蜜汁金沙骨 + 紅油拌皮蛋 + 自家制麵包 ( 7-JAN-2021 )

今晚凍凍哋   所以煮雜豆蘭州拉麵

( 7-JAN-2021  THU )

里奧大人今日  WFH   所以陪我食早餐 ~

無五香肉丁嘅   蝕咗三蚊雞呀   嗚嗚

我同里奧大人講話好在無發夢唔知醒   佢話番工有壓力 ?!   我話無喎   不過事實係好驚無開鬧鐘就真嘅   特別係里奧大人放假嘅時候   因為佢係瞓到自然醒   咁我真係會遲大到呢 ~

食完抖陣就番工   唔錯唔錯 ~

菇場唔太忙   但有嘢都唔想做   哈哈 ~

今日有啲攰   快啲有陽光啦   濕氣咁無重嘛 ~

熟睡中嘅 Berry

Lunch Time 行 15 分鐘   之後買炒麵燒賣番菇場食 ~

忙咗一陣又 Hea 下   有啲想瞓覺添 ~

放工即走   番到屋企即沖涼洗頭   之後即預備晚餐   今晚諗住開焗爐會好快搞掂   但都要成個鐘先可以開餐   哈哈 ~

是日晚餐 - 蜜汁金沙骨 + 紅油拌皮蛋 + 自家制麵包

蜜汁金沙骨 - 里奧大人話好味道   真係好難得佢咁講   我依家轉去另一間買凍肉   我哋覺得煮出來無咁 "鞋" 呀 ~   

紅油拌皮蛋 - 好想食重口味小食   咁啱屋企有一隻皮蛋   咁就食埋去喇 ~

自家制麵包 - 今次係朱古力果仁麵包   做飯後甜品就啱喇 ~

洗埋碗就食生果   之後都係沖多次身   感覺乾淨啲 ~

8 點幾開始睇 "夫妻的世界"   估唔到呢套幾好睇   所以睇到差唔多 12 點先瞓呀 ~

鹹魚煎肉餅 + 蜜椒薯仔牛柳粒 (外賣) ( 6-JAN-2021 )

鹹魚煎肉餅 - 好香鹹魚味   哈哈

明明外賣就係唔想煮同洗嘛

蜜椒薯仔牛柳粒 - 呢個仍然好味道

白飯份量好多   呢到係盒白飯   

( 6-JAN-2021  WED )

臨起身前發惡夢   好記得係星期六   唔知點解 11 點仲未番到菇場   一開電話有廿幾個未接來電 ~

我即搭地鐵番工   因為只需要 15 分鐘   但好奇怪去到出口又唔知邊方向到菇場   但眼見菇場就係前面 (呢個情境已經夢過幾次)   問職員邊個出口   佢叫我落樓下問   有人會答我   我即落樓下   但個職員串串共話唔識   激死我   之後即飛出去搭的士   個司機係傻嘅   係咁剎車又衝上前   話搵緊路喎   最後仲要過哂我去嘅地方   我嬲到即刻落車唔比錢   再即上另一架的士   之後鬧鐘就啱啱響   起身嘅時候個人仲好激氣   哈哈哈哈 ~

今朝凍咗咁呀   依家起身都會着見晨褸   我唔想攝親呀 ~

我習慣出門口前   會用塊鏡照下後面啲頭髮有無亂   我不嬲有塊鏡喺廁所   但唔見咗   好肯定係里奧大人用完   之後我喺書枱搵到   所以即打電話鬧爆佢   我話用完啲嘢唔該哂番原位呀   唔好浪費我時間搵啦   佢仲話: 乜妳用嘅咩 ?!   呢下再要鬧爆佢   我話唔用點會知唔見呀 ?!?!?!   麻鬼煩   之後即收線   雖然佢講唔好意思   但我真係好憎好憎啲人咁無手尾 ~

