薑蓉金菇撈麵 ( 7-AUG-2017 )

( 7-AUG-2017  MON )

今朝 7 點 45 分先起身   星期一多數瞓晏少少   感覺好精神啲   哈哈 ~

早餐食芝腿治   其實唔知食咩好   咁是但啦 ~



菇場忙咗陣   之後我問溫總係咪有嘢要我跟 ?!   條友即刻手頭上嘅嘢唔做   即教我呀   平時叫佢比嘢就話一陣先 ~

咁教我就唔該 Run 一次先好教我啦   教兩張都係錯嘅資料   佢自己都話點解咁點解咁 ?!   我點知妳點解咁呀 ?!   頂佢唔順   之後叫我慢慢做   我心諗   我做得快就顯得佢慢   所以佢強調咗 3 次叫我慢慢做 ~

不過我都唔會做住先啦   樣樣得一半   我等埋齊哂先做   唔係又要做重覆嘢 ~

呢排作乜   又攰又暈   頭先暈咗一嘢   可能有新嘢做太緊張   哈哈 ~

整下相   好快又 Lunch Time   咁又未餓   行咗去買補牆泥   之後再行多陣就買腸粉燒賣番菇場食   今日無啦啦又好想食燒賣   奇奇怪怪 ~

忙下又停下   又 Load 下相   準時放工走人 lu ~

番到屋企好攰   灘喺梳化都唔願郁 ~

6 點半開始煮嘢   個人有啲暈   都係早食早休息 ~

是日懶餐 - 薑蓉金菇撈麵  

薑蓉金菇撈麵 - 勁咯   個炒麵餅擺咗個幾星期   好在無壞咋   所以快快趣食埋去   薑蓉係星期日買雞嘅時候比㗎   唔好嘥埋   加咗隻指天椒落去炒兩炒   咁樣辣辣地哋好味啲   但其實你炒麵餅都好鬼大個   食剩半個真係食唔落   最後都係掉咗 ~

今日唔係狀態   但又好想徑步   不過最後都係唔徑喇   始終個人暈暈哋   都係休息好啲 ~

咁里奧大人食埋嘢先番屋企   我都沖涼先喇   想快啲休息 ~

佢差唔多 9 點番到嚟   不過我 9 點 45 分都瞓喇 ~

咖哩雞 + 西蘭花 ( 6-AUG-2017 )

( 6-AUG-2017  SUN )

今朝 10 點起身喇   因為教會有事奉   沖埋涼就同里奧大人一齊食早餐   之後就各自活動喇 ~





崇拜完畢就去超市買菜   再去燒味舖買半隻雞   最後買埋壽司就番屋企 ~

番到屋企都差唔多 2 點   咁食嘢 lu   因為好眼瞓   想食完瞓下晏覺 ~

食剩 4 嚿留番今晚食



食完又精神咗啲   咁熨下衫啦   熨完衫就熄冷氣   呵呵 ~

睇睇下電視又瞓咗半個鐘   應該係作乜喇   無理由成日咁攰呢 ~

里奧大人好似 5 點幾番到屋企   一番到屋企就沖涼   好似好熱咁   但我覺得好凍喎 ~

佢飲埋杯桑寄生   之後無耐話反胃   咁我話抖陣先煮飯   反正我未餓 ~

7 點半煮飯   因為我要徑步   唔想咁晏煮   叫佢反胃都食啲   唔好阻住我徑步呢 ~

昤日懶餐 - 咖哩雞 + 西蘭花  

咖哩雞 - 買咗半隻雞   以前鍾意煮咖哩雞翼   因為夠方便   點知上次去阿 mi 屋企食咖哩雞   佢教話買現成嘅雞   唔駛特登煮熟好方便   所以我要好好記得呢個方法   哈哈   呢個咖哩汁係阿 mi 比我架   用咗 2 湯更   剩番就倒入樽放入雪櫃   食多兩次應該食完   哈哈 ~

