麻酸樂米線專門店 @ 九龍灣 ( 6-AUG-2018 )

我成日覺得啲配菜擺到好亂

( 6-AUG-2018  MON )

雖然一覺瞓天光   但起身都係有啲攰添 ~

早餐食芝腿治   今次溶哂啲芝士   所以覺得好好味呀    開心開心 ~



菇場勁忙   忙到完全唔想上網   只係想快啲做哂啲嘢   哈哈 ~

Lunch Time 出去買生果   之後再買嘢食番菇場食   差唔多開工嘅時候   診所打來   不過我聽唔到   佢就留言話報告有啲問題   醫生要同我講啲嘢 ~

嘩   聽完之後   我嚇到震哂   寫電話號碼都寫錯埋 ~

咁打去診所   姑娘都話報告有啲問題   醫生想約我   同我講啲嘢   咁我同姑娘講我依家好驚   我想問係咪生 Cancer ?!   佢話唔係生 Cancer   只係報告有啲問題   等醫生同妳講解   妳無生 Cancer 呢 ~

聽完之後安樂哂   咁約咗聽日聽報告   要即時同西瓜請假   我話唔好意思   因為之前檢查嘅報告有啲問題   我聽日要覆診   佢望住電腦打嘢   係咁點頭   講真   呢個動作我好反感   但你點憎我請假   你都問候聲啦   等我覺得你係一個會關心下屬嘅好上司啦 ~

之後即打比里奧大人   但居然我喊住講   因為頭先驚到我死   所以真係要喊出來   宣洩一下 ~

佢本身要去舖頭整嘢   我話咁你陪唔陪我睇報告呀 ?!   佢話梗陪啦   妳緊要啲嘛   聽到佢咁講   都幾感動下 ~

不過我都知道佢都會好緊張   分分鐘緊張過我   因為我依家識處理自己情緒   喊咗緊張咗一輪   就要處理一下之後點做   呢啲先緊要 ~

佢之後話叫其中比較口密嘅姑奶們幫我祈禱   我話 OK   但我想簡單處理   唔駛咁 Detail 講出什麼事   因為我都唔知依家報告情況係點 ~

今日忙到顛   放工都仲未做完   但好在急嘢搞掂哂 ~

我放工都即走喇   同里奧大人去麻酸樂   真係諗唔到食咩好   6 點食飯太早喇   哈哈 ~

走出昨日嘅困局 (唔好把今成為昨天)   放棄過去嘅生活方式    盼望明天活在今天   我哋知道人不能   神都能   困難當中要緊緊依靠主   因為恩典必夠用 ~

今晚嘅信息   真係好啱里奧大人聽呀   希望佢接收得到啦   哈哈 ~

聽完培靈會都已經 9 點幾   番到屋企沖埋涼都成 10 點了 ~

今晚整呢樣整果樣   成 12 點先瞓   好在聽日 Off 咋 ~

海景粥店茶餐廳 ( 5-AUG-2018 )

突然好想食鹹肉糭



炸兩 - 油炸鬼脆卜卜   勁好味呀   哈哈



艇仔粥



( 5-AUG-2018  SUN )

今朝 9 點半起身   沖埋涼就去食早餐   今日有事奉   我要早啲番教會預備 ~

我成日叫里奧大人笑嘅時候   都係咁樣整里奧大人㗎   所以好鍾意呢件 Tee   哈哈







崇拜完畢就同水姑飲茶   我覺得飲茶唔係問題   但真係唔好成日食同一樣嘢囉   我就算餓   我都唔想食   係睇見都驚呀 ~











咁講開情緒病   水姑話邊會有情緒病㗎 ?!   我最憎佢呢樣嘢   自己無接觸過呢啲病人   妳就咪話無呢樣嘢   世界上好多怪病   妳識哂呀 ?!

