吉豚屋吉列豬扒專門店 @ 九龍灣 ( 9-SEP-2016 )

吉列豬柳泡菜湯烏冬鍋

( 9-SEP-2016  FRI )

今日係結婚週年   尋晚有禮物收   所以今朝實記得講週年快樂   哈哈 ~

又唔係咁餓噃   所以食奶醬多算喇 ~

菇場唔太忙   不過都係做下停下咁 ~

Lunch Time 仲落雨   但唔理喇   照落街   因為勁想食燒賣粉果呀 ~

諗住今晚煮飯   點知里奧大人 4 點幾打嚟話不如唔好煮啦   咁好啦   突然間又想出去食   之後佢都喺度笑   之前講到點都要煮   依家無啦啦又話想出去食   哈哈 ~

放工去 Taste 行陣   之後番屋企喇   無啦啦勁餓呀   又唔想食薯片   食咗條紫菜卷頂住先 ~
   
里奧大人 6 點 45 分放工   咁佢去到九龍塘   我就差唔多落樓   因為星期五度度都好多人囉 ~

好喇   7 點 35 分都未見里奧大人   餓鬼到我呢   咁即打比佢啦   無理由咁耐嘛   比平時遲成 15 分鐘呀   原來佢喺九龍灣見到大眼妹兩公婆   所以一齊傾偈   好在我打比佢咋   唔係唔知傾幾耐   之後佢叫我叫嘢食先囉   我真係叫嘢食先呀   真係好鬼餓呀   有啲暈暈哋 ~

食完就番上屋企喇   沖埋涼就睇電視   差唔多 12 點先瞓 ~ 

今日里奧大人同阿喂交收   估唔到我又有嘢收   哈哈   多謝阿 mi

Saizeriya @ 九龍灣 ( 8-SEP-2016 )

水牛芝士伴蕃茄

中華海草

黑椒雞肉比薩

香焗白汁雞肉菠菜

蕃茄煙肉意大利粉

( 8-SEP-2016  THU )

尋晚瞓得完全勁差   真係慘   好在起身之後又唔係話好眼瞓囉 ~

又無啦啦好想食蛋治   我次次食蛋治   家姐同阿 mi 都覺得好奇怪   因為我本身係唔鍾意食蛋治   覺得好滯嘛   但依家覺得蛋治幾好味   可能有牛油呀   哈哈 ~

菇場忙呀   不過咁都好   時間快過 ~

Lunch Time 未餓   本來諗住食尋晚食剩嘅餐包   但菇場真係好鬼凍囉   所以 1 點真係頂唔順   要叮個超米   想暖下個身   但叮完就好鬼唔想食   最後由好熱變到凍哂先食   唉 ~

繼續忙啦   里奧大人 4 點有嘢整   所以我今晚都唔煮飯   我話請佢食飯   預祝聽日結婚週年   之後佢話做咩呢排咁豪   成日請佢食嘢   又咩都比番錢佢   真係煩啦   對佢好啲都唔得 ~

放工即走   番上屋企放低嘢又出去攞位喇 ~

里奧大人差唔多 6 點半先到   咁叫佢即刻睇食咩喇   我好餓呀   同埋今晚我居然想食羊鞍   但我又驚燥得滯   之後里奧大人都話估我唔到會食羊呀   我覺得自己真係內分泌陰陽失調定喇   哈哈 ~   

食到好鬼飽呀   但里奧大人話想食甜嘢   咁去食雪糕啦   食咗幾啖又話不如番上屋企食   個背囊好重喎   真係比佢激死   一早話買番屋企食咪得囉 ~

咁我食咗 2 啖之嘛   咁佢就繼續食   我就諗住擺番好哂啲嘢再食幾啖   點知佢已經食哂   平時食菜又唔見咁快   哈哈 ~

無啦啦個人好攰   咁即沖熱水涼啦   之後又胃酸倒流喎   痛到背脊都好痛   叫里奧大人幫我 Dup 幾嘢   Gur 咗啖氣又好似好啲   不過之後都仍然唔舒服 ~

我呢排都主打睇 "梅長蘇"   但會再睇多一次   因為好多時都係睇睇下瞓着咗   之後里奧大人好驚咁話 "我唔會再陪妳睇第 2 次㗎下"   哈哈   我話由始至終都無諗住叫佢陪囉 ~