西蘭花 - 淥 1 個算喇   我又唔太餓嘛   留番 1 個聽晚食   又可以唔駛特登買菜   呵呵 ~

搞掂哂就徑步   徑 20 分鐘   個人真係舒服好多 ~

沖埋涼就休息   睇多陣電視   10 點 45 分都瞓喇   瞓得就瞓嘛   哈哈 ~ 

興記茶餐廳 @ 牛頭角 ( 5-AUG-2017 )

( 5-AUG-2017  SAT )

今朝同家姐食早餐   真係好似見完無耐又見咁   哈哈 ~





食下傾下   話咁快又要番工 lu ~

菇場忙咗陣   之後 Load 相   星期六嘛   真係無 Mood 做嘢囉 ~

差唔多 12 點半先忙   好在 20 分鐘搞掂咋 ~

BG 又係好怕凍   咁佢出去幫老細買飯   我話做咩唔除咗件冷外套 ?!   佢話仲喺好凍   之後佢話有次佢同老細一齊等車   佢叫老細行去唔曬嘅地方   老細話唔駛   佢要解凍   哈哈   都話菇場好凍啦   個個都着外套㗎   除咗西瓜毫升同阿爽   佢哋好似唔怕凍咁 ~   

放工番屋企   抖陣就整嘢食 ~



依家個人真係怕凍定咩呢   我番到屋企完全唔駛開冷氣   開風扇都覺得凍凍哋添呀   其實咁都好   慳番唔少電費   同埋個人無咁濕氣重   呢樣最好囉 ~

好鬼飽呀   但又好鬼眼瞓   所以無動力做家務   3 點左右瞓咗   瞓咗半個鐘   之後睇電視   呢期鍾意喺 Youtube 睇嘢   咩都有得睇   真係好鬼正   哈哈 ~

抖下又煲桑寄生蓮子茶   因為原來之前果盒仲未煲哂   想快啲清哂雪櫃啲嘢呀 ~

約咗里奧大人 6 點半喺興記等   無冷氣咁嘅   好怕食嘢食到出汗   係焗到出汗喎   真係食龍肉都無味囉 ~

快食快走   里奧大人去拎嘢   我就番屋企先   因為我要去徑步呀 ~

今晚攰㗎   但中午太 Heavy   點都要郁囉   徑咗 20 分鐘   番到屋企即沖涼   之後休息 ~

真係好攰   所以 11 點左右都自己瞓先喇 ~

住家飯 @ 家姐屋企 ( 4-AUG-2017 )

煎釀三寶 - 每食 1 隻尖椒就會講辣唔辣   笑死   我同姐夫一食到辣就比家姐食呢   哈哈哈哈 



我叫工人整比我食㗎   因為佢真係整得好好味呢

蠔油燜冬菇鴨掌 - 工人特登煮比我食㗎   真係非常感動呢   其實我都估佢會煮比我食   但我唔想講話想食咩   因為真係是但家常菜都得嘛   最緊要方便



沙巴龍躉 - 姐夫話呢啲魚無味   只係滑   比佢咁講又好似係   哈哈   呢條 $50 咋   最衰佢會郁啦   唔係我一定會買來食囉 



最愛食蔥絲   多多都食得哂啊   



蒜蓉炒絲瓜 - 呢度 1 條半   最搞笑家姐好大反應問工人   乜可以買半條㗎 ?!   工人話半條留起咗   因為 1 條太少   2 條太多   咁又係   我哋都食剩 10 嚿   哈哈



老黃瓜豬骨湯 - 正呀   嘆得冷氣多   真係要飲祛濕湯呢



( 4-AUG-2017  FRI )