所以我忍唔住話佢   因為佢已經唔係第一次話邊會有呢樣病   邊會有嗰樣病   成日認叻   又唔係叻先死 ~

我話妳唔好成日將自己主觀感覺講一樣嘢   情緒病係有   係妳唔知   身邊無人係咁啫   但妳唔好話無 ~

之後佢無出聲   連里奧大人都話係有情緒病呢樣嘢   仲要話係嗰一刻發作   下一刻就係跳樓   控制唔到囉 ~

我覺得妳唔用同理心   我已經好反感   仲要好肯定話無   我真係好想講   妳顧掂妳自己一家人先啦   以為樣樣為人好   但其實完全唔明理人想法   唔理人感受   一句講嘢   根本活喺自己世界當中   依家係 2018 年㗎喇   唔該同時代並進   無人要妳一定要跟住世界走   但妳都要知道呢個世界係轉變緊囉   唔該 ~

飲到 3 點左右都走人   番到屋企都要休息下 ~

番到屋企   里奧大人話估唔到我頭先咁激動   我問佢有無講錯先 ?!   佢話無   因為佢都好認同我講法   所以我都話佢家姐無得救   成日活喺自己世界入面 ~

我上網睇嘢   里奧大人就話要沖涼瞓陣   不過我 4 點半開始勁眼瞓   一瞓就瞓到 5 點半   當堂精神哂呀 ~

咁又要出發食嘢喇   其實唔太餓   但又唔想 9 點幾先食   所以我話食粥呀 ~

今晚都係 7 點前到   而今晚分享嘅信息係關係   鞏固家庭基礎信仰   同埋接納與愛   呢幾樣嘢   我真係要多多學習   希望所有人都能夠睇見 / 聽見 / 感受 / 信靠主耶穌呢 ~

今晚 9 點幾散會   番到屋企都即沖涼休息一下喇 ~

睇多陣電視   11 點幾都瞓 lu   好在都有睡意   哈哈 ~

百樂門國際宴會廳 @ 九龍灣 ( 4-AUG-2018 )

雀巢海中寶



野菌燒汁牛柳粒

濃湯魚滑浸菜苗



燒鵝 (例牌)



滷水掌翼



( 4-AUG-2018  SAT )

今朝瞓到自然醒呀   居然瞓到 11 點   咁即刻沖涼落樓食早餐喇 ~





番到屋企又抖下   1 點出發同婆婆飲茶 ~

今日同里奧大人各有節目   我約咗婆婆 2 點飲茶   佢就約咗 2 點 45 分同水姑兩老婆傾嘢 ~

最搞笑係大食表妹同里奧大人   佢哋以為我係同埋家姐一齊同婆婆飲茶   無諗過我自己一個人去陪婆婆呢 ~

我話想做就做囉   反正我都成日話約婆婆飲茶   依家里奧大人唔去仲好   一陣苦埋瓜乾咁面口對住我婆婆   嚇到佢以為唔想同佢飲茶添   哈哈 ~

講真   今次真係好似整定同婆婆飲茶咁   事緣尋日屋企發生咗啲嘢   因為婆婆工人而起   咁我都想了解下婆婆點諗法   所以就約婆婆啦   咁啱佢得閒   所以去飲茶囉 ~

婆婆唔食台灣嘢同越南嘢   咁同婆婆去咗左鄰右李飲茶囉   最緊要佢想食就得喇 ~

蜜汁叉燒腸



蠔皇鮮竹卷



鮮蝦燒賣



不過到最後   我都無問發生咩嘢事   始終尋日發生   今日就問   太敏感了   同埋我心中有數   不過大人講嘢   我哋做細嘅就唔出聲喇   同埋我成日都話   我唔係成日探婆婆   我都無資格說話呢 ~

大舅父同細舅母佢哋喺個群組度講工人不是   咁我咪同里奧大人講囉   我唔喺現場   佢哋講咩都得啦   我要親眼見親耳聽到先信囉   好怕啲人做埋啲小學雞嘢   未知道成件事就去斷定人哋錯   我最憎   後尾終於知道原來係細舅母話錯工人   大舅父叫細舅母保持緘默   之後細舅母嬲到退出群組   小學雞到呢   我其實覺得佢退出仲好   小事化大   不知所謂 ~