咁我次次好唔舒服   就會問里奧大人   如果我死咗你會點 ?!   我話我死咗都唔會比你有好日子過   佢覺得我非常之毒㗎   呵呵   之後佢話 "聽日要幫我再加大保額   但次次加大都用唔到   激死"   佢講到幾咁順口呀   哈哈 ~

今晚有啲攰   11 點都入房瞓喇   咁里奧大人入咗房睇聖經   之後我入房啦   我拎埋自己張被上床   咁一上床就好順手咁揭開里奧大人張被   咁里奧大人笑咗出來   我知道有古怪啦   點知我一瞓上床   諗住蓋佢張被   一見就見到阿 Bob 呀   勁開心呢 ~

多謝完里奧大人之後   就聞下阿 Bob 有無味   哈哈   聞哂全身同眼鏡   我真係好驚有味嘛   之後里奧大人見我聞完又聞   話駛唔駛聞咁耐呀   哈哈 ~

咁佢話之前已經喺淘寶買咗   不過收埋喺另一個背囊   我話無理由唔知㗎喎   因為我間唔中都會開佢啲背囊   睇下佢夠唔夠紙巾家嘛   之後佢勁串話唔知幾出奇呀 ?!   間屋咁亂 ~

又話佢咩都無   真係好慘   我話頭先咪請咗佢食飯囉   同埋我頭先比咗張靚 Number 嘅一百蚊比佢㗎   唔係叫做咩都無囉 ~

其實我無諗過佢會記得結婚週年嘅日子㗎   所以我好開心呢 ~

大家樂 @ 九龍灣 ( 7-SEP-2016 )

其實我最想食支脆薯圈   以為口感似喺台灣食嗰啲   點知原來係厚身囉   又唔脆   雞扒又乾到死   超級難食   最慘食完之後   成個口係苦呀  

( 7-SEP-2016  WED )

今朝里奧大人上大陸   佢出門口之後   我都瞓得唔係咁好   瞓到 7 點 45 分先起身 ~

慢慢行去搭車   仲越行越餓咁   真係差啲暈咁滯   哈哈 ~

早餐食奄列餐   其實唔想食個奶油豬   不過唔想留番做 Lunch   索哂啲奶油   個包係超級甜   好鬼難頂   咁唯有食埋去啦 ~

菇場仍然忙呀   所以話咁快又 Lunch Time   我居然餓添呀   所以食杯麵   勁頹咁   哈哈 ~

好喇   又忙下停下   好快又放工   呵呵 ~

里奧大人要 8 點先番到九龍灣   咁等埋佢先食飯   但其實番到屋企又餓   今日唔知點解好快餓咁   咁開包薯條食啦   之後食咗幾條又唔想食 ~

睇下電視   打下機   里奧大人 8 點左右都到九龍灣   咁我都落大家樂 lu ~

食完即番屋企   抖陣就沖涼 ~

叫里奧大人幫我喺淘寶買㗎   1 Pack 只係 RMB2 咋   如果買夠 RMB50 就免運費   否則要比 RMB8 運費   咁真係買唔到 $50 咁多   所以最後都比運費   哈哈

之前喺萬寧買㗎   大出位價只係 $154/盒   真係好抵

11 點幾要瞓喇   但其實唔眼瞓   慘 ~

炸醬麵 + 雲吞麵 + 三文魚頭湯 (外賣) ( 6-SEP-2016 )

炸醬麵辣辣哋幾好味   不過食完之後   個口好苦   勁重味精呀

好味道

( 6-SEP-2016  TUE )

