別府 @ 九龍灣 ( 9-SEP-2013 )

( 9-SEP-2013  MON )

今日係我同里奧大人結婚 13 週年   眨下眼就 13 年   時間過得真快呢 ~

其實我都仲係溫溫燉燉   都無咩 Mood 去邊度慶祝   不過點都要出去食餐飯嘅   哈哈 ~

今朝打的番菇場   居然塞車   所以買粉果同咖啡番菇場食算喇   因為已經 9 點半啦 ~

好在無嘢做咋   真係全日望住個 Mon 唔想郁   直頭攰到連水都唔想飲   廁所都唔想去嗰隻呢 ~

雖然有 Lunch Box   不過食咗少少咋   真係無胃口   留番今晚再食   懶得去洗碗   哈哈 ~

放工即走喇   番到屋企抖陣   再食埋 Lunch Box 嘅餸   其實唔餓   不過唔想嘥嘢 ~

等到里奧大人 7 點幾放工   佢話啲嘢做唔哂都唔做住   要早啲放工食飯慶祝喎   咁又幾好   因為佢好少記得啲慶祝日子呢 ~

唔知做咩鬼   喺梳化一起身就頭暈暈   眼前一黑呀   嚇到我又即刻坐低   上次暈過一次   好在里奧大人喺度咋   不過佢以為我玩囉   但今次得我一個人   所以都係即坐低定一定神先呀 ~

仲係暈暈地咁   所以去別府算喇   反正我勁想食壽司 ~

食咗嘢又好啲喎   食完番上屋企喇   想快啲沖涼休息呢 ~  

粒粒車打芝士包 ( 6-SEP-2013 ) + ( 7-SEP-2013 ) + ( 8-SEP-2013 )

( 6-SEP-2013  FRI )

終於又 Happy Friday 啦   依家超級非常之想每個星期六都係 Off 呀   咁樣可以陪里奧大人呢 ~

早餐食奶油多   估唔到呢間茶餐廳都有   因為餐牌無寫嘛   我尋日見人食先知有咋 ~

菇場唔忙實在太好   因為好攰呀 ~

原來每月一到   好在有胃口食埋個 Lunch Box 咋   唔係就嘥嘢喇 ~

個肚無咩痛   不過放工都係睇定醫生先   順便拎埋聽日假紙   其實如果唔肚痛   我都會番工嘅   最搞笑醫生好肉緊咁講話唔舒服唔好番工   命令式咁㗎   佢梗係咁講啦   我唔係妳員工嘛   哈哈 ~

勁想食大包   所以去海寶睇下有無   原來夜晚係無點心買   又行番鴻星睇   佢都無哂   所以又走番去美心買包番屋企食算喇   個肚開始嚟料 ~

番到屋企即煲滾啲湯   食埋湯渣   因為里奧大人唔食   咁我之後未必食得落   所以今晚食埋去喇   再食咗少少麵包   洗埋碗抖陣就沖涼喇   個肚開始痛添   嗚嗚 ~

沖完涼即食藥   之後灘喺梳化一路睇電視一路瞓   里奧大人又上咗大陸   差唔多 10 點半先番到屋企   佢一番嚟   我即入房瞓喇 ~

( 7-SEP-2013  SAT )

個肚痛呀   真係要 S/L 呢 ~

瞓呀瞓   又係咁沖熱水涼啦   又嘔   好鬼煩   所以瞓到 6 點   咁又好啲喎 ~

之後里奧大人姐夫上嚟拎電腦   差唔多 7 點就走   佢仲以為我上星期病到今星期咁勁添呀   我話係唔同嘅病呢   哈哈 ~

今日係 8 卦結婚   不過我真係去唔到   所以 Whatsapp 話佢知我唔舒服唔到喇   佢應該好嬲我啦   因為我唔嚟即係唔替佢開心嘛   佢成日話都咁講 ~

又係無胃口食嘢啦   所以里奧大人去買麥記番屋企食   我食咗幾條薯條   因為新鮮熱辣好好味呢 ~

10 點瞓喇又   反正里奧大人做公司嘢   又無電視睇   慳番啲電   呵呵 ~

( 8-SEP-2013 SUN )

仲係肚痛   真係只有瞓瞓瞓呢 ~

不過今日瞓到 5 點就唔敢再瞓喇   驚今晚瞓唔着嘛 ~

但好感恩都有胃口食嘢   勁想食五寶飯   所以里奧大人即刻去大家樂買喇   佢自己就食焗豬扒飯   因為我話我想帶 Lunch Box   所以自己食一盒飯喇 ~