今朝雙重打擊   要食番啲甜嘢中和番   所以食奶醬多   哈哈 ~

菇場忙下停下   好快又到 11 點 45 分 ~

Lunch Time 落去行陣   之後買牛腩河番菇場慢慢食 ~

忙咗陣又可以 Hea 喇   呢排有啲攰 ~

放工即走   估唔到同里奧大人同車 ~

同里奧大人去睇邊爐鍋   但太大唔想買   之後我話不如叫外賣   難得一齊咁早番到屋企   哈哈 ~

一齊買完都番屋企喇   沖埋涼就可以舒舒服服咁開餐呢 ~

我見肉餅咁厚   所以咬完再睇下啲似熟唔熟   雖然係好熱   但都想睇下   點知真係唔熟   要再焗熱 ~

預熱焗爐 5 分鐘   再焗 10 分鐘   同等外賣時間一樣   最搞笑里奧大人話好激氣   我話下次唔食肉餅就得啦   之後話係諗住外賣就唔駛整嘢同洗嘢   點知依家要整完再洗   我真係估唔到佢咁講   哈哈   咁我話好簡單啫   要開鑊就煩啫 ~

食完就休息   9 點幾就要做運動   做咗 20 分鐘   真係成個身慶哂   其實之後無咁凍   都應該出去徑步   我都係鍾意行多啲 ~

今晚 10 點 50 分瞓覺   呢排好快眼瞓咁 ~

金菇豚肉卷 + 蠔油燜節瓜 ( 5-JAN-2021 )

蛋炒飯平時一定加豉油   但今晚只加鹽   唔想碟碟都係啡色   哈哈

( 5-JAN-2021  TUE )

感恩一覺瞓天光   起身好精神 ~

早餐食芝腿治烘底   因為好餓呀   咁啱家姐食芝士牛角酥   大家都係芝士 ~

我柔軟度好似佢咁就好喇   哈哈

菇場忙呀   好快就到 Lunch Time ~

我去買菜   咁見到泥薑好靚咁   又走去買   阿姐話唔夠一斤   咁我再睇有無細嚿啲啦   有個阿叔好好人   特登過嚟講話唔夠一斤要 $22 㗎   本身好似 $22/2 斤   叫我買多一大嚿啦   我話太大嚿咁喎   佢笑住話唔怕啦   可以留好耐   咁信佢啦   哈哈 ~

12 點 15 分番到菇場   慢慢食腸粉   真係食到 1 點   好抵食   哈哈 ~

基本上家姐 WFH   就會問我早午餐食咩   佢 Lunch 食燒賣   我食腸粉   今日食嘅嘢好似呀 ~

姿勢好搞笑

終於做哂長命 Report   等對眼抖下再做 Email Filing ~

放工即走   番到屋企即沖涼   之後即預備晚餐喇 ~

里奧大人 7 點幾番到屋企   等佢沖埋涼就可以開餐 ~

是日晚餐 - 金菇豚肉卷 + 蠔油燜節瓜

金菇豚肉卷 - 里奧大人話今次啲金菇唔難咬   以前成日咬唔開   我話因為我蒸熟金菇先囉   特登要做多個步驟   今次個汁鹹咗啲   下次落少少就算喇 ~

蠔油燜節瓜 - 節瓜加少少瑤柱   賣相無咁 Dry   估唔到蒜頭燜到軟爛呀   勁好味 ~

洗埋碗就開機洗衫   之後沖涼 lu ~

里奧大人尋日用百潔布擦哂玫瑰鍋啲漬   依家變番九成新咁款呀   同埋最開心係無咁黐鑊   但之前喺家姐屋企拎咗隻新嘅大玫瑰鍋   依家唔知點算好喇 ~

掛住睇電視   完全唔記得做運動   差唔多 10 點半先做呀   我大大力 Fing 手 Fing 腳   做到有啲熱   所以只係做咗 10 分鐘   我唔想熱住瞓覺 ~

今晚 11 點唔夠都瞓   呢排又每月一到   所以要瞓多啲補血呀 ~

豆腐火腩煲 + 菠蘿生炒骨 (外賣) ( 4-JAN-2021 )

豆腐火腩煲 - 好好味呀   同埋份量好多

菠蘿生炒骨 - 好有鑊氣   又係好味道

( 4-JAN-2021  MON )