感恩一覺瞓天光   但其實 7 點 20 分已經醒咗   不過懶床到 7 點半先起身   硬係覺得鬧鐘響先瞓夠時間咁   哈哈 ~

早餐食芝腿治   因為呢間餐廳嘅麵包   烘咗有啲煙煙韌韌咁   同埋有啲溶溶哋嘅牛油   所以好正 ~



菇場忙啦   其實咁都好   時間過得好快 ~

Lunch Time 出去食水餃米   下次真係要少米喇   依家真係夠就食唔落   唔係飽喎   都唔識點講添 ~



食完就行陣   買咗件外套比姑奶做生日禮物   又買咗條 One Piece 比自己   呵呵 ~

仍然忙呀   好在 5 點左右就搞掂 ~

家姐今日 Off   佢順便帶埋狗仔做針灸   所以佢 5 點已經喺屋企 lu ~

咁我放工番屋企拎嘢   之後家姐車我去佢屋企   原來都 6 點半 lu ~

咁我話好凍嘛   最搞笑家姐話驚我熱   開定冷氣等我   咁我 OK 嘅   始終開冷氣係舒服啲呢   同埋佢啲狗都要開冷氣呀   話唔開呢   好似有啲扯蝦咁   我咪話囉   佢哋貼住個地下   一定熱過我哋   所以呢啲錢唔慳得呢 ~

飲碗湯就開飯喇   今餐樣樣都好味道   同埋唔駛煮有得食   真係最開心   哈哈哈哈 ~

食飯嘅時候   家姐話工人今日好緊張   家姐出門口時係咁問家姐煮啲好咩   家姐話趕住出門口   無時間答佢   之後家姐就打比我想食咩   我話咩都無所謂   有條魚   同埋想飲湯就可以咯 ~

工人都話因為我唔係成日嚟   所以想煮啲嘢比我食   我好感動㗎   因為佢記得我鍾意食咩   其實家姐兩個工人都對我好好   媽咪工人又對我好好   加上我啲朋友又對我好好   我覺得自己都幸福㗎   嘻嘻 ~

食完飯抖陣就食蜜瓜   其實我好飽   但家姐係都要我食   之後工人又拎埋佢啲私伙炸嘢我食   我話真係食唔落   咁食完生果   家姐又問我食唔食甜筒   大嫂   今時唔同往日   我真係唔可以食咁多嘢   咁好啦   佢又叫我睇佢個薯片櫃   無啦啦又拎包薯片出來食   我又食咗幾塊細嘅   因為試下咩味道   點解家姐咁鍾意食囉   哈哈 ~

喺清邁買㗎   如果香港有就好啦   隨時買比家姐食都得 

又唔係好甜   都 OK   但我都係鍾意食鹹嘅薯片多啲呢

飯氣攻心   因為真係好少會食完飯就坐嘛   喺屋企點都要洗埋碗   咁家姐屋企又凍   如果今晚喺家姐屋企瞓   我一定瞓鬼着咗添呀 ~

B 仔瞓到好林



麥包初初都瞓得好林

  
我一埋去影相   佢就開眼了 
  


之後想影佢瞓覺都難喇   哈哈哈哈



坐到 9 點就走人   家姐車我番屋企   今晚全程都只係坐同食   爽呀 ~

番到屋企即沖涼   無耐里奧大人都番嚟 lu   喺家姐屋企吸得太勁冷氣   加上又無乜郁   沖完熱水涼都唔覺熱添呀   所以冷氣開咗 40 分鐘又要熄   開風扇算喇   開風扇都覺得凍凍哋呀 ~

又作乜乜咁   突然間好眼腫   所以 11 點幾都瞓喇   瞓多啲好啲呢 ~

臘腸蒸飯 + 菜心苗 ( 3-AUG-2017 )

又食阿婆餐   哈哈  



( 3-AUG-2017  THU )

話咁快又星期四   應該係話   話咁快就 8 月呢 ~

今朝 7 點 45 分起身   去到餐廳已經 8 點 35 分   咁我食通粉餐嘛   但見咁晏 8 卦都無 whatsapp 我   可能突然要上大陸都未定   咁我勁落胡椒粉啦   點知一落完就問我喺邊 ~



菇場忙呀   但好充實   哈哈 ~

Lunch time 未餓   咁去超市買嘢啦   買完都 1 點 10 分   咁番菇場喇   食埋健康餐就開工   話時話   食健康餐其實都好熱氣   所以真係要停一停喇   哈哈 ~



