燒汁金菇豚肉卷 + 泡菜炒年糕 ( 7-APR-2020 )

( 7-APR-2020  TUE )

今朝又係凍凍地   但天色灰灰暗暗   差唔多成個星期都係咁 ~

早餐食吞拿魚治烘底   想食酸咪咪嘅嘢 ~

菇場唔太忙   但呢排個人真係好攰咁呢   但就唔係無精神咁喎 ~

里奧大人今日放假   但依家疫情關係   我都唔會請假同佢出去玩   雖然我都好想出街   但如非必要嘅   真係多留家中好啲 ~

今日 Lunch Time 出去行下   順便打簿   再買埋鯪魚球米粉番菇場食   番到去都已經 1 點 05 分   要快啲食了 ~

仍然唔太忙   4 點可以準時走   之後同里奧大人一齊去拎淘寶就番屋企喇 ~

里奧大人話今晚 8 點開會   咁我話 5 點半就開始煮飯啦 ~

6 點半開餐   食完就可以抖下 ~

是日晚餐 - 燒汁金菇豚肉卷 + 泡菜炒年糕

燒汁金菇豚肉卷 - 我好鍾意食呢個餸   但里奧大人唔多鍾意食金菇   不過唔理佢喇   咩都要食啲家嘛   金菇都有益   但就唔可以食咁多呢 ~   

泡菜炒年糕 - 好想食年糕   所以整呢個餸   懶人餸首選   哈哈 ~

7 點幾食完   叫里奧大人快啲沖涼   唔駛開完會之後先沖 ~

搞掂哂都到我沖涼   今晚好攰   唔想熨衫   只想抖下 ~

里奧大人話 8 點幾都未齊人   唔通唔駛開會 ?!?!   之後佢問我今日係咪星期三 ?!   我話今日星期二呀   原來佢搞錯咗   係聽晚先開會囉   依家真係放假放到亂哂龍   哈哈 ~

諗住整蕃薯糖水   點知 4 隻蕃薯都有黑點   唔敢食呀   咁留番個薑汁糖水聽晚再整啦 ~

繼續睇 "無心汰師 3"   但睇到 10 點 15 分都開始眼瞓   所以即刻去瞓喇 ~

煎三文魚柳 + 榨菜絲蒸金菇茄子 ( 6-APR-2020 )

( 6-APR-2020  MON )

感恩尋晚瞓得都算好   因為呢排睡眠質素比較差   唉 ~

個天又想落雨咁   真係無咩 Mood ~

早餐食奶醬多   無咩胃口咁呀 ~

菇場忙下停下   好快又到 Lunch Time ~

今日食 Flakes + 朱古力奶   因為懶得落街 ~

同家姐傾偈   佢話好悶   我話咁咪執下嘢囉   佢話執咩嘢呀 ?!  開緊工喎   話悶只係無得同同事傾偈咋   哈哈哈哈哈哈   笑死我呀   我完全唔記得 WFH 係喺屋企做嘢   唔係放假   哈哈哈哈   我已經唔係第一次咁   有時里奧大人 WFH   我都會叫佢幫我做呢樣嗰樣   完全唔記得佢番緊工添 ~

2 點半先嚟忙   好在 3 點半搞掂   可以抖下 ~

4 點放工即走   番到屋企   里奧大人問我幾點食晚餐 ?!   佢話全日只食咗 4 塊方包喎   咁我問番佢想幾點 ?!   佢話 5 點幾都得   我話其實我想抖下囉   同埋 5 點幾真係太早   第時回復正常時間放工   起碼要 7 點先開飯   咁 5 點幾會好餓囉   之後我拎豬肉乾比佢食   等佢有啲嘢落肚 ~

之後叫佢放番個盒入雪櫃   佢話無位放 ?!   我話因為我放得好入呢 ~

咁上次佢叫我切完木瓜就放入雪櫃仲好啦   我話無位   佢話估唔到無位   仲話依家我買定多啲嘢都唔會話我喎   梗係啦   我樣樣都有存貨   唔係你話食就有得食喇喎 ~