今朝里奧大人話想瞓晏啲   所以唔同我食早餐   我話瞓啦   我都無諗過要一齊食早餐   WFH 就話啫   因為 9 點要開工嘛 ~

起身有啲頭痛   又占寒占凍   但沖完勁熱水涼都覺好凍   要用風筒吹埋頸同膝頭哥   咁樣先好少少   但都有啲凍凍地感覺囉   大佬   唔好發燒呀 ~

早餐食奶醬多   飲完杯咖啡又好啲 ~

2021 年 1 月喇

我真係會 Mark 低好多嘢㗎   唔係為買而買呢   我比里奧大人睇舊年嘅月曆   佢都呆咗   哈哈

菇場忙呀   但個人真係凍到震   即用暖手器同飲 Hot Lemon   依家有咩依郁都打定底先 ~

今日開始回復正常時間上下班   我又要適應番 5 點半放工喇   哈哈 ~ 

Lunch Time 出去行陣   又舒服好多   可能菇場太凍喇 ~

又要做長命 Report   一手揸 Mouse 一手拎暖手器   最衰無帶絲巾   條頸又凍喎   所以係咁將暖手器搓條頸   勁舒服 ~

放工即走   條街好大風   所以覺得更加凍到入心   感恩好快有車   不過坐車都仲係覺得凍 ~

買埋外賣就番屋企   第一時間探熱   感恩係無發燒 ~

沖埋涼就食飯   我同里奧大人講話好在有胃口食嘢   佢笑住話食嘢有無味 ?!   我話得苦味咋   因為唔舒服仲要去外賣   佢都忍唔住笑   哈哈 ~

食完就真係抖 lu   今晚唔做運動喇 ~

睇多陣電視   9 點半已經想瞓   但好驚瞓到半夜就醒   所以等到 10 點 20 分都瞓覺呢 ~

香蒜火腿螺絲粉 + 蕃薯糖水 ( 3-JAN-2021 )

( 3-JAN-2021  SUN )

今朝 9 點半起身   梳洗之後就食最鍾意嘅麵包   哈哈哈哈 ~

食完就做家務   拖埋地再大清潔廚房   咁就已經 12 點 15 分 lu ~

抖陣就網上崇拜   之前都覺得自己過份   無實體崇拜直頭唔崇拜   所以今年真係要參與喇 ~

崇拜完就煲雪梨茶   里奧大人 2 點半放工   咁我都預備午餐喇   呢兩無出街   其實幾舒服   感覺全身都無塵咁   哈哈 ~ 

一開蓋見到咁   啲蛋白爆到好似蜘蛛網

整呢個下午茶真係好方便   腸仔放入焗爐   通粉係有調味包嘅快熟通心粉

食完就睇下電視   睇到 4 點幾已經想瞓   但又瞓唔到   全程中中下咁囉 ~

終於 5 點瞓到 5 點半呀   起身勁精神 ~

今晚 7 點開餐   因為想早啲食糖水 ~

是日晚餐 - 香蒜火腿螺絲粉

香蒜火腿螺絲粉 - 差啲唔記得冰格有火腿添   所以即刻開嚟食喇 ~

洗埋碗就煮蕃薯糖水   之後就沖涼喇 ~

8 點食蕃薯糖水   里奧大人好鍾意食呀   佢強調要多糖水   因為我以前係蕃薯勁多但糖水勁少   佢話好似只係食蕃薯咁呢 ~

睇下電視   話咁快又 11 點幾瞓   我都要瞓喇   里奧大人話晏啲先瞓 ~ 

蒜蓉粉絲旺菜 + 雞絲蘭州拉麵 ( 2-JAN-2021 )

( 2-JAN-2021  SAT )

今朝里奧大人起身番工   我叫佢早啲番屋企   之後都瞓番 lu ~

瞓到 9 點幾起身整早餐   熱香餅過期兩日但無臭   不過就好鬼乾呀   食第一啖差啲哽死 @@

其實我希望新一年唔駛食過期嘢㗎   哈哈哈哈 ~

食埋早餐就開機洗衫   之後大清潔屋企   搞掂哂就熨衫   再大清潔廁所   沖埋涼就休息   因為好凍   聽日先再大清潔廚房 ~

又終於的起心肝整理文件   寫清哂所有應該要做嘅嘢   安樂哂 ~

里奧大人 1 點半放工   2 點半可以開餐 ~

我又食芝士牛油包   里奧大人就食迷你福建炒飯   佢同事整咗玉子燒   仲熱辣辣㗎   所以即刻食埋去喇   

同家姐 Whatsapp   之後問可唔可以打比我 ?!   以為有咩緊要事   原來話佢呢排好多靜電   尋晚摸 Berry 個鼻    電到佢走開咗   頭先 Berry 又吠   家姐摸下 Berry 個身   電到 Berry 大聲怪叫呀   話人哋唔知以為佢打到 Berry 大聲怪叫   所以依家一伸隻手摸 Berry   佢就即刻走開呀   哈哈 ~