今朝 8 點 15 分先起身   沖埋涼   再去埋 Taste 買佳得樂同杯麵就打的番工喇 ~

無胃口   但點都要食嘢   最慘係咁 ~

菇場超級勁忙呀   但真係要慢慢做囉 ~

個肚有啲痺痺地咁痛   但都 OK   如果每月一係咁嘅痛   我會開心到喊出來囉   話哂可以番工嘛 ~

Lunch Time 唔餓呀   想瞓又瞓唔到   唉 ~

好啦   繼續忙啦   放工都未做完   真係好耐無試過咁   哈哈 ~

放工即番屋企   開始勁餓喇   但點都買埋麵包比里奧大人做早餐   我先去元氣買三文魚頭湯番屋企慢慢飲 ~

飲完個口好苦   下次咪搞   唔係想個肚暖暖哋   我都唔飲佢囉   又貴喎    嗚嗚 ~

里奧大人 7 點先放工   我都開始有啲餓   實在太好喇   今晚又辛苦里奧大人買外賣喇 ~

食完成身暖哂   真係舒服哂   抖多 1 個鐘就沖涼   之後又睇電視喇 ~

今晚 11 點都瞓   唔知係咪天氣涼咗   好似好快眼瞓咁 ~

大快活 @ 九龍灣 ( 5-SEP-2016 )

( 5-SEP-2016  MON )

諗住番工   等咗 10 分鐘都未有的士   已經 8 點 50 分喇   個肚又有啲扯住痛   所以都係請 S/L 算喇 ~

番到屋企就即刻喺梳化瞓   一瞓就瞓到差唔多 12 點   之後起身 lu ~

其實個肚只係赤赤哋痛   唔駛沖熱水涼   其實已經好好㗎喇 ~

里奧大人 3 點喺黃大仙見客   見完客就番屋企   咁就好喇   陪我去睇醫生   因為我無咩食嘢   有啲暈暈地 ~

5 點半去到   等咗 10 分鐘就有得睇 lu ~

勁想飲湯同食肉醬意粉   所以去大快活食嘢   去到都只係 5 點 58 分   要等 2 分鐘先可以買嘢食   呵呵 ~

飲完湯   再食 2 啖意粉就夠哂飽   太耐無食嘢   所以好快脹胃 ~

食完就番屋企休息   抖咗陣先沖涼呀   呢兩日都勁攰   平時一番到屋企就頂唔順沖涼㗎喇 ~   

睇下電視   11 點幾都瞓喇 ~  

陸陸雞煲火鍋 @ 旺角 ( 2-SEP-2016 ) + ( 3-SEP-2016 ) + ( 4-SEP-2016 )

陸陸雞煲例牌 (小辣) $148 - 上次同阿 Mi 食過   大家都覺得只係雞煲最好味   其他食物唔掂

頂級美國肥牛 (例) $98 - 衰糟糟   係都要叫   但食咗 4 塊就話唔食   即係要我食啦   因為依家家姐又唔食牛嘛        

西班牙黑毛豚肉腩片 ($108) - OK 啦   定係食咗濃味雞煲呢 ?!  

手打蝦滑 ($70) - 完全唔掂

新鮮脆鯇件 ($60) - 好腥又有細骨

陸陸自家炸響鈴 ($44) - 有陣唔知咩味咁       

炸魚皮 ($40) - 硬崩崩又無味   衰過我喺街市買嚟食嗰啲  

陸陸鮮菜籃 ($72) - 食剩哂啲菜   我叫家姐拎走啦   成餐飯真係咩都食剩一半   好唔鍾意囉   

食完雞煲就打邊爐   我哋要辣湯   不過都係無味囉   其實見到成個煲係油   嗰下唔係咁想打邊爐   因為好似樣樣嘢都索哂啲油咁   哈哈   

青檸梳打 ($48/支) - 衰糟飲剩 1/3   之前都話 Share 啦   死都唔滯   

芒果冰 ($54/2 杯) / 6 Luck (Strawberry/Cherry Tomato/ Orange) ($54/2 杯) - 呢兩杯飲品完全無味

免費嘅雪糕糯米糍  

( 2-SEP-2016  FRI )

今朝等咗 20 分鐘先有車   食埋早餐   終於遲到喇 ~

菇場忙下停下   好快又過半日 ~

Lunch Time 未餓   咁出去行下啦   去萬寧買咗 4 盒 Olay 新生護膚霜   今日大出位價 $154/盒咋   反正都要買   一次過買好過 ~

買完都 1 點半   即飛番菇場喇 ~

菇場都係忙下停下   3 點幾先食埋個菠蘿叉燒包   其實唔餓   不過唔想留番聽日食 ~

今晚約咗家姐同糟糟去旺角食雞煲   所以搭地鐵 lu   大家都差唔多 6 點 15 分左右到   咁去咗睇車套先   之後再去食店   以為係同阿 Mi 食開嗰間   估唔到係白布街間分店   因為係糟糟比資料我嘛   我以為得一間㗎咋   好在行多 2 條街就係咋   唔係就慘 ~