5 點 45 分開始煮嘢   蒸茄子同滾熱啲湯   之後煎魚再淥麵   原來都要唔少時間   所以 6 點半先食得   哈哈 ~

是日晚餐 - 煎三文魚柳 + 榨菜絲蒸金菇茄子

煎三文魚柳 - 家姐比我架   所以我好比心機慢慢煎   我覺得煎到金金黃黃好靚呀   無咩幾何 ~

榨菜絲蒸金菇茄子 - 本身想整香辣焗茄子   但見仲有金菇   所以一次過蒸就算   估唔到就咁加榨菜絲都好味道   其實我好想快啲食哂啲榨菜絲呀 ~

洗埋碗就開機洗衫   之後沖涼休息 ~

同里奧大人一齊睇 "無心法師 3"   又食薯片飲啤酒   我覺得象啤真係味道淡啲   但好啱我飲   不過其實我都只係飲兩三啖啫 ~

今晚差唔多 11 點半先瞓   算夜㗎喇 ~

Sambal Terasi 醬雞翼 + Hand Made 麵包配蘋果 Jam + 老黃瓜赤小豆西施骨湯 ( 5-APR-2020 )

我搽咗牛油   咁樣易煎啲   哈哈

蘋果 Jam 好香肉桂味   正呀

( 5-APR-2020  SUN )

今朝里奧大人晏啲番工   但佢話想早啲出去食早餐   因為無咁多人 ~
   
我尋晚瞓得勁差呀   但今朝 9 點半就自然醒   咁起身沖涼喇 ~

去完買煲湯料再去超市買嘢   之後再買麵包番屋企食   原來已經 10 點 45 分   怪不得開始有 d 餓啦 ~

食完就抖下   之後再整 400 次咖啡   用手打係失敗咗   所以倒咗唔要喇 ~

差唔多 1 點幾就開始預備煲湯   咁一陣就可以抖下 ~

我同里奧大人講話今日都唔出去食下午茶   我喺屋企整嘢比佢食   問佢想食芝蛋定煙肉蛋 ?!   佢話邊樣方便整邊樣   佢次次都咁答   好驚我辛苦   但我識煮嘅嘢   其實有幾難吖   哈哈 ~

芝蛋肉鬆蒜蓉包

唔忿氣   用打蛋器打   又係打唔起   但今次唔浪費喇   點都要飲埋去 ~

Dalgona Coffee

特登買 1 盒鮮奶   我又無加冰   所以飲完好滯   哈哈

里奧大人知我特登整   所以佢話好飲   但之後話好滯   我其實都覺滯呀   又芝士又蛋又鮮奶   哈哈 ~

我 send 張相比朋友睇   佢話打得唔夠耐呀   咁又係喎   自己衰心急   唉 ~

里奧大人沖埋涼就瞓晏覺   我就睇無心   差唔多 6 點幾就預備煮晚餐喇 ~

是日晚餐 - Sambal Terasi 醬雞翼 + Hand Made 麵包配蘋果 Jam + 老黃瓜赤小豆西施骨湯

Sambal Terasi 醬雞翼 - 個醬辣辣地味道唔錯   但可惜今次個皮煎得唔夠脆 ~

Hand Made 麵包配蘋果 Jam - 里奧大人同事頂爺整比我食架   口感 OK 呀   如果自己整到麵包都唔錯   屋企有粉   真係得閒整下先 ~

老黃瓜赤小豆西施骨湯 - 係時侯要飲番啲祛濕湯水   今次買咗 $55 西施骨煲湯   唔知點解呢排想飲肉湯 ~

今晚要大清潔廚房喇   其實之前開鑊炒餸都懶得大清潔廚房   所以硬係覺得唔乾淨   成日心掛掛   下次都係做埋去好過 ~

沖埋涼就開機洗衫   之後睇 "無心法師 3"   因為里奧大人話陪我睇 ~

我 11 點唔夠都瞓先喇   難得有睡意   呵呵 ~     

橋鍋居 @ 紅磡 ( 4-APR-2020 )

豚肉雜菜湯鍋定食 ($45) - 天氣凍   我想飲湯   所以又食呢個定食   哈哈

雞扒夜貓大碗飯 (木魚絮 + 紫菜絲 + 牛油拌) ($45) - 里奧大人次次都會比埋佢兩片黃蘿蔔比我食   嘻嘻

( 4-APR-2020  SAT )

今朝里奧大人 8 點半已起身沖涼   我仲以為已經 10 點   不過我話我要瞓多陣呀   咁佢就靈修呢 ~

瞓到 9 點半都醒 lu   沖埋涼就去食早餐 ~

炸魚柳包好大個   好似拎住個巨無霸咁

食完番屋企抖陣   之後再煲石斛水比里奧大人帶番公司慢慢飲 ~

上網睇份量   多數只係用 10g   呢度 3x 粒就啱啱好 10g

里奧大人 12 點幾出門口   咁我都出去買嘢喇 ~

又買咗 2 大袋急凍食物   呢排多時間煮嘢   咁買定就唔駛成日去街市買餸呢 ~

番到屋企抖陣   再熨埋 2 機衫就休息了 ~

4 點幾開始好餓   所以食啲零食同香蕉   但其實都唔係飽   但唔食咁多嘢喇   一陣食唔落晚飯就慘~

家姐喺日本買比我嘅零食   係時候要食喇   好似 6 月到期   細細個成日食呢個零食㗎   不過越買越貴   唔係咁捨得食   但唔知家姐買幾錢呢 ?!