Berry 都要好好保暖   哈哈   雖然喺家姐屋企未必話係最好   但起碼有個家   希望呢個世界唔好再有浪浪啦

里奧大人 4 點左右瞓覺   我就聽歌   一聽聽到 5 點半   好耐無聽歌   勁正呀 ~

好鬼凍呀   所以抖到 6 點幾先預備晚餐   今晚 7 點半先開餐 ~

是日懶餐 - 蒜蓉粉絲旺菜 + 雞絲蘭州拉麵

蒜蓉粉絲旺菜 - 諗住擺靚啲   但同我想像仲有啲距離   旺菜我煮熟一半   我驚蒸好耐都唔熟   粉絲就浸軟   之後再放埋一齊蒸   我覺得多功夫呀   哈哈 ~

雞絲蘭州拉麵 - 尋晚食剩啲豉油雞   今晚拆肉再用燒汁炒兩炒   咁樣無咁乾 ~

洗埋碗再大清潔廚房   之後沖涼休息 ~

今晚里奧大人 11 點都瞓   我就睇食譜   睇到 12 點幾先瞓 ~

豉油雞 (外賣) + 鮑魚生菜 ( 1-JAN-2021 )

( 1-JAN-2021  FRI )

新一年新開始   希望疫情快快退去   每個人都繼續開開心心生活 ~

今朝 7 點半鬧鐘響   實在太論盡   唔記得熄鬧鐘添 ~

瞓到 10 點半起身   梳洗之後就等食喇 ~

差唔多 11 點先食早餐   我食咗幾啖   之後同里奧大人講話啲五香肉丁好辣呀   佢好大反應話係啦   但個樣好慘咁    好搞笑 ~

食完就抖陣   沖埋涼就去 Megabox   因為想買行山鞋 ~

去到 Megaxbox   里奧大人話去買衫先   好奇怪做咩咁心急買衫 ?!   原來係我上次買唔到   今次叫我去買番呀   其實佢唔講我都唔記得   哈哈 ~

終於買咗一件直身裙同埋一件中袖 Tee   再加一條長裙   只係 $318咋   因為我只買特價貨 ~

之後周圍行   喺 Catalog 見到件風褸 (原價$599 / 特價 $299) 都幾靚   我叫里奧大人試啦   我送比佢   之後我再拎另一件外套  (原價 $659 / 特價$399) 比佢試   佢兩件都鍾意   今次佢發啦   哈哈 ~

差唔多 2 點半就去太興食下午茶   我同里奧大人話份量好細   但今次量好多呀   今日早午餐都好有驚喜   哈哈 ~

柑桔蜜 - 超細杯   但勝在夠濃味   可以沖 10 次   我真係沖到佢變水咁架   因為我好口渴   哈哈

滿燻鵝絲雪菜絲燜米粉 ($53) - 得個色   無咩味   但材料都算多

鹹魚雞粒炒飯 ($56) - 有鹹魚粒   但有細骨   所以叫里奧大人小心啲食

食完再去埋 Aeon 超市買嘢就走人喇  里奧大人就番屋企先   我就買埋豉油雞先番屋企喇 ~

家姐知我好掛住 Berry   所以成日都會影相比我睇   

我以前好似佢咁   成日要縮埋一嚿咁瞓覺   所以一起身就腰酸骨痛   哈哈

呢排天氣乾燥到不得了   洗衫就好好   即洗哂啲新衫   搞掂哂就沖涼 ~

今晚好簡單   可以 7 點開餐 ~

是日懶餐 - 豉油雞 (外賣) + 鮑魚生菜

豉油雞 (外賣) - 買咗半隻半雞   食咗好少咋   留番聽晚再食 ~

鮑魚生菜 - 兩棵細嘅生菜 + 細嘅罐頭鮑魚   份量啱啱好 ~

洗埋碗再開機洗衫   搞掂就再去沖身   感到乾淨啲 ~

里奧大人話想食雪糕   我話整比佢食   佢話雪糕都要整 ?!?!   哈哈哈哈   我其實想講話拎比佢食   不過最後又話唔食 ~

新一年要的起心肝做下運動   今晚做咗 20 分鐘運動   其實只係手手腳腳郁下   扭下腰咁   哈哈 ~

聽日放假   所以今晚睇電視睇到 11 點半先瞓 ~