睇埋 "衝上雲霄 2" 大結局就即瞓喇   聽日要番工呢 ~

住家飯 @ 媽咪屋企 ( 5-SEP-2013 )

( 5-SEP-2013  THU )

尋晚半夜里奧大人話我做咩周身郁   當時我無答佢呀   因為知道自己發夢   咁今朝再同佢講   尋晚發惡夢呀   入咗另一間教會   但全部都係鬼咁架   有個男人搽咗好紅嘅唇膏   之後又見到里奧大人同另一隻鬼比人綁住捉咗入籠   但佢前面隻鬼一鬆哂啲繩就會傷害到里奧大人   所以我係咁唔比隻鬼鬆啲繩呀   幾咁緊張呀   呢個夢到我醒咗都仲記得   幾咁恐怖呀   搞到我好似無瞓過咁   哈哈 ~

早餐食奄列餐   將半份奄列放落 Lunch Box 度   咁就有多樣餸喇 ~

番到菇場唔好忙呀   又要搬 Blog   屋企好難搬到嘛   唔想阻住里奧大人用電腦呢 ~

今日有 Lunch Box 啦   不過出面都有雨   又係長命雨   所以唔落去行 lu ~

里奧大人今日唔駛上大陸   不過我都會去媽咪屋企食飯嘅呢 ~

家姐又早咗少少番到嚟   又早咗少少食飯啦   今餐都係飽到上喉嚨   因為飲咗碗巨湯   好在家姐包底   其實家姐都好飽   但佢就唔嘥嘢囉   所以點飽都會食哂   呵呵 ~

同家姐 8 點半走喇   里奧大人差唔多 9 點打嚟話喺唐記買咗好多點心   同我 Share 食喎   所以我番到屋企即刻沖涼先   咁我可以陪佢食嘛   原來佢只係買咗煎蛋牛肉飯同雞扎   仲以為有幾多添   佢依家次次食唔哂啲嘢就問我食唔食   衰到呢   佢又係食唔哂啲牛肉飯呀   咁我帶埋做 Lunch Box 囉   慘 ~

好攰呀   10 點 45 分就瞓覺喇 ~      

XO 醬蒸帆立貝 + 茄汁豬扒 + 菜心苗 ( 4-SEP-2013 )

( 4-SEP-2013  WED )

今朝天黑黑又落大雨   仲應該係長命雨添呀   所以索性帶直身遮   收遮唔駛咁煩呀 ~

早餐食腿蛋治烘底   今次烘得靚仔喇   哈哈 ~

菇場忙咗陣   之後又搬 Blog   日日搬啲咁   希望快啲搬哂呢 ~

之前帶 Lunch Box 就無落大雨   今日無帶就落大雨喎   所以買酸辣米線番菇場食算喇   次次買完成件衫都有陣酸辣米線味咁   好暈呀~

放工去超市買米   尋晚啲米有穀牛呀   嘥哂我啲米   特登開咗包喺台灣買嘅糙米同 2 包細珍珠米家嘛   嗚嗚 ~

番到屋企預備好哂晚餐就抖陣   之後就煮飯喇   今晚我自己食先   因為里奧大人又係差唔多 8 點幾先番到屋企 ~

是日晚餐 - XO 醬蒸帆立貝 + 茄汁豬扒 + 菜心苗

XO 醬蒸帆立貝 - 好在心血來潮煮呢個餸食咋   唔係就唔夠餸食呢 ~

茄汁豬扒 - 上次用 1 塊豬扒覺得啱啱好   不過今次呢塊細好多   所以煮一塊真係唔夠   我無食呀   如果食埋就唔夠里奧大人食   我 Lunch Box 都係帶條豬扒骨咋   下次都係煮 2 塊好啲 ~

菜心苗 - 尋晚食剩   其實我鍾意食菜心苗多過菜心呢 ~

沖完涼又食車厘子   衰里奧大人又食剩幾粒   我話唔想洗碗就食剩幾粒要我洗   佢話真係好飽喎   最多我食完佢幫我洗   咁我食完真係留比佢洗㗎   好在佢都有洗   唔係實會鬧鬼佢 ~

煎鯪魚餅 + 菜心苗 ( 3-SEP-2013 )

