早番嚟 ~

差唔多 8 點幾就同家姐一齊走喇   家姐感冒   所以我叫佢直接搭車番屋企   唔駛又陪我落九龍灣呢 ~

好餓呀   頭先喺媽咪屋企食咗隻薑醋蛋都 OK 頂到   但番到屋企衫都唔碗就即係食碗炒飯先呀   凍都照食喇   餓起上嚟   覺得原來就咁無料又凍又硬嘅炒飯都好好味囉 ~

食完抖陣沖涼   再等埋里奧大人一齊食餸   真係好耐無同佢同枱食飯咁呀 ~

板長壽司 @ 九龍灣 ( 1-SEP-2011 )

加洲卷 / 親子卷 / 金三文魚壽司 / 三文魚醬油漬壽司 / 蒲燒宮城秋刀魚 / 珍珠廣島蠔壽司 / 醬燒三文魚骨腩

( 1-SEP-2011  THU )

唔知係咪呢幾日 11 點幾先瞓   所以朝早起身都好眼瞓咁呀 ~

原來呢間早餐有芝士雙拚三文治   點解之前睇唔到   我覺得有芝士好抵囉   里奧大人話佢食嗰間如果要芝士   要額外加 3 蚊㗎   我依家唔駛加錢   真係覺得好抵囉 ~

菇場無嘢做啦又   等到 Lunch Time 就食麥片加特濃朱古力奶   頭果幾啖真係覺得幾甜幾好味   之後覺得好漏呀 ~

媽咪無啦啦肚屙又頭暈   好在預咗今晚去媽咪屋企啫   順便買埋寶礦力比佢補充體力 ~

入到屋企見到媽咪瞓緊   叫咗兩聲都唔醒   嚇得我   行緊啲睇佢   佢原來瞓得好淋   家姐仲搞笑   叫工人間唔中要睇媽咪郁唔郁   因為驚佢暈咗嘛   工人話唔好嚇我呀   我覺得好搞笑 ~

媽咪起身   我第一件事即刻比寶礦力佢飲   見佢飲完好啲   再問佢食過咩   佢食嘅同工人食嘅都係一樣   唯一一樣工人無食媽咪整嘅豬腳薑   咁即係豬腳薑啦   因為媽咪話食咗幾粒薑   咁我就即刻同家姐試下啲薑係咪壞   我一食就知咩事啦   辣到跳舞呀   血壓高唔食得咁辣嘅薑   所以又引致頭暈囉   媽咪明知自己唔食得薑又要食   我話一切都係自己為食攞嚟   不過依家自己唔會再激動發顛鬧佢㗎喇   因為我真係無咁好氣   之後佢叫我拎豬腳薑番屋企食   我話我唔會拎   佢係咁話唔好啦   拎番屋食啦   因為佢知我鍾意食   我乘機就話   我次次叫妳唔好做嘅嘢妳都做   叫妳帶電話妳又唔帶   依家妳叫我拎我就偏唔拎   等妳知道嗰種激氣呀 ~

我同家姐等埋工人出去食完嘢就走喇   今晚請家姐去板長啦  佢恨食壽司好耐啦   食完再嚟我屋企食雪糕   因為佢又買咗兩盒比我   要清咗盒舊先有位擺新買嘅雪糕呀 ~

今晚我做足賢妻嘅責任呀   里奧大人要 9 點半先番到屋企   所以我煮咗 Ikea 肉丸酸辣蝦味湯麵比佢食呀   雖然係即食麵都係咪精   但話哂喺自家煮嘛   感覺舒服好多呢   有份愛喺度呀   哈哈哈哈 ~