我哋上樓上   我哋坐個位都好正   因為佢比多咗 2 個位我哋放袋 ~   

限時 2 個鐘   所以一坐低   Waitress 就即刻叫我哋落咗雞煲先   真係比佢搞到精神緊張 ~

咁睇食咩啦   糟糟咩都話要食   但樣樣食啲就唔食   大佬   我依家食力唔同以前   同妳清嘢真係好辛苦   哈哈   但無理由嘥哂家嘛   佢咁叫法   真係好似啲人食自助餐   起勢夾夾夾之後唔食咁囉   我唔想話佢   費事一陣又話我孤寒   但咁食法   真係唔好囉 ~

唉   落完 Order 諗住傾偈啦   點知隔離枱嘅 4 個女仔嘈到死   完全係劈大喉嚨講嘢   佢哋走咗之後真係當堂靜哂   但之後就到糟糟後面隔離班人好嘈啦   個男仔仲間唔中大力 Dup 地   咁我哋即刻望住佢啦   大佬   佢 Dup 到好似有嘢跌落嚟咁呀   連佢班朋友都望住佢   之後無耐又 Dup   我哋頂唔順再望住佢   係好不耐煩咁望住佢   傾偈就傾偈啦   Dup 乜嘢地呀   喺度食飯   真係嘈過酒樓   所以成餐飯都好似比聲音包圍中咁   好煩 ~ 

呢間嘅邊爐料真係完全完全唔得   所以應該唔會再嚟㗎喇   食完又成身雞煲味   慘 ~

糟糟坐火車   我同家姐一齊坐巴士   之後佢喺九龍城轉車 ~

里奧大人話估唔到我咁早番到屋企   我話飽到食唔落糖水   唔係無咁早番㗎 ~

佢要幫我淘嘢嘛   佢話諗住淘完之後有啲私人時間   點知淘咗好耐   我又咁早番   搞到佢連啲啲 私人時間都無   哈哈   正衰公 ~   

沖埋涼就休息   個肚唔知點解扯住痛   所以 11 點幾都瞓喇 ~
  
( 3-SEP-2016  SAT )

唉   尋晚個肚已經扯住痛   以為尿道炎   但之後好似每月一到咁 ~

咁之後打咗番菇場請病假就繼續再瞓   雖然驚   但又好眼瞓 ~

瞓到 10 點半起身   之後即去睇醫生   Check 咗之後話係每月一到   但佢講到好嚴重咁   所以同里奧大人食埋早餐   再去相熟嘅醫生再睇   佢話我係每月一到亂咗   最緊要唔好每個月係咁就得   如果咁就要睇婦科喇   聽完佢講   我個心定好多   但睇完醫生有啲暈暈咃   好在里奧大人可以扶下我 ~

番到屋企沖涼休息   個肚有啲痛   但唔係平時每月一到嘅冤住痛   不過就只係想瞓瞓瞓囉 ~

激死我   今日本來係去家姐屋企打邊爐做節家嘛   點知無啦啦咁   唉 ~

我喺梳化瞓下醒下   家姐 6 點左右嚟屋企淘車套   佢都話我好似無咩嘢咁   哈哈 ~

家姐都醒   今朝 Whatsapp 我食咩   我無覆到   佢都估我唔舒服   因為平時我一定覆佢呢 ~

佢有佢淘   我有我瞓   之後我差唔多 7 點都醒喇   咁啱家姐都搞掂   佢都番屋企 lu ~

咁里奧大人去買叉鴨飯   佢同埋家姐一齊出門口   佢話家姐去美心買 Cake   我話你一定無陪家姐啦   估唔到佢有陪   之後家姐話陪番佢買飯   里奧大人話唔駛啦   兜來兜去做乜鬼   早啲番屋企好過   哈哈 ~

我無胃口食呀   好在聞到叉鴨味都唔反胃   算好好㗎喇 ~

之後里奧大人同我講   話比咗 2 盒凍嘅柑香茶比家姐   因為雪櫃爆哂無位   真係好大膽啦   唔問我就比人   不過佢都知我實會比家姐嘅   其他人就唔敢亂比㗎   哈哈 ~