( 3-SEP-2013  TUE )

今朝仍然天黑黑又落雨   呢年真係好多雨水咁呀 ~

早餐本來叫咗芝腿治烘底   不過佢哋比錯芝蛋治   是但啦   唔想又換又等呀 ~

菇場唔忙   咁都好   可以抖下   因為仲係有啲攰 ~

呢排都要多啲 Lunch Box 喇   落雨濕濕落街真係好煩 ~

放工去街市買餸   之後番屋企預備晚餐 lu ~

里奧大人差唔多 8 點幾先放工   咁我食埋尋晚剩嘅叉燒炒麵同菜先   等里奧大人番嚟再陪佢食少少   同埋煮個冬蔭功麵比佢食算喇   都懶得煮飯 ~

是日懶餐 - 煎鯪魚餅 + 菜心苗

煎鯪魚餅 - 買咗 $14/半磅鯪魚肉   好有心機煎㗎   不過都有啲燶咗   呵呵 ~

菜心苗 - 買咗 1 斤   淥咗半斤咋   估唔到 1 斤都幾多 ~

搞掂哂又 9 點幾   沖埋涼再睇陣電視又要瞓   番到屋企真係無咩私人時間咁呢 ~        

叉燒炒麵 + 西蘭花 + 芫茜皮蛋魚片湯 ( 2-SEP-2013 )

( 2-SEP-2013  MON )

又星期一喇   個人仲係呆呆滯滯   無咩精神咁添 ~

早餐食奶油豬仔包   個包好似無烘過咁   唔係咁好食 ~

菇場無嘢做   吽下吽下   真係斟水都慢幾拍咁呢 ~

今日有 Lunch Box   食完又上網咁啦   因為想瞓又瞓唔到呀 ~

放工即走   估唔到落大雨呀   真係邪   因為今朝仲同里奧大人講話唔想帶把縮骨遮   不過我睇天氣報告話間中有驟雨   所以都帶啦   真係好在有帶咋   狀態已經唔係咁好   再淋一淋   攝一攝就煩喇 ~

去到街市就停雨   買完餸又落大雨呀   駛唔駛咁呀   哈哈 ~

番到屋企即浸菜同開機洗衫   抖咗陣就煮飯喇   里奧大人差唔多 8 點先放工   所以我自己食先 lu ~

是日懶餐 - 叉燒炒麵 + 西蘭花 + 芫茜皮蛋魚片湯

叉燒炒麵 - 買咗 2 個全蛋麵餅 ($9)   今次唔用韭菜炒喇   里奧大人唔太鍾意   之後去太興買 $23 叉燒   份量得我半隻手掌咋   見佢放落磅時真係嚇呆   細嚿到呢   好在我唔鍾意食叉燒咋   唔係真係一個人都唔夠食囉 ~

西蘭花 - $10/2 個   原來一次煮 2 個都幾多   但硬係覺得 1 個又好似好少咁喎 ~

芫茜皮蛋魚片湯 - 熱氣呀   所以滾呢個湯喇 ~

搞掂哂都 9 點半   之後即沖涼再熨衫   差唔多 10 點幾先食生果   呢期啲車厘子真係好甜又好平   所以媽咪見到實買比我食呢 ~

日月星茶餐廳 (外賣) ( 1-SEP-2013 )

( 1-SEP-2013  SUN )

今朝 10 點醒一醒再懶床   之後見里奧大人沖涼   咁我都起身去食早餐 lu ~

真係好驚食西藥   食完真係超眼瞓   所以今日都唔番教會喇 ~

番到屋企呆呆滯滯   但又瞓唔到   慘到爆 ~

2 點幾去食 Tea   食完又係番屋企呆   真係好想瞓   但合埋眼又瞓唔到喎 ~
里奧大人做公司嘢   我就睇雜誌同打機   今晚決定叫外賣   所以 4 點幾就沖涼洗頭   里奧大人覺得好奇怪   點解沖完又沖   我話幾難得食飯前可以沖咗涼先呀   哈哈 ~

差唔多 6 點半就叫外賣   差唔多 7 點到   都算快   不過唔好食嘅   呢間應該唔會再叫㗎喇 ~

食完唔駛洗碗真係超級勁爽   之後我又睇電視   里奧大人又做公司嘢   無計啦   尋日奉獻哂比佢姐夫嘛 ~