6 點幾出發去里奧大人公司幫手   8 點幾搞掂走人 ~

今晚去飯堂食飯   因為老闆好好人   所以點都要幫襯 ~

食完就番屋企   沖埋涼就睇無心 2 ~

里奧大人同事頂爺比我食㗎   Hand Made 麵包 + 蘋果果醬   但要聽晚先食呢   因為今晚好飽   哈哈



麻糬朱古力曲奇 ($15) - 唔想買嘅時候就成日喺妳眼前出現   到想買嘅時候就行咗 6 間 7-11 都無   咁今晚等車期間   見有時間就入 7-11 睇下   估唔到有 3 盒   咁我即買喇   可以比盒家姐食呢

家姐鍾意食   所以買比佢   咁啱仲要係特價   感恩感恩

炸雞皮 ($12) - 好似幾好味咁   所以買兩款味道試下

今晚睇到差唔多 12 點先瞓   太夜了 ~

上海小南國 @ 九龍灣 ( 3-APR-2020 )

紅燒獅子頭 ($128) - 雖然好味   但我覺得好貴呀   只不過係炸咗嘅大粒豬肉丸咋噃

南國招牌炒飯 ($108) - 呢個好味呀   里奧大人話有好香嘅鹹蛋味   怪不得咁滯啦

生煎包 ($52) - 呢個就好一般

前菜 ($18) - 好在係菜脯   如果係榨菜就慘喇

( 3-APR-2020  FRI )

今朝里奧大人好早起身   我鬧鐘未響   佢已經出門口 ~

上車打比佢   以為佢公司有急事要做   因為明明今日佢番晏啲家嘛   佢話早咗起身   不如早啲去食早餐之後靈修   咁都好   晚晚做公司嘢   係時候要比自己靈修一下呢 ~

我諗住早餐食芝蛋治   不過去到茶記又唔想食   最後都係食番奶醬多 ~

菇場忙咗陣就抖下   點知一抖就又嘢做 ~

呢排唔見得 Berry   所以超勁掛住佢呀   希望佢仲記得我啦   哈哈

Lunch Time 要出去解凍   順便買鯪魚球米粉番菇場食   我覺得食鯪魚球好似啲阿婆咁   但我真係好鍾意食㗎   我都係鍾意食白肉多啲 ~

今日 4 點放工   里奧大人話要去 Ikea 買花樽   所以我都一齊去喇 ~

我去到 Megabox 就第一時間行 AEON 超市   其實個場好細   同埋好多都無貨   但價錢係平過百佳   如果佢喺德福開就都好啦   方便啲嘛 ~

好想買日本年糕   但搵極都唔見   咁問職員   佢話好耐無番貨了   咁最後都買咗 Yeast 同紅豆蓉同大菜絲就走人   呢排多喺屋企   可以整下甜品 ~

去埋 Ikea 買有機醃青瓜同辣根醬就走喇   之後同里奧大人去睇花樽   我就睇廚房用品   差唔多 6 點就搞掂哂 ~

唔記得傾開啲咩嘢   里奧大人就同我講   話頂爺真係好撐我   我之前比咗個食療比佢   佢同里奧大人講話個份量食咗 3 日   里奧大人就話妳知道呢   我老婆次次煮一餐嘢   都係 3 日嘅份量   頂爺即話睇你身型 Keep 到吖   之後衰奧話所以我老婆個身型咪咁囉   成日要包底   之後頂爺話咁個老婆咪好囉   唔浪費食物   講完之後佢哋都大笑呀   里奧大人話撐我撐到咁   無得再駁   哈哈哈哈 ~

諗住去 CPK 食 Pizza   但見到小南國又想食上海嘢   哈哈 ~

本身 Megabox 個場都靜   加上疲情就靜上加靜   全場得 3 枱客   包括我哋   所以食店喺呢個時間真係好難做 ~

我問里奧大人今餐你請定我請 ?!?!   佢好快答妳請   咁我即拎銀包出來比錢   佢話估唔到我咁快話好   咁頭先 Ikea 都係我自己比錢啦   因為我覺得買啲無謂嘢   用自己錢比較舒服啲   同埋佢依家成日出去食 Lunch   又唔係間間餐廳有八達通   好驚佢無錢食嘢呀   哈哈 ~