咁我陪婆婆周圍行下啦   焗到我嗌救命   之後婆婆話去超市買油    我即刻話好呀好呀   因為有冷氣呀   哈哈 ~

婆婆叫我去佢屋企坐   咁其實佢唔講   我都係會去㗎啦 ~

坐到差唔多 5 點都走喇   約咗里奧大人喺舖頭等   其實我本身應承咗 5 點到舖頭   已經會遲大到呢   所以婆婆叫我食晚飯   我都話下次咯   我約咗人嘛 ~

去到舖頭都 6 點   整咗陣就走人 ~

約咗水姑同佢老公傾嘢   所以去百樂門食飯喇 ~

食到 8 點幾就走人   之後去姑奶屋企   再同朋友一齊傾嘢   傾到 11 點幾呀   攰到我呢 ~

打的番屋企   之後即沖涼瞓覺喇 ~

抹茶館 @ 九龍灣 ( 3-AUG-2018 )

黑麻油濃厚豬骨拉麵定食 ($89)
配菜 2 款 / 三文魚壽司 2 件 / 炸雞 2 件 / 甜品 / 指定飲品 1 杯



味道一般啦



香蔥芝麻生薑燒豬肉定食 ($89)
配菜 2 款 / 豚肉野菜湯 / 白飯 / 甜品 / 指定飲品 1 杯 



呢個味道 OK 喎   但係啲白飯太腍啦

想食蕨餅好耐啦   但原來係一啲都唔煙韌嘅   哈哈



凍綠茶



( 3-AUG-2018  FRI )

今日請一日 A/L 呀   因為 12 點半要做婦檢 ~

9 點半起身   沖埋涼就去大家樂食早餐   食完就番屋企抖陣   之後就搭巴士去尖沙咀喇 ~



12 點 15 分到診所   所以等多陣就可以睇醫生了 ~

做咗婦檢 + 抹片檢查   感恩個瘤無大到呀   雖然都唔係細   但已經好開心啦   真係第一次笑住開門走呢 ~

里奧大人 4 點去土瓜灣洗牙   咁我話去煌府飲茶囉   可以坐得耐啲   天氣好鬼焗   唔想周圍行 ~

四寶滑雞扎 - 個賣相嚇我一跳   好肉酸啦



蜜味叉燒腸



我本來叫咗鮮蝦菜苗餃   但見到 2 隻餃上面   都有啲啡色嘅汁 (唔記得影相)   咁我唔要啦   之後同侍應講要換   佢話再蒸要等好耐   我即刻話同我取消呀 ~

頂佢吖   唔好意思都無聲   仲話等好耐   咩態度先 ?!

一樣點心要蒸 23 分鐘   但仲要唔係好熱咋喎   咩玩法呀

其實都唔飽   但都走人喇   去土瓜灣再食嘢 ~

個天灰灰暗暗   同埋好焗



去到紅磡   首先睇咗診所嘅位置   咁樣安心好多㗎   之後再周圍睇下有咩食   見有間格局都乾乾淨淨   所以入去食喇 ~   

沙爹牛肉脆包件農夫沙律 ($32)



芝蛋治烘底 ($27)



4 點開始洗牙   半個鐘搞掂   之後再坐巴士去德福 ~

今晚約咗家姐睇戲   所以一齊食埋晚飯呢   開心開心 ~

里奧大人先搞笑   上星期日佢同家姐傾電話   不過我唔知話內容   家姐星期二喺群組度問係咪 8 月 3 日睇戲 ?!  仲話里奧大人自己話 8 月 1 日去買戲飛添 ~

家姐話西片唔睇   但我哋話超人特攻隊係西片喎   之後話里奧大人話係睇職業特工隊   但奇怪係里奧大人好耐之前係一齊話睇超人特攻隊囉   所以我都奇怪   無啦啦轉睇職業特工隊 ?!

