臘腸龍蝦丸炒飯 + 臘腸旺菜 + 旺菜木棉魚湯 ( 7-NOV-2018 )

( 7-NOV-2018  WED )

今朝里奧大人一出門   我又瞓唔到   所以起身 lu ~

感恩早咗起身早咗出門口   因為架巴士早咗開呢 ~

早餐食腿蛋治   8 卦一見我食蛋呢   就話乜唔係會好滯咩 ?!   我話間唔中就想食囉 ~



菇場超級勁忙   忙到 11 點半就搞掂   抖陣再要做長命 Report ~

聽見船頭 Book 船   話上網做啲文件仲煩過申請綜援   笑死我哋   不過我都睇住佢問好多嘢   所以應該真係好煩呢 ~

Lunch Time 出去食貢丸米   真係食到無嘢好食   我成日覺得啲貢丸一陣味   好在呢間無咋   今日無落醋   個胃真係唔痛喎 ~

食完就行大運   之後都番菇場 lu ~

搞掂哂 Report 之後就忙到爆炸   所以話咁快就放工 ~

番到屋企即預備   差唔多 7 點 15 分就可以食飯 lu ~

是日懶餐 - 臘腸龍蝦丸炒飯 + 臘腸旺菜 + 旺菜木棉魚湯

臘腸龍蝦丸炒飯 - 我覺得炒飯有蛋絲係好味啲嘅   所以今次又整   將臘腸龍蝦丸切粒   心機菜嚟㗎   哈哈 ~   

臘腸旺菜 - 食埋上次剩嘅旺菜   加條臘腸放面   無咁單調   不過我覺得賣相非常之老土   無計啦   得 6 片   同埋呢   我覺得好似阿強呀   所以影完即刻撥開去   哈哈 ~

旺菜木棉魚湯 - 本來想就咁滾魚湯   但見旺菜嘅芯好似好甜咁   所以加埋落湯度一齊滾   咁我買咗 3 條木棉魚   每條手掌咁大   又見成條無甩到   所以食埋啲魚肉呀   咁又好喎   唔好嘥嘢   哈哈 ~

大清潔埋廚房就開機洗衫   叫里奧大人幫手熨衫   我就沖涼   之後到佢沖涼   我又熨番衫 ~

今次啲功課好難   我都無從入手   所以放棄 ~

里奧大人 10 點唔夠都瞓   我就睇多陣 Youtube   睇到 12 點先瞓 ~

榮基打冷小菜 @ 官塘 ( 6-NOV-2018 )

砂窩雲吞雞煲



鹹魚肉餅煲仔飯



( 6-NOV-2018  TUE )

尋晚起身去咗 2 次廁所   可能飲咗湯啦   但唔飲湯又唔得喎   真係煩死 ~

7 點半唔夠都醒咗   係完全唔想瞓   咁沖涼洗頭番工 lu ~



咁同阿 mi 傾開   佢又瞓得唔好   應該係轉天氣   咁就好喇   事關我呢幾晚都瞓得唔好   如果唔係點會星期六瞓咗 12 個鐘   哈哈 ~

無啦啦塞車   好在今朝早咗 15 分鐘起身咋   感恩感恩 ~

早餐食芝腿治   我掛住睇 Youtube   完全唔知 8 卦叫我落 Order 添   好在最後都無遲到   哈哈 ~

菇場忙呀   所以好快 Lunch Time 了 ~

今日食魚片頭河   食完就去萬寧買平安藥   依家啲藥真係貴到呢   健康就是保你財富   所以真係要好好愛錫身體呀   哈哈 ~

買完之後無啦啦胃酸倒流   痛到我呢   即刻飛番菇場   一坐低就即伏喺枱度休息   勁辛苦呀   好在抖咗 15 分鐘叫好啲   但標完冷汗個人好攰囉 ~



頭先 8 卦都見我行商場   一番嚟見我咁都問我做咩 ?!   我話應該落得太多醋   佢就一定係話我食辣㗎喇   咁我都有食辣   但呢排我成日落醋   真係胃痛多咗   係時候要停 lu ~