食完都要即番屋企喇   里奧大人 8 點要開 Conf Call ~

我叫佢番屋企先   我就去買薄荷雪糕   不過無得買   反而買咗 4 盒 Haagen Daz 雪糕   因為只係 $115/2 盒咋   勁抵   所以即買比里奧大人食喇 ~

喺 Ikea 買嘅乾花   只係 $9.9   估唔到拆出來都好香   以前都買過呢啲乾花   但係無香味囉

番到屋企就開機洗衫   沖埋涼就休息 ~

瞓得好林呀   勁想拍下佢   哈哈哈哈

睇多陣 Youtube   今晚 11 點幾都瞓 lu ~

享弄台點咖啡館 @ 官塘 ( 2-APR-2020 )

黑蒜蔥油拌麵配麻油雞翅配薯條 ($38)

椒麻醬油拌麵配孜然捧捧肉配粟米 ($39)

( 2-APR-2020  THU )

今朝覺得凍咗好多呀   好似得 20 度咋 ~

早餐食麥芝蛋包   呢期鍾意食呢個包   以前唔鍾意呢啲濕濕立立咁嘅包㗎 ~

菇場忙下停下   好快 Lunch Time ~

里奧大人 Send 呢張相比我   再問隻勺喺邊度買 ?!   我話你唔係用呢隻勺當匙更咁用呀嘛 ?!   佢話用來 "北" 餃子上碗好方便喎   仲讚不絕口   但我話呢個係用來壓蕃茄蓉㗎架噃

呢個牌子嘅餃子都唔錯

一出街就覺得簡直係冬天咁   所以我要買魚片頭米粉番菇場食   菇場又凍   一定要食熱嘢 ~

仍然忙下停下   放工都即走 lu ~

今晚唔想煮呀   所以我話出去食喇 ~

6 點唔夠就出去食   之後拎埋淘寶就番屋企 ~

番到屋企抖陣就沖涼   今晚好攰   聽晚先熨衫 ~

8 點幾開始睇 "無心法師"   睇到 11 點半   終於睇哂   喊死我了 ~

冷靜咗一陣先敢瞓   因為唔想聽朝眼腫腫番工呀 ~

蒜片炒台灣黑椒腸 + 蒜芹炒豬腸粉 + 蕃茄薯仔紅衫魚湯 ( 1-APR-2020 )

( 1-APR-2020  WED )

話咁快就到 4 月   希望痠情快快退去啦 ~

早餐食吞拿魚治烘底   好想食啲酸嘢 ~

菇場忙呀   眨下眼又 Lunch Time ~

原本 4 月係最開心嘅   因為好多紅假嘛   但可惜依家疫情嚴峻   咁唯有乖乖在家中休息啦

今日好開心   因為 Lunch 終於食埋最後 1 包黑芝麻五谷粉   再加多個吞拿魚包 ~

去會計部整嘢   發現個冷氣係校到 20 度   唔怪得菇場成日咁鬼凍啦 ~

4 點即走   買埋蕃茄薯仔同方包就番屋企 lu ~

番到屋企都接近 5 點   係時間預備晚餐喇 ~

里奧大人 6 點半番到屋企   我先啱啱搞掂咋 ~

是日晚餐 - 蒜片炒台灣黑椒腸 + 蒜芹炒豬腸粉 + 蕃茄薯仔紅衫魚湯

蒜片炒台灣黑椒腸 - 上次睇 Youtube 見到咁樣煮都好方便   淥完再煎好快熟   一路煎一路聞到好香嘅味道   感覺好似喺台灣咁   哈哈 ~

蒜芹炒豬腸粉 - 蒜芹仲貴過豬腸粉   不過我都好鍾意食蒜芹   就咁炒米粉都好好味㗎 ~

蕃茄薯仔紅衫魚湯 - 3 個蕃茄 + 1 個薯仔 + 5 條細紅衫魚   煲起得番 2 碗   所以夠哂濃郁   好味道呀 ~

洗埋碗就即沖涼   開機洗衫之後就休息   里奧大人負責熨衫   呢排腰骨痛   唔想企咁耐呀 ~

又睇無心   唔駛睇廣告真係睇得快好多   哈哈 ~

今晚仍然 11 點幾瞓   不過都係想早啲   呢排天氣潮潮濕濕   瞓極唔夠咁 ~