菇場仍然忙啦   之後阿爽問西瓜有無搵我傾嘢   我仲以為傾 FC 嘅嘢   點知佢話溫總遲啲會比啲嘢我做   我頂個死溫總   自己唔想做就比我做   呢啲嘢應該係 A/C 做家嘛 ~

咁西瓜 Email 咗比 PSY   問佢部門啲人做得唔得 ?!   咁 PSY 又搞出個大頭佛   叫佢部門啲人每日做啲咩要 Report 比佢知   咁就算妳唔忙呀   都咩都寫出來話做咗啲咩啦   咁熊人就覺得自己部門啲人好忙   同埋無理由話自己部門啲人唔忙家嘛   所以演變咗到我做囉 ~

A/C Dept 有 5 個人   但 8 卦都話唔見得佢哋個個都忙   有個成日篤電話   另一個就用手機睇小說   不過佢哋坐啲位就好好囉   無人見到佢哋做啲咩 ~

我個位就成日有人經過   係人都知我上網   所以覺得我最得閒係應該嘅   我已經做緊兩個人嘅嘢啦   我都照做   反正總好過坐喺度   我都忙啦   但我唔會同同事講   因為人哋會知妳做緊嘢家嘛   嗰時我休養要 Shipping Dept 幫手做   我一番到嚟   佢哋都同我講   原來我咁多嘢做 ~

聽完我要做溫總啲嘢確實唔開心   因為佢話自己多嘢做到瞓唔着   但我見佢成日打機㗎喎   將啲紙放到成枱到係   咁將手機放喺一大堆紙下面   成日喺到掃掃掃部手機   好在 8 卦都見過咋   唔係真係講都無人信囉 ~

同 8 卦呻完又要繼續做啦   放工前 10 分鐘搞掂   但有長命 Report 要做   不過聽日先做   一次過做哂好過 ~

放工番屋企   浸好菜就抹柜   之後 6 點 45 分就開餐喇 ~         

是日懶餐 - 臘腸蒸飯 + 菜心苗

臘腸蒸飯 - 個飯係星期日㗎喇   點都要食埋去囉   加 2 條臘腸一齊蒸   夠哂方便   呵呵 ~

菜心苗 - 又無苦喎   咁奇怪嘅 ~

食完抖陣就去徑步   徑 25 分鐘   番到屋企都 8 點   拖埋地就開機洗衫   之後即沖涼 ~

晾埋衫就休息喇   今日攰攰地   哈哈 ~

睇埋電視   11 點幾都瞓 lu ~   

火腿炒麵 + 菜心苗 ( 2-AUG-2017 )

( 2-AUG-2017  WED )

感恩尋晚瞓得好呀   如果唔係就慘咯   因為前晚瞓得唔好   嘩哈哈 ~

今朝食芝腿治   蛋治真係好漏   都係間唔中食下好咯 ~



菇場唔太忙好開心啦   點知 11 點開始勁忙   難得大粒唔喺度   點解今日要咁忙㗎 ~

Lunch Time 出去行陣   諗住買腸粉 + 釀 3 寶   咁我問佢有無腸粉   佢話有   之後就整咗呢 Set 比我   其實我依家好驚食燒賣囉   不過買慣買熟就算啦   同埋佢又特登整比我先 ~

嘩嘩嘩   要還喇   睇怕要做得哂都要聽日㗎喇 ~

做呀做   做唔哂呀   不過放工都即走 lu ~

番到屋企即預備   搞掂哂都 6 點 45 分 ~

是日懶餐 - 火腿炒麵 + 菜心苗

火腿炒麵 - 好耐無買金妹牌火腿片   估唔到煎香又幾好味   不過我覺得有啲鹹   個麵餅星期六買   我仲買咗 2 個添   今晚點都要清 1 個  仲有 1 個就聽晚食埋去啦   最慘係炒出嚟係咁鬼大碟囉   但又唔想做 Lunch Box   咁搞法咪即係連食 4 餐炒麵 ?!   唔好喇啩 ~