到 2 點無啦啦又再痛   好在抖咗 5 分鐘左右無事   但忙到爆炸囉   無得休息了 ~   

唉   平均半個鐘又隱隱作痛一次咁   個人好攰 ~

做到 5 點 40 分都走喇   真係頂唔順   唯有聽朝番來再即刻做埋去啦 ~

今晚本來煮架   但個胃仲係痛   所以要出去食喇 ~

里奧大人 7 點半到   咁食完都番屋企   即開機洗衫   之後沖涼休息 ~

睇多陣電視   11 點都瞓喇 ~

茄汁蝦碌 + 旺菜 + 豆腐梭羅魚湯 ( 5-NOV-2018 )

( 5-NOV-2018  MON )

呢排瞓到半夜都會醒一醒   但又唔係急醒果隻喎   真係好奇怪囉   咁樣好慘啦   要碌幾碌先可以瞓番   唉 ~

早餐食吞拿魚治烘底   今朝唔太餓   所以食到一半就已經好滯咁 ~



菇場唔太忙   但要做長命 Report ~

Lunch Time 出去食水餃米   之後就去買嘢   買完即番菇場   原來已經 1 點半 ~

仍然做長命 Report   諗住一心一意做啦   但又有其他急嘢喎 ~

呢張絨毛被仔真係救我一命   因為我唔記得帶外套 



放工即去買餸   今晚要搵梭羅魚   行咗好多魚檔都無   最後行去另一邊先有   不過行咁多魚檔真係好難頂   今晚仲要好似特別臭咁   我都忍唔住用絲巾掩住個鼻來行   平時唔會咁㗎 ~

買完即番屋企預備喇   下次都係如果去買餸嘅話   嗰餐就咁蒸嘢就算   咁樣就可以無咁辛苦   同埋可以快啲開餐   因為今晚 7 點 45 分先搞掂呀 ~

是日晚餐 - 茄汁蝦碌 + 旺菜 + 豆腐梭羅魚湯

茄汁蝦碌 - 好想食呢個餸   所以即煮   買咗 $40 海蝦   感恩今次啲蝦都彈牙   因為我洗蝦嘅時候   覺得好似腍劈劈咁嘛   里奧大人好鍾意呢個餸   但就唔鍾意剝殼   我會咬啲蝦殼出來   完全唔駛經過雙手囉   呵呵 ~

旺菜 - $10 有 2 個   超級勁抵 ~

豆腐梭羅魚湯 - 尋晚問阿 Mi 煲過梭羅魚未 ?!   佢話好簡單   將啲魚洗兩洗就搞掂   唔駛洗內臟   我其實從未見過梭羅魚   原來係咁細條   我買咗 $20   因為我驚好腥   所以買少少試下   估唔到又 OK 喎   好過買紅衫魚   因為唔駛洗   哈哈 ~

我次次煎炒完嘢就會洗哂 2 個爐頭   里奧大人見到就好驚訝   話咁大陣象㗎 ?!   我話唔係廚房點會咁乾淨喎 (自我感覺非常良好) ~

洗完碗就拖地   之後大清潔廁所   沖埋涼就休息喇   今晚真係無停過   不過咁都好   代表我有精神力氣做嘢嘛 ~

問里奧大人想食咩粥   我試下煮   頂佢   話食柴魚花生粥   我話呢樣要諗諗   之後佢話唔好再問佢嘛   絕對係假民主   咁又係   次次問佢想食咩   佢講完之後實會話唔煮住   咁問來做咩   哈哈 ~

我覺得皮蛋瘦肉粥都難啦   試過煲一次   杰到連自己都唔想食   依家仲要柴魚 + 花生   又要特登去買 1 包咁   不過遲啲都會試下嘅   最緊要買油炸鬼   啲粥唔好食都可以塞住佢把口嘛   哈哈 ~