里奧大人成日話我大食   我覺得佢都唔野少囉   食完飯抖陣又食 Cake   之後無耐又食花生同飲啤酒   以前我真係咩都咬啲   呢幾個月都變咗無咁大胃口   真係唔想食就唔想食囉 ~

( 4-SEP-2016  SUN )

我瞓到 11 點幾先醒呀   里奧大人起身就去買包做早餐   咁我都出廳喇 ~

我睇 "琅瑘榜"   里奧大人就熨 2 機衫   仲洗多 1 機衫   次次我唔舒服   佢都會幫手熨衫   如果佢幫手抹埋櫃拖埋地   執下間屋就更好   哈哈 ~

咁我都係瞓下醒下   之後見佢搞掂哂佢就睇書   抖陣就食個杯麵   食完就強調話 "我其實好細食㗎咋"   大佬   杯麵呀   都好飽㗎 ~       

6 點幾又話買豬柳蛋漢堡番屋企食   不過我完全食唔落嘢   最緊要佢自己想食就得喇 ~

8 點 沖埋涼   又瞓下醒下   又睇電視   最後成 12 點先瞓呀 ~ 

京都豬扒 + 臘腸炒西蘭花 ( 1-SEP-2016 )

( 1-SEP-2016  THU )

尋晚落咗場大雨   今朝涼番好多呢   舒服舒服 ~

早餐食腿治   煎咗嘅火腿真係好味啲   但其實我又唔係咁鍾意食火腿 ~

做埋個長命 Report 就搞掂   可以做下私人嘢 ~

Lunch Time 出去 7 仔買柑香茶   之前只得澳門有得飲咋   我覺得都幾好味道   估唔到依家香港有得買   所以買咗 9 盒   難得特價 $10/3 盒   以 375ml 嚟講算抵㗎喇 ~

買完就買酸辣米線番菇場食   已經 1 點喇   唔可以 Hea 食 lu ~

菇場無啦啦忙呀   一望個鐘已經 4 點幾   所以其實有時忙下都唔錯呢 ~

里奧大人 2 點去油麻地見客   佢見完客之後   我叫佢喺九龍灣地鐵站嘅 7 仔幫我買柑香茶   估唔到佢話油麻地間 7 仔有貨   買咗 6 盒比我   最搞笑係油麻地同菇場附近間 7 仔都問要唔要夠 1 箱   但我話 24 盒太多   始終唔係有益嘢嘛   我見佢原價都只係 $4.9/盒   咁第時可能會出 6 Pack 裝   咁到時再買都未遲   我唔想一次買咁多   買完又夾硬飲   唔 Enjoy 囉 ~

里奧大人 5 點番到屋企 lu   我放工都即走喇 ~

今晚煮埋 2 個公仔牌米粉   呢隻米粉真係超級勁難食   次次食完都反胃   好在依家清哂   其實唔記得買咩送嘅   比着以前真係即掉   依家就唔會㗎喇 ~   

7 點開飯   不過今晚早食完都唔敢徑步喇   個天好似想落雨咁 ~ 

是日晚餐 - 京都豬扒 + 臘腸炒西蘭花 

京都豬扒 - 喺 Taste 買 3 塊豬扒要 $28   街市 4 塊就係 $29   不過唔知點解我覺得街市嘅豬扒有陣味   但豬骨又唔覺有喎   今晚又清埋 2 個蕃茄   將佢切片   落鑊煮一陣再加埋茄汁豉油胡椒粉同糖一齊煮   估唔到最好味係個蕃茄   好甜呀   唔知係咪本身都已經甜呢   我覺得自己今次整得好好食   所以好開心呀 ~   

臘腸炒西蘭花 - 清埋最後一個西蘭花   咁加多條臘腸   當堂無咁單調   呵呵 ~

搞掂哂就飲埋碗桑寄生茶   其實今次煲得比較濃味   但估唔到里奧大人都接受到   咁都好   下次再煲過   桑寄生茶好有益㗎 ~

沖埋涼就休息喇   今晚好攰咁   我自己 11 點唔夠都入房瞓喇 ~