菜心苗 - 今次喺另一檔買   但苦苦哋嘅   仲有半斤添   聽晚再食   睇下係咪苦先 ~

洗埋碗都 7 點半   即刻去徑步呢   難得無落雨   同埋我真係好鬼飽囉 ~

出咗一身汗真係 Very Good   沖埋涼就休息 ~

依家多數開一個鐘頭冷氣   之後熄冷氣開風扇   臨瞓先再開   咁又慳電又唔駛咁凍   呢排吹得太勁冷氣   個膝頭哥痛㗎   成個阿婆咁   就係咁   我先要徑步   等身體好啲囉 ~

今日做咗成日   真係有啲攰   所以 10 點 50 分即上床瞓喇 ~

福源餐廳小廚 @ 官塘 ( 1-AUG-2017 )

( 1-AUG-2017  TUE )

今朝好在 8 點出門口咋   因為 7 點 45 分突然間落好大雨呀   不過只係落咗一陣咁囉   快啲落場雨都好   天氣唔駛咁焗熱呢 ~

早餐食蛋牛治   勁飽呀 ~



菇場唔太忙   咁 8 卦又係咁講講講   佢成日打 Keyboard 好鬼大聲   如果激動仲更加大聲   咁菇場又靜   佢打完又到我打   全場得我同佢嘅 Keyboard 聲   係人都知我哋傾偈 ~

咁有次佢講啲嘢我知   問我震唔震驚 ?!   我話好震驚呀   佢之後即打 "震驚 13 億人"   嗰下笑死我呀   上網睇啲健康網   好多時都會出現 "震驚 13 億人" 呢幾隻字   吹到咁大   但其實佢啲嘢係無料到囉 ~

Lunch Time 唔餓呀   但天氣咁焗熱   我又唔想出街行   所以食健康餐算喇 ~

又 Load 相   再望個鐘原來已經 5 點   時間過得好快呢 ~

今日里奧大人喺上環見客   咁同佢出去食   咁去飯堂啦 ~

去埋今次唔再去喇   無咩冷氣咁   里奧大人話食到出汗添呀 ~

食完我幫家姐去萬寧買嘢   佢話買牙膏送嘅杯好靚喎   同埋送把 Minions 遮   今日 Enjoy 仲有 95 折   所以好抵 ~



家姐成日叫佢做 "呢隻嘢" 幾得意   依家都幾鍾意佢   同埋覺得佢外型好似粒藥丸   哈哈



咁佢話要 4 隻唔同色先買   咁好啦   我去到萬寧   第一時間問個經理仲有無遮 ?!   無遮就唔買啦   咁個經理話有   我即話妳留比我   我即買 4 盒牙膏   咁有個女人都同時揀緊牙膏   仲要揀咗我嘅色   好在個倉有咋   咁我買夠 4 盒   佢就拎咗 2 盒喺 Cashier   咁 Cashier 話得一把遮   邊個比錢先就比邊個   咁我即話頭先同經理講咗留比我㗎   咁個女人又話佢問緊經理有無原味   我都係買 4 盒   不過好似無原味   咁即係妳其實都唔知自己買唔買到 4 盒啦 ~

我搞掂哂佢都仲未揀完   又話今日唔記得帶環保袋添   咁其實佢都唔知係咪會買   因為我比完錢就走   唔知最後係點   同埋其實帶咗環保袋都無用   普通嘅環保袋係裝唔落 4 盒牙膏㗎   我都要比五毫子買個膠袋   因為我個環保袋只裝到 1 盒咋   哈哈 ~  

不過呢間嘅職員都好好   會幫妳打去另一間分店問有無遮   會幫妳留番把遮   但最主要係 4 隻顏色要齊囉   唔係要把遮都無用   之前去咗睇   得 3 隻色咋 ~

買完即番屋企   真係熱到成身汗呀   不過我都想出去徑步囉 ~

徑咗半個鐘   爽呀   番到屋企即沖涼   之後休息喇 ~

諗住抖下   家姐打嚟傾偈   又傾咗成 45 分鐘   咩都傾一餐   其實我哋真係口水婆   哈哈 ~

睇下電視   又同冰姑傾下偈   睇下佢今日番工咩環境   傾到 11 點幾   我都要瞓覺喇 ~