頭先執零食櫃  呢包喺泰國買嘅零食已經過期一星期   咁要食埋佢喇



酸酸辣辣咁㗎   超級好味道   下次再去一定要入貨  



里奧大人 10 點半都瞓   我就差唔多 11 點先瞓 ~

利佳舫避風塘 @ 荃灣 ( 4-NOV-2018 )

菠蘿咕嚕肉 (唔記得幾錢) - 好味呀   我呢排鍾意食咕嚕嘢



菠蘿好甜



紅燒鮮菌蝦乾豆腐 ($88) - 都 OK 呀   但豆腐好鹹呀

荷香窟窰雞 ($138) - 我覺得無咩特別噃 



( 4-NOV-2018  SUN )

今朝 8 點 40 分起身   係鬧鐘未響都起身   所以里奧大人沖完涼之後都裝下我   睇下係咪見到鬼   哈哈   因為我多數鬧鐘響先起身   哈哈 ~

今日崇拜之後要開會   所以我話要食勁量早餐   講真   食完真係超級勁飽   但見里奧大人好多時都係咁食   佢又無話超級勁飽喎   比佢呃咗添 ~

食完早餐就番學   今日有事奉   但要做 2 個崗位嘅嘢   勁開心   每個崗位都做下真係唔錯   咁樣人哋唔番嘅   我可以即刻補上 ~

我今日嘅身體同精神狀況都好呀   所以里奧大人即約阿 Mi 佢哋   但我哋碼要 3 點先入到荃灣呢 ~

里奧大人堅持今朝先好約阿 Mi 佢哋   因為真係好怕我身體突然又唔舒服   唔想約人又取消   咁又係   之前就係成日朝早無嘢㗎喎   但突然中午或者夜晚就好唔舒服   所以呢兩個幾月   直頭飯都少煮   唔想買完餸又煮唔到   因為真係唔知佢幾時無啦啦又扯住痛囉   呢下先煩 ~

佢哋覆我哋話一齊行街之後食飯   咁無問題啦   最緊要佢哋唔駛就我哋   我哋都係周圍行之嘛 ~

勁開心呀   終於都可以見面喇 ~     

崇拜完畢就開會   1 點 45 分散會   去牛下食啲嘢就入荃灣喇 ~

今日仲係小童價搭地鐵   勁抵囉   入荃灣只係 $4.4   不過喺九龍灣都係多數搭地鐵㗎喇   因為無小巴入去   哈哈 ~

今日阿 Mi 喂陪我哋行街   佢哋帶我哋周圍行   行嘅地方係熟   但真係完全唔記得係咩名   哈哈 ~

同阿 Mi 真係太耐無見啦   好多嘢未傾完咁   但有樣我好感動   佢話: 如果同一個人呻   會將啲負能量比咗嗰個人   所以佢唔敢成日同我呻   我聽完覺得個心好唔舒服   咁即係呢兩個幾月佢有嘢唔敢同我講囉   驚我吸哂佢啲負能量   咁我話無問題喎   大家傾下又可以放鬆番啲嘛 ~

不過老實講   我唔舒服嗰排   我真係靜哂   里奧大人以為發生乜事添呀   見完大家 Say Hello 就靜哂   哈哈   無計啦   個肚成日扯住唔舒服   真係乜 Mood 都無哂㗎 ~

阿 Mi 仍然記得我要買陳皮   哈哈   不過唔想行咁遠 ~

差唔多 5 點半到食店   不過冷氣唔夠   所以個人有啲眼瞓   之後開咗冷氣   但都唔係咁冷氣咁   雖然啲風吹住我個位 ~

阿喂好攰咁呀   可能間食店焗得滯   好似食到差唔多 7 點就走人喇   大家聽日都要番工   所以都唔會晏走   之後一出食店   真係涼過喺入面 ~

呢餐一定要請   因為係阿喂嘅生日飯   佢 9 月尾生日   但因為我身體唔好   所以依家先請食   真係唔好意思 ~

我哋搭地鐵去 APM   里奧大人去 Playlord 買咗件褸 $990 (原價 $1,980)   原來佢頭先喺荃灣已經睇中咗   不過再諗一諗先買喎 ~

買完都即番屋企喇   沖埋涼又睇多陣電視   11 點都瞓覺喇 ~

阿 Mi 送比我哋嘅手信   同埋自家製潤唇膏

麺屋武蔵 @ 大埔 ( 3-NOV-2018 )