喺個群組嗰度係咁講職業特工隊同超人特攻隊   講到亂鬼哂   之後同里奧大人 3 人會議啦   講話係睇超人特攻隊    咁我話: "清楚哂   我再講清楚   8 月 3 日係去睇職業特工隊"   家姐即話係超人特攻隊呀   呢下笑死我   我都講到亂鬼哂籠了   哈哈哈哈 ~

食完飯就即去買爆谷套餐   買 1 Set 大嘅   3 個 Share 食真係好夠咯   啱啱食完飯嘛 ~ 

呢套卡通片好好笑呀   所以話咁快過咗 2 個鐘頭喇 ~

陪埋家姐等巴士就走喇   番到屋企即沖涼   之後休息 ~

我完全唔眼瞓咁呀   可能頭先飲咗杯綠茶   所以差唔多 1 點先瞓   好在聽日 Off 咋 ~

牛下新城 @ 九龍灣 ( 2-AUG-2018 )

涼拌麻辣豬手 ($30) / 涼拌麻辣青瓜 ($22) - 依家食呢啲小食都好貴下呀

唔撈一下   里奧大人應該唔知邊樣打邊樣   哈哈

( 2-AUG-2018  THU )

居然一覺瞓天光   感恩呀   因為代表我真係無唔開心呢   如果好激氣   真係好難入睡   同埋會不斷諗好多負面嘅嘢㗎 ~

早餐食芝腿治   唔知食咩好 ~



菇場忙咗陣   咁就即 Load 相喇 ~

點知阿 A 番咗嚟   我又唔可以隨時上網 lu ~

里奧大人 Send 個短訊比我   知佢尋晚做錯咗   之後我寫咗一大段嘢比佢   講出我感受   叫佢必須控制一下自己情緒   好感恩好感恩   佢肯面對同接受我所講嘅一切 ~

最搞笑係佢 Send 嘢比我   咁我又啱啱諗緊寫啲咩   所以唔覆佢住   但信息係 "已讀"   佢問我做咩唔講嘢呀 ?!   因為我好少會咁   佢應該知我嬲   因為佢好少咁緊張我無覆佢㗎 ~

我相信每個人嘅人生當中都會有逆境   但就睇你用咩心態去面對   要是你日怨夜怨就一定喺困局裡面   永遠係唔願意多行一步走出嚟   咁真係無人可以幫到你 ~

安慰說話我會講   但聽完之後   你又固態復盟   不斷要番困局入面   對成件事無幫助之餘   仲搞到自己心情唔好   負面不斷 ~

我真係好怕啲人乜都負面   講極唔聽之餘仲乜都只係話人哋錯話人哋衰   永遠睇唔到自己嘅錯   等如我成日都話   一次兩次三次都遇衰人   我當你黑仔   但次次話人都係衰嘅話   咁就一定係你自己本身有問題   永遠睇唔到自己有問題嘅人先會咁講 ~

做人要兩面睇嘛   咁你先知道對與錯   日日負面思想   做人真係唔會開心   開心又一日   唔開心又一日   點解要揀唔開心   咁我都會有唔開心   咁咪食個朱古力甜筒囉   起碼食嗰下都開心嘛   有啲事發生咗就係事實   改變唔到事實   你就要必須改變自己嘅心態去面對呢 ~

老實講   尋晚爆咗一鑊   今日又寫埋論文   等里奧大人知道我感受   我真係有解脫咗嘅感覺   雖然我都知里奧大人仍然會自己走番困局入面   但起碼呢一刻係我自己走出困局   釋放咗出來啦   哈哈 ~

8 卦要還書   所以又要我陪佢食 Lunch   佢好鍾意打機   一坐低就打機   但又會傾偈  之後佢食完   但我仲未食完   佢又打機   之後我話佢: 你成個港童咁   打機食飯打機   係咪當我唔存在㗎 ?!   之後佢喺度大笑   知衰嘛   哈哈 ~