爆炸男爵沙律 (Fried Potato Salad) - 個沙律醋非常之酸   所以里奧大人都無乜點食   我要食埋啦 



雙色煙雞翼 - 熱辣辣好味呀   不過真係好熱氣同好飽肚   哈哈





赤豚角拉麵 - 唔好味道

蕃茄豚骨湯拉麵 - 里奧大人話唔好味道   無蕃茄味嘅湯底



巨峰葡萄椰果特飲 (+$5 特飲) - 最緊要夠凍



( 3-NOV-2018  SAT )

勁喇   我一覺瞓到 11 點先起身   瞓咗 12 個鐘呀   真係精神飽滿   原來里奧大人 9 點幾醒咗   我都記得佢問我起身未 ?!   但當時我無問幾點   只係話仲想瞓   無諗過一瞓瞓到 11 點 ~

我直頭完全唔記得里奧大人今日 1 點要去拆線   所以即刷牙去食早餐喇 ~



佢話要是我繼續瞓   佢會自己去拆線先   唔想嘈醒我   哈哈   佢呢樣最好   知我好難瞓得咁好   所以一定比我瞓番夠本呢 ~

食完就番屋企沖涼   之後就搭車出發喇 ~

今日兒童價搭地鐵呀   但我哋用唔到啦   因為去嘅地方都係搭巴士方便   哈哈 ~

1 點前去到診所拆線   里奧大人傷口埋得好好呀   感恩感恩 ~

之後搭巴士去探兒生女 BB   去到都差唔多 2 點幾   玩到 3 點半都走人喇 ~

豬腳薑啲醋好酸



打的去大埔市中心巴士站   因為我諗住坐 307 去銅鑼灣買衛生褲   好在里奧大人等巴士嘅時候   睇邊個站落車   我話平時落橋轉彎個站   但我唔知咩名   之後佢話無喎   我先醒起自己記錯 619 號線   咁要是特登去到中環再轉車去銅鑼灣   我又唔想喎   一程車費都要三十   太貴了   同埋中環真係無地方行囉   所以我話喺大埔行咗先   有得買就唔駛再去銅鑼灣呢 ~

行到 4 點幾有啲餓   所以去食下午茶 ~

楊洲炒飯啲份量都好多   好在我話叫 1 個 Set 咋   同埋好在無最低消費呢   



奶茶紅豆冰



食完又周圍行   去到見到優品 360   所以即買 4 盒 Market O 嘅 Real Cheese Chip 比家姐   因為今日特價 $15/盒   我覺得好抵 ~



感恩可以買到衛生褲   之後再周圍行   里奧大人就喺 Log-On 買咗個背囊   特價 $599 (原價 $975)   感覺好抵   哈哈 ~

我 send 比家姐同阿 mi 睇   話今晚食呢盤壽司   但呃唔到佢哋啦   嘩哈哈哈    



行下行下   里奧大人喺 G2000 買咗件乾濕褸   依家特價 $999 (原價 $1,499)   不過無貨   要星期三先去德福拎 ~

佢次次買嘢   我都話買啦   我買呢   佢就次次話屋企好多   我已經有   咁我買嘅嘢又唔係貴   買下嘢比自己開心下都無妨啫 ~

6 點半左右去食嘢   但呢間唔好食   所以食咗好耐   哈哈 ~

食到好鬼飽   真係要行陣囉   咁阿 mi 話隻 Mask 好用   咁我又再去買   之後再行多陣就番屋企喇 ~

喺 Tonymoly 買咗 Mask   今日所有貨品 4 折呀   我買咗 3 Pack Mask 同埋 1 支唇膏 + 1 支 Mascara   勁開心呀 ~

坐坐下車個背脊好痛   勁似胃酸倒流咁款喎   所以叫里奧大人幫我搓下背脊   咁又好啲喎   其實頭先果餐真係勁飽   但因為係我話要食 Set   所以我點都要食埋囉   講真   食到想嘔   定係啲醋太酸呢 ?!

番到屋企即沖涼   再開機洗衫   之後再熨埋 2 機衫   郁下又好似好啲咁 ~

搞掂哂就睇 Youtube   差唔多12 點先瞓   但心口好痛囉   唔知係咪胃酸倒流呢 ~

康和車仔麵茶餐廳 @ 官塘 ( 2-NOV-2018 )

( 2-NOV-2018  FRI )

今朝里奧大人起身   我都醒醒哋   所以都唔懶床喇 ~

涼咗好多呀   我啲熱底人話涼就真係涼㗎喇   哈哈 ~

8 點 10 分落車   今朝早咗好多呀   所以去 MOS BURGER 慢慢嘆早餐   8 卦唔去 MOS 食㗎   襯佢唔喺度   我就自己去食呢 ~



菇場唔忙   襯唔忙都抖下 lu   因為之後又會勁忙呢 ~

Lunch Time 同家姐去萬寧買舒適達牙膏   買完都差唔多 1 點   即去買酸辣米線   唔知點解勁想食 ~



買 4 支牙膏就送好多嘢   重到我呢

今次又係食完好攰   味精重呀   唉 ~

仍然 Hea 過   之後阿 A 又番來   但買咗蛋撻比我哋做下午茶   咁又好喎   我咁啱想食甜嘢 ~

放工即番屋企抖下   咁里奧大人今日 2 點喺大陸見客   之後再番大陸 Office   所以差唔多 7 點 45 分左右先到官塘   咁我話出去食喇 ~

今日去萬寧買 4 支牙膏   送咗咁多嘢   因為唔知買滿幾多又送乜咁呢



上次去萬寧買 3 件滿 $188   就送咗呢 3 支洗潔精

食完就番屋企   之後開機洗衫   搞掂哂就沖涼休息 ~

勁呀   真係攰到九彩   10 點 45 分都即上床瞓呀   反而里奧大人仲睇緊 Youtube   佢都覺得我好奇怪   聽日 Off 好少見我咁早瞓喎   哈哈 ~ 

栢檔極品海南雞飯 @ 九龍灣 ( 1-NOV-2018 )

二人套餐 ($165)
極品海南雞 (半隻) / 栢檔住家靚湯 / 健康翠綠時菜 / 雞油香飯 



香煎手刴魚香肉飯



( 1-NOV-2018  THU )

感恩一覺瞓天光呀   我覺得瞓得好真係好重要   所以真係好羨慕啲人一上床就可以瞓着呢 ~

早餐食吞拿魚治   想食啲酸嘢 ~



菇場唔忙   可以 Hea 過 ~

用多個幾月   就要同佢 Say Goodbye 了



Lunch Time 出去食水餃米   之後行陣   依家都想食完嘢就行下   天氣好嘛   熱就唔會咁樣 lu ~



仍然 Hea 過   又 Load 下相   所以好快放工 ~

今晚去尖沙咀拎藥   去到九龍灣都差唔多 7 點   所以叫里奧大人睇下想食咩   叫佢搵定位 ~

佢話食海南雞飯   我話平時我煮就話唔食飯   今晚又食飯   完全唔明屋企飯同出街食嘅飯有咩分別 ?!   之後話知我想食飯喎   我話係呀係呀 ?!   是但啦 ~

坐低嘅時候就好餓   所以叫半隻雞嘅 2 人餐   食到一半真係好飽   但點都要食   因為我話要食半隻雞嘛   嗚嗚 ~

好眼瞓   但今晚要去聽嘢   感恩去到又好精神喎 ~

今晚組長同 2 個組員唔番嚟   得我同另一個組員   佢一見到我就話今晚我哋相依為命   哈哈 ~

9 點半左右完畢   同里奧大人都即番屋企 lu ~

沖埋涼就睇陣電視   11 點左右都瞓喇 ~