食完就分道揚鑣   佢還書我打簿   買埋酥皮蛋撻就番菇場喇 ~

我買埋比 8 卦   佢話做咩買比佢   我話突然來想食   咪買埋比你開心些牙囉 ~



話咁快就放工   同里奧大人去牛下食嘢   之後去培靈會喇 ~

其實今朝我問里奧大人想唔想我一齊去培靈會 ?!  佢話想就陪   唔想就算㗎喇 ~

但真係好感恩我可以聽培靈會   今晚得到嘅信息係承認自己有限同軟弱   要學會謙卑   不要自大   虛心接受主耶穌嘅主權同力   因為神掌管一切呢 ~

9 點完畢就番屋企   里奧大人話想去麥記食雪糕喎 ~



食完就飛番屋企喇   沖埋涼就洗衫 ~

聽晚見到家姐   所以即刻開包杏仁條同佢 Share   喺曼谷買㗎   啲口感係入口即溶   好得意

睇陣電視   成 12 點幾先瞓呀 ~

回鍋茄子雞柳 ( 1-AUG-2018 )

( 1-AUG-2018  WED )

感恩又一晚瞓天光呀   我覺得真係好重要㗎   因為我睡眠質素唔係咁好呢 ~

正想出門口嘅時候   里奧大人又問我隻腳痛唔痛 ?!   比佢嚇死   無啦啦有人講嘢嘛 ~

早餐食吞拿魚治   好味   但同時覺得好乾   哈哈 ~



菇場唔太忙   但衰囉   唔諗忙就無啦啦超級勁忙   但諗住忙呢   又可以 Hea 喎   所以都係唔好諗多喇   呵呵 ~

揭下揭下又 8 月   好快就換 2019 年㗎喇   哈哈



Lunch Time 食 K 餐   懶得出去 ~

忙下停下又放工   即番屋企煮飯喇 ~

里奧大人去聽培靈會   難得九龍灣有轉播站嘛   不過我無去呀   因為我想煮飯 ~

咁我煮完都自己食先喇   放入暖壺比佢番嚟食呢 ~

食飯期間就順便煲埋山渣蘋果茶   酸酸咪咪幾好飲喎 ~   

是日晚餐 - 回鍋茄子雞柳  

回鍋茄子雞柳 - 用回鍋肉嘅醬嚟炒   切完茄子先醒起佢好難熟   所以就將啲醬汁加多多水   燴熟佢   之後再落醬汁   但味道同茄子唔太夾   哈哈   本來想落指天椒架   肯定提升哂個味   但又唔想成日都辣嘢囉 ~

洗埋碗抖陣就去徑步   徑咗差唔多 40 分鐘   其實徑步唔聽歌真係唔錯   可以靜靜哋思考一下人生   哈哈 ~

里奧大人 9 點 45 分番到屋企   之後叫佢食飯   居然發脾氣話我緊張啲嘢食多過佢   我心諗   叫你食飯咋   又唔係叫你做啲咩   同埋我仲要幫你洗碗㗎   係咪要等你 11 點食完   我先洗碗呀 ?!   咁我話: 你講咩 ?!   佢就鬼上身講衰嘢   我即發火鬧番佢 ~

情緒唔好   我絕對明白理解   但你要是下下發我脾氣   咁我又可以向邊個發脾氣 ?!   前幾晚已經係咁   今晚又嚟   我覺得我真係要出聲囉 ~

我成日都話   媽咪走咗   我情緒低落過   心情傷痛過你依家九萬陪   因為無人可以比番個媽咪我架   呢樣係咪大鑊過你呀 ?!   難道我就可以任意發脾氣嗎 ?!   等於要是你每日安慰我   但我話你死咗老母咁耐   你點會明我心情呀 ?!   咁你會點吖 ?!

激到我又吞唔到口水   好在我又同阿 mi 呻完   我又真係 OK 番   我其實只係想呻番到氣出來   咁樣做   阿 mi 先慘   聽我呻呻呻   好在我又會聽佢講   唔係佢安慰完我   我又唔聽又呻呻呻   到時到佢顛都似   哈哈 ~

咁我叫里奧大人飲埋山渣蘋果茶啦   佢又話好飲   真係覺得佢係一個甲級嚴重精神分裂病患者 呀 ~

嬲一嬲真係好傷元氣   但又好喎   10 點 45 分就要瞓覺   因為真係好眼瞓   